طيوف الماضي

البارت(58) طيوف الماضي الكاتب#احمد

#طيوف_الماضي
بقلم #احمد
البارت_58
.
.
عمران: راح ترفع الحوش والحديقة متر فيبقى بين الحوش والبيت متر عالمتر هذا تخفيه بدرج يمتد من الجهة اليمين للجهة اليسار ويصير واجهة للبيت
.
.
مصطفى: منين تجيب هالافكار
عمران: كضيت ايام هواي بالعمالة خلتني اجمع هواي افكار
مصطفى: والله هاي خوش فكرة جنت محتار بيه
.
.
عمران: لا تحتار ولا شي
مصطفى: تمام
.
.
بقينا متواصلين ويا علي اني وجنى بس ما حجينالو عن اي شي بعد ما كملنا الاساس باسبوع تقريبا اتصلت على صاحب الشفر وكلتلو يجي يدفنو
.
.
ولان جانت الكاع محفورة ما احتاجينا تراب بس اجى صاحب الشفر ونقل التراب من مكانو للاساس لحد ما دفنو كامل واخذ فلوسو وتوكل
.
.
بعدها بيوم جنت كاعد العصر بالمضيف ودا اكلب بالفيس وشفت منشور ان نازلة النتائج ودخلت فورا للرابط وطلعت النتيجة مالت جنى وجانت دراجتها كلهن 90 وفوك
.
.
بوقتها فرحت فرحة مو طبيعية واندارت على شاهين كلتلو شاهين من باجر تجيب راوتر للبيت كال شذكرك كلتلو احسن واقوى ورجعت للبيت جانت جنى بالمطبخ سلمت على امي وكعدت يمها وصحت جنى واجت
.
.
جنى: هلا مصطفى
مصطفى: بعصبية .. شنو جنتي تسوين كل هالسنة هاي
جنى: باستغراب .. شنو
.
.
مصطفى: كل هالدراسة وهالتعب وتالي تجيبين هيج درجات
جنى: بعبرة .. شبيهم درجاتي
مصطفى: شبيهم يعني مصخمة الدنيا باجوبتج
.
.
جنى: شو شوفني
مصطفى: ششوفج اذا اعلى درجة 37
.
.
جنى: من كال هيج احس انضربت راشدي على وجهي بقيت متحجرة بمكاني وماعرف شسوي وخنكتني العبرة ونزلن دموعي بعد كل هالتعب اطلع راسبة
.
.
حطيت ايديني على عيوني وانفجرت بالبجي وحسيت شخص حضني ودا يحجي وياي بس ماعرف شدا يحجي لان مو مركز بالي يصير وياي من القهر
.
.
رفع راسي بايدو وجان مصطفى حاضني ومبتسم كال دا اشاقيج كليبي اقل درجة عندج بالكيمياء 90 ومن كال هيج تخبلت عليه صرت اضربو على صدرو وابجي
.
.
يعني فوك توتري يلعب هيج باعصابي مسك ايديني ويضحك واني مشتعل كلبي من القهر وكوة هديت بعدها فلتت نفسي منو وصعدت فوك ورحت على وحدة من الغرف وسكرت الباب اجى وراي يريدني افتح الباب كلتلو وربي ما افتح
.
.
مصطفى: لج بابا دا اشاقيج هاي هي بعد ما اعيدها
جنى: روح على امك ما افتح
مصطفى: هههههههه شسوي عند امي
.
.
جنى: ما افتح لو تخرب الدنيا
مصطفى: لعد راح ابقى كاعد هنا
جنى: روح ما اريد اشوفك
.
.
مصطفى: شرايج نروح اشتريلج هدية
جنى: ما اريد
مصطفى: زين نخابر اهلج نفرحهم
جنى: ما اريد
.
.
مصطفى: زين شلون اراضيج
جنى: عوفني وروح ما اريد شي
مصطفى: تمام اني رايح
.
.
جنى: سمعت صوت خطواتو كلت خلي اروح اجيبلي ملابس للنوم وارجع وما اطلع للصبح علمود يتعلم يلعب باعصابي مرة ثانية بسيطة الك يا مصطفى اني الك
.
.
فتحت الباب على كيفي ومديت راسي ماكو احد تركت الباب مفتوح علمود اذا شافني ارجع بسرعة قبل ما يمسكني ورحت للغرفة اخذتلي ملابس ورجعت بسرعة
.
.
دخلت للغرفة وقفلت الباب همزين ما شافني جنت اريد ابدل ملابسي وسمعت صوت كال بدلي بالحمام وصرخت كل قوتي من الخوف انداريت وراي شفتو واكف بالزاوية ومبتسم
.
.
كلتلو شلون جيت كال مثل ما يجون الناس جيت ادفعو اريد اطلعو سحب اديني ومسكهن ثنينهن بايد وحدة وشالني على كتفو واخذني للغرفة واني ارافس اريدو ينزلني وهو ما مهتم
.
.
مصطفى: شفتها قافلة وعفتها ونزلت وكلت خلي اشوفها اذا فتحت الباب اروحلها واذا ما فتحتو اعوفها لحد ما تهدأ قابل راح تبقى هيج زعلانة مصيرها ترضى
.
.
رجعت وكفت بصفحة وشفتها فتحت الباب وراحت للغرفة مالتنا عرفتها تجيب شي وترجع لان ما تكدر تبقى بغرفتنا دخلت للغرفة بدون ما تشوفني ووكفت بزاوية
.
.
وهي اجت تركض عبالها محد موجود ومنظرها وفزتها من حجيت وياها يخرب ضحك كوة بقيت كاتم ضحكتي وبعدها شلتها واخذتها لغرفتنا وهي ترافس
.
.
دخلت للغرفة وقفلت الباب واخذت المفتاح حطيتو بجيبي ونزلتها عالسرير وكعدت على رجلينها ومسكت ايديها كلتلها يلا كليلي هسا شلون تطلعين
.
.
بقت تحرك بنفسها وتسحب ايديها بس مثل العصفور مابيها حتى طاقة ومعصبة لان ماتكدر تفلت دنكت عند اذانها وهمستلها
.
.
على كيفج على كلبي ترا ما يتحمل عصبيتج الحلوة وصار وجها احمر من الخجل والعصبية وما تحملت واخذت بوسة منها وانتهت الزعلة بطريقة ثانية ههههههههه
.
.
جنى: صدك تحجي
مصطفى: شنو
جنى: كل هالزعل وراحت هيبتو هيج
.
.
مصطفى: ههههههههه شسويلج اذا انتي تحبيني
جنى: بس انت ما تحبني
مصطفى: منو يكول
.
.
جنى: لو تحبني ما تسوي بي هيج
مصطفى: نهز الورد حتى نشمو
جنى: انت مو هزيت الورد انت دمرت الورد
.
.
مصطفى: ههههه اروحلج فدوة شكد احبج
جنى: واني هم اموت بيك بس امانة لا تعيدها
مصطفى: ليش
.
.
جنى: غير لعبت باعصابي
مصطفى: اممممم نجربها بعد سنتين
جنى: اموتك اذا تعيدها
.
.
مصطفى: هههههه تمام يابة تأمرين
جنى: ما يأمر عليك ظالم
.
.
مصطفى: اخذتلي دوش اني وجنى ونزلنا وراحت تحطلنا العشى هي والبنات ومن انجمعنا وحطو العشى كلتلهم انتبهولي باجر شاهين راح يجيب راوتر وخلينا نبدا بالشروط
.
.
اولا البنات ممنوع برنامج غير اليوتيوب واذا تريدون تحجون ويا احد عالواتساب او غير برنامج موجودين اني وشاهين وكاضم ثانيا اي برنامج غير الالعاب ما ينزل
.
.
وممنوع تلعبون بالراوتر يفصل النت يضعف تكولولنا وهاي هي واذا اجى احد وطلب الرمز تنطوه فورا وشاهين من تجيب البرج تجيب راوترين واحد تنصبو هنا وواحد بالمضيف
.
.
علمود الي بالمضيف ما يأثرون عالبيت شكد ما جان العدد جبير واتفقت ويا الكل على هالشي واكيد محد يكدر يعارض ولاحظت البنات كلش فرحن بهالشي واني فرحت لفرحهن من خلصنا عشى جابتلنا الجاي جنى
.
.
كاضم: مصطفى شرايك بما انو الدنيا ليل والجو بيه برودة نروح نطلع الاساس علمود من نبلش بالبناء يكون جاهز
مصطفى: خوش فكرة
.
.
جنى: ايمتى تبلشون
مصطفى: ماعرف والله بس ما نتأخر
كاضم: من نطلع الاساس جيبو بلوك وخلي نبنيه
.
.
مصطفى: تكدرون تكملوه اليوم
كاضم: اي شيرادلو
شاهين: انطي خبر للشباب وخلي كل واحد منهم يجيب شي يحفر بيه
.
.
مصطفى: لا الشباب لا تكولولهم
شاهين: ليش
مصطفى: اذا نكللهم يكولون يشغل ولدنا علمود نسيبو
.
.
شاهين: لعد نسويه اني وياك وكاضم
مصطفى: اتفقنا روح جيبلنا الضو وتعال
.
.
طبعا معروف بكل بناء يكون التراب بالدفن اعلى من الاساس بمسافة صغيرة واذا نريد نبني الحايط لازم نطلع التراب من المكان الي ينبني بيه الحايط
.
.
وجان عندنا كلوب او لمبة حسب ما تسموه انتو مشكلين قاعدتو على واير ونكدر ناخذو ويانا وين ما نريد فشكلناه عالبيت وسحبناه ورا البيت وبلشنا نشتغل
.
.
ومن شافونا عمامي وولدهم تجمعو يمنا وراحو الولد جابو وياهم قزمات ⛏ مثل هاي والي جاب وياه كاروك واني جنت ادري بيهم راح يجون بس يجون من يمهم احسن ما اني اكللهم
.
.
وجابو كراسي لعمامي وصارت تعليلتنا بالاساس بدال المضيف وجنت اني اشتغل وياهم هم اساعدهم وهم علمود محد يكول يتكبر عليهم رغم يعرفوني هم ماعندي هيج سوالف بس الحذر واجب
.
.
من خلصنا نظفنا التراب كلش زين علمود مايصير عازل بين الحايط والاساس بالبناء ورشينا الاساس كلو بماي علمود التراب يثبت وما يتحرك من يجيه هوا
.
.
والساعة 10:30 خلصنا وكل واحد راح لبيتو دخلت للبيت وباوعت بالمراية صاير املح من التراب ههههههههه وراحت جنى حطتلي ملابس ودخلت اخذتلي دوش
.
.
ومن طلعت جنت تعبان وما نزلت بعد واجت جنى تمددت يمي واخذتها لحضني واكيد ما يخلى الموضوع من البوسات والتحرشات لحد ما نمنا
.
.
ثاني يوم شاف الرمل عمران كال نحتاج بس بلوك وسمنت والرمل حاليا ما نحتاج واتصلت على ابو المعمل وجابلي بلوك وسمنت واتفقنا بعدها بيوم ننجمع من الفجر ونبلش نبني البيت
.
.
ولد عمي الصراحة جانو يتعبون ولو شكد ما احجي عن وكفتهم وياي قليل بحقهم بس الي صار انو اني منطي كلمة لعلي ما اكمل البيت وهم ما يريدوني اكسر كلامي
.
.
وبهاي الحالة صارت جنى تكمل البيت يعني اني لحد الان ملتزم بكلمتي بس خليت دفتر عند جنى وخليتها تسجل كل يوم نشتغل بيه وكم بلوكة بنينا ومن هالشي
.
.
علمود من نخلص اكون عارف شبنينا وبعدين انطيهم حق تعبهم بدون ما انقص منهن شي بس بعد ما احجي ويا علي
.
.
بلشنا بالبناء وجانت من صدك اوقات حلوة بحيث نكضي النهار بالشغل وتحت حرارة الشمس بس مو حاسين بالحر والتعب ومكضينها سوالف وضحك
.
.
وهسا عرفت ليش النجارين من اشتغلو بالاساس ما جانو يوكفون الظهر وجنا من نحتر كلش نشغل الغطاس ونسوي تجمع ويجي شاهين يرشنا بالماي البارد يخلينا ننتعش
.
.
يعني من الاخير جنا متونسين اكثر من انو نشتغل ومن نرجع للبيت بالليل ونرتاح شوية يبدا عندنا الخمول والتعب والزلمة بينا يسهر لل 10 اني جنت بال 9:30 اسلمها تراب وانام
.
.
وبناء البيت تأخرنا شوية بيه لان عمران لحالو يبني واحنا بس نساعدو ومن خلصنا بناء الحايط توقفنا اول شي لحد ما يثبت ثاني شي الفلوس الي عند جنى قربن يخلصن والسقف اقل شي يحتاجلو 10 ملايين لهذا توقفنا
.
.
وكلت بما انو توقفنا لازم اشوف معهد لجنى علمود السادس لان اهم مرحلة ولازم تدرس زين ودورت بالعمارة ردت معهد بس للبنات ويدققون على اساسيات الطالب
.
.
ولكيت معهد حسب طلبي جان خاص بس للبنات ويبلشون ويا الطالب من الاساسيات كم محاظرة وبعدها يبلشون بالمادة وسجلت جنى وياهم
.
.
جان يوم خميس والاحد يبلشون الطلاب بالدوام بالمعهد ومن رجعنا انطيت خبر لجنى وكلتلها من الاحد تبلشين وهم راح يسلموج كتب ودفاتر وقرطاسية كاملة
.
.
وشدي حيلج علمود تضبطين المواد واشوف منا لحد ما ينفتح التقديم عالخارجي اذا تكدرين تمتحنين اسجلج واذا ما تكدرين عالسنة الجاية
.
.
وبالنسبة لاهلها هي اتصلت عليهم وكالتلهم علمود نجاحها ولحد الان علمهم بالبيت انو اساس وحتى الاساس مو كامل
.
.
مشت الايام وجنى بلشت دراسة بس خلال دوامها بالمعهد جنت الاحظ انها تتعب هواي وعبالي هالشي طبيعي لان اكيد اجواء المعهد مثل المدرسة وتحتاج تعب وجهد من الطالب بالدراسة والتحظيرات
.
.
وحتى اني ابتعدت عنها لان اشوفها تجي كلش تعبانة مكضية وقتها نوم ودراسة وما مفتهم منها كلشي وكل ما اريد احجي وياها اشوفها دا تتعب علمود مستقبلها وعلمود الشي الي اني وصيتها عليه واتراجع واكول خلي اتحمل لخاطرها
.
.
واذا من صدك احبها لازم اوكف وياها هاي الفترة واساندها ومرة من المرات جنت بالمضيف الظهر واجاني اتصال من صاحبي الضابط
.
.
الضابط: شلونك شيخنا
مصطفى: حياك الله هلا اخوي
الضابط: اخبارك امورك
.
.
مصطفى: بخير يحفظك الله انت شلونك
الضابط: بخير دامك بخير
مصطفى: الله يجعلك دوم بخير
.
.
الضابط: اكلك السيد رجع للعراق البارحة
مصطفى: شنو ووينو هسا
الضابط: حاليا موجود ببيت بالعمارة
.
.
مصطفى: اوك ممنونك حبيبي
الضابط: شراح تسوي
مصطفى: اريد اعرف ليش رجع
.
.
الضابط: خليها علي هاي
مصطفى: لا حبيبي مشكور اني اتصرف
الضابط: لعد خليني اجيبو الك بمكان وانت احجي وياه
.
.
مصطفى: وشلون تسوي هالشي
الضابط: من تجي نحجي وانتظر مني اتصال بعد شوية
مصطفى: تمام
.
.
سكرت منو وكلت شجابو هذا مو حذرتو ما يرجع الضاهر ببالو شي بس جنى حاليا بالبيت وخلي اشوف شعندو ووقتها اقرر اذا اخليها تكمل بالمعهد لو لا
.
.
واذا حسيت ببالو شي راح ابطلها من المعهد لحد ما يرجع يطلع من العراق لان مهما كان سبب رجعتو مستحيل يشفعلو عندي ويجبرني اسامحو عالي سواه من قبل
.
.
انتظرت الضابط تقريبا ربع ساعة واتصل علي كالي تجي لفلان مكان وانطاني العنوان ورحت من وصلت جانت دائرة شرطة ولكيتو هو وضابط المركز منتظريني
.
.
سلمت عليهم ودخلنا كلتلو شلون جبتوه كال اتهمناه ان احد مشتكي عليه وجبناه علمود التحقيق يعني كلشي رسمي بس دير بالك تضربو لو تأذيه ترا نروح بيها ثلاثتنا وكلتلهم تمام
.
.
ودخلت عندو وهم بقو ينتظرون خارج الغرفة علمود اي شي يصير يتدخلون قبل ما يتأذا واحد منا والسيد من شافني تفاجأ كلتلو مو متوقع تشوفني مو
.
.
السيد: بصراحة متوقع بس مو هنا
مصطفى: اي ليش رجعت
السيد: الناس تكول الحمدلله عالسلامة
.
.
مصطفى: تدري بي ما اتمنالك السلامة
السيد: هههههههههه توقعت الجواب
مصطفى: اي كلي ليش رجعت
.
.
السيد: رجعت اصفي املاكي لان ما صفيتهن
مصطفى: وشكد راح تبقى
السيد: ما مقرر بصراحة بس ما اتأخر لان زوجتي تنتظرني
.
.
مصطفى: زوجتك .. مو انت ما متزوج
السيد: لكيت بنت حلال وتزوجتها
مصطفى: يعني من تصفي املاكك بعد ما نشوفك
السيد: اي اكيد
.
.
مصطفى: شوف راح اخليك تصفي املاكك بس قسم بالله لو تقربت لاحد من اهلي لو تقربت لجنى او اهلها اجيبك لو تكون تحت سابع ارض واشوفك نجوم الليل بعز الظهر
.
.
السيد: ومتوقع مني اخاف بعد هالكلام
مصطفى: ادري بيك ما تخاف بس دير بالك
السيد: ما يحتاج ادير بالي لان مو ناوي اسوي شي
.
.
مصطفى: اي خوش لعد
السيد: وهسا استأذن
مصطفى: الشباب الي اعترضو طريقي انت دزيتهم
.
.
السيد: باستغراب .. يا شباب
مصطفى: لاتسوي نفسك ماتعرف بشي
السيد: اقسملك بالله ماعرف شي عنهم
.
.
مصطفى: تمام
السيد: شصار احجيلي
مصطفى: حجيتلو الي صار
.
.
السيد: لو اني دازهم تتوقع اجي للعراق
مصطفى: ماطول ما تدري بيهم هاي هي لعد
السيد: تمام
.
.
مصطفى: عفتو وطلعت وتشكرت من صديقي والضابط الي وياه وكالو راح نكول بالمحظر بلاغ كاذب علمود تنتهي القضية بارضها ورجعت منهم
.
.
كلت خلي اشوف هاليومين اذا سوا شي وقتها من صدك ماارحمو ومن حجيتلو عالشباب مبين انو ما يدري لان الاستغراب واضح عليه
.
.
ثاني يوم جنت كاعد بالمضيف واجاني اتصال رديت عليه وحجى وياي رجال كال زوجتك بالمستشفى
.
.
....... يتبع
حطولنا لايك وتعليق حلو مثلكم ❤
قناة اليوتيوب
https://www.youtube.com/@ahmed_19_98