طيوف الماضي

البارت(66) طيوف_الماضي الكاتب#احمد

قربت النهاية
66
#طيوف_الماضي
بقلم #احمد
البارت_66
.
.
جان رمضان يوم 28/5 اذا ما كنت متوهمة فقبل رمضان باربع ايام الي هو يوم 24/5 بالليل جنت كاعدة ويا البنات والحجية واحس نفسي دايخة ومعدتي مأذيتني كلش والحجية كالت خلي مصطفى ياخذج باجر للدكتور خاف صاير عندج التهاب بالمعدة لو شي لان كلش تأذيني وهند كالت اني هم اروح وياهم هم عندي مغص صار كم يوم ومن اجى مصطفى حجتلو الحجية كال خلي اخذج هسا كلتلو لا الصبح احسن هسا ماكو دكتورة تأخر الوقت وسندني واخذني للغرفة وهند استأذنت من كاضم علمود تجي ويانا واكيد ما يرفض لان مصطفى ويانا وبكل الاحوال اني احتاجها وياي لان لارا ملتهي بابنها والحجية مالها خلك الدكتورات وغيرهن من رحنا للغرفة اني ومصطفى فورا حطيت نفسي بحضنو وغنضت عيوني لحد ما نمت وما كعدت للصبح اول ما كعدت لكيتو فاتح عيونو ويباوعلي صبحت عليه وشفت عيونو ذبلانات كلتلو شبيك كال ماكو شي وعرفت انو الليل كلو كاعد من خوفو علي بس ما حبيت اوضحلو اني اعرف لهذا تجاهلت الموضوع ورحت اخذتلي دوش وجهزت نفسي وهو هم جهز نفسو ونزلنا سوا ورغم راح الالم بس اصر علي انو يسندني ومن نزلنا لكينا لارا مجهزة الريوك وهند وياها ومجهزة نفسها وتريكنا عالسريع ورحنا للدكتورة سجلنا اسمائنا وبقينا ننتظر دورنا وتقريبا نص ساعة واجى دورنا ودخلنا سوا اني وهند وحجينالها وسوينا تحاليل وبعد التحاليل سونار اول وحدة هند سوت سونار وبعدها اني من خلصنا كتبت النا ادوية وكالت الف مبروك ثنينكن حوامل والله يتمملكن على خير انتي (جنى) وضعج كلش ممتاز وهند وضعج جيد بس تحتاجين هاي الادوية لان بنيتج ضعيفة وجسمج ناعم بس ويا هذا العلاج ما تواجهين اي مشاكل إن شاء الله من كالت هيج هند طارت من الفرح ولوما عيب جان صرخت بكل صوتها من الفرح وفرحتي اني لا تقل عنها وجانت هي بداية الشهر الثاني واني نص الشهر الثاني طبعت لمصطفى الابتسامة شاكة وجهي ومو منطية فرحتي لاحد من وصلتو كال ها شكالت كلتلو خلي نحجي بالسيارة ومن صعدنا كلتلو ابشرك اذا الله تتملي على خير بعد 7 شهور ونص تصير اب
.
.
مصطفى: بصدمة .. كولي والله
جنى: هههههه اي والله ولا اسمع الخبر الاحلى بعد
مصطفى: كملي
جنى: كاظم راح يصير اب وراك باسبوعين
مصطفى: صدك والله
جنى: اي والله
مصطفى: الف مبروك خوية
هند: الله يبارك بيك شيخنا
مصطفى: على هالخبرين تستاهلين عزيمة عالمطعم
جنى: اي والله نستاهل
.
.
رحنا للمطعم جنا دا نتغدا واتصلت الحجية على مصطفى جاوبها كالتلو شصار وياكم كال ماكو شي يمة ماكلات بامية ومنفوخات كالتلو يمة مو مسوين بامية من زمان كاللها لا يمة هربولهن بامية ويضحك ومايريد يكوللها عالتيلفون ومن خلصنا رجعنا سوا للبيت لكيناهم متجمعين بالصالة ويريدون يتطمنون وجان كاضم موجود وشاهين بالمضيف واستغليت الفرصة كلتلهم جايين نفرين وواحد منهم هنا وحطيت ايدي على بطن هند من الفرح باوع كاضم بصدمة كاللها ابن منو هذا من كال هيج مصطفى ضحك على طول صوتو وكاضم مايعرف شيسوي واحنا كلنا ضحكنا على ردة فعلو وكام ركض شالها ويفتر بيها لحد ما داخت
الحجية: وانتي يمة شصار وياج
مصطفى: النفر الثاني من حصتنا
الحجية: صدك والله
مصطفى: هههههه اي يمة صدك
الحجية: طكتها بهلهولة مرتبة
كاضم: شنو هالانحياز يمة
الحجية: شنو من انحياز
كاضم: تهلهلين بس لمصطفى
الحجية: لا يمة هاي الهلهولة الكم ثنينكم
كاضم: لا والله فلا مقبولة وهسا تهلهلين لوليدي
الحجية: هلهلت مرة ثانية..
كاضم: ما يجون الا بالعين الحمرة .. وعافنا وطلع
مصطفى: مخبل مو صاحي
الحجية: عود كلنا من نزوجو يعقل
مصطفى: اغسلي ايدج منو يمة
جنى: لا تحجون عليه هند ما تقبل
هند: لا عوفيهم يستاهل
كاضم: ها ولج اني استاهل
هند: لا لا اسفة . وخلت ورا الحجية
كاضم: اني اعلمج يا هندو
هند: ههههههههه لا والله اسفة
جنى: اي كاضم ملص اذاناتها
هند: ولج خبيثة اسكتي ههههه
كاضم: باعي باعي جنى بربج مو مثل ضحكة جيري
جنى: بالضبط
كاضم: بربج زلمة شكبرني شكدني متزوجلي فارة
جنى: الفرق بينها وبين الفارة الذيل بس
كاضم: يعني قصدج هي من فصيلة الهامستر
جنى: هههههههههههه يخرب بيتك
.
.
باوعنا لهند مبرطمة وزعلانة وراح كاضم حضنها واحنا نضحك عليهم ومصطفى يحرشهم علي واخذها كاضم وراح وهو يكوللها بالغرفة نتفاهم شلون اني استاهل وانتي هامستر ويضحك وهي تضربو على صدرو وتضحك
.
.
الحجية: شلون وضع الاطفال يمة
جنى: الحمدلله زينين بس هند شوية صعب لان اول حمل
الحجية: الله يتمم على خير يمة
جنى: امين
شاهين: السلام عليكم .. وياه هيثم
الكل: هلا بيكم
هيثم: كومي روحي لارا
لارا: وين اروح
هيثم: غير اني رجال غريب يلا روحي
شاهين: قسم بالله غضب مو طفل
لارا: يا باطل كشفني بالئرعة .. وحطت الشال على وجهها
جنى: يبوووووي اروح فدوة للرجال اني
هيثم: جنى مرة ثانية ما تطلعين بدون علمي
مصطفى: شو تعال خلي ادبك
.
.
جنى: تقدم عليه مصطفى وهو انهزم ويضحك واحنا نضحك عليهم بس صاير لسانو شطولو ويتذكر سوالف محد مفكر بيهم ولاحظت عليه دا ياخذ اطباع مصطفى واخوانو لان مكضي وقتو وياهم وبصراحة احسن شي انو ياخذ اطباعهم بهالحالة يطلع ذكي ويعرف يدبر نفسو وإن شاء الله اذا صارلي ولد يطلع على ابوه وعمامو والحلو بهيثم رغم شقاوتو بس مطيع كلش بس الواحد يكلو اسكت لو اكعد فورا ينفذ لان يشوف مصطفى يوصي اخوانو وينفذون وتعلم منهم ان لازم يسمع الكلام بعدها وصتني الحجية انو اهتم لنفسي ولطفلي وكالت حتى لو تأجلين الجامعة عادي احسن ما تخسرين الطفل الثاني وكلامها جان منطقي لان ذيج المرة صحيح متوبلو يتوفى قبل ما يصير بس التعب جان الو اثر كبير وبالليل رحت لماما وبشرتها وكلش فرحتلي وكعدت ساعة توصيني شسوي وشلون اهتم بنفسي وما اتعب وما اشيل شي ثكيل وتوصيات لا تعد ولا تحصى من خوفها وحرصها علي ومن اجى بابا ومصطفى طلع مصطفى منطيه خبر وباركلنا ويدعي ان الله يتمملنا على خير ومن ذاك اليوم مصطفى صار ما يكدر ينفذ افعالو القديمة لان يخاف علي اني والطفل وهم اجى رمضان والتهينا بين السحور والفطور وبعد العشى يروحون الولد وبابا لصلاة التراويح وماما تكمل شغلها وتجي هي وهيثم تكضي وقتها عندنا واني وهند ماكدرنا نصوم وصرنا من صدك مفجوعات 24 ساعة ناكل ولا نشبع بس ما جان يبين علينا بسبب الحمل والحجية جانت تكول هيج احسن لان الام من تجوع وما تاكل جسمها يغذي الطفل من المواد الي موجودة بعضامها وهالشي راح يأثر عليها وهذا الاكل الي ناكلو اني وهند يفيدنا احنا والطفل وبعدها صرت اموت عالبرتقال بحيث اعوف الاكل الاساسي واكل برتقال وجنت اتضايق من يصير على ايدي ماي البرتقال ورغم هذا ما اتحمل اذا ما اكلو وهند جانت تشتهي البطيخ الاصفر (اعتقد بغير دول يسموه شمام)وهمزين جانت الدنيا صيف وجان اكو بطيخ ولا جان تورط وجان خطية يتعنى للسوك علمود يجيبلنا بطيخ وبرتقال وكل وحد تسوي الي تشتهيه ونكعد مقابيل بعض وناكل بس بالنسبة الي جانت احلى ايام حياتي هي ايام الحمل جنت كلش متونسة واحس انو عايشة لاجل هدف كلش مهم وهالهدف هي حياة انسان راح يكون رجال او مرة من يكبر وراح تكون مسؤوليتو كلها علي  جان الشي الوحيد الي مضوجني اني وهند انو ما كدرنا نصوم ونضوج من ناكل وحدنا بس مجبورات ناكل وجنا علمود نتونس نخلي كاضم يجيب هيثم عندنا علمود ياكل ويانا ويونسنا بسوالفو  وهو طكلو ميانة ويا الجناين والبنات والحجية ويمون عليهن اكثر من مصطفى واخوانو وجانت حركتو المعتادة من يكون موجود عندنا ويخلص اكل يكعد يم الحجية بالصالة ويوصي على جاي والحجية متخبلة على حركاتو كضينا رمضان بهدوء وقبل العيد باسبوع رحنا اني ومصطفى للسوك نتسوك ملابس وحلويات ولارا وهند اجلن روحتهن لان هند جانت تعبانة وطلبت من لارا تأجل روحتها علمود يروحن سوا للسوك واني جنت اريد اجل روحتي علمود اروح وياهن بس من فكرت بالموضوع كلت نروح اني ومصطفى لحالنا احسن هم ناخذ رحتنا ويا بعض وبعد ما اجى من صلاة التراويح رحنا اني وياه وجان السوق م اروع ما يكون بحيث من تدخل بيه تحس الدنيا نهار من كثر الاضائات الي بيه وبلشنا نفتر اني ومصطفى من محل لمحل ونختار سوا واخذتلي فستان اسود لان حبيت اعيد الذكريات الي صارت من قبل واخذت وياه اكسسوارات سود بدال الذهب ومن خلصنا الملابس رحنا لمحل بيه حلويات والحجية وصتنا نجيب على ذوقنا واخذت حب مخلوط (يكون بيه عدة انواع من الحب ووياه جوز وفستق وبندق) واخذت كيك جاهز وجكليت وحلقوم وكاكاو ومن خلصنا اخذناهن للسيارة ومن ركبت السيارة رجعت ظهر الكرسي لورا وتمددت عليه بتعب واتنفس بسرعة واول مرة اتعب هيج
.
.
مصطفى: شبيج كليبي
جنى: ناكو شي بس تعبانة كلش
مصطفى: تريدين اخذج للمستشفى
جنى: لا حبيبي اهذني للبيت خلي ارتاح وارجع مثل الحصان
مصطفى: ماكو حصن منا ورايح
جنى: هههه اي والله ابنك دمرني
مصطفى: شنو ابني لحالي
جنى: اي ما اريدو
مصطفى: صدك منو كال ولد
جنى: ماعرف الله اعلم
مصطفى: اني اريد بنت
جنى: لا والله خاف ما تشتهي
مصطفى: ليش
جنى: اريد ولد علمود ابقى الوحيدة بحياتك
مصطفى: شبيج ترا هاي بنتي
جنى: والله هذا الي عندي بنتك مو بنتك ما دخلني اني
مصطفى: الله يعيني على خبالج
جنى: واذا اجت بنت يا ويلك تبوسها الا اخرب الدنيا
مصطفى: ههههههه حاضر يابة تأمرين
جنى: وليش تضحك لعد
مصطفى: خلي اجيبلج برتقال وارجع
جنى: تمام
.
.
ادري بيه يريد يلفلف السالفة علمود اسكت عبالو راح اسكت واخلي السالفة تمر بدون ما احجي شي رجع بايدو علاكة برتقال وحطها بحضني
.
.
مصطفى: وهذا البرتقال
جنى: عاشت ايدك .. وطلعت وحدة اكشرها
مصطفى: نروح للبيت
جنى: اي نروح
مصطفى: تمام
جنى: وين وصلنا
مصطفى: بشنو
جنى: ببنتنا
مصطفى: ما وصلنا
جنى: واني اكل .. لا تنرفزني
مصطفى: ليش اني شسويت
جنى: ممنوع تبوسها
مصطفى: ههههههههه تمام يابة
جنى: ومموع تضحك
مصطفى: تمام
جنى: وممنوع تنام بحضنك
مصطفى: تمام
جنى: وممنوع تكول تمام
مصطفى: دسكتي لا اطلعج من الجام
جنى: هههههههه اي والله استاهل
مصطفى: اروح فدوة للتغار علي
جنى: اموتن بيك
مصطفى: هاي اغسلي ايديج بهذا الماي
.
.
جنى: اخذت البطل منو وطلعت ايدي من الجام وغسلتها بدون ما يوكف مصطفى وكملنا طريقنا للبيت وجنت من صدك ميتة تعب من وصلنا تركت الغراض ورحت لغرفتي وشوية واجو مصطفى وكاضم شايلين الغراض ونزلوهن وراح كاضم من طلع تمددت عالسرير وكلت لمصطفى عوفهن من ارتاح اني اسفطهن وهو ما جذب خبر عافهن واجى تمدد يمي وبقيت متمددة لحد ما غفيت من التعب ما كعدت لثاني يوم كمت من فراشي لكيت الغراض بعدهن مخبوصات اخذتلي دوش وعزلت ملابسي عن الحلويات ونزلت تحت لكيت كاضم وهند كاعدين كلتلهم صباح الخير
.
.
ثنينهم: صباح النور
جنى: كاضم فدوة الحلويات بالغرفة تكدر تجيبهم ثكيلات ماكدر اشيلهن
كاضم: ترا مايصير هيج
جنى: شنو الي مايصير
كاضم: تدرين بي صايم غير تكولين البارحة من جنت مفطر علمود اكل منهن
جنى: اكول نفرين ياكلون بدالك
كاضم: اي والله صحيح
.
.
جنى: راح جابهن حطهن بالمطبخ وجاب كاكاو وكيك وكعد يم هند ويفتح ويوكلها ويكوللها اريد ابني يطلع اسمن واحد بالعشيرة كلها وانتي هم اريدج تسمنين
.
.
هند: لا ما اريد اسمن
كاضم: بلى اسمني جنج هامستر
هند: دروح زعلت منك
كاضم: اروح فدوة للزعلانة اني
جنى: اي قشمرها بكلامك
كاضم: خطية اكو وحدة زوجها نايم وتاركها
جنى: تروح فدوة لزوجي
هند: انجبي حبيبتي
كاضم: اي عفية بزوجتي لا تسمحيلها تحجي
جنى: نطير اني وزوجي مو بسيطة يا كاضم
كاضم: واذا ما تطيرون اطيركم اني
مصطفى: منو هذا الي يطيرون
كاضم: شاهين ولارا
شاهين: هذا لمنو هالحجي
كاضم: دخيل ربكم شياطين مو بشر
.
.
جنى: من كال هيج كلنا ضحكنا عليه ورحنا اني وهند علمود نتريك واجت ويانا لارا وتركنا الولد يتعاركون بينهم واجتمعو شاهين ومصطفى على كاضم جنا كاعدات بالمطبخ وصوت ضحكهم لعندنا وكعدت على هوستهم الحجية وراحت لارا لغرفة لكت مصطفى الصغير كاعد وجابتو واجت يمنا والحلو بلارا جان ابنها دائما نظيف وريحتو طيبة بحيث بس تشتهي تبوسو وجان خدودو كبار وينكرط هو وخدود وبعد ما تريكنا راحو تسوكو الولد والجناين وراحت وياهم الحجية وبقينا اني ومصطفى وشفت نفسي فاضية وماعندي شي ورحت عند ماما كضيت الوقت يمها ومن رجعو رجت للبيت وقبل العيد بيوم حبيت اخبث ويا مصطفى على طريقتي الخاصة
.
.
........يتبع
لايك وتعليق حلو مثلكم ❤