طيوف الماضي

البارت(60)طيوف_الماضي الكاتب#احمد

تصويت ومتابعه لحتى توصلكم باقي البارتات والقصص
#طيوف_الماضي
بقلم #احمد
البارت_60
.
.
مصطفى: قبل ما ادخل البيت اجاني اتصال من رقم غريب جاوبت عليه كالي خلصت كعدتك ومن الصوت عرفتو السيد كلتلو اي تفضل ضحك ضحكة هستيرية
.
.
وكال بالله عليك مو اعترف بنفسو كلتلو شعرفك كال لو كايلك اني سويت هيج علمود يعترف جان ما اقتنعت بكلامي ولذلك خليتو هو يعترفلك بنفسو
.
.
وما يحتاج تشكرني وعود دير بالك منو وهسا في امان الله سكرت منو وكلت والله وطلعت ذكي يا سيد ما توقعتك بهالذكاء هذا بس رغم ذكائك ما كدرت تستمر بلعبتك ضدي وكشفتك بكل سهولة
.
.
ثاني يوم ابو اسراء عرض بيتو للبيع ومشت الايام طبيعية جنى بعد ما تشافت رجعت لدوامها بالمعهد واني صرت حريص عليها اكثر من الاول وبقت حياتنا طبيعية
.
.
قبل ما يبلش الدوام ب 10 ايام اجى علي هم يتطمن على جنى وهم يريد يدفن الاساس من شافو كلش عصب علي اني وجنى لان ما يريدنا نكملو
.
.
بس مع كلامنا اني وعمامي وكاضم وشاهين هدا واقتنع بس بشرط وهو انو شكو دينار حطيناه يوفينياه واني رفضت كال قسم بالله اجيب شفر هسا واهد البيت
.
.
اني اشتريت الارض علمود ارتاح مو اكضيها عناد وعركات وياك وجبرني اوافق وانطاني الفلوس الي وياه كال هاي حق البناء واكيد ماكدرتلو بالعناد واخذتهن
.
.
وبقى كم يوم وراح ومن بلش الدوام ما اجى الي عجبني بالمعهد مال جنى جانو يمشون بالمواد باستمرار والمحاظرة تكون اطول من محاظرة الدوام
.
.
يعني تروح جنى الصبح وترجع العصر فبهاي الحالة صار دوامها عدال دوامين ومن ترجع ترتاح وارجع اني اراجعلها وادرسها وبسبب ذكائها جانت بسرعة تحفظ
.
.
واكثر دافع الها هو حبها للدراسة يخيلها بسرعة تحفظ وبسرعة تفهم وهذا الشي سهل عليها وعلي هواي اشياء جنا يوميا قبل النوم نحددلنا تقريبا نص ساعة اراجعلها المواد الي حظرتهن ونتأكد منهن وبعدها ننام
.
.
وجان دوامها اسبوعي بس عندها عطلة الجمعة يعني 6 ايام بدال ال5 بالمدرسة واستمرت على هذا الروتين لحد ما فتح التسجيل عالخارجي جانو مخلصين من كل مادة نص
.
.
والي عجبني بجنى انو ذكية وما تنسى جنت اكعد واكلب بالكتاب واختار صفحات عشوائية واسألها وما فد مرة لكيتها ناسية الجواب لو متخربطة بيه
.
.
من شفتها هيج كلت بدال ما اجلها سنة ثانية خليها تمتحن هالسنة وتخلص والسنة الجاية احتمال يصير عدها ملل ويخرب واهسها فسجلتها بالخارجي
.
.
ومريت عالمعهد سألت عنها رغم اعرف مستواها بس جنت اريد اعرف اذا ترتبك لو تتخربط بالدراسة وما تجاوب ومن سألتهم كلهم مدحوها واحس راسي صار بكد الغرفة شكد ما افتخرت بيها كدامهم ههههههههه
.
.
بعدها تشكرت منهم ورجعت للبيت بهاي الفترة بدا يسوء وضع الموصل واكثر من مرة نكول لعلي يبيع البيت قبل ما يتورط ومايفيد بيه
.
.
واعرفو مايريد يبيعو هسا علمود يكمل بيتو هذا وما يريد يبقى كاعد يمي لحد ما يكمل والايام تمشي والوضع من سيئ الى اسوء
.
.
الاخبار جانت عبارة عن تفجير بالموصل وتفجير بالانبار وتفجير بصلاح الدين يعني ضغطو عالجيش والمواطنين بشكل مو طبيعي بالتفخيخ
.
.
وبالنسبة للي يفكر بيها يعرف انهم جانو يسوون هيج علمود يخوفون المواطنين والجيش لان الجندي من يشوف اصدقائو يتفجرون او نقطة قريبة منو تتفجر راح يصير عندو قلق ويتخربط وضعو
.
.
لان كلنا نعرف ان الروح غالية ومهما كان شجاع الشخص من يشوف ان الوضع ممكن يأدي لموتو ويفكر باهلو وباطفالو اذا متزوج راح يخاف كلش وهم اعتمدو على هالشي
.
.
مرت ايام الشتاء واجت امتحانات التمهيدي وجانت جنى قريبة كلش من نهاية الكتب بالمعهد وقررت اخليها تمتحن تمهيدي وحسب مستواها بالتمهيدي نقرر للنهائي
.
.
وبلشت الامتحانات جنت يوميا اوديها وارجعها مثل نظام الثالث بالضبط تروح تمتحن وتطلع تراجع الاسئلة وياي
.
.
وجانت بكل امتحان يكون اكو فرع او فرعين من المواضيع الي مو واصليها بالمعهد بس الاحياء والاسلامية لان حفظ هي جانت تحفظهن بدون ما يوصوها بالمعهد وبالامتحانات جاوبت على كل اسئلتهن ما خلت ولا فرع بس اذا اكو ترك تتركو
.
.
ومن خلصت امتحانات قررت اروح لاهلها وطلبت مني انو تجي وياي ورفضت لان الوضع يخوف واني خايف عليها وبعد ما خلصت امتحانات بيومين توكلت الفجر
.
.
ووصيت شاهين وكاضم انو واحد منهم ياخذها للمعهد من وصلت بغداد جان الوضع بين الطبيعي والموطبيعي يعني اكو تزعزع بالوضع الامني بس مو هواي
.
.
بس من عبرت بغداد كل ما امشي مسافة اشوفلي سيارة محروكة لو متفجرة واكثرهن عسكريات وهيج مناظر حتى اذا ما تخاف منهن تحس شي يكتم على نفسك
.
.
لان تنقهر عالي جانو بيهن ذول كلهم ابنائنا واخوانا الي راحو بالتفجير وعدا المدنين الي يموتون بالتفجيرات الداخلية
.
.
من وصلت صلاح الدين جان واضح على الجيش انهم مو مطمنين لان من يطلع للواجب مايعرف ايمتى توكف عندو سيارة مفخخة وتتفجر يعني الوضع متخربط هواي عن بغداد
.
.
وجانو ما يسوون ازدحام عند السيطرات علمود يحافظون على ارواح المدنيين اذا صار انفجار من وصلت عند المدخل مال تكريت سألني الجندي منين جاي ووين رايح
.
.
كلتلو جاي من العمارة ورايح للموصل كال اطبك على صفحة رغم استغربت من كال هيج بس لان اعرف ماعندي شي اخاف منو تقبلت الموضوع بكل بساطة
.
.
ومن وكفت اجى علي كال اخوي نصيحة الك من تطلع منا اذا اجتك سيارة غريبة او حتى لو سيارة جيش وسألوك انت سني لو شيعي كللهم سني وعايش ببغداد كلتلو ليش
.
.
كال لان المسلحين يعتبرون الشيعة مرتدين واذا عرفو انت شيعي بس الله يعلم وين ياخذوك لو شيسوون بيك وتشكرت منو لان نصحني
.
.
وبوقتها مو معروفين باسم داعش لو الدولة الاسلامية والاسلام بريئ منهم ومن افعالهم كملت طريقي وكلت اسوي مثل ما كال ومو بس علمودي علمود اهلي هم
.
.
بس اسوء وضع شفتو من دخلت الموصل كلمة الوضع متزعزع كلش قليلة عليه 75% من الطرق الي بالموصل مسدودة بسبب التفجيرات
.
.
من وصلت الدنيا جانت عصر وبهيج وقت اشوف الاسواق بدت تعزل واني انجبرت ادخللها من شارع بغداد والي جانو يسموه قبل بشارع الموت لكثرة التفجيرات الي بيه
.
.
وحتى اكون صريح وما اسوي نفسي ما اخاف من جنت امشي بالشارع جان كلبي مقبوض واحس على اي لحظة تنفجر علي عبوة تنهي حياتي
.
.
ولهذا السبب جنت احاول امشي سريع علمود اذا لا قدر الله وصار انفجار ممكن سرعة السيارة تبعدني عن مكان التفجير واطلع منها سليم
.
.
كضيت دقايق بالموصل جانت اصعب من سنين خارجها بسبب الوضع ومن طلعت منها حمدت ربي انو ما صارلي شي بيها
.
.
وكملت طريقي لحد ما وصلت بيت علي جانت الدنيا ليل بس التعب النفسي والجسدي لا يوصف دكيت الباب وطلعلي علي
.
.
علي: لك هلا والله بالغالي .. وحضني
مصطفى: هلا بيك حبيبي
علي: وحدك لو وياك احد
.
.
مصطفى: لا والله وحدي
علي: تفضل تفضل .. رؤى اجى مصطفى
رؤى: هلا بمصطفى شلونك
.
.
مصطفى: هلا بيج ام هيثم الحمدلله انتو شلونكم شخباركم
علي: والله الحمدلله عايشين
رؤى: وين جنى ليش ما اجت وياك
.
.
مصطفى: والله يا ام هيثم خفت عليها من الطريق والوضع الي متخربط
رؤى: ما تنلام والله
.
.
علي: حطيلنا العشى رؤى علمود مصطفى يتعشى وينام اكيد هسا ميت من التعب
مصطفى: اي والله تعبان كلش
.
.
علي: اي احجيلي شعجب اجيت
مصطفى: اجيت اخذكم
علي: وين تاخذنا
.
.
مصطفى: من باجر تجون وياي للعمارة ومنا لاسبوع يوصل نقلكم للعمارة
علي: ههههههههه شبيك متحمس هالكد
.
.
مصطفى: لان مستحيل ابقيكم هنا بهالوضع
علي: شبيه الوضع ترا اني مدني مثلي مثل غيري وماعندي شي اخاف منو
.
.
مصطفى: عندك شي تخاف عليه مو منو
علي: شنو هو
مصطفى: عندك ابنك وزوجتك
.
.
علي: ترا زوجتي وابني ببيتي مو بالشارع
مصطفى: هالمرة اخذك لو تنكلب الدنيا .. جابت العشى ام هيثم
رؤى: شنو القصة مصطفى صاير شي
.
.
مصطفى: ام هيثم اريد اخذكم وياي للعمارة
رؤى: ليش خوما جنى بيها شي
مصطفى: لا ام هيثم اقصد اخذكم علمود تسكنون هناك
.
.
رؤى: وين نكعد اذا بيتنا بعد مو كامل ودوامنا وغراضنا
مصطفى: ام هيثم لعد اني ليش موجود اذا ما اوكفلكم بهيج وضع والغراض سهلات والدوام اسويلو نقل
.
.
رؤى: زين ليش تريد تاخذنا هسا
مصطفى: ام هيثم ترا من الاخر الوضع هذا ماراح يستمر
رؤى: يا وضع
.
.
مصطفى: صاحبي الضابط الي جان وياي اول ما لكيت جنى يكول وضع الموصل تخرب كلش واكو حجي انو المسلحين راح يقتحمون الموصل هالفترة هاي
.
.
واذا دخلو للموصل فلا تتوقعون راح ياخذوها بدون حرب وبدون قتال وحتى لو اخذوها بسهولة راح تنحصرون هنا وماراح تكدرون تطلعون
.
.
واذا عرفت جنى تتخبل اني ما حجيت لاحد هالكلام هذا علمود لا تسمع وتلتهي عن دراستها وينشغل بالها بالتفكير وانتو حاليا عندكم بيت شبه كامل
.
.
وبيتي هو بيتكم تكعدون يمي شهر سنة 10 سنين احلى عندي من العسل وانتو تعرفون كلش زين هالكلام اكولو من كلبي
.
.
فاني احتياطاً للاحداث الي ممكن تصير دا اكللكم خلي اخذكم وحتى حرام عليكم تعرضون حياتكم وحياة ابنكم للخطر وانتو عندكم فرصة كلش جبيرة انكم تنقذونو وتنقذون نفسكم
.
.
من حجيت هيج ام هيثم كلش خافت من كلامي  علي جان ساكت وكأنو يفكر واني تعشيت وتركتهم يفكرون ويقررون بس راح ابقى الح لحد ما اخذهم وياي
.
.
من خلصت عشى كلتلهم هسا اعوفكم تفكرون بالموضوع واني اروح انام لان تعبان كلش بس من هسا اني حجيتلكم الوضع وكلتلكم ما اروح بدونكم وهسا تصبحون على خير
.
.
ورحت للغرفة الي نمنا بيها اني وجنى من اجينا لهنا ومن التعب بس تمددت نمت ودائما الشخص من يكون تعبان تعب نفسي ينام اسرع من التعب الجسدي
.
.
واني تعبت نفسيتي اول شي لان جنى مو وياي ثاني شي بسبب الطريق والوضع الي واصلتلو مناطق الموصل وصلاح الدين
.
.
والمواطنين خطية لا يكدرون يغيرون الوضع ولا يعرفون ايمتى يموتون وماعرف شلون متحملين كل هالضغط النفسي بس اعتقد هم تعودو لان شافو وعاشو كلشي لحضة بلحضة ومع الوقت تعودو وصحيح يخافون من الوضع بس مو كلش
.
.
كعدت ثاني يوم شوية مرتاح بعد هالنومة الطويلة وكمت صليت الفجر ولكيت علي وام هيثم كاعدين كعدت وياهم وتريكنا
.
.
وبعد الريوك خابرت امي تطمنت عليها وعلى اهلي وطلعنا اني وعلي بسيارتو ورحنا للكصاب كلتلو بربك اني محتار شلون اقنعكم وانت محتارلي بالاكل
.
.
كال لا تخاف من تنترس البطن الباقي كلو يصير سهل وفعلا كلامو ضحكني واخذنا لحم ورجعنا للبيت انطاه لزوجتو علمود تطبخو وكعدنا اني وياه نحجي
.
.
علي: يعني مصر انو نروح
مصطفى: كلش
علي: نروح بس بشرط
.
.
مصطفى: وهو
علي: اولا اكعد اجار لحد ما اكمل بيتي
مصطفى: وبيتي شنو فايدتو
.
.
علي: كلتلك قبل هالمرة ماكدر ابتعد عن هيثم وامو
مصطفى: ترا البيت بالزايد شهر تكملو كامل
علي: يا شهر يمعود ترا بعد السكف والسيراميك والارضية واللبخ يعني بعدلو هواي
.
.
مصطفى: بس عيب تكعد اجار وبيتي موجود
علي: هذا شرطي
مصطفى: يلا يابة موافق بس المهم تجي وياي
.
.
علي: والغراض شلون نلكي احد ياخذهن للعمارة
مصطفى: الغراض نجيب لوري ونحملهن بيه واحنا نروح كدامو وبين ما يوصل تبقون عندي
.
.
علي: ماعرف نلكي احد ياخذهن للعمارة لو لا
مصطفى: نلكي نلكي الفلوس تقنعو
علي: وشكد ياخذ
.
.
مصطفى: ماعرف حسب الاسعار عندكم
علي: يعني مليون مليونين
مصطفى: ماعرف بس مهما كان الواحد ينطي
.
.
علي: اكلك اني بنيت بيت كامل مكمل ليش ما اخذلو اثاث جديد وارتاح من سالفة الاثاث هذا
مصطفى: بعد احسن والله
علي: اي هيج احسن بس ناخذ المهم ونتوكل
.
.
مصطفى: لعد من اليوم اجمع المهم انت وام هيثم واني راح اخابر شاهين واخليه يشوفلك بيت اجار او تريد من نروح هناك انت تدور على راحتك
.
.
علي: لا خلي شاهين يدور واذا لكى من نروح نشوفو ونقرر
مصطفى: تمام
.
.
شفت الدنيا بعدها بداية نهار طلعت تيلفوني وخابرت شاهين والصدفة الحلوة جان بالسوك كلتلو شوفلي بيت اجار باطراف العمارة من جهتنا لابو هيثم وعود صورو ودزلياه
.
.
وسكرت منو وكملنا حجي اني وعلي والعصر دزلي صور بيوت وكل واحد وتفاصيلو مثل مساحة 200 متر وعدد الغرف وسعر الايجار وكم طابق ومسافتو عننا
.
.
وشوفت الصور لعلي وام هيثم ولان يكعدون بيه مؤقت فما يحتاج يدققون هواي بس المهم يكضون بيه لحد ما يكمل بيتهم واستقرو على بيت مسافتو عننا تقريبا ربع ساعة بالسيارة يعني قريب علينا
.
.
وكلت لشاهين ينطي خبر لصاحب البيت ان بعد باجر نشوفو ونقرر وكضينا الوقت اني وعلي نجمع بالغراض بوحدة من الغرف وام هيثم تجهز بالملابس والاوراق والاشياء المهمة مثل ذهبها والفلوس العدهم وتحطهن بجنطة
.
.
ومن خلال حديثنا ويا بعض عرفت ان رؤى هي الي قنعت علي انو يطلعون لان كلامي خوفها وهم بالاول والاخير راح يسكنون هناك فليش يتأخرون بدون اي فايدة
.
.
وتقريبا لليل بقى اشياء قليلة من الغراض مثل الطباخ والكاونتر والمواعين وباقي الغراض جمعناهن كلهن بالغرف وسوتلنا رؤى عشى وتعشينا
.
.
وكال علي المونة الي عدنا والخضرة بدال ما تخرب عالفاضي اكو ناس فقراء يمنا يمكن اوديهن الهم كلتلو هاي من الزينات هم تكسب بيهم اجر
.
.
كال لعد كوم وياي وصاحب البيت عندو سيارة كية صغيرة نجيبها يحمل المونة ويروح لان التمن والطحين اذا وكع بسياراتنا يدمرهن دمار ورحنا بسيارتو ودك الباب وطلع رجال متوسط بالعمر بس مبين عليه التعب
.
.
علي: شلونك ابو فلاح
الرجال: هلا استاذ علي تفضل
علي: يزيد فضلك جيتك بموضوع صغير
.
.
الرجال: تفضل استاذ علي بشنو اكدر اساعدك
علي: بصراحة راح ارحل من بيتي وعندي مونة وخضراوات زايدة وكلت انطيهن الك
.
.
الرجال: وين ترحل وليش ترحل
علي: والله يخوي بنيت بيت قريب من نسيبي
الرجال: بيها الخير
.
.
علي: المهم اكو هواي مونة وخضراوات وطريقي بعيد وما تسوى اخذهن وياي فجيب سيارتك علمود نساعدك بيهن واعتبرهن هدية متواضعة من اخوك
.
.
الرجال: الله يكثر خيرك ويرزقك وين ما تتوجه
علي: والكايل إن شاء الله اني رايح كدامك
الرجال: تمام اني هسا الحكك
.
.
مصطفى: رجعنا قبلو وجهزنا المونة لحد ما اجى ووياه ابنائو عمرهم يطلع بال 11 و 12 سنة وحملناهن كلهن بالسيارة بحيث السيارة انترست ترس واخذهن وراح
.
.
كلت لعلي وهاي حصل مسواك شهر وراح تكسبلك كم دعوة حلوة بسبب هالشي بدال ما ياكلو الدود وما تحصل منو شي كال اي والله صدكت
.
.
وبعدها اخذتلي دوش اني وعلي ولبست من ملابس علي وملابسي غسلتهن ام هيثم علمود ثاني يوم البسهن وبسبب نقل الغراض والمونة اني وعلي انهدينا هد من التعب
.
.
بس كلو يهون لخاطرهم المهم انهم ما يتأذون وإن شاء الله ربنا يسهلها ونوصل هناك بخير وسلامة ومن خلصنا كلشي نمنا علمود نكعد من وقت
.
.
.......... يتبع
لايك وتعليق حلو مثلكم ❤