طيوف الماضي

البارت(55) طيوف الماضي الكاتب#احمد

تصويت ومتابعه لحتى توصلكم باقي البارتات والقصص❤
#طيوف_الماضي
بقلم #احمد
البارت_55
.
.
مصطفى: كال وضعو زين وما يحتاج لا عملية ولا شي بس ضماد علمود لا يلتهب من الغبار الي بالجو لمدة اسبوع وكل يومين تبدل الضماد وتعقمو
.
.
وراسك مبين زين بس صدك الله سترك الضربة كلش قوية كلتلو والله كلش زين طلعنا من الحادث لو شايفو اجانا ما يشوف الدرب من السرعة كال العراق مليان من هالنماذج رجع ضمدني ورجعنا للبيت
.
.
من رجعت للبيت كلت لعلي تعال وياي اريد اخذك لمكان ورحنا اني وياه ورا بيتنا كلتلو شنو رايك جان ارض فارغة مابيها شي فهو استغرب من سؤالي
.
.
علي: رايي بشنو
مصطفى: بالارض هاي
علي: اكلك انت عقلك تمام
.
.
مصطفى: هههههههه لا يابة تخبلت
علي: هههههه مو اكول بيه شي الشيخ
مصطفى: لا لا صدك شرايك ترهم تنبني
.
.
علي: ليش ما ترهم مشاء الله حجمها كلش مناسب
مصطفى: ليش ما تبني بيها
علي: شعندي ابني بيها
.
.
مصطفى: اول شي تكون قريب من بنتك ثانيا انقل دوامك انت وام هيثم للعمارة وهم اوضاع الموصل ابد مو زينة اذا صارلكم شي لا قدر الله متوقع جنى راح تبقى عايشة
.
.
علي: بحيرة .. اعرف والله كل ذني بس صعبة
مصطفى: شنو الصعوبة بيها
علي: اني ورؤى متعودين على بيتنا ومنطقتنا
.
.
مصطفى: وهنا تتعود خلال ايام معدودة
علي: ماعرف والله
مصطفى: وايام العطل بدال ما تبقى بالبيت تجي للمضيف ويا عمامي تغير جو وتتونس
.
.
علي: وشكد سعر هاي الكاع
مصطفى: افه انت تسأل عالسعر
علي: نسابتنا شي والارض شي ثاني
.
.
مصطفى: لا كلهن واحد والارض اعتبرها الك
علي: اذا هيج معناها انسى موضوع انو اجي هنا
مصطفى: يعني قافل
.
.
علي: اي قافل
مصطفى: تمام
.
.
اخذتو ورجعنا للمضيف جانو عمامي جايين كعدنا وياهم وجيبتلهم طاري وكلتلهم يريدني اخذ منو فلوس وكلهم كالو هي قطعة ارض وما تسوى وانت صرت منا وبينا
.
.
بس الي استغربت منو ان علي ما وافق ولا باي شكل من الاشكال كل كلامي وكلام عمامي ما قنعو وقافل يا اما ابيعلو الارض او ما ياخذها وليش هيج قافل ماعرف
.
.
مصطفى: شكد تحط بيها
علي: انت صاحبها وانت تعرف اسعار الاراضي يمكم
مصطفى: شكد ما تحط بيها اني موافق
.
.
علي: 25 مليون
مصطفى: ولخاطر عمامي شكد تصير
علي: هههههههه هاي بالعكس صارت
.
.
مصطفى: لخاطر عمامي تطير 20 يبقى 5 ملايين يفيدك
علي: لا بالعكس احسبها علمود يصير سعرها 20
عمي: تسمحولي اتدخل
.
.
علي: اكيد تفضل
عمي: 10 ملايين واقفلو الموضوع
مصطفى: اني موافق
علي: هاي هي يابة مثل ما كلت
.
.
مصطفى: وبس اتحسن نروح اني وياك نسويلك حصة بالمكان الي تبني بيه لان الارض باسمي نحولك الي تبنيه باسمك احسن
علي: وبرايك اني منتظر هالشي
.
.
مصطفى: اعرف انت مأمن بي بس مانعرف بالمستقبل شيصير فنسوي هيج احسن وعمامي شاهدين عالحجي هذا وإن شاء الله ما يصير الا كل خير
.
.
علي: الله كريم على كل حال اني باجر اتوكل
مصطفى: متونسين وياك
علي: صارلي اسبوع غايب عن الدوام
مصطفى: لعد براحتك
.
.
جنى: مرن كم يوم ارتاحيت بيهن وجنت متونسة بوجود ماما وهيثم صحيح جانت صعبة علي اتحرك واكمل احتياجاتي بسبب ايدي بس جنت اكدر ادبرها
.
.
والي جان مساعدني هو انو ايدي الي انكسرت جانت اليسار فاكدر استخدم ايدي اليمين بكل اريحية واني شغلي بالبيت قليل بسبب دراستي فالحمدلله جان وضعي كلش مريح
.
.
من راحو اهلي ضجت على ماما وهيثم بس لان مخلية روحتهم ببالي من البداية ما تأثرت حيل ومن كالي مصطفى ان بابا اشترى الارض طرت من الفرح
.
.
ومن حجالي اصرار بابا انو يدفع فلوس بدالها عرفت تفكير بابا بس ما حجيت لمصطفى والي جان يفكر بيه بابا انو ممكن بالايام الجاية اذا يسكن هنا يكولون طمعان بفلوس مصطفى او يسمعونو حجي ما يعجبو علمود الارض
.
.
فهو سوا هالشي علمود محد يكدر يفك حلكو والي يحجي يكدر يسكتو وبالاخص انو صار الموضوع كدام عمام مصطفى واخوانو فاكيد اي واحد بالعشيرة راح يعرف ان بابا اصر انو يشتري الارض وما يقبلها بلاش
.
.
بعدها رجعت لدراستي وجنت اتحسن يوم بعد يوم اثار الكدامات بقى شي قليل كلش ومع الايام يروح مصطفى جان كل يومين يروح للدكتور يتأكد من وجهو لحد ما تحسن وفتح الضماد
.
.
جان مبين بيه شي قليل كلش من الجروح والدكتور كلو راح تختفي نهائيا وانطاه مرهم كل ما يريد ينام احطلو منو وادلك وجهو
.
.
جان ما يخليني احطلو المرهم الا احط راسو بحضني واكعد ادلك راسو وهو يحجيلي عن بطولاتو من جان صغير والي يسمعو يكول حتى بروسلي ما يلحكو
.
.
ومن اخلص اروح اغسل وارجع الكيه مسوي نفسو يشخر على اساس نايم ونبقى نتعارك ونضحك لحد ما ننعس وننام ثاني يوم نكعد اني اكضي وقتي بالدراسة وويا اهل مصطفى وهو يروح للمضيف
.
.
بالفترة الاخيرة اشوف صايرين يجون ناس هواي للمضيف وكل كم يوم يسوون عزيمة لو شي من سألت مصطفى كال ناس يصيرلهم مشاكل ويفضوها يمو
.
.
وكال هالشي يعتبر فخر النا لان نكدر نحل المشاكل كلتلو ما تخاف تظلم احد منهم كال اني ما اجبرهم على الحل اني انطي رايي وهم الهم حق بالقبول والرفض
.
.
ومن يتفقون اني والي بالمضيف نعتبر شهود على التراضي واي واحد منهم يخلف بكلامو عشيرة الثاني الها اي حق تسوي الي تريدو وعشيرتو ممنوع تدافع عنو
.
.
كلتلو معقولة عشيرتو تتخلى عنو كال اني هذا شرطي علمود اكون طرف ثالث والي يرفضون ما اتدخل بينهم واكيد الي يريد صلح يوافق اما الي يدور مشاكل ما يوافق
.
.
ورغم تارك الدراسة بعد التخرج ودارس الثالث من زمان بس جان كلش شاطر بالمواد واغلبها يشرحها الي بدون ما يراجعها بس بعض المواضيع الي تكون كلش صعبة او ضايفيها جديد للمنهج يراجعها مراجعة بسيطة ويشرحها الي
.
.
واني لان احب طريقة شرحو من اول مرة افهم الموضوع جان الشي الوحيد الي مضايقني هو طوق الرقبة بحيث احس نفسي مختنكة منو
.
.
وبالاخص انو اني ركبتي كصيرة فاحس بانزعاج مو معقول منو وما اكدر انام اذا ما انزلو حتى لو اريد اتمدد الا انزعو وبعدها اتمدد
.
.
اهلي تواصلي وياهم بس بالاتصالات دائما يتصلون ويسألون عني اني ومصطفى ويوصوني بدراستي وبعدها يسكرون والارض ماعرف ايمتى مقرر بابا يبنيها
.
.
ومن سألتو كال ماعرف حاليا واعرفو محتار لان اذا يريد يبنيها يحتاج هواي فلوس ومستحيل ياخذ من الي تركتهن يمو
.
.
واذا يبيع البيت لازم يكعد اجار ولا مصطفى راح يوافق على هالشي ولا بابا يوافق يكعد عند مصطفى هو بالزيارات يبقى مو ماخذ راحتو لحد ما يروح مو يجي بالاشهر لحد ما يخلص البناء
.
.
وحتى لو يبيع البيت ويطلب مهلة من الي يشتريه ماراح يكدر يشتغل بالبيت بسبب المسافة لهذا مو مقرر حاليا بس الي متأكدين منو انو اشترى الارض وباي يوم يجي يجيب وياه فلوسها ويحولها مصطفى باسمو
.
.
هي الارض جانت قبل زراعية ومشتريها ابو مصطفى الو هو وعمامو وكل واحد بانيلو بيت ومسجلو بكد مساحة البيت باسمو
.
.
والي اشتراها بابا قررو يكون مساحتها 300 متر مربع واني اشوفها كلش زين مساحتها لان بيتنا الي بالموصل 200 وبيت اهلي الي مأجرينو جان 300 ومساحتو كلش زينة
.
.
من اعلنو نتائج التمهيدي جنت متأكدة من نفسي ناجحة بس يبقى التوتر عند الطالب لحد ما يشوف النتيجة ومن طلعت شافها مصطفى طلعت ناجحة ومعدلي 75
.
.
بالرغم انو تمهيدي يعني كتاب كامل والمدة جانت قصيرة وغير مدة العرس والاحداث الي صارت وياي من دخلت وزاري بهذا المعدل ضمنت النجاح
.
.
بس اكيد ما يصير اتكاسل لان هالشي راح يأثر علي تأثير كلش سيئ وطبعا فضل البنات وبالاخص لارا وهند مستحيل انساه جانن اكبر سند الي بعد الله ومصطفى
.
.
جانن ما يخلني اشتغل ومن اشتغل يرزلني ههههههه ويكللي اذا تتركين دراستج يا ويلج وتعاملهن وياي وروحهن الطيبة خلتني كلش اتعلق بيهن واحبهن كلش
.
.
ولان ماعندي خوات ماجنت اعرف حبي الهن مثل حب الاخت لاختها لو لا بس الي اعرفو كلش حبيتهن وما اتمنالهن اي سوء وادعيلهن دائما بالتوفيق
.
.بعد الحادث ب 40 يوم تقريبا رحت للدكتورة فتحتلي الجبص وتأكدت من ايدي كالت وضعها كلش زين وبنفس الوقت نزعت طوق الرقبة وارتاحيت منهن ثنيهن
.
.
بس ايدي لان صار فترة مو مشتغلة بيها احسها توجعني ومع الوقت تعودت وراح الوجع ورجعنا مثل قبل اني ومصطفى ورجع وجه حبيبي يخبل مثل قبل رغم اني احبو بكل حالاتو
.
.
قربت امتحانات الوزاري وجنت كلش خايفة ومتوترة وماعرف ايمتى اخلص من هالخوف والتوتر وجان الشي الوحيد الي فرحني هو خبر حمل لارا
.
.
البيت صارت بيه فرحة ما تنوصف وبالاخص شاهين تخبل من سمع صار مخبل اكثر من كاضم وكاضم كضاها معارك ويا هند يتشاقة وياها يكللها شبيج انتي ما تحملين بشنو احسن منج لارا وهند تضحك على خبالو
.
.
بس لارا رغم حملها جانت تشتغل عادي بس الاشياء الثقيلة تخليها عالبنات واني من يكون عندي وقت فراغ انزل اساعدهن
.
.
ومن خلصت كل المواد جنت اراجع كم ساعة بالنهار وكل ما اخذلي استراحة انزل اساعدهن او اطبخ وياهن لحد ما تخلص استراحتي وارجع ادرس مرة ثانية
.
.
وبقيت على هالنظام لحد ما بلشت الامتحانات وقتها الحجية والبنات كالن هن كم يوم اتعبي بيهن وخلصي من الثالث وشغل البيت لا تهتميلو وسويت مثل ما كالن واهتميت بدراستي
.
.
ومثل التمهيدي ياخذني مصطفى الصبح اول يوم وصونا عالغش وغيرو علمود ننتبه بس جان الجو حار كلش مو مثل الموصل
.
.
وماعرف بوقتها الجو جان حار بكل مكان ولا العمارة نفسها حارة بس اكيد العمارة حارة لان الموصل تعتبر منطقة شمالية فجوها يصير شوية ابرد
.
.
ومن بلش الامتحان وزعو ماي بس لو مو موزعيه احسن حار والي يشرب منو يعطش بعد اكثر والمبردة مشتغلة وهواها حار ويمكن مابيها ماي والمدرس وجهو احمر من الحر
.
.
كلت بكلبي بدال هاي معبين المبردات ماي قبل ما يبلش الدوام احسن ما تنسمطون انتو والطلاب بس يمكن المدرسة ما يوصلها ماي على كل حال الله يعينا ويعينهم على هالحر
.
.
حليت الاسئلة واول ثنين خلصو جانو اني وولد خلصنا بنفس الوقت وانتظرتو لحد ما سلم الورقة واني هم سلمت ورقتي وطلعت وجان جوابي لا يعلى عليه ومتأكدة إن شاء الله درجة كاملة
.
.
ومن رجعت هم قريت الاسئلة لمصطفى وجاوبت عليهن وهو يشجعني وتكرر هالروتين بكل الامتحانات من الحر للتوتر لمراجعة الاسئلة ويا مصطفى
.
.
جان اخر امتحان فيزياء هم طلعنا الصبح اني ومصطفى شو من دخلنا داخل العمارة وصاني البس حزام الامان كلت الله يستر وسألتو كال احتياط لان الدنيا صبح وازدحامات
.
.
لبستو والحمدلله وصلنا المدرسة وماصار اي شي ودخلت امتحنت وطلعت كالعادة جواب فول وقبل ما اراجع الاسئلة ويا مصطفى كلي البسي حزام الامان كلتلو ترا خوفتني كال ماكو شي يا روحي بس مجرد امان
.
.
لبستو بدون عناد ومشينا ومن طلعنا من العمارة بمسافة تجاوزتنا سيارة ووكفت كدامنا وكوة كدر يوكف مصطفى ونزلو منها 4 كل واحد بايدو عصى اذا يضرب بيها ثور يفلش راسو
.
.
من شفتهم مابقى دم بجسمي من الخوف مسكت ايد مصطفى كلتلو ارجع بالسيارة فدوة وعاف ايدي ونزل من السيارة ولا كأنو يشوفهم
.
.
وفوك هاي هو قبل فترة مسوي حادث اذا ضربوه على راسو ما يطلع منها وكف مقابيلهم وجانو بمسافة عنو وحجى وياهم بس ما اسمعو لان جنت داخل السيارة
.
.
شلون هجمو عليه شفت ثنين طلعو من يم سيارتنا مثل الصواريخ وكمزو عالشباب ويا مصطفى اني من الخوف غطيت عيوني وكمت ابجي
.
.
مصطفى: من طلعنا الصبح اني وجنى انتبهت اكو سيارة تلاحكنا ومبين بيها شباب اكثر من واحد فخليت جنى تلبس حزام الامان علمود اذا صار شي ما تتأذة
.
.
ومن جنت انتظرها بالامتحان خابرت كاضم وشاهين وانطيتهم خبر وفهمتهم انهم يمشون ورانا بدون ما يخلون احد ينتبهلهم واذا شافو السيارة تحاول تسوي شي يتدخلون
.
.
ومن نزلو عرفتهم يريدون يتعاركون وياي وجنى تريد انهزم من كل عقلها كلت بكلبي مو عيب الشيخ مصطفى ينهزم من شلة زعاطيط نزلت من السيارة وكلتلهم تفضلو رايدين شي
.
.
واحد منهم كال جينا نربيك كلتلهم افه 4 على واحد علمود تربوه جان جايبين وياكم كم واحد بعد خاف ما تكدرون لحالكم كال هسا نشوفك نكدر لو لا
.
.
اول ما هجمو علي تدخلو شاهين وكاضم صارو 4 على 3 بس الغلط الي سووه جانو مركزين انهم يضربون اكثر ما يدافعون عن نفسهم واني واخواني ركزنا عكسهم
.
.
جنا نبتعد عنهم من يضربونا ونرجع نضربهم وبهالحالة هاي كدرنالهم كسرناهم تكسير الناس الي بالشارع ما تدخلو لان يخافون من سوالف العشاير
.
.
وخليت اخواني يربطونهم وحطو ثنين بصندوق سيارة شاهين وثنين بصندوق سيارتهم ورجعت ركبت بسيارتي لكيت جنى مغطية راسها وتبجي
.
.
مسحت على راسها ورفعت راسها واجت عيوني بعيونها الغركانات بالدموع كلتلتها اروح فدوة لهالدموع ليش تبجين
.
.
جنى: ضربوك مو
مصطفى: واذا ضربوني شلون اجيت احجي وياج
جنى: رفعت راسها ماكو بس سيارتهم .. وينهم
.
.
مصطفى: هههههههه تبخرو
جنى: لا صدك وينهم وذاك مو كاضم بسيارتهم
مصطفى: اي يابة ذاك كاضم وهم حطيناهم بصناديق السيارات
.
.
جنى: شتريدون منهم
مصطفى: غير نعرف منو هم ومنو دازهم علي
جنى: تمام
.
.
رجعنا للبيت والحمدلله جان اخر امتحان لجنى علمود لا ينشغل بالها بالموضوع ورحت للمضيف لكيت اخواني منزلينهم ومدخلينهم بالمضيف
.
.
ولان مربوطين مايكدرون يسوون شي لا ينهزمون ولا يكدرون يدافعون عن نفوسهم وكفت كدام الي جان يحجي كلتلو اي يابة وينها تربيتك بقى ساكت
.
.
كلتلو يلا احجي لو البزون اكل لسانك ولا انت من ذولاك الناس من تشوف نفسك قوي تغرد ومن تشوف نفسك طايح حظك وراح تنكتل مثل المطي تنخرس
.
.
وهسا وياكم لل 10 دقايق اذا اعترفتو يجوز اعفي عنكم واذا ما حجيتو اربعتكم تكلفوني 10 الاف دينار كل واحد طلقة ب 2500 دينار وخلي الي دزكم يبقى مرتاح
.
.
كال لا تكتلنا وراح نعترف كلتلو هسا انت عيني يلا غرد وكلي اذان صاغية لتغريداتك
.
.
.......... يتبع
حطولنا لايك وتعليق