طيوف الماضي

البارت (73) طيوف الماضي الكاتب احمد

جنى: بقو يتناقشون ويصنفون على بعض واني من كعدت رانية اخذتها للغرفة رضعتها وبدلتلها ومن اجى مصطفى خليتها بحضنو وعفتهم ونمت
.
.
ثاني يوم كعدت الصبح لكيت مصطفى حاط رانية بنصنا ونايمين ومنظرهم وهم نايمين يخبل حتى انكسر كلبي عليهم لان راح اكعدهم ثنينهم
.
.
كمت اخذتلي دوش وكعدت مصطفى وكعدت رانية رضعتها وبدلتلها ملابسها ونزلت اني وياها حطيتها بغرفة الحجية وغطيتها ورحت للمطبخ
.
.
جهزت ريوك الي ولمصطفى بين ما نزل هو وتريكنا وتأكدت ان رانية نامت ورحنا للجامعة وصلني ونزل وياي ومد ايدو علمود امسكها كلتلو ترا مو زغيرة اني كال بس دجيبيها
.
.
واخذ ايدي ورحنا نتمشى من شفت صديقاتي كلتلو راح اروح عليهن كال تمام براحتج وعافني وراح داخل الجامعة واستغربت شعندو بالجامعة
.
.
اني تحججت بصديقاتي علمود يطلع وما يشوف البنات او يشوفنو بس هو ما طلع سلمت على صديقاتي وسألني ليش تأخرت وحجيتلهن انو صارتلي بنت وكلهن باركن الي
.
.
وطلبن صورتها وطلعتلهن الصورة بالتيلفون وتخبلن عليها اول محاظرة جانت شاغر عندنا وبقيت ويا صديقاتي وانتظرت مصطفى لحد ما يطلع
.
.
وتأخر تقريبا نص ساعة وطلع ومن طلع ما شافني بس الي ريح كلبي انو من يمشي وما مهتم للبنات وبعدها رحت استلمت المواد كلهن وبديت اخذ المحاظرات القديمات من صديقاتي علمود ارتب وضعي باقرب وقت
.
.
مصطفى: جان عندي صديق من الجامعة من اني كملت البكلوريوس هو كمل ماجستير ودكتوراه وصار مدة طويلة مو شايفو وكلت امر اسلم عليه
.
.
وهم اشوفو اذا يدرس جنى لو لا اول ما شافني اجى حضني ويرحب بي بحرارة وبعد الترحيب سألتو كال ادرس المرحلة السادسة طب كلتلو زوجتي بالمرحلة الخامسة
.
.
كال عادي دكاترة الطب للمرحلة الخامسة كلهم اصدقائي ومنهم صادق الي جان ويانا كلتلو وينو هسا كال ما اجى كلتلو لعد ما الي قسمة اشوفو
.
.
وحجيت وياه نص ساعة وبعدها طلعت وتوقعت جنى بالمحاضرة لان جانت مبلشة المحاضرة الاولى من رجعت للبيت شفت نفسي مو نعسان كعدت بالصالة يم اهلي وطلعت تيلفوني وفتحت الفيس واكلب بيه
.
.
ومرت الايام بهذا الروتين يوميا اودي جنى ومن تخلص لو اني لو واحد من اخواني يرجعوها وبالبداية جانت كلش تضغط على نفسها بالدراسة علمود تكدر تعوض الايام الي ما داومت بيهن
.
.
جنى: بعد مدة طويلة من الدراسة والتعب المكثف كدرت اسيطر عالمواد بس الي صار بهاي المدة ما جان من صالحي لان رانية تغلبت علي هههههههه
.
.
وجود مصطفى اثناء غيابي بالجامعة خلاه يهتم بيها علمود يخفف عن امو وهي رغم تعلقها بي من ارجع بس تعلقت بابوها مثلي ويمكن اكثر لان اني حتى من ارجع التهي بالدراسة وهو يبقى وياها
.
.
من وصلت عمر 35 يوم بلشت توزع ابتسامات وجانت اول ابتسامة الي جنت نازلة من الغرفة بعد ما كملت دراسة وهي بحضن مصطفى بالصالة
.
.
اخذتها منو وكلتلها ماماتي تأخرت عليج يا روحي وهي ابتسمت لو اخذت عقلي من الفرحة ماعرف شسوي اخذتها ركض ورحت للغرفة وهم يضحكون على ردة فعلي
.
.
وهي صحيح جانت ردة فعلي طفولية زيادة عن اللزوم بس تخيلو اول طفل الي واول ابتسامة اكيد ردة فعلي تختلف عن اي ابتسامة ثانية اشوفها
.
.
لاعبتها بالغرفة جانت بس تبتسم ماتضحك ولا يطلع صوتها بعدها اخذت عبايتي ونزلت كلت لمصطفى اخذني لاهلي
.
.
مصطفى: شعندج رايحة لاهلج
جنى: اريد اشوف ماما ضحكة رانية
كاضم: شدو روسكم يا كرعان
.
.
جنى: انت مو اكرع
كاضم: حتى اني راح اشد راسي بسببج
جنى: طلعتلو لساني
.
.
كاضم: اكلك صوفي متأكد مرتك بكامل قواها العقلية
مصطفى: اشك بالموضوع
شاهين: لا خوية تأكد مو تشك
.
.
هيثم: السلام عليكم
جنى: سويت نفسي ابجي .. شوف هيثم بجوني
هيثم: منو بجاج
.
.
جنى: مصطفى وكاضم وشاهين
هيثم: دعوفيهم الي يشوفهم عبالو غورلات منهزمات من حديقة الحيوانات
كاضم: هههههههههه شيخنا طلع حيوان
.
.
جنى: من كال هيج كاضم وشاهين مسكو بطونهم من الضحك ومصطفى يعرف هيثم ما جان قصدو بس سوا نفسو معصب علمود هيثم ما يعيدها
.
.
الحجية ابتسمت ابتسامة خفيفة اني اخذت هيثم وانهزمنا عن مصطفى شوية واجى كاضم اخذني لاهلي اول ما وصلنا رحت ركض على امي بحيث وجها انكلب اصفر عبالها صاير وياي شي
.
.
من كلتلها اريد اشوفج ابتسامة رانية سحبت نفس كالت بربج جنى هاي سالفة تسوينها بي عبالي شوف شبيج طلعت علمود رانية
.
.
هيثم: هي من يومها مخبلة
جنى: انت معليك انت المخبل
هيثم: لا والله انتي مخبلة
.
.
جنى: ترا اكوللها
هيثم: كوليلها
رؤى: شنو تكولين
.
.
جنى: ماكو شي ماما
رؤى: دحجي شمصخم اخوج
جنى: لا ماما خليني ماسكة مستمسك عليه
.
.
هيثم: كلت لمصطفى واخوانو يشبهون الغورلات
رؤى: الله يصخم وجهك على هالسالفة
جنى: شبيج ماما دا يتشاقة وياهم
.
.
رؤى: اني كم مرة كلتلك لا تتجاوز على الاكبر منك
هيثم: ماما دا اشاقيهم
جنى: اي ماما حتى هم اخذو الموضوع بضحكة
.
.
رؤى: طبعا ياخذوه بضحكة لانهم ما يريدون يفشلوه او يفشلوج بس هو فشلنا وصخم وجهنا كدامهم
علي: شكو رؤى صوتج طالع
.
.
رؤى: تعال شوف ابنك شمسوي
علي: شمسوي
رؤى: يتجاوز على مصطفى واخوانو
.
.
علي: بعصبية شنوووو
جنى: بابا جان يتشاقة وياهم
علي: احجيلي شكال
.
.
جنى: والله جان يتشاقة وياهم
علي: جنننننى احجيلي
هيثم انخلس من شاف بابا عصب
.
.
جنى: حجيتلو الي صار وفهمتو يتشاقة وياهم
علي: تعال هيثم تعال هناااااا
.
.
جنى: من صاح عليه اني من يمي رجفت من الخوف تقرب عليه هيثم مسكو بابا من اذنو اني من يمي بجيت عليه حطيت رانية بحضن ماما علمود اروح لبابا
.
.
قبل ما اوصلو ضرب هيثم راشدي مع صوت الراشدي طلعت صرختي ومسكت هيثم حضنتو خطية هو مثل الي انصدم لان اول مرة بابا يضربو وعلمود موضوع ما يستاهل
.
.
بقى ساكت بس يباوعلي بابا من سمع صرختي كأنو حس على نفسو بس ما حجى شي كعد عالقنفة ومبين عليه الضوجة هيثم بعد ايدي ببرود وراح للطابق الثاني
.
.
اني اجيت فرحانة وخربت فرحتي اتصلت على كاضم كلتلو تعال اخذني وباوعت لماما كلتلها مو كلتلج دا يتشاقة وياهم
.
.
رؤى: خلي يتعلم يحترم الاكبر منو
جنى: ماما لخاطر الله دا يتشاقة مدا يغلط عليهم
رؤى: نفس الشي
.
.
جنى: هاي عود انتي امو
علي: جنى كافي عاد
جنى: بابا مع احترامي الك بس ما الك حق تضربو
.
.
علي: هاي هي اكل نصيبو
جنى: تمام تصبحون على خير
.
.
طلعت من يمهم واني معصبة وكلش مستغربة معقولة بابا وماما يتصرفون هيج وماخذين الموضوع بكل برود ولا كأنهم ضربوه وهو مو غلطان بشي
.
.
انتظرت كاضم بالحوش ورانية بحضني تبجي لان جوعانة وتعبانة تريد تنام واني كوة ماسكة اعصابي واحس دمي يفور من العصبية
.
.
وفوكها ابوي وامي الي ضربوه يعني ماكدر اسوي شي وياهم من اجى كاضم لاحظ انو اني معصبة سألني كلتلو ماكو شي ورجعت وياه
.
.
من دخلنا البيت عفت الكل وصعدت لغرفتي سمعت واحد صاحني بس ما ميزت الصوت لان مو مركزة بشي وما رديت كملت طريقي وبس اريد اوصل الغرفة
.
.
اول ما دخلتلها سكرت الباب صرت وراه ونزلت دموعي على هيثم وكل ما اتذكر منظرو بعد ما بابا ضربو احس اموت من القهر حسيت الباب اندك وصوت مصطفى خارج الغرفة
.
.
كمت مسحت دموعي وفتحتلو الباب وانداريت بسرعة علمود ما يشوف دموعي كال شبيج جنى مو دا تصيحج امي كلتلو رانية جوعانة
.
.
مصطفى: شبيه صوتج
جنى: مابي شي
مصطفى: تقرب ورفع وجهي .. شبيج ليش باجية
.
.
جنى: ماكو شي موضوع مو مهم
مصطفى: دحجي عاد شبيج
جنى: بابا ضرب هيثم وزعلت عليه
.
.
مصطفى: ليش ضربو
جنى: استحيت اكلو علمودكم .. ماعرف
مصطفى: شنو قابل اجى ضربو بدون سبب
.
.
جنى: ماعرف جان معصب عليه وضربو
مصطفى: دكافي ابوية انتي ياما انضربنا
جنى: بس بابا ما يضرب الاطفال اول مرة يضرب هيثم
.
.
مصطفى: عادي بنيتي عادي ابوه ويمون عليه لعد لو شايفة ابوي شجان يسوي شتسوين
جنى: شنو جان يسوي
.
.
مصطفى: اكلنا كتل منو اني واخواني لحد ما ملينا
جنى: ليش
مصطفى: جان من يعصب بس ربج يهديه والي يغلط الله كتبها عليه
.
.
جنى: بس مايصير هيج
مصطفى: لا يصير لان بسبب تصرفاتو طلعنا زلم حوك وما نرضى احد يعيل بينا وما طلعنا مايعين
.
.
جنى: هذا مو تبرير
مصطفى: مدا ابررلج دا افهمج انو الاب عادي يضرب ابنو
جنى: وإن شاء الله ناوي تضرب جهالك انت هم
.
.
مصطفى: اذا يستاهلون اي اكيد
جنى: لا والله خاف ما تشتهي
مصطفى: هههههههههه يلا يابة لخاطر امهم اسامحهم
جنى: تمام
.
.
بكلامو كدر يمتص عصبيتي وقهري واني رضعت رانية ونومتها وكلت باجر يرجع الوضع طبيعي ونمنا ومرت كم يوم جان روتين طبيعي وماكو شي مهم
.
.
الشي الي تغير انو هيثم ما اجى ابد من ذيج الليلة وحتى الحجية لاحظت غيابو ومن سألتني كلتلها يجوز عندو دراسة وسكتت ومر اسبوع وهو ماكو جنا كاعدين بالصالة ورا الغدا
.
.
الحجية: كاضم
كاضم: ها يمة
الحجية: انت مسمع هيثم كلام لو مزعلو
.
.
كاضم: لا يمة علمود شنو ازعلو
الحجية: شو مدا يجي
كاضم: والله مدري يمة
.
.
مصطفى: جنى
جنى: نعم
مصطفى: ابوج ضرب هيثم علمودنا مو
.
.
جنى: لا مو علمودكم
مصطفى: احجي الصدك
جنى: اي ما يريدو يتجاوز عليكم
مصطفى: والله جنت حاس
.
.
جنى: الولد انصدمو لان ما جانو يعرفون ان بابا ضرب هيثم والحجية نفس الشي ومصطفى من كال هيج عافنا وطلع وعرفتو يريد يروح على اهلي
.
.
مصطفى: بالبداية جنت عبالي هيثم كاسر شي لو معصب عليه علي علمود موضوع ثاني وضربو بس من لاحظت غيابو وبالاخص بعد ذاك اليوم شكيت بالموضوع
.
.
ومن سألت امي شفت جنى توترت وتأكد شكي وكدرت اخليها تعترف وكلش زعلت لان ضربو علي على موضوع تافه وما ينحجي بيه اصلا
.
.
اول شي جاهل ثاني شي مو قصدو رحت دكيت الباب وفتحلي علي ورحب بي ودخلت سلمت على ام هيثم وكعدت جان هيثم موجود كلتلو جنى تريدك
.
.
كال تعبان واريد انام العصر اروحلها كلتلو لعد روح نام لان ما جنت اريد احجي كدامو علمود ما يعتبرني افزعلو وتطلع عينو من راح باوعت لعلي كلتلو كل عقلك الي مسويه انت
.
.
علي: ليش شنو مسوي اني
مصطفى: ليش ضارب الولد
علي: لان يستاهل ضربتو
.
.
مصطفى: ابو هيثم هسا عجبك من هيثم قاطعنا وصارلو فوك الاسبوعين مو طاب بيتنا
علي: مصطفى اني ما اريدو يطول لسانو عالاكبر منو
.
.
مصطفى: ايمتى طول لسانو احجيلي بس مرة وحدة طول لسانو على الاكبر منو وانت موجود
علي: اني ما اريدو يسويها لا بوجودي ولا بعدمو
.
.
مصطفى: ام هيثم بلا امر عليج صيحيلي هيثم
رؤى: تمام
مصطفى: وانت علاوي بعد ممنوع تضربو علمودنا
.
.
علي: ههههههه شو صارت علاوي
مصطفى: علمود اكدر امنعك هههههههه
علي: خلص يابة تامر امر
.
.
مصطفى: ما يأمر عليك ظالم
هيثم: ها مصطفى صحتلي
مصطفى: اي تعال وياي الك عندي مفاجأة
.
.
باوع لابوه كلتلو مدخلك بابوك هو موافق تعال وياي اخذتو وطلعنا ركبنا بسيارتي وتوكلنا وصلت عند نهر دجلة بمكاني المفضل وكلتلو شرايك بالمكان
.
.
هيثم: كلش حلو
مصطفى: هسا احجيلي ليش ما تجي علينا
هيثم: دا ادرس وانسى
.
.
مصطفى: عيب عليك تجذب
هيثم: مدا اجذب
مصطفى: انت من يوم ضربك ابوك ما اجيت
.
.
هيثم: اي عادي مو فدشي مهم
مصطفى: اذا مو فدشي مهم ليش لعد ما تجينا
هيثم: ماطول اني قليل ادب خليني ابقى بالبيت علمود ما اتجاوز على احد اكبر مني
.
.
مصطفى: ترا زودتها هي ضربة لعد لو شايف ابوي
هيثم: شبيه
مصطفى: حجيتلو على ابوي
.
.
هيثم: كاضم وشاهين يستاهلون بس انت ليش يضربك
مصطفى: لان اني اساس المشاكل
.
.
حجيتلو عني اني واخواني قبل جنت ادزهم يتحارشون بالولد وارجع افزعلهم واكتل الي تحارشو بيه ويوميا نحصللنا كتلة من ابوي وما يفيد بينا
.
.
وحاولت اطلع هيثم من الوضع الي جان بيه لان احبو كلش وما يهون علي اشوفو زعلان وابقى ساكت وما اسوي شي علمود اساعدو
.
.
من صارت الدنيا مغرب اتصلت على امي كلتلها لا تسوون عشى راح اجيبلكم وياي واخذتو على مطعم كلتلو شنو رايك ناكل هنا وناخذلهم حصتهم لو ناخذ سفري وناكل وياهم
.
.
كال لا وياهم احسن كلتلو لعد انتظرني ونزلت اخذت سفري للعائلة كلهم ورجعنا سوا للبيت نزلنا العلاليك ودخلنا ودزيت وياه علاكة كلتلو توديها لاهلك وترجع تتعشى وياي
.
.
واخذها وداها ورجع كاضم كال لعد خلي علي يوميا يضرب هيثم علمود تجيبلنا سفري كلتلو لا المرة الجاية على حسابك كال لعد بطلنا خلي يضربني اني ههههههههه
.
.
تعشينا وخلصنا وبقى هيثم عدنا لوقت النوم ورجعت الماي لمجاريها وصار يجينا مثل قبل من ذاك اليوم
.
.
مرت الايام وبيوم الخميس بالليل اخذتلي دوش وطلعت كعدت عالسرير عند جنى وهي جانت ماسكة كتاب تراجع بيه عافتو وباوعتلي
.
.
جنى: شرايك نكتب قصتنا
مصطفى: شنو من قصة بالضبط
جنى: قصة حياتنا اني وياك
.
.
مصطفى: وليش نكتبها
جنى: علمود الناس تقراها
مصطفى: يعني تريدين تشوفيها للناس
.
.
جنى: اي لعد احنا نقراها
مصطفى: لعد انسي
جنى: باستغراب .. ليش
.
.
مصطفى: تركي الموضوع جنى لان ماراح اوافق
جنى: بس فهمني ليش
مصطفى: لان ما اريد الناس تدخل بخصوصياتنا واحجيلهم عن اهل بيتي
.
.
جنى: اولا راح تكون الاسماء متغيرة ثانيا اسم عشيرتكم ماراح ينذكر واذا تريد حتى المكان نغيرو
مصطفى: وليش مصرة على الموضوع
.
.
جنى: لان حابة الناس تعرف الي عشتو ويعرفون قصة حبنا
مصطفى: وانتي مفكرة انو سهلة علي احجي للناس عنج
جنى: ترا مثلنا مثل اي ثنين حبو بعض وتزوجو
.
.
مصطفى: شذكرج بالموضوع هذا
جنى: وحدة من صديقاتي كلتلي وقريت قصة وعجبتني الفكرة بس لازم اخذ رايك قبل ما اسوي شي
.
.
مصطفى: عوفيني افكر بالموضوع والله كريم
جنى: تمام مثل ما تحب
.
.
مصطفى: بقيت افكر بالموضوع ومن جهة ما اريد اخجلها ومن جهة اشوف الموضوع مو راهم بس الي مريحني انو معلوماتنا راح تبقى مجهولة
.
.
.......... يتبع
لايك وتعليق حلو مثلكم ❤
حطولنا ارائكم وتوقعاتكم ❤