طيوف الماضي

البارت(20) طيوف_الماضي الكاتب#احمد

تصويت ومتابعه لحنى توصلكم باقي البارتات والقصص❤
#طيوف_الماضي
بقلم #احمد
البارت_20
.
.
مصطفى: رحت استقبل الي يجوني للمضيف ومعروف عند كرايبنا كلهم اول يوم العيد الغدا يكون ببيتنا بوجود ابوي وبعد وفاة ابوي اني سويت نفس الشي
.
.
واحد من عمامي جاب طاري المنطقة الي جانت جنى بيها وحجيتلهم عنها واني اعرف قصدو على جنى بس ما حجيت عنها وهو ماكدر يسألني بصيغة مباشرة كدام الناس وبقى ساكت
.
.
طبعا بكل عيد ولد عمي بحكم عيد يروحون يسلمون على امي لان هي مرة الشيخ سابقا وام الشيخ حاليا بس هالمرة جنت اضوج من يروحون يسلمون عليها
.
.
وما جان قصدي انو ما اريدهم يسلمون بس اخاف من يدخلون تصير جنى كدامهم وهي اليوم طالعة جنها كيكة باللون الجوزي وهم شباب واكيد تجذب نظرهم الحلوة
.
.
فبقيت كل الوقت تفكيري بيها وبالشباب الي يسلمون على امي ولو يصير جان منعتهم من الروحة بس اذا اسويها تطلع علي الف سالفة بحجة مو واثق بولد عمامي
.
.
جنى: بلشن النسوان يجن وكل ما تجي وحدة نروح نسلم عليها اني والبنات وطبعا كلهم يعرفون قصتي بس احس نظراتهم الي مو طبيعية ماعرف ليش
.
.
بس كلت اني ما دخلني بيهم المهم اسوي الي علي علمود ما افشل اهل مصطفى ومن رجعتا للمطبخ كلت لاماني شبيهم
.
.
اماني: منو هم
جنى: كرايبكم نظراتهم الي ما عجبتني
اماني: عوفج منهم لان ما يعرفوج
.
.
جنى: صدك احنا من رحنا اشترينا ملابس ما جبنا حلويات ويانا ايمتى جبتوهن
اماني: مصطفى جاب قبل العيد بيوم
.
.
جنى: زين كرايبكم زينين من وجهة نظرج
اماني: اكيد قابل اكو احد يكره كرايبو
جنى: اني اكره عمي ابو محمد وعيلتو
.
.
اماني: هي اكيد كل عشيرة بيها عائلة مكروها بس مو كلهم
جنى: منو هم
اماني: ابو اسراء وزوجتو وبنتو اسراء
.
.
جنى: هم عمج هذا
اماني: ابن عم ابوي
جنى: يعني يجون اليوم
.
.
اماني: اي
جنى: ليش تكرهينهم
.
.
اماني: قبل ما يتوفى ابوي واصل حجي لابو اسراء ان ابوي يريد يخطب اسراء لمصطفى مع انو ابوي مجان مفكر يزوج مصطفى ولزكو بابوي من وقتها
.
.
جنى: وليش يلزكون قابل اخر شاب هو
اماني: شاب عادي شي وشيخ عشيرة شي ثاني
جنى: بالعكس اني اشوفو طبيعي بالاخص وياكن
.
.
اماني: اقصد كلمتو مسموعة وعندو املاك وخير من الله
جنى: يعني لهذا السبب
اماني: اي بس اكو موضوع مهم اليوم
.
.
جنى: شنو هو
اماني: راح يجون ولد عمي يسلمون على امي
جنى: واني شدخلني بيهم
.
.
اماني: اقصد انو تنتبهين علمود ما تطلعين كدامهم
جنى: تمام
.
.
جنت بالمطبخ اساعدهن هي وهنادي بالعصير والحلويات الي يقدمنهن للخطار ومثل ما كالت اجو شباب سلمو عالحجية وراحو
.
.
بس جانو كل شوية يجون ثنين لو ثلاثة لهذا تقيدت وبقيت بالمطبخ وجانن البنات يسلمن عالحجية والنسوان الي بالصالة ويجن عالمطبخ عندنا
.
.
بحيث البيت انترس جهال ونسوان وبنات وصارت خبصة مو طبيعية جنت الوحيدة الغريبة منهم بس بنفس الوقت فرحانة بالتجمع الي صار
.
.
رغم الهوسة والاصوات وبالاخص اصوات الجهال بس حبيت الوضع لان هواي ناس ويحجون ويتناقشون والجهال يلعبون ويا بعض
.
.
البنات جانن نص مو مهتمات لوجودي يعني عادي عندهن سلمن طبيعي ويحجن والبعض ما حجن شي بس مبين مو حابات وجودي واني ما حاولت احتك بيهن
.
.
والغريب ما سألني عن اهلي ابد والنسوان الي بالصالة نصهن ما سلمت عليهن بسبب الشباب الي يجون يسلمون عالحجية جنت دا احط عصير بالكلاصات للنسوان واجت اسراء
.
.
ما جنت اعرفها بس من اول ما وصلت رحبن بيها البنات من شافتني اجت سلمت بس سلامها مصطنع كملت العصير وانطيتو لاماني وحجت وياي اسراء
.
.
اسراء: يكولون اهلج انسجنو .. عبالها بنت ابو سيف
جنى: اذا تقصدين الكبر سجن فحجيج صحيح
اسراء: شنو من كبر
.
.
جنى: اهلي متوفين مو مسجونين
اسراء: لعد منو الي دخلهم مصطفى للسجن
جنى: ماعندي وصف الهم
.
.
اسراء: شلون يعني
جنى: اوصفيلي شخص يجبر بنت عالزواج من شخص ما تريدو ويمنعها من الصلاة والصيام
.
.
اسراء: وليش عشتي يمهم لعد
جنى: شتعرفين عني انتي
اسراء: هواي
.
.
جنى: وشنو هالهواي هاي
اسراء: سمعت انو اهلج الي انسجنو ولان انتي كلتي لمصطفى عنهم طردوج وما يردوج بعد
.
.
جنى: الله يحرمنا من هيج اخبار
اسراء: ليش
جنى: لان الفتي قصة وكملتيها وصدكتيها
.
.
اسراء: اني هيج سمعت شدخلني
جنى: الي سمعتي منو جذاب
اسراء: وشنو الاثبات انو جذاب
.
.
جنى: اولا ابوي وامي توفو بحادث من جان عمري 11 سنة وعشت ويا اخوي لحالنا ببيت بكل زاويا النا ذكرى ويا ابوي وامي بيه وجان هو يهتم بي
.
.
وياريت بس هالشي صاير وياي لان واني بعمر ال 11 قبل ما يمر سنة على موت ابوي وامي انقتل اخوي الي جان سندي بوجود اهلي وبعدهم ومحد يعرف منو قتلو
.
.
وبدال ما اعيش ببيت عمي انخطفت وعشت 6 سنين واني مو شايفة بس 3 اشخاص ثنين يحرسوني علمود ما انهزم وواحد يفكر كل يوم شلون يبقيني تحت حكمو كل العمر
.
.
وبعد ما انهزمت منو بامل ارجع لعمي وكعت بايد وحوش قبل ما تجين تحجين وتتفلسفين شوفي الي عشتو يمهم من الم وعذاب لدرجة ضلعي المكسور لحد الان يبين اثر الضربة عليه
.
.
عشت يمهم سنة كبرت بيها الف عام ولعلمج ام زوجي هي الي هربتني وهي كدام اماني وهنادي تشكرتني لان انقذت بناتها انقذتهن من اخوانهن وابوهن يعني شفت اشياء لو تعيشين 100 سنة ما تشوفيهن
.
.
جنت احجي بانفعال لان هي جانت تحجي بطريقة تشبه الاستفزاز واماني تريدني اسكت بس ما تحملت خلي الكل يعرف شنو صار بحياتي
.
.
من حجيت هيج ما ادري بنفسي الا دموعي مثل الشلال واني ينعاد شريط حياتي البائس كدامي والبنات اكثرهن تأثرن بكلامي كلت هسا ما اريد بس ارجعي لعمي وارتاح مسحت دموعي وسكتت
.
.
اسراء: يعني زوجج مسجون
جنى: طليقي بعد كم يوم إن شاء الله
اسراء: وعمج وينو
.
.
جنى: خارج العراق
اسراء: بس عيب عليج تسكنين ببيت مليان شباب وانتي مطلقة وصغيرة بالعمر
.
.
اماني: عيب عليج اسراء هذا بيت الشيخ مصطفى وعمرو مصطفى ما طرد ضيوفو من بيتو
اسراء: ما كلت يطردها واخوانو هم عايشين بيه
.
.
هنادي: ببرود .. مصطفى راح يتزوج جنى
جنى: الكل انصدم حتى اني
اسراء: شنوو شلون يتزوج وحدة مو معروف كرعة ابوها منين
.
.
جنى: اسراااء احترمي نفسج ولا تحجين على ابوي
اسراء: لا والله خوفتيني
الحجية: شبيكن فضحتننا شنو هالمصايح كدام النسوان
.
.
هنادي: وهي تشرب عصير .. اسراء تحجي على ابو جنى
الحجية: افه عليج يا اسراء تهينين ضيوف الشيخ مصطفى وهم كاعدين ببيتو
.
.
اسراء: لا والله عمتي بس كلت مو معروف ابوها منين
الحجية: سكرو عالموضوع وسكتن عيب من النسوان
هنادي: خلص يمة روحي انتي عند النسوان
.
.
الحجية: تعالي جنى سلمي عالنسوان دا يسألن عنج
جنى: مو دا يجون شباب يسلمون عليج
الحجية: لا يمة ما بقى احد تعالي سلمي قبل الغدا
.
.
جنى: رحت وياها اسراء صارت حمرة من العصبية وهنادي توزع ابتسامات ولا مهتمة الها سلمت عالنسوان الي ما سلمت عليهن وحدة وحدة
.
.
وكل ما اسلم على وحدة تمدح بجمالي وكالتلهن الحجية بنت حلال ومن اجت ما رفعت صوتها لو تجاوزت على احد بالبيت كلت بكلبي الحمدلله ما سولفت عالجفصة مالت الصبح عزا شلون فشلة ولا اكدر انساها
.
.
بعدها رحت للمطبخ بال 12:30 جابو غدا للنسوان وبما انهم كلهم ولد عمام دخلوهن فورا للصالة وراحو والنسوان بس عدلوهن
.
.
بقيت اني بالمطبخ اني وهنادي وبنت من كرايبهم جانت حبابة وكل الوقت ساكتة شوية واجت اماني جايبة صينية النا كالت هنا احسن غسلنا وكعدنا ناكل
.
.
ولان ماكو احد يخرب علينا اكلت لحد ما انتفخت بس الي تعجبت منو البنت تاكل وما حجت ابد لدرجة من شفتها لحد ما غسلت وخلصت وهي ساكتة
.
.
جنى: شو البنية هاي ولا تحجي
فاطمة: شنو احجي
جنى: وربي عبالي خرسة
.
.
فاطمة: ههههه لا مو خرسة بس السكوت افضل
جنى: اي والله صحيح
فاطمة: ما دخلج باسراء ختولي
.
.
جنى: على شنو شايفة نفسها
فاطمة: بسبب موضوع مصطفى مو على اساس يخطبها
جنى: قابل اول وحدة تنخطب لو اخر وحدة
.
.
فاطمة: يمعودة مصطفى مو معيرها ولا يدري بالخطبة
جنى: شلون يعني مايدري
فاطمة: انتي تدرين بالقصة الي حجتها عنج
.
.
جنى: لا
فاطمة: مصطفى كذلك ما يدري بسالفة الخطبة
جنى: هههههه لعد منو خطبها
فاطمة: علمي علمج
.
.
اماني: مختصر الكلام مصطفى ما يعرف بموضوع خطبة اسراء والكلام صار ويا ابوي ومن حجى لامي ما جان مصطفى موجود ووصانا ما نحجيلو
.
.
جنى: وليش ما تحجولو اذا يريد يخطبها
اماني: والله ماعرف بعد بس ابوي جان غريب بحيث الموضوع البسيط يطلع بلاوي من وراه
.
.
جنى: قطع اندماجنا بالسوالف صوت الشباب من اجو ياخذون المواعين والاكل الزايد واماني اخذت الصينية الي عندنا ودتها الهم ورجعت عالمطبخ
.
.
وبلشو الكرايب يروحون عائلة ورا عائلة ومن ضمنهم اسراء وامها وارتاحيت منها لحد ما فرغ البيت من النسوان والجهال الي جانو بيه
.
.
وبلشنا حملة تنظيف اني والبنات ما خلصنا للمغرب دخلو مصطفى واخوانو جان مصطفى بعدو باناقتو بس اخوانو لان جانو يساعدون بالغدا تدمرت ملابسهم
.
.
اني تذكرت موقف الصبح وصعدت فورا من الفشلة رحت لغرفتي طلعتلي ملابس بيت واخذتلي دوش وطلعت مشطت شعري وبقيت بالغرفة
.
.
مصطفى: النهار كلو جنى بتفكيري اريد ابعدها عن تفكيري ماكو اريد اعرف شنو المميز بيها ليش افكر بيها ما صارلها اسبوع يمي وماراح تبقى يمي ليش هي من دون البنات اهتم لامرها وافكر بيها
.
.
بقيت بتفكيري لحد ما رجعت المغرب للبيت شفتها انهزمت فوك عرفتها تذكرت موقف الصبح كعدت عند الحجية واني تعبان لان كاعدين من صلاة الفجر كلتلها ها يمة إن شاء الله كلشي تمام اليوم
.
.
الحجية: اي يمة الحمدلله
كاضم: يمة زوجيني
الحجية: شذكرك يمة بالزواج
.
.
كاضم: علمود من اغسل المواعين زوجتي تفرك كتوفي
الحجية: اغسل المواعين واني افرك كتوفك
كاضم: لا يمة ما اريد اتعبج
.
.
الحجية: لعد روح اسبح واترك سوالفك
كاضم: فلا يكدر الواحد يحجي وياج
الحجية: اي شيخنا خوما قصرت ويا ضيوفك
.
.
مصطفى: تسأليني اني هالسؤال
الحجية: ادري بيك ما تقصر بس ما اريد احد يحجي كلمة مو حلوة بحقك
.
.
مصطفى: تطمني يمة وانتو خوما الشباب الي اجو ضايقوكم
الحجية: لا يمة قابل ما تعرف ولد عمامك
اماني: حتى جنى بقت بالمطبخ وما شافوها
.
.
مصطفى: بابتسامة .. اي هيج احسن
الحجية: ايمتى جلسة الطلاق يمة
مصطفى: من يخلص العيد باول يوم
.
.
الحجية: وين تكضي فترة العدة
مصطفى: يعني هم عليها عدة
الحجية: ليش هي مو مرة وجانو متزوجة
.
.
مصطفى: تعرفين قصدي يمة
الحجية: ماعرف والله بس اسألك احد يعرف بالموضوع
مصطفى: تمام يمة
.
.
بقيت كاعد ويا امي للعشى واجت هي شفتها نزلت من الدرج وراحت فورا للمطبخ ووجها احمر ومبين خجلانة من جفصة الصبح من تعشيت رحت لغرفتي منتهي ونمت فورا
.
.
جنى: من خلصنا عشى نمنا كلنا لان كاعدين من الفجر وتعبانين كعدت ثاني يوم الصبح نشيطة صليت الفجر ونزلت تحت لكيت اماني والحجية كاعدات
.
.
ساعدتهن بالريوك واجو البقية واحد ورا واحد هنادي اجت للمطبخ والولد كعدو بالصالة كالعادة واجى كاضم علمود ياخذ الريوك
.
.
كاضم: جنى بعدنا على اتفاقنا مو
جنى: شنو من اتفاق
كاضم: فستان عرسي على حسابج
.
.
جنى: هههههههه تدلل راح اشتريلك احلى فستان
كاضم: لك كفوووو
اماني: وربي مخبل هالولد
.
.
جنى: اخذ الصينية وهو يضحك تريكنا وخلصنا وصارت الساعة 9:30 واجو عائلة خالهم الصغير هو وزوجتو وبناتو ثنين وابنو
.
.
جانو كلش حبابين وابنهم سلم عالحجية وطلع وسوينالهم غدا وقمنا بواجبهم وبقو عندنا للعصر وراحو وجانت زيارتهم خفيفة ولطيفة وحلوة
.
.
راح اختصر ايام العيد لان جانت اكثر ايام اشوف بيهن هيج كمية من الناس بحيث البيت ما يفضى مرة خوال مرة خالات مرة عمات مرة ماعرف منو
.
.
جنا نكعد من الصبح نبقى نشتغل ونقدم ونأخر لليل ومن نخلص بالليل نكون كاتلنا التعب من كثرة الناس الي تجي
.
.
جان مصطفى يكدر يجيب وحدة تطبخ بايام العيد بس ما جان يحب ياكل اذا مو من طبخ البيت حتى من ينعزم لو يروح بكعدة او مناسبة ياكل بس هيج كدامهم
.
.
ومن يرجع يكمل اكلو بالبيت لهذا ما يجيب وحدة تطبخ ويكول اذا اكلها مو طيب او مو نظيفة راح تنعكس السمعة علينا ويكولون هم مو نظيفين
.
.
بقينا عل  هالحال لحد يوم السبت بالليل وجان ثاني يوم جلسة الطلاق من كعدت الصبح تريكت وجهزت نفسي ورحنا اني ومصطفى جان بالطريق ساكت واني هم ما حجيت شي 
.
.
من وصلنا جانت الجلسة مو مبلشة بعد بال 10 بلشت الجلسة ودخلنا اني ومصطفى شوية وجابو سيف لابس ملابس السجن وتحت عيونو اسود ومبين عليه اثر السجن
.
.
بس رغم هذا ما انكسر كلبي عليه لان الي شفتو منو مستحيل اكدر اسامحو عليه طلقني وانتهت علاقتي بيه وخلصت منو وطلعنا من المحكمة بس فرحتي لا توصف
.
.
اخير خلصت منو بعد طول انتظار صعدت بالسيارة من صعد مصطفى انداريت عليه وكلتلو شكرا ما انسى فضلك للموت كال الفضل لله
.
.
اريد اتحمل وماكدرت حطيت ايديني على عيوني وبجيت بجيت فرح بخلاصي وحسرة على عمري الي راح مسح على راسي بايدو
.
.
مصطفى: ليش تبجين مو خلصتي منو
جنى: دا ابجي على عمري الي راح بدون ما افهم منو شي
مصطفى: الي راح ما يرجع لهذا لازم نركز بالي جاي
.
.
جنى: ومنو يكول الجاي افضل
مصطفى: باذن الله افضل
جنى: ويجوز من ارجع لعمي انخطف مرة ثانية
.
.
مصطفى: وغلاة عيونج اذا عرفت الي خطفج الا اندمو
جنى: شتسوي وياه
مصطفى: خلي اعرفو ووقتها تشوفين
.
.
جنى: من كال وغلاة عيونج حسيت باحساس غريب وشنو يقصد بغلاة عيوني بس مبين مو مركز بكلامو لان اول مرة يكولي هيج شي
.
.
بعدها رجعنا للبيت بس طلع بغير طريق كلتلو وين رايح كال شغلة صغيرة اكملها ونروح للبيت ورحنا داخل العمارة ووكف عند بيت وكال انتظريني
.
.
مصطفى: رحت لبيت رجال متدين ويعرف بالدين علمود اسألو اذا واجب عليها تلزم عدة لو لا فتحلي الباب ورحب بي بس كلتلو مستعجل ماكدر اكعد
.
.
......... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413