طيوف الماضي

البارت(3) طيوف_الماضي الكاتب#احمد

تصويت ومتابعه لحتى توصلكم باقي البارتات والقصص ❤

#طيوف_الماضي
بقلم #احمد
البارت_3 
.
.
باوعت من الشباك فتح الباب وسحب واحد جان عند الباب وزتو بالكاع واجى عزيز عالصوت بس بسبب الظلام ما كدرت اعرف منو الي سحبو
.
.
وصار عندي فضول وماكدرت ابقى نزلت تحت وطلعت من باب المطبخ وانصدمت بالمنظر الي شفتو كدامي وابد ما جنت متوقعتو
.
.
شفت محمد جان متمدد بالكاع وهيثم كاعد على صدرو ويضربو وعزيز يحاول يبعد هيثم عن محمد جان المنظر مرعب كلش بالنسبة الي
.
.
من بجيت انتبهلي هيثم وبعد عنو وعزيز بسرعة اخذ محمد وطلعو خارج البيت وسكر الباب حضني هيثم وكال لا تخافين يا روحي ماكو شي
.
.
اني مسكتو من ملابسو وكأني اريد احتمي بيه من شي يريد يأذيني وهو شالني واخذني لفراشي وغطاني كلتلو خايفة
.
.
هيثم: من شنو خايفة
جنى: ماعرف .. استحيت اكلو لان ضربت محمد
هيثم: تخافين واني يمج
.
.
جنى: ماعرفت شنو اجاوب
هيثم: زين اذا انام ويا بنيتي اليوم هم تخاف
جنى: هزيتلو راسي بمعنى لا
هيثم: يلا لعد سويلي مجال يمج
.
.
سويتلو مجال يمي وتمدد واخذني بحظنو وبقى يمسح على راسي لحد ما غفيت اول ما نمنا طفت الكهرباء وصار الجو حار وكعدت من النوم
.
.
هيثم: خلي ننام عالسطح احسن
جنى: بنعاس .. تمام
هيثم: اخذي المخاد واني اجيب الباقي
.
.
جنى: اخذت مخدتين وهو جاب وياه فراشين وبطانية وجان عندنا حصير نفرشو تحت فراش النوم علمود لا يخربن لو يتوسخن من الصبة
.
.
فرشنا الفراش ورجع اخذني بحضنو وجان الجو بيه برودة خفيفة تخلي حتى الشبعان نوم ينعس دقايق قليلة ونمنا وجان نومة كلش حلو بسبب برودة الجو
.
.
من صار الدنيا صبح واحتر الجو شوية كعدنا وشلنا الفرش نزلناهن وغسلنا ورحنا سوينا ريوكنا ويا بعض
.
.
جان هيثم يواجه صعوبة كلش جبيرة بالاهتمام بي وبالمحلات بوقت واحد بس رغم هذا ما حسسني بهالشي جان بامس الحاجة للمساعدة من شخص جبير وبالاخص ان تكون مرة علمود تهنم بي
.
.
بس لا يكدر يترك بيت ابونا ويعيش بغير مكان ولا عمي علي يقبل يعيش ويانا وفوك هاي ما يكدر يتزوج حاليا لان هسا متوفين ابوي وامي
.
.
اني جنت ما احس بهاي المسؤولية وعبالي ان الوضع طبيعي جنا كاعدين نتريك واندك الباب بهمجية وصوت واحد خارج يصيح على هيثم وكدرت اميز صوتو عمي ناصر هذا
.
.
اكيد جاي علمود ابنو محمد طلع هيثم فتح الباب ومسكو عمي من ياخة القميص وبدا يدفع بيه وهيثم مايكدر يسوي شي لان مهما كان هذا عمي الجبير ولازم يحترمو
.
.
ناصر: انت منو انطاك صلاحية تضرب ابني
هيثم: ابنك يستاهل
ناصر: شنو سوالك لان بس اجى عليكم تضربو هيج
.
.
هيثم: بعصبية .. ابنك يريدني انطيه اختي فاهم شنو يريد لو جاي لبيت كحاب ما يكول هالكلام هذا واذا شفتو مرة ثانية الا ارجعو الك مكفن
.
.
ناصر: علمود اكفنك وياه
هيثم: انكلع منااااااا
ناصر: تطردني ولك هيثممممم
.
.
هيثم: اطردك واطرد عشرة من امثالك وما اريد اشوفك مرة ثانية هنا لا انت ولا ابنك الخايس
ناصر: انجبببببب
.
.
جنى: ضرب هيثم راشدي وقبل ما توصل ايدو لوجه هيثم مسكها هيثم وعيونو صارت تجدح من العصبية والشرايين الي براسو برزت كلش حتى عمي احسو خاف
.
.
هيثم: وياك خمس ثواني اذا ما انكلعت يصير شي ما يعجبك انكلع من بيت ابوي
ناصر: يصير خير يا هيثم اذا ما اخليك تندم
.
.
جنى: ترك ايدو وطلع عمي من البيت وهو معصب عزيز واكف كدام بيتهم شعرو منكوش ومبين انو هسا كاعد من النوم باوع لهيثم وضحك كالو على كولة السوريين فاشوش
.
.
ضحك هيثم من كل كلبو على كلمة عزيز وطلع عند الباب يحجي وياه واجى عزيز وكف يمو ولاول مرة اجاني شعور فضول وتصنتت عليهم
.
.
عزيز: شنو راح تسوي هسا
هيثم: ماعرف والله
عزيز: انت فاهم قصدي مو
.
.
هيثم: اي اكيد
عزيز: المحل والبيت باسم منو
هيثم: باسم ابوي
.
.
عزيز: طلعتلو شهادة وفاة
هيثم: اي اكيد
عزيز: حولهن باسمك وفضها
.
.
هيثم: بس جنى هم الها ثلث من الثنين
عزيز: جنى بعدها طفلة وحصتها تبقى محفوظة يمك لحد ما تكبر وتتزوج وبعدها تقررون ثنينكم
.
.
هيثم: لو جبيرة جان حولتهن باسمها
عزيز: عندي فكرة حلوة كلش
هيثم: شنو هي
.
.
عزيز: سجلهن باسمك وسوي معاملة لعمك علي تنطيه صلاحية ببيع او تأجير البيت والمحل بغيابك هذا افضل حل وبهاي الحالة عمك ناصر ما يكدر يسوي شي
.
.
هيثم: خوش فكرة والله
عزيز: يلا اترخص اني
هيثم: مرخوص حبيبي
.
.
جنى: تركتهم ودخلت قبل ما يجي هيثم ويحجي علي لان اتسمع لكلامهم انتظرتو لحد ما اجى ونظفنا المطبخ اني وياه كال شوية وتجي عمة رؤى غيرها لا تفتحين لاحد
.
.
من راح اني طلعتلي سطلة عبيتها ماي وزاهي وجبت وياي وصلة ناشفة وصرت امسح باثاث البيت وانشفو بالوصلة نص ساعة تقريبا واجت عمة رؤى
.
.
وشافتني انظف نزلت عباتها وبلشت تشتغل وياي ونسولف وكلتلها على المشكلة الصارت البارحة واليوم كالت حجالنا هيثم بس انتي من تبقين وحدج لا تفتحين الباب لاحد ابد
.
.
وجنت اريد احجيلها عن كلام هيثم وعزيز بس سكتت علمود ما يعرف هيثم اني سمعتهم ويعصب علي يمة اتي لحد الان خايفة لان عصب على عمي اذا يعصب علي اموع بمكاني ههههههههه
.
.
كملنا تنظيف البيت وسوينا غدا وكالت عمتي هيثم كال اذا تأخرنا لا تنتظرونا وحطينا غدا الي والها وكعدنا نتغدا
.
.
رؤى: شكد صار عمرج هسا
جنى: 11 سنة
رؤى: ايمتى جان عيد ميلادج
.
.
جنى: قبل شهرين يمكن
رؤى: حاولي تقنعين هيثم علمود يجيبج يمي
جنى: ليش
.
.
رؤى: تعاي عيشي وياي احسن ما تعيشين هنا وحدج وهم تسوين نقل للمدرسة الي اداوم بيها
جنى: وهيثم
.
.
رؤى: هيثم اذا يريد يجي وياج هلا بيه واذا ما يريد يبقى لحالو هنا هو شباب ما عليه شي
.
.
جنى: لا عمة ماكدر اعوف هيثم واعيش بعيدة عنو
رؤى: الله يوفقكم ولا يفرق بينكم
جنى: امين
.
.
عمي وهيثم ما اجو للمغرب تعشو وتعللنا شوية ويا بعض وراحو وثاني يوم نفس الشي راحو من الصبح من تسألهم عمتي يكولون بالمحل
.
.
بس جانو يرجعون تعبانين وعالغدا ما يبينون يعني جانو يروحون للموصل علمود معاملة تحويل البيت والمحل باسم هيثم وما يريدون احد يعرف
.
.
وهم اكيد مو خايفين من عمتي رؤى بس ما يريدون يكون عندها علم علمود لا يزل لسانها كدام احد وتحجي بدون ما تنتبه وينتشر الخبر
.
.
وبالنسبة لوفاة ابوي وامي من راحو للموصل صاير وياهم حادث وجان اكو واحد وراهم يكول فجاءة السايق طلع عالترابي وكلبت السيارة ولان سريعة توفو ابوي وامي
.
.
ومحد يعرف ليش ابوي طلع عالترابي لو شنو الي صار فكان اغلب التوقعات ان السيارة صار بيها عطل وما سيطر عليها ابوي ومن طلعت للترابي دعمت حجرة وانكلبت يعني قضاء وقدر ومثل ما يكولون تعددت الاسباب والموت واحد
.
.
بعد مشكلة عمي ما شفناهم ابد لا هو ولا ابنو محمد ومانعرف عنهم اي شي وعشنا بهدوء اني وهيثم جان حنون علي اكثر من امي وابوي قبل ما يموتون ومن ماتو احس صار حنون بعد اكثر
.
.
اني هم بسبب توصياتو هو وعمة رؤى صرت ما اتعبو واسمع كلامو بكلشي يكولو والباب جنت افتحو بس لام عزيز وعمي علي وهيثم وما اجانا غيرهم
.
.
جانت ام عزيز  كل فترة تجي تطمن علينا وتروح ومرات تجيب وياها اكل اذا مسوية طبخة طيبة وجانت تذكرني بامي بحنانها وطيبتها
.
.
جنت اكثر ايامي ما انام الا ومخدتي مبللة بدموعي شكد ما اشتاق لاهلي هيثم جان كل جمعة الصبح ياخذني ونروح لاهلي نزورهم ونقرالهم الفاتحة
.
.
بعدها نروح لبيت عمي علي نبقى عندهم لليل ونرجع والمحلات ما يفتحهن الصبح مثل بابا الله يرحمو من وصلنا على بيت عمي كعد هو وعمي واني رحت لعمة رؤى للمطبخ
.
.
من صار وقت الصلاة راحو هيثم وعمي وكعدت حجت وياي عمتي علمود بلوغ البنت وفهمتني وكالت تختلف الفترة من بنت لبنت
.
.
بس اذا صار عندج اي شي من هالاعراض خلي هيثم يجي  علي بس صار وجهي طماطية
.
.
بس هي فهمتني ان موضوع مهم ولازم انتبه لكل كلمة من كلماتها من اجو هيثم وعمي تغدينا وبقينا عندهم لل 10 بالليل ورجعنا للبيت اني وهيثم
.
.
يمكن بهاي الفترة جان الافضل الي اني وهيثم انو نعيش ويا عمي وزوجتو بس قلوبنا متعلقة ببيتنا لان بيه كل ذكرياتنا ويا ابوي وامي وثانيا اقرب لمحلنا
.
.
وبنفس الوقت هيثم ما يحب يثقل على احد وببيتنا ناخذ راحتنا اكثر جنت امشي بالليل وماسكة ايد هيثم والجو بيه برودة
.
.
وجنا مثل الاب وبنتو بسبب فرق الحجم بيني وبين هيثم بس سبحان الله هالضخامة هاي والجسم الكبير بداخلو قلب طفل ما يحب يأذي البريئ بس الي يضوجو لو يتعدى عليه بس الله يعلم شيسوي بيه
.
.
من وصلنا فرعنا تذكرت من جنت انتظر هيثم عند الباب ويجي عزيز يكعد يمي
.
.
وتذكرت من احضو اول ما يوصل سبحان الله من جان  ابوي وامي يمي هيثم جان بعيد عني ومن هيثم رجع اهلي راحو ويارت مدة ويرجعون
.
.
مشت بينا الايام وبلش العام الدراسي الجديد جان هيثم خايف علي من محمد وعمي ناصر من اول يوم راح وياي للمدرسة
.
.
وكال للمديرة اي احد يجي عليها ممنوع تطلع من صفها الا اجي اني عليها وكالي ديري بالج تطلعين من المدرسة قبل ما اجيج كلتلو ليش
.
.
كال سوي مثل ما اكولج ولا تطلعين وراح وتركني بدوامة افكاري كملت دوامي والظهر اجى اخذني ورجعنا سوا للبيت سوينا غدا وتغدينا وحجى وياي هيثم
.
.
هيثم: جناوي ركزي وياي شوية
جنى: شنو
هيثم: احتمال بعد كم يوم يجي عزيز ياخذج
.
.
جنى: وين ياخذني
هيثم: على بيتهم الثاني بس الي اريدو منج ما ترفضين ومن يكلج فورا تاخذين ملابسج وتروحين
.
.
جنى: ليش
هيثم: بعدين تعرفين
جنى: بخوف .. هيثم كلش خايفة ليش هيج
.
.
هيثم: يا روح هيثم انتي لا تخافين
جنى: لعد تعال وياي
هيثم: ماكدر حبيبتي اهم شي انتي روحي وياه
.
.
جنى: بس فهمني ليش اروح واعوفك
هيثم: بعدين تفهمين
جنى: تمام
.
.
جنت خايفة كلش من كلامو وهو مبين عليه خايف ومتوتر وفوكها ما يحجيلي شنو السبب وماعرف ليش يريدني اروح ويا عزيز كلتلو هيثم
.
.
هيثم: يا روح هيثم
جنى: ليش ما يجي عمو علي ياخذني
هيثم: بحيرة .. شلون افهمج
.
.
جنى: ماعرف
هيثم: اني مو دائما اسوي كلشي لمصلحتج
جنى: اي
.
.
هيثم: لعد هالمرة هم ثقي بي علمود مصلحتج
جنى: ماشي
هيثم: وعود لا تعاندين عزيز
.
.
كلامو خلاني احتار اكثر والمشكلة ماعرف شنو السبب الي يخليه يسوي هيج شي زين ليش ما يجي وياي هو ليش يبقى واني اروح هواي اسئلة بتفكيري ما الهن جواب
.
.
بس كلت يجي يوم ويبين كلشي وإن شاء الله ماكو الا كل خير بعد الظهر رجع هيثم للمحل واني نمت لان ماعندي دروس ومن كعدت بقيت العب بالغرفة بالعابي
.
.
رغم جان عقلي كبير بس امي جانت دائما تكول الطفولة تجي مرة بالعمر العبي وتونسي قبل ما تكبرين وكلامها خلاني احب الالعاب لان ماراح تجيني فرصة ثانية العب بيهن
.
.
بالليل اجى عمي علي سألني اذا احتاج كتب للدوام لو لا جان ناقصني علوم وانكليزي بس المعلمة كالت باجر اسلمكم وكال اي شي تحتاجيه انطيني خبر
.
.
وبقى نص ساعة تقريبا وراح وما تأخر لان جان تعبان ودايخ من صوت الطلاب والكعدة من الصبح ثاني يوم الصبح اجى ويانا عزيز للمدرسة
.
.
كلتلو شو اجيت ويانا كال نوصلج ونروح اني وهيثم ومن وصلت دخلو للادارة شوية وراحو ومدري ليش تصرفات هيثم الغريبة تخوفني يوم بعد يوم
.
.
لا يشرحلي ولا يحجيلي ليش يتصرف هيج واني بس ابقى افكر وما اوصل لنتيجة مرت الايام ومرة من المرات اجى هيثم ياخذني من المدرسة
.
.
جان كلش ضايج واحس حزن الدنيا كلو بيه سألتو اكثر من مرة علمود اعرف شبيه وما حجى من وصلنا البيت رحت ابدل ملابسي وهيثم بقى بالمطبخ يسوي الغدا
.
.
وكل شوية ينجوي لان بالو وتفكيرو مو عند الغدا من خلصنا غدا حضني وباسني من راسي وخدودي وعيوني رغم استغربت من فعلو بس فرحت كلش لان يبوسني
.
.
بادلتو الحضن ورفعت راسي والتقت عيوني بعيونو كلتلو لا تروح ابقى كال ماكدر المحل مفتوح وعزيز لحالو هناك لازم كلتلو تمام بقى حاضني شوية وبعدها تأكد من الابواب كلهن انهن مقفولات اندار علي
.
.
هيثم: جنى حظري جنطة الملابس مالتج وهويتج
جنى: ليش
هيثم: لان عزيز راح يجي ياخذج
.
.
جنى: فدوة خلي ابقى وياك ماكدر اعيش بدونك
هيثم: نزلت دموعو .. لا تحركين كلبي جنى
جنى: ماشي مثل ما تريد
.
.
عفتو ورحت لغرفتي دفنت راسي بالفراش وانفجرت بالبجي ليش يريد يبعدني عنو وهو يعرفني ماكدر اعيش بعيدة عنو بس اني اعلمك يا هيثم الا اخليك تتندم
.
.
كمت من مكاني طلعت جنطة وحطيت بيها ملابسي وجان ابوي عندو جنطة صغيرة حاط بيها الهواية اخذتها وهم حطيتها بالجنطة
.
.
ولان خفيفة ومابيها بس ملابس نزلتها وكعدت بالصالة انتظر عزيز شوية واندك الباب بهمجية من سمعتو خفت لان اعرف عزيز ما يدك الباب هيج
.
.
طلعت عند باب المطبخ صحت منو كلي اني عزيز بسرعة افتحي الباب ركضت فتحتلو كال بسرعة جيبي ملابسج وتعاي اني اروح اشغل السيارة وارجع وراح على بيتهم
.
.
رجعت اني اخذت الجنطة وطلعت لكيتو ينتظرني عند الباب قفل البيت وتأكد منو وطلعنا اني وياه نريد نروح لبيتهم واجى صوت اكثر شخص هيثم ما يريدو يعرف ان عزيز اخذني وصاح من ورانا كال عزيز وين ماخذ جنى
.
.
......... يتبع
لايك وتعليق حلو مثلكم ❤
حطولنا ارائكم وتوقعاتكم شنو الي صاير ومنو هالشخص ❤