طيوف الماضي

البارت(26) طيوف-الماضي الكاتب#احمد

تصويت ومتابعه لحتى توصلكم باقي البارتات❤😁
#طيوف_الماضي
بقلم #احمد
البارت_26
.
.
جنى: اتصلت على مصطفى بس بقيت ويا عمي وعمتي بالصالة علمود ما يشكون بشي من اروح لحالي بس صدمني صوت كاضم من فتح الخط
.
.
كاضم: الو
جنى: هلا كاضم شلونك
كاضم: لك هلا والله شلونك ولج
.
.
جنى: ههههه الحمدلله وانتو
كاضم: الحمدلله شخبارج
جنى: على الله
.
.
كاضم: ليش تتصلين على مصطفى خطية من الخوف دا يبجي بحظن امي وخايف منج
مصطفى: مو اجيك يول
.
.
جنى: ههههههه اريد ارقام اماني وهنادي والحجية منو
كاضم: من عيناي وصدك اني هم عندي خط خاف ما تعرفين
جنى: ههههههه انطينياه انطي لعمو
.
.
كاضم: خرب حظي ههههههه
مصطفى: دجيب التيلفون لا اطيح حظك .. الو
جنى: هلا مصطفى شلونك
.
.
مصطفى: الحمدلله وانتي شلونج
جنى: الحمدلله ممكن رقم البنات وخالتي
مصطفى: هسا ادزهن الج كلهن برسالة
.
.
جنى: تمام مشكور
مصطفى: العفو
.
.
جنى: سكرت منو
علي: لعد منو الي حجى وياج قبلو
جنى: كاضم اخو مصطفى
.
.
علي: شلون اخلاقهم هو وشاهين
جنى: ماكو منهم كلش محترمين ومستحيل يعارضون قرار مصطفى
.
.
علي: الله يحفظهم لبعض
جنى: آمين
رؤى: شنو قررتي علمود دراستج
.
.
جنى: ماعرف والله
رؤى: خلي ابوج يسجلج بالخارجي
جنى: شنو رايك بابا
.
.
علي: مثل راي امج
جنى: لعد سجلني .. شفت اجتني رسالة
علي: وصلتج الرسالة
.
.
جنى: اي
علي: تعالي اعلمج تحفظيهن
.
.
جنى: رحت عليه كال كدامج كلشي مكتوب اقريه وراح تعرفين شنو تضغطين وشلون تستعمليه وكضينا الليل كلو بيه لحد ما بقى بيه شحن 20 واخذتو عالشحن
.
.
مصطفى: باوعت على كاضم كلتلو راح تبقى طايح حظ
كاضم: ليش شسويت اني
مصطفى: لو سامعك خالها جاي ترقمها شيكول علينا
.
.
كاضم: يابة على كيفك منو مرقمها
مصطفى: سمعتك باذني
كاضم: مصطفى كافي عاد زودتها
.
.
مصطفى: تعال اخذ راشدي بعد
كاضم: اذا تحبها مو معناها تفسر تصرفاتي بكيفك انت بنفسك تعرف من حجيت هيج اتشاقة مو شي ثاني
.
.
مصطفى: اني دا احجي على عمها مو علي
كاضم: ترا حتى الاثول يعرف قصدي شنو من حجيت هيج فلا تجي تفسر كلامي بكيفك
.
.
مصطفى: انكلع من وجهي كاضم
كاضم: لا انكلع ولا شي
مصطفى: شو صاير ترادد وقليل ادب انت
.
.
كاضم: لان تستاهل المرادد انت
مصطفى: عيد عيد شنو كلت
كاضم: كلام الملوك لا يعاد
.
.
مصطفى: كمت عليه ووكفو بيناتنا شاهين وامي واحجي عليه وهو يرادد صحيح ما يقلل من قيمتي بس حرك اعصابي لان يرد علي
.
.
كاضم: تورطنا بيك لان حبيت البنت
مصطفى: لك منو كال احبها لك زمال
كاضم: مو ملاحظ تصرفاتك انت
.
.
شاهين: كافي كاضم انجب واسكت
كاضم: دروح انت كل عقلو اسكت
شاهين: لك كاضممممم
.
.
كاضم: قسم بالله فلا اسكت والا اطلعلك كلب يمصطفى
مصطفى: يمة بس عوفيني خلي اكسر سنونو
كاضم: انطيني رقم عمها علمود اسوي الي ما تكدر تسويه انت
.
.
مصطفى: علمود تفضحنا ويا الناس مو
كاضم: ليش من ايمتى صار الحلال فضيحة
مصطفى: فضيحة لان جانت عايشة عندنا
.
.
كاضم: شبيك صرت تخوط بصف الستكان شنو فضيحة لان سكنت عدنا ترا ما سوينا وياها الا كل خير والحمدلله ما قصرنا وياها وعاملناها مثل بناتنا
.
.
مصطفى: عافنا وطلع اني جنت اكدر ابعد شاهين وامي واوصلو بس اول شي خفت لا ادفع امي بدون ما انتبه وتتأذة وهم ما جنت اريد اضربو بس احجي عليه
.
.
من طلع كعدت بالصالة وطالعة روحي منو من هديت شوية طلعنا اني وشاهين للمضيف لكيتو كاعد ومكابل عمي ويضحك هو وياه وكضيت الليلة هناك لحد وقت النوم
.
.
جنى: كعدت ثاني يوم مثل كيل يوم التهيت ويا هيثم والريوك ومن تريكت وخلصت واخذت التيلفون واتصلت باماني لان اعرفها تكعد قبل هنادي
.
.
اماني: الو
جنى: هلا امون شلونج
اماني: هلا بام المشاكل
.
.
جنى: هههه ليش شسويت اني
اماني: كولي شنو الي ما سويتيه
جنى: والله ما اتذكر سويت شي
.
.
اماني: هو الحلو بدون ما يسوي شي يسبب مشاكل
جنى: هههه حبيبتي عيونج الحلوات احجيلي شصاير
اماني: بعدين احجيلج هسا كليلي عمامج شلونهم
.
.
جنى: الحمدلله زينين ومكيفين بهيثم
اماني: من كال مصطفى صايرلهم طفل كلش فرحتلهم
جنى: ربي يديم فرحتج عندي الج خبر
.
.
اماني: شنو هو
جنى: راح اسجل خارجي وارجع ادرس
اماني: ربي يوفقج حبيبتي اهتمي بدراستج واي شي تحتاجيه انصلي علي وإن شاء الله اكدر اساعدج
.
.
جنى: تسلمين حبيبتي عمي  وعمتي هم معلمين ويكدرون يساعدوني اكيد
اماني: حلو كلش لعد راح يسهلون عليج بعض المواد
.
.
جنى: اي وهو كذلك
هنادي: هلا ولج شلونج جناوي
جنى: هلا حبيبتي شلونج
.
.
هنادي: يولي حيوانة ليش ما تتصلين على تيلفوني
جنى: مو هسا جنتي شحلاتج شبيج انجلبتي
هنادي: ههههههه شسوي غير انتي تستاهلين الحجي
.
.
جنى: طيح الله صبغج
هنادي: هو بدون ما يطيح صبغي محد معبرني انوب يطيح صبغي
.
.
جنى: خلص بس يكبر هيثم اخليه يعبرج هههههه
هنادي: ههههههه منا لوقتها اصير سلبوح
جنى: ههههههههه خرب بيومج على هالسالفة
.
.
هنادي: يولي البارح ت..... وسكرت حلكها اماني
جنى: شصار البارحة .. الو .. الوووو
هنادي: ها ولج ما صار شي
.
.
جنى: لا صاير
هنادي: صدك تريدين تدرسين
جنى: اي .. بس غلسي اني اعلمج
.
.
هنادي: ربي يوفقج حبيبتي
جنى: ويوفقج
هنادي: يلا باي
جنى: بايات
.
.
سكرت منها بس شغل بالي شنو الي صاير البارحة وما حجت عنو رحت عند عمتي كضيت وقتي وياها
.
.
مشت الايام بشكل روتيني ورغم وجود عمامي بس افتقدت اهل مصطفى لان عشت وياهم مدة طويلة بس هاي هي ما بقى بيناتنا غير الاتصالات
.
.
عمي دبرلي كتب سادس ابتدائي وبلشت بالدراسة جانت عمتي وياي بكل حرف وجانت المادة بيها نوع من السهولة بس لان عفت المدرسة من زمان صار عندي هواي نسيان بالدراسة بس ما جان الو اثر كبير علي
.
.
بلشت ادرس واشد حيلي جنت منظمة وقتي يوميا بالنهار دراسة وبالليل تيلفون وعمتي جانت المراقب علي اي تهاون مني ما تقبل ولازم ادرس دائما
.
.
من فتح التسجيل الخارجي راح عمي وسجلني اني الشي الوحيد الي سويتو اني رحت وياه صورت ورجعت والباقي هو كملو من البداية للنهاية
.
.
ومن كمل تسجيلي كمت اركز وادرس اكثر لان الموضوع صار جدي وما يقبل اي تهاون وبالاخص ان التمهيدي كتاب كامل مو نص الكتاب
.
.
درست هواي وجنت بعض الاحيان اترك التيلفون بالليل واقرا واي شي ما اعرفو اسأل عمي وعمتي عنو وهم يفهموني
.
.
اتصالاتي باهل مصطفى قليلة لان كلتلهم دا ادرس ومصطفى من رد علي جواد لليوم ما سمعت صوتو بس بسبب انشغالي بالدراسة ما لحكت افكر بيه
.
.
ورغم هو سادس ابتدائي بس هم يعتبر صعب لان مرحلة جديدة علي تعتبر واول مرة ادرسها اجانا الشتاء وجان بارد برد مو طبيعي
.
.
ولان نعتبر مناطق شمالية جان البرد عندنا لا يوصف وابرد من العمارة بهواي عمي علي اشترى برميل كاز وكال هذا الج وحدج ههههه
.
.
وخطية كل هالشي سواه علمود اكدر ادرس بالغرفة براحتي وما ابرد رغم انو احب ادرس بوجودهم بس كال احتياط هذا
.
.
جانو حاطين صوبة نسميها صوبة بواري تجي صغيرة نسبيا وتنحط بوسط الغرفة اكو انواع منها دائرية ومربعة وبعضهن على الحطب وبعضهن عالنفط
.
.
والي جانت عند خالي يحطلها نفط والدخان الي يطلع منها يعبر مع البوري لخارج البيت اكو بعض ناس يحفرولو مكان بالحايط واكو بعضهم مثل عمامي يعبروه من فتحة صغيرة بالشباك
.
.
وجانت من تشتغل الغرفة تصير كلش دافية وجنا دائما نكون حريصين على هيثم ان يكون بعيد عنها لان مرات ينكلب وهو متمدد وجان الو مكانة كلش جبيرة بكلبي لان حلو كلش ومتعلقة كلش بيه
.
.
بدينا بتشغل الصوبات من بداية الشهر 12 وجنت اني من عشاق الشتاء ونسيت اذكرلكم انو ببداية الشتاء قرر عمو علي انو نروح للموصل نتسوك ملابس الشتاء من هناك
.
.
وثاني يوم من الفجر توكلنا عالموصل رحنا اول شي على سوق باب الطوب الي جان اكبر سوق بالموصل وارخص سوق بالعراق اني بالنسبة الي جان جولة سياحية اكثر من كونها جولة تسوق
.
.
جانت الاسعار مناسبة للفقير والغني وتشوف الي مفتح بسطية والي يمشي والي يسأل عالاغراض والي رايح لدكتور وتسمع لهجة عامية ولهجة مصلاوية قحية
.
.
يعني جان صورة مبسطة عن مجتمع الموصل عامة رغم جان الجو بارد وملابس الشتاء غالية بس جانت ارخص من اسعار الملابس الصيفية بالعمارة
.
.
بحيث ال 100 الف تكون زايدة عالبنت بس بدون مكياج لان المكياج وبالاخص الماركات اكيد يكونن غاليات
.
.
ومرينا على سوق الصفارين والي هو من ضمن باب الطوب وهو عبارة عن فرع طويل ومن الجهتين محلات مواعين من كل الاشكال والانواع
.
.
يعني النسوان الي يحبن الطبخ وبالاخص الكبار بالعمر من يدخلن هنا ما يطلعن بسهولة حتى لو ما يشترن يبقن بس يتجولن ويشوفن انواع المواعين
.
.
وبعد ما خلصنا من سوق الصفارين رحنا على مطعم وما احجيلكم عن كباب الموصل بس الريحة توصفلك كمية المذاق الي راح تحس بيه
.
.
اني طلبت نفر كباب وعمي نفر تكة وعمتي برياني وخلال خمس دقايق صارت المقبلات كدامنا ومشكلة حمص بطحينة وزلاطة عادية وزلاطة باذنجان وزلاطة فواكه ولهانة واكو كم نوع نسيتهن
.
.
وبعدها ب 5 دقايق اجى الطبق الرئيسي اكلنا لحد ما انتفخنا وطلعنا وبعدها رحنا بالسيارة لسوق الجديدة والي هو عبارة عن فرع واحد بس طول كلش وعالجانبين اكو محلات وبالوسط بسطيات وجان سوق متكامل من كلشي
.
.
تمشينا بيه اني وعمي وعمتي وعجبني كم شغلة من البسطيات من ضمنهن طاكية (قبعة) لهيثم وتراكسود لعمي ودشداشة وشال لعمتي
.
.
وجانت اسعارهن مقاربة جدا لباب الطوب لان نفس المدينة قبل ما نطلع جاب عمي نفرين كباب وواحد تكة وجاب جيس فلافل ومرينا للكصابين اخذنا منهم لحم واخذت عمتي مصارين بقر كلتلها كل عقلج تريدين تاكليهن
.
.
رؤى: ليش شبيهن
جنى: مو طيبات
رؤى: يبووو هم عندج ذوق انتي
.
.
جنى: والله مو طيبات
رؤى: اني وابوج ناكلهن
جنى: من اتذكر انهن ببطن البقرة تلعب نفسي
.
.
رؤى: قابل اني راح اسويهن بدون ما انظفهن
جنى: حتى لو تنظفيهن
رؤى: شوفيهن بيهن شي
.
.
جنى: باوعت عليهن فعلا منظفيهن وصايرات عبارة عن قطعة بيضة شبيها بالشحم الي موجود بذنبة الاغنام ومابيه اي وسخ وفوك هاي تنظفهن هي قبل ما تطبخهن
.
.
بعدها رجعنا للبيت جانت الدنيا مغرب من وصلنا تعشينا بس لان اكلنا هواي بالغدا ما اكلنا هواي بالعشى واني ما كدرت اكمل نص نفر وهو جان عدال نفرين مقارنة بالكباب الي اكلتو ببغداد من جنت ويا مصطفى
.
.
بعدها حطيت اغراضي بغرفتي ونمت وجريتها بنومة وحدة للصبح ومن كعدت الصبح رحت للمطبخ تريكت ورجعنا اني وعمتي لغرفتي
.
.
عزلت ملابسي ولبست الجدد علمود عمتي تشوفهن علي وشلت الملابس الصيفية ومن ضمنهن شفت الفستان الي شافني بيه مصطفى
.
.
لبستو وشوفتو لعمتي وتخبلت عليه ومن شافني وهي تسمي بالله لحد ما نزعتو وكالتلي لا تلبسيه لا تنصابين بالعين وما كدرت احجيلها عن موقف مصطفى
.
.
ومن خلصنا من الملابس رجعنا عند عمي وسألتو شكد صرف عالمسواك كال اقل من 500 الف كلتلو كل هذا باقل من 500 كال يوصل بحدود ال 250 و 300 اكثر شي
.
.
كلتلو والله كلش زين اني كلت يوصلن اكثر من 600 كال لا الاسعار رخيصة ومشت الايام الشتوية وبدت المربعانية
.
.
(كلمة يستخدمونها العراقيين للتعبير عن الايام الاكثر برودة بفصل الشتاء والي تبدي من يوم 25/12 الى يوم 5/2 )
.
.
وكلمة مربعانية تعني 40 يوم واذا نريد نحسبها بالمضيوط فهي تنتهي بيوم 3/2 بالضبط لان شهر 12 وشهر 1 يكونن 31 يوم
.
.
ومن تخلص المربعانية تبلش الاجواء الباردة بالدفو يوم بعد يوم ويبلش العشب يغطي المناطق المحيطة بمنطقتنا والي يكون مختلط بين الحنطة والشعير بالاراضي الزراعية ونبات طبيعي بالاراضية المتروكة والجبلية
.
.
بعدها بلشت الامتحانات التمهيدية وجان مركزي الامتحاني بالموصل وجان الموضوع صعب على عمي لان لازم نروح ونرجع يوميا بس ما بيدنا حل ثاني
.
.
فصرنا يوميا نروح اني وياه للموصل امتحن ونرجع وكالي هذا تمهيدي وحتى لو مو درجة كاملة عادي بس مع ذلك لا تتركين منهن شي واخذت بنصيحتو وجنت اجاوب
.
.
بس جانت الاجواء الامتحانية جديدة علي لان وزارية والمعلمين كلهم غريبين فجنت احس برهبة كلش جبيرة بس هالشي ما جان يمنعني انو اجاوب
.
.
ومن ابلش احل انعزل عن العالم كلو وجنت متوقعة نفسي اكبر وحدة بالامتحانات بس انصدمت انو اكو اكبر مني بهواي بعضهم كبار بالعمر وبعضهم عمرهم يوصل لل 40
.
.
واكو اصغر منهم واكو بعمري واكو نسبة قليلة اصغر مني يعني اكو اعمار مختلفة من الناس وبعد معاناة طويلة نسبيا كدرت اخلص من الامتحانات بس بقت علي امتحانات اخر السنة
.
.
والحمدلله كانت اجوبتي زينة بس اسئلة الفصول الاخيرة جنت اخربط بيهن لان ما لحكت ادرسهن بس كانت درجاتي تجيبلي نجاح بكل المواد
.
.
من خلصت اخذتلي استراحة وجانت عمي يضحك ويكول استراحة البطل بعد الحرب وبهاي الاستراحة اتصلت على اماني كالتلي دا يدرسن هي وهنادي طب
.
.
وحجتلي عن الجامعة وخلتني اتشوق الها هواي كلتلها إن شاء الله اوصلها واعيش هالحياة الحلوة الي دا تحجيلي عنها وهي كالت آمين
.
.
مصطفى: بعد اتصال جنى بي حفظت رقمها بس ما جنت اكدر اتصل عليها اول شي ما الي حق اتصل عليها وثاني شي خاف التيلفون عند عمها او عمتها لذلك ما حبيت احط نفسي بموقف مو حلو
.
.
وكاضم من شاف ماكو اتصالات بيني وبينها سكت وما حجى وجنت اعرف اخبارها من اماني بس جنت كلش اشتاقلها واحس بفراغ جبير بغيابها ومو كادر انساها مثل ما جنت اتوقع
.
.
عشت بمعاناة كلش قوية جان افضل اوقاتي من يكون عندي كعدة ويا عشيرة لو اكون طرف بصلح بين عشيرتين متخالفات لان بهذا الوقت يكون كل تفكيري عن المشكلة الي صايرة وشلون احلها وبهاي الحالة انسى التفكير بجنى
.
.
ومن اكعد لحالي ترجع صورتها كدامي من تفز من تضحك من تبجي من تمشي من تكعد من تحجي من تسكت من شفتها بالفستان الاسود من شفتها بالعيد واكثر وقت اتذركها بيه من اريد انام تبقى تتجول براسي وذكرياتي لحد ما انام
.
.
........ يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413