طيوف الماضي

البارت(61)طيوف-الماضي الكاتب#احمد

61
#طيوف_الماضي
بقلم #احمد
البارت_61
.
.
كعدنا ثاني يوم الفجر وحملنا الغراض بالسيارات وصارن نص الجنط بسيارتي ونصهن بسيارة علي وتأكدنا من ابواب وشبابيك البيت وتوكلنا على الله من طلعنا من منطقة علي جانت اكو سيطرة ولان الدنيا فجر كالو الطريق مسدود كلتلو ورانا طريق للعمارة ومثل مو شايف ويانا غراض ولازم نوصل بوقت وبلكي تدبرها من يمك باوع لسيارة علي الي وراي هم مليانة غراض وكال تفضلو تشكرت منو ومشيت وفعلا جانو الجيش كلش متعاونين ويا المواطنين رغم عندو امر يسد الطريق بس لان مجبورين نطلع بوقت فتحلنا الطريق وما اخرنا من تقربنا عالموصل كلت لعلي خليك بمسافة عني واذا لا قدر الله وصار انفجار لو شي كدامك حتى لو على سيارتي دير بالك توكف فورا تكلع من الطريق وتغير اتجاهك كال تمام وزدت سرعتي شوية وجان اكو كدامي تقاطع وطلعت سيارة كدامي فجأة وكوة كدرت اوكف سيارتي قبل ما ادعمو وجان رجال جبير بالعمر وخطية انخطف لونو من الخوف عبالو راح ادعمو وكف يمي علي وتطمن ان ما دعمتو كلتلو روح كدامي وخليك سريع كال تمام واعتذرت من الرجال وكملنا طريقنا من طبينا شارع بغداد صرت ادعي بكلبي انو تعدي على خير وما يصيرلنا شي علي جان بمسافة 50 متر عني تقريبا ولان اعرف الطريق هذا خطر كلش جنت مركز على كل حجرة بالشارع ومستعد لاي لحضة ازيد سرعتي او اغير طريق دا امشي شفت لمعة ضو احمر على يميني وعرفتو ضو قنبلة وكبست البانزين كل قوتي عبرت كم متر عنها وانفجرت ولو متأخر ثانية وحدة جان صرت بخبر كان اول ما انفجرت مسكت الستيرن بقوة علمود السيارة لا تطلع من الشارع بسبب الضغط وكوة سيطرت عليها وجانت اكو سيطرة كدامنا للجيش وكف يمهم علي ومن وصلت يمهم وكفت تحمدولي بالسلامة ويلومونا لان اجينا من هذا الطريق كلتلهم ما نندل هواي بالموصل وانطونا ماي شربت منو وغسلت وجهي وتشكرت منهم ومشينا واني احمد ربي الف مرة انو شفت الضو وهمزين مو علي لان لو هو جان يجوز ما انتبه للضو وتأذة هو وعيلتو من وصلنا تكريت وكفنا يم محل لفات اخذنا سفري وكملنا طريقنا جنت امسك اللفة بايد واسوق بالثانية وما حبينا نبقى هناك لان الوضع بيها شبيه بالموصل واخذنا اللفات تصبيرة لبغداد ووصلنا بغداد ويا الظهر ومن طبينا احس ردتلي الحياة صحيح الاعمار بيد الله بس الموصل من تمشي تحس الموت كلش قريب منك واذا ما تموت يجوز تتعوق لو يصير بيك شي يخليك تتمنى الموت نزلنا بمطعم ببغداد وتغدينا وارتاحينا ام هيثم وجها اصفر من الخوف ومبين صار عدها هبوط كلتلها الحمدلله خلصنا منها والجاي إن شاء الله احسن وبعد الغدا بشوية كملنا طريقنا وطبعا جنى ما تدري بي اريد اجيب اهلها كلتلها زيارة لان جنت حاط رفض علي من ضمن توقعاتي وما حبيت اكوللها وبالاخير يخيب ضنها ومن جنا بالطريق اتصلت على امي كلتلها سوو عشى لعلي وعايلتو ومنا لساعتين احنا يمكم وسكرت منها
.
.
جنى: من راح مصطفى حسيت نفسي ضايعة ماعرف شسوي صرت اكره الغرفة لان هو مو بيها ومن ارجع من المعهد انام بيها ساعة ومن اكعد اخذ كتبي وانزل يم الحجية ادرس وجنت كلش ضايجة عليه ومن راح بس مرتين اتصلت عليه لان ما حبيت ازعجو وما حجينا هواي مجرد تطمنا على بعض وسكرت واحس اختنكت كلش لان بعيد علي وباليوم الي اجى جنت هسا ماخذتلي دوش ونزلت لكيت الحجية توصي البنات بس ما سمعتها زين لان صوتها جان مو واضح وراحن البنات للمطبخ واني كعدت يمها وفتحت كتبي دا ادرس ومادري بمصطفى يريد يرجع وهي عبالها ادري بيه وما حجت شي والتهيت الدراسة ومن خلصت قراءة جان عندي واجب لازم اكتبو فشغلت نغمة بالتيلفون بس موسيقى بدون كلمات وهادئة كلش بحيث تريح اعصاب الواحد وجنت كلش احب اسمعها من اكتب شي وشكلت السماعات وحطيتهن باذاني ودا اكتب وقربت اخلص والتهيت بالكتابة ومادري بالدنيا من حولي والحجية جانت ما تحجي وياي من اكعد ادرس يمها علمود ما التهي فجأة صارت ايد صغيرة على الدفتر انداريت شفت هيثم يمي كلتلو بصوت عابي يارووووووووحي وشلتو وابوس بيه وهو كلش فرحان بشوفتي ورحت سلمت على ماما وفرحت فرحة مو طبيعية وكلتلها شو ما ادري بيكم جايين كالت ليش مصطفى ما حجالج كلتلها لا والله كالت المهم اجينا وراح نأجر بيت قريب منا لحد ما نكمل البيت
.
.
جنى: بعفوية .. جذب
رؤى: هههههههه طلعت جذابة ولج
جنى: لا والله ماما بس مو مصدكة
رؤى: لا صدكي وحتى غراضنا بالسيارة وباجر نوديهن للبيت الي راح نأجرو
جنى: يااااااااي مو مصدكة وربييييييييي
الحجية: يلا جناوي شيلي كتبج وحطي العشى لامج واخوج اكيد جوعانين
رؤى: والله يا حجية حتى بالغدا ما اكلنا من الهبطة
الحجية: يا ستار هبطة شنو
رؤى: الله نقذ مصطفى من انفجار على اخر ثانية
.
.
جنى: جنت دا اشيل كتبي وسمعتها من كالت هيج احس متت بدمي من الخوف عليه وكع الكتاب والاقلام من ايدي وتركتهن وطلعت ركض من البيت ودموعي تجري باوعت للسيارة فارغة مابيها احد وصوت الحجية وامي وراي يريدني ارجع باوعت للمضيف وبدون وعي مني رحت ركض عليه وهاي اول مرة بحياتي ادخل للمضيف بعد ما دخلتو علمود السيد والحمدلله ماجان احد موجود بس مصطفى واخوانو وبابا المضيف جان من تدخل مثل الغرفة الصغيرة ينزعون بيها الاحذية (مكرم القارئ) وبيها باب يدخلون منو للمضيف دخلت ركض ووكفت عند الباب الخارجي ودموعي مثل الشلال من شافوني وكفو على حيلهم بابا ومصطفى يعرفوني خايفة على مصطفى بس شاهين وكاضم ما يعرفون من شفت مصطفى زاد بجيي وهو تقدم علي بسرعة ركضت عليه ورميت نفسي بحظنو واريد اسكت ماكدر من خوفي عليه يحجي وياي هو وبابا واني دافنة وجهي بصدرو وحاضنتو مثل الطفل من يحظن العابو علمود محد ياخذهن بقيت يمكن 10 دقايق بحضنو بعدها رفع راسي وباوع بعيوني وكلي لا تخافين يا روحي هاي اني كدامج مابي شي كلتلو لو صاير وياك شي اني وين انطي وجهي كال الحمدلله ماصار شي وهاي جبتلج اهلج علمود لا ينشغل بالج عليهم كلتلو اصلا زعلانة منك بعد ما احاجيك جاي من الموصل وصاير وياك كل هذا وماكدرت تدخل للبيت علمود نتطمن عليك وعفتو على اساس زعلانة عليه ورحت سلمت على بابا وبعدها كلولي روحي للبيت قبل ما يجي احد ورجعت والحجية كالت عيب تطبين للمضيف لو موجود احد غريب تفشلين مصطفى كدامو كلتلها مو بايدي من سمعت كلام ماما تخبلت ولان تعرفني شكد احب مصطفى وتعرف انو سويت هيج بعفوية من خوفي عليه ما حجت وياي هواي بس كلتلي مايصير وكملت كلامها ويا ماما وبعدها تعشينا وكضيت وقتي ويا ماما وبال 10 ماما جانت تريد تنام اخذتها لغرفتها هي وهيثم ومن نامو رحت على غرفتي وخابرت مصطفى
.
.
مصطفى: هلا يا روحي
جنى: عبالي نمت
مصطفى: لا كليبي بعدني ليش
جنى: عود تعال نام هنا
مصطفى: مايصير حبيبي لازم انام يم ابوج بالمضيف
جنى: انهزم بدون مايدري بيك ههههههه
مصطفى: هههههههه صايرة تعرفين تخططين بعد
جنى: لعد شعبالك
مصطفى: اي احجيلي شكد مشتاقتلك
جنى: يبوووووووه ميتة الف موتة من شوقي الك
مصطفى: بعيد الشر عنج يموتون عدوينج
جنى: وعدوينك
مصطفى: يلا اشوف اذا كدرت اجي
جنى: انتو بالمضيف بعدكم
مصطفى: اي بس من اتصلتي طلعت خارج علمود احجي وياج براحتي
جنى: ايمتى تجي والله مشتاقتلك
مصطفى: باجر اجيج
جنى: ها هيج صارت
مصطفى: شنو الي هيج صارت
جنى: ماتريد تجي يمي
مصطفى: لج عيوني انتي عيب من ابوج
جنى: هاي هي براحتك
.
.
حجيتها بحركة اعصاب ولو ما هو يسمعني جان سبيت نفسي لان طلبت منو واحس حتى جسمي صار يرجف من العصبية وفوك كل هذا هو يحجي بكل برودة اعصاب فجأة انفتح بابا الغرفة ودخل باوعلي كل اجيتك يا معذبني بنص ضوجتي ضحكني بكلامو هذا ورجعت خفيت ضحكي وسويت نفسي زعلانة عليه وهو بهيج موقف ما يحب يزعلني او يتجاهل زعلي اجى حضني ورفعني فوك واني حضنتو من ركبتو علمود ما اوكع واخذني للحمام كلتلو لا مصطفى فدوة قبل شوية سبحت وبردانة كال تمام وفتح الماي الحار بالبانيو علمود ينترس ورجع طلع للغرفة وكل هذا وهو شايلني رجع طلعلو ملابس بنفسو هالمرة ونزلني على كرسي المراية وباسني بكصتي وراح يسبح باوعتلو وهو يمشي واحجي ويا نفسي اكول والله احبو ياناس تمددت عالكرسي وفتحت اديني ومع فتحت اديني وكعت للكاع رجعت بسرعة وكفت الحمدلله محد شاف ههههههههه رجعت كعدت عالكرسي علمود حط مكياج واضحك على نفسي لان وكعت وجان مصطفى من نوع الي بسرعة يسبح ويطلع رغم عطر جسمو الحلو بس سريع بشكل بالسبح لدرجة قبل ما اكمل مكياجي هو طلع ينشف بشعرو واجى وكف وراي وحط الخاولي على كتوفو ونزل نفسو لحد ما صار حنجو على كتفي اليمين وحاوطني بايديه
.
.
مصطفى: شتسوين
جنى: احط مكياج
مصطفى: وشنو فايدتو
جنى: علمود اطلع حلوة
مصطفى: ومنو كلج انتي مو حلوة
جنى: امممم محد كال
مصطفى: شنو هاي الامممممم
جنى: مادري احب اكولها .. وابتسمت
مصطفى: ليش تتخارشين بهالشايب
جنى: غير اموتن عالشايب
مصطفى: يروحلج فدوة هالشايب
جنى: لا والله اني اروحلو الف فدوة جنو العافية
.
.
سكت ودفن راسو بركبتي مثل الجوعان ولكالو اكل ورجع رفعني مرة ثانية واخذني للسرير كلتلو اذا انت شايب وهيج قوي لعد من جنت شباب شلون جنت كال هو شباب قبل مثل شباب هسا وضحك وضحكتو شلبت عقلي وقلبي واحس الدنيا ضحكتلي من ضحك هو قبل ما ننام سألني شنو اكثر شي تحبينو بي كلتلو ماكو شي محدد كال شلون يعني كلتلو يعني احب اهتمامك بوقت احتياجي الك احب خوفك علي من يصير وياي شي احب اشتياقك الي من نبتعد كم يوم عن بعض احب اهتمامك بمستقبلي واصرارك علي انو ادرس وانجح بحياتي كل هاي الاشياء احبها بيك ومستحيل اكدر اعيش بدون وحدة منهن باسني على راسي ولفني بحضنو ونمنا سوا كعدت الصبح هو ماكو وجنت بعدني مو شبعانة نوم بس لان اليوم يروحون اهلي يشوفون البيت ماكدرت ابقى نايمة نزلت تحت وساعدتهم بالريوك وبعد الريوك راحو بابا وماما ومصطفى علمود يشوفون البيت وكالو اذا عجبهم البيت يجون يتخذوني اني وكاضم وشاهين علمود اني اساعد ماما وكاضم وشاهين ينزلون الغراض ويا مصطفى وبابا ورا نص ساعة رجع مصطفى كال يلا جنى خلي نروح كالتلو اماني مصطفى خلي نروح اني وهنادي نساعد جنى وام هيثم كال يلا لعد بسرعة بدلن وتعالن اني خارج وبسرعة بدلنا ورحنا وياه بس اخذنا بسيارة شاهين لان سيارتو مليانة غراض واخذونا للبيت جان قريب من بيت اهل مصطفى بس مو كلش من دخلت عليه جان تصميمو هادئ وحلو يعني مو صارفين عليه هواي بس رغم هذا منظرو عجبني اول ما تدخل من باب الحوش يلاكيك حوش ياخذ سيارتين تقريبا وعاليسار حديقة وعاليمين صحيات خارجية ومقابيل الحديقة استقبال ومقابيل الحوش مطبخ من تدخل من المطبخ وتعبرو تجيك عاليمين صحيات داخلية ودرج معزولة لحالها وعاليسار صالة وبعد الصالة والصحيات غرف ثنين بلشنا اول شي بالغرف اني وهنادي بغرفة وماما واماني بغرفة جلفناهن جلفة من هاي التمام خليناهن يلمعن بعدها طلعنا للصالة والصحيات الداخلية وهم نظفناهن كلش زين والبيت ما جان كلش وصخ يمكن جانو عايشين بيه ناس من خلصنا الصالة والصحيات الداخلية اماني وهنادي استلمن المطبخ واني وماما طلعنا للاستقبال لان هنادي واماني ماياخذن راحتهن بالشغل بوجود بابا ومن كملنا بقى بس الحوش والصحيات الخارجية وكالو بعد الغدا ننظفهن واجى كاضم جايب وياه غدا من المطعم لان اقرب من بيتهم وكعدو الزلم بالاستقبال واحنا النسوان بالمطبخ ومن خلصنا غدا دخل سيارتو مصطفى علمود الغراض يصيرن قريبات عليهم وشفتهم واكفين دا يحجون قريب منها واجيت يمهم طلعو يحجون عالسيارة باوعت عليها الجام الورا متفلش وبعض اماكن من السيارة جايهن شضاية او حجر من الشارع وزارف الحديد من شفتها هيج كلش ضجت عليها لان جانت جديدة اخذها بعد ما سوينا حادث وما لحك يتهنى بيها بس الحمدلله اجت سلينة ومثل ما يكول المثل بالمال ولا بالعيال بلشنا بتنزيل الغراض ولان مو جايبين اثاث جانن خفيفات وبسرعة خلصناهن وسيارة بابا كالو ما يحتاج يدخلوها لان الي بيها كاهن ملابس وجنط يدخلونهن بدون تعب جمعنا الغراض كلهن بغرفة وراحو شاهين وبابا ومصطفى وكاضم للسوك وكل واحد جانت مهمة يجيب شغلة جابو فرش على كد ماما وبابا ومسواك خضرة وقنينة وطباخ صغير وثلاجة صغيرة وبابا اخذ شبه اثاث لان يريد يشتري اثاث جديد من يكمل بيتو وهم ما يضايقو بالنقل واعتقد هاي احسن فكرة ممكن يسويها بهيج ضروف ساعدنا ماما بترتيب البيت اني والبنات ومن كملنا كامل رجعنا ويا مصطفى للبيت وبابا وماما تقريبا استقرو بالوقت الحالي بس يبقى استقرارهم مو مكتمل الا يكملون بيتهم ويكعدون بيه من وصلنا البيت اخذتلي دوش ونزلت تعشيت ويا البنات وكعدنا نحجي لل 10 واجى مصطفى ورحنا نمنا ثاني يوم اتصل مصطفى على بابا علمود يسألو اذا محتاج سي ولا لا وبابا كال ما محتاج بس سلامتكم ومصطفى كال كملي شغلج علمود بالليل نروح عليهم وفعلا بالليل بعد العشى رحنا اني ومصطفى عليهم وانتبهت انو مصلح السيارة وكال اخذها كاضم رتبها ورجعها من وصلنا فتحلنا الباب بابا ودخلنا كعدنا كلنا بغرفة وحدة ويا بعض
.
.
مصطفى: اكلك ابو هيثم راح تبقى تعاند
علي: بسم الله بعدني ما كلت حياكم الله
مصطفى: ههههههه المهم تعال خلي احجيلك
علي: احجيلي وكلي اذان صاغية
مصطفى: ايمتى راح تكمل البيت
علي: بس ارجع لوضيفتي اجمع راتبي وراتب رؤى وابلش بيه
مصطفى: وراح تبقى هيج متبهذل
علي: ليش شبي متبهذل ترا وضعي احسن من هواي ناس
مصطفى: يخوي بس الاجار 250 الف عدا مصرفك انت ام هيثم وهيثم وجايك الصيف شلون تتحمل حرو
علي: وشنو الحل برايك
مصطفى: بما انو ما تقبل اني اساعدك عندك الفلوس الي تركتهن جنى لاخوها تكدر تكمل بيهن
علي: اتوقع كلتلكم الفلوس امانة عندي
جنى: يحرم علي اخذ منهن دينار واحد
علي: جننننى .. وخزرني خزة خلاني ماعرف راسي من رجليني
مصطفى: وهاي انحلت المشكلة
علي: مو على كيفها هي
مصطفى: على كيفي واني اكلك ما اسمحلها تاخذ
علي: شنو جايين تغثوني انتو
مصطفى: لا جايين نكلك انو تكمل بيتك وتترك هالعناد هذا
جنى: اي بابا فدوة كمل بيتك وفضها
.
.
سكت وبقى يفكر بس مابقى كدامو حل ثاني وهسا عرف انو مستحيل اخذ شي من الفلوس وبقينا نلح عليه اني ومصطفى ونحاول نقنع بيه علمود يكمل اخير شي سأل ماما كالتلو حجيهم صدك جاينا الصيف ولازم نشتري مبردات او سبلت وبعدها جاينا الشتاء ونشتري صوبة وعدا الايجار يعني مو لصالحنا التأخير
.
.
مصطفى: كومي جنى سويلنا ستكانة جاي ابوج اذا ما يشرب جاي ما يقرر
جنى: تمام تدللون
رؤى: اكعدي اني اسوي
مصطفى: ام هيثم اكعدي الله يرضى عليج مو تصيرين مثل زوجج تموتين عالعناد
جنى: هههههه ارجعي اكعدي ماما ترا عصب عليكم
رؤى: هههههههههه لعد ابقى ساكتة احسن
مصطفى: هاي هي ابو هيثم من باجر اني اشتغلك بالنقل وانت كمل البيت ولا تشيل همو
علي: إن شاء الله
.
.
جنى: سويتلهم جاي ورجعت كعدت يمهم بس لو اسولف على فرحتي مستحيل اوصفها لان جانت امنيتي انو بعد ما اتزوج نجي اني ومصطفى نتعلل على اهلي ونرجع بقينا لل 10 عدهم وبعدها رجعنا ولان عندي دوام بالمعهد مانكدر نتأخر من رجعنا كضيت الطريق كلو مبتسمة وفرحانة كلش باوعلي مصطفى وسأل باستغراب
.
.
مصطفى: ليش فرحانة هيج
جنى: جانت امنيتي نجي نتعلل هيج عند اهلي
مصطفى: وهاي تحققت
جنى: كلو بفضل الله ثم فضلك
مصطفى: تدللين انتي .. ومسكتها من خدها
جنى: شنو اسوي واعوض فضلك هذا
مصطفى: اولا اني زوجج مو غريب وتكليلي هيج ثانيا اذا تريدين تفرحيني انجحي من السادس باول سنة وجيبي معدل طب وما اريد غير هالشي هذا
جنى: من عيوني يا بعد عيوني انت
مصطفى: الله يخليلياج ويخليلي عيونج
جنى: شكد يتأخر بابا بالبيت
مصطفى: حسب شغلو بيه اذا متقطع يتأخر اذا يشتغل بسرعة بالشهرين 3 يكعد بيه
جنى: هواي
مصطفى: هذا بيت مو شغلة تتبدل بسهولة ولازم مايكون بيه ولا غلط
جنى: اي والله صحيح لازم يرتبو
مصطفى: اي وراح اكون وياه إن شاء الله دائما علمود يكملو باسرع وقت
جنى: بسبب افعالك دا تكبر بعين بابا يوم بعد يوم
مصطفى: لان ابوج يستاهل ومهما سويت ما اعوض فضلو
جنى: يا فضل
مصطفى: انو انطاني جوهرة مثلج
جنى: ابتسمت بغرور .. بس انت الي حصلتني قبلو
مصطفى: اني سويت الي يسويه اي شخص عندو غيرة ورجعتج لاهلج
جنى: الحمدلله الله حطك بطريقي وانقذتني
مصطفى: صدك ام سيف شخبارها
جنى: ماعرف والله بس اخر مرة شفتها من رجعت لاهلي
مصطفى: انقطعت اخبارها
جنى: الله يوفقها وين ما تكون
مصطفى: اي والله خطية شافت الضيم بحياتها
جنى: لا تذكرني وربي جان اسوء شي شفتو بحياتي
مصطفى: الحمدلله خلصتي منهم خلص سكري عالموضوع
جنى: اي سكرتو ما اريد اتذكر
.
.
من وصلنا البيت نزلت قبل مصطفى لكيت الحجية كاعدة هي والبنات سلمت عليهن وصعدت لغرفتي علمود انام ومصطفى تأخر يمكن راح للمضيف واني نمت
.
.
مصطفى: من رجعنا اني وجنى اريد ادخل للبيت واجى شاهين كال منجمعين ولد عمامي وصايرة خوش تعليلة تعال يمنا واني ما جذبت خبر لان جمعتهم تونس رحت وياهم وكضينا الوقت كلو ضحك وشقى وهذا يصنف على ذاك وذاك يصنف على هذا حتى اني صرت ميز تصنيف بحيث من خلصنا التعليلة صار عدنا مغص من الضحك وجان اقوى واحد بينا بالتصنيف كاضم لو ينجمعون عليه 10 ما يكدرولو يخترع سوالف عجيبة ويضحكك لو عندك عزا من خلصت التعليلة كل واحد رجع لبيتو طلعت تيلفوني الساعة 1 اول مرة اتأخر هيج بدون سبب رجعت للبيت سكتة ماكو احد كلت بكلبي بس لا جنى بعدها كاعدة وباجر عدها دوام من صعدت شفتها نايمة كلت الحمدلله لان اهم شي راحتها بدلت ملابسي وتمددت يمها واخذتها بحضني ونمت ثاني يوم كعدت الصبح باوعت للساعة 10 وجنى رايحة للمعهد كمت غسلت وبدلت ونزلت تحت تريكت وطلعت شفت علي وشاهين ووياهم واحد واكفين يم بيت علي يحجون ورحت عدهم
.
.
علي: صح النوم شيخنا شمسك عالية ابيوم
مصطفى: صح بدنك اي والله تأخرنا البارحة بالتعليلة
علي: اي خوية انطيني من الاخير
مصطفى: منو الاخ
علي: نجار جاي يجيك البيت
مصطفى: حياك الله
النجار: ابقاك الله
مصطفى: اتفقتو على شي لو بعد
علي: دا يطلب 8 ملايين
مصطفى: لا هواي هيج
النجار: والله مو هواي انت احسب كم يوم نخشب اكل العمال وشربهم ويوميتهم والصبة وغيرها يعني هواي راح يصير علي وانتو تعرفون الاسعار حاليا
مصطفى: اذا على اكل العمال وشربهم تجون تتغدون وتشربون يمي بالمضيف وإن شاء الله ما اقصر وياكم
النجار: كفو منك وبيتك عامر بس احنا بالشغل نحب ناخذ راحتنا فناكل ونشرب بالبيوت الي نشتغل بيها واحتمال ناخذ منكم بس ماي بارد والاكل علينا
مصطفى: زين ال 8 ملايين بيها مجال بعد لو لا علمود ما نكثر الحجي والرجال هم معلم يعني راتبو على كدو وكاعد اجار وما يحتاج احجيلك بعد
النجار: ولخاطر هالوجوه الطيبة راح احسبها ب 7 ملايين ونص وغيرها اقسم بالله ما اكدر انزل ابد
مصطفى: هاي هي ابو هيثم اني اشوف السعر مناسب
علي: تمام اتكلنا على الله ايمتى تبلش بيه
النجار: باجر عندي بيت اصبو وبعد باجر اني هنا إن شاء الله بس باجر الولد يجيبون الخشب ينزلوه هنا علمود من اجي ابلش بيه فورا
مصطفى: يلا ابو هيثم اني اترخص اروح اشوفلك امر النقل بلكي ادبر
علي: مرخوص حبيبي
.
.
مصطفى: بالنسبة الي اشوف السعر مناسب لان بيت علي جان جبير نوعا ما بس يبقى موضوع عملة والواحد لازم يعامل علمود يحاول يوفر شوية من مصرف البناء يعني ابسط شي من هاي كدر يوفر 500 الف خلال دقايق قليلة من طلعت منهم رحت لمديرية التربية التربية بالعمارة وقابلت المدير وبعد السلام والترحيب حجيتلو عن علي وكلتلو اذا تكدر خلي بمدرسة قريبة هو وزوجتو وانطيتو معلومات علي وزوجتو وكال من انطيك خبر خلي يجيبلي نسخة المربع الذهبي وكتاب النقل اني اسويه الو تشكرت منو ورجعت للبيت
.
.
لايك وتعليق حلو مثلكم ❤
البارت 3000 كلمة اعتبروه تعويض ترا استاهل اني 😁