طيوف الماضي

البارت(19)طيوف_الماضي الكاتب#احمد

تصويت ومتابعه لحنى توصلكم باقي البارتات والقصص😁❤
#طيوف_الماضي
بقلم #احمد
البارت_19
.
.
مصطفى: دا نحجي وطبو شرطة سلمو وكعدو كالو رايدينك بموضوع بس ماطول مشغول يتأجل ومن كالو هيج اهل الولد ترخصو وراحو كلتلهم تفضلو بشنو رايديني
.
.
كالو البنت الي قدمت دعوة طلاق انت وياها مخطوفة من 7 سنوات وجانت قاصر وحسب الادلة المقدمة انت متورط بخطفها وياريت تجي ويانا لان الضابط يريد ياخذ اقوالك
.
.
رحت وياهم وبحكم اني شيخ استقبلني الضابط استقبال حلو عكس الباقين والكل يعرفني ما ارتكب ذنب متعمد بيه يعني مستحيل اخطف جنى كعدت
.
.
الضابط: شلونك شيخ مصطفى
مصطفى: يحفظك الله الحمدلله بخير
الضابط: حجولك الولد عن الموضوع مو
.
.
مصطفى: اي حجولي
الضابط: اي وشنو رايك انت
مصطفى: البنت صحيح مخطوفة قبل 7 سنين
.
.
الضابط: وشجابها عندك
مصطفى: تعرف منطقة الدعارة الي اقتحموها قبل كم يوم
الضابط: اي اعرف بيها
.
.
مصطفى: هي جانت هناك
الضابط: يعني جانت تمارس الدعارة
مصطفى: بعصبية .. هيج دا تغلط بحقي انت
.
.
الضابط: وليش اغلط بحقك اذا انت تكول جانت هناك
مصطفى: اولا اني ما اجيب زانية لبيتي وثانيا انت جايبني هنا لان قدمتلها دعوة طلاق يعني جانت متزوجة البنت
.
.
الضابط: الي متزوجتو يكول مو لامسها
مصطفى: شلون يعني
الضابط: الشاب عقيم وسوينا تحليلات للتأكيد وطلع فعلا عقيم وما بيه اي قدرة
.
.
مصطفى: المهم هسا اني شنو المطلوب مني
الضابط: البنت لازم ترجع لعمامها
مصطفى: البنت ما تطلع من بيتي لو تنكلب الدنيا
.
.
الضابط: بس هيج ما يصير شيخ واني ما اريد يحققون وياك مرة ثانية والبنت اولها واخرها ترجع لعمها
مصطفى: طيب انطيني مهلة لباجر بس اشوف البنت
.
.
الضابط: اذا البنت كالت تريد تبقى عندك القانون ما يتدخل بالموضوع وتبقى عند العشائر
مصطفى: تمام مشكور
الضابط: العفو
.
.
مصطفى: طلعت منو ورحت للبيت محتار بموضوعها لان حتى لو ما كدرو ياخذوها بالقانون ياخذوها بالعشائر لان مالي اي حق ابقيها يمي
.
.
من وصلت البيت كلت خلي اسألها واشوف ردها واذا قبلت تبقى خير على خير واذا ما قبلت تبقى فهاي حياتها وهي حرة ومستحيل اجبرها
.
.
جنى: الصبح حسيت بصوت حركة بالغرفة رفعت راسي شفتها اماني ورجعت نمت شوية وكعدت نزلت تحت دا نتريك اني والبنات والحجية واجى مصطفى
.
.
اني من شفتو تذكرت موقف البارحة وصار وجهي احمر حتى اكل ماعرف اكل وفوكها اجى وكعد ويانا والمصيبة الاكبر باوعلي ومبين عندو كلام
.
.
مصطفى: جنى اليوم رحت للمركز علمودج
جنى: ليش اني شنو سويت
مصطفى: علمود موضوع خطفج
.
.
جنى: بس انت ما خطفتني
مصطفى: اعرف بس لازم تروحين وياي علمود اذا يسألج الضابط تكليلو تبقين يمي
.
.
جنى: تمام
مصطفى: يعني انتي حابة تبقين يمي
جنى: اي لحد ما يرجع عمي علي
.
.
مصطفى: تمام كملي ريوكج واني رايح للمضيف بين ما تكملين ومن تخلصون انطوني خبر
.
.
رحت للمضيف واجت صورتها بفستان البارحة ببالي وفوكها الضابط خربط افكاري من يكول زوجها معترف انو مو لامسها وماكدر افاتحها بالموضوع علمود تحجيلي
.
.
بعد نص ساعة اجى كاضم كال يريدوك وفورا اخذت السويج ورحت ركبنا السيارة وانطلقنا واخذتها للضابط الي حقق وياي علمود يسألها
.
.
رحب بينا وكاللها اكو بلاغ مقدم من عمج علي بانو انتي مخطوفة هالحجي صح كالتلو اي بس مو الشيخ مصطفى الي حطفني كاللها لعد منو
.
.
كالت كل الي اعرفو عن  اسمو السيد عمرو حاليا بال 35 الى 40 وغير هالشي ماعرف ومن انهزمت منو بقيت ايام وليالي امشي يعني مستحيل اتذكر المكان الي جنت بيه
.
.
واني اريد ابقى عند الشيخ مصطفى لحد ما يرجع عمي علي للعراق وتأكد من كلامها وكال هاي هي رجعتها للبيت ومن دخلنا راحت هي تبدل ملابسها
.
.
واني سألت امي علمود زوجها كلتلها تأكدي منها كالتلي كلام زوجها صحيح وهي كالتلي هالحجي من اول ما اجت من امي كالت هيج ماعرف ليش فرحت وكأنو مسوي انجاز وعفت امي ورحت للمضيف
.
.
جنى: من ركبت وياه بقيت ادعي لربي مايجيب طاري موقف البارحة لان من دون كلشي فشلتي ما تنوصف ويجي هو يكملها ويحجي بيها كدامي
.
.
والحمدلله رحنا ورجعنا بدون ما يذكرها بس ماعرف ليش حتى من كلت للضابط ابقى لحد ما يجي عمي علي احس ضجت من نفسي
.
.
بس افكاري متخربطة لا اريد اعوف عمي علي ولا اريد اعوف اهل مصطفى لان الثنين احتووني وقدمولي الحنان الي فقدتو بفقدان اهلي
.
.
من رجعنا بدلت ملابسي ونزلت عند الحجية وكضينا اليوم طبيعي ثاني يوم صادف عرفة كعدنا كلنا قبل صلاة الفجر بساعة تسحرنا وصلينا الفجر ونمنا
.
.
وجنت فرحانة كلش لان الي بالبيت كلهم يصومون وين هم ووين اهل مصطفى الولد بالاخص فرق من السماء للكاع بينهم ثاني يوم لان صايمين بقينا للظهر نايمين
.
.
من كعدنا الضهر صليت ورحت للمطبخ ومشتهية دولمة كلت مابيها مجال لازم اسويها شفت نواقصها مو ناقص بس ورق العنب وصيت كاضم وبلشت بالحشوة
.
.
والبنات لان صايمات ما الهن واهس بالدراسة واجن يمي ساعدني بين ما اجى كاضم الحشوى صارت جاهزة لفيناها وكملناها والعصر حطيتها عالنار
.
.
ونظفنا المواعين الي اشتغلنا بيهن المغرب جابو بقرة كاضم وشاهين وربطوها عند البيت بس مشاء الله جانت سمينة كلش كلتلهن ليش جابو بقرة
.
.
اماني: يضحون بيها عننا احنا وويانا 6 بيوت من الفقراء الي ما يكدرون يشترون اضحية
جنى: ويصير هيج
.
.
اماني: اي لان الخاروف يكفي عن بيت والبقرة تكفي 7 بيوت والبعير يكفي عن 10 بيوت
جنى: ليش يعيبون عالبقرة والله حلوة
.
.
اماني: هههههههه انتي مو تضوجين من احد يكول بقرة
جنى: اي اضوج
اماني: لعد شلون تكولين حلوة
.
.
جنى: اني اضوج لان يشبهني بحيوان
اماني: يعني حتى اذا اكول جنج غزال تضوجين
جنى: اي لان هم حيوان والله خلقني انسان مو حيوان
.
.
اماني: المهم عوفينا من الموضوع وخلي احجيلج شغلة
جنى: شنو هي
اماني: تدرين ان الرسول ﷺ ضحى بدال امتو
.
.
جنى: شلون يعني
اماني: بعيد الاضحى جاب خاروفين واحد ضحى بيه عن نفسو واهلو والثاني كال لمن لا يستطيع ان يضحي من امتي
.
.
جنى: مو الخاروف يكفي عن بيت واحد
اماني: اي صحيح
جنى: لعد شلون ضحى بيه عن كل امتو
.
.
اماني: اولا مو كل امتو ثانيا هذا رسول الي ضحى
جنى: والله ماعرف
اماني: لعد شلون مسلمة وماتعرفين هيج اشياء
.
.
جنى: ليش اني عشت مثل المسلمين
اماني: اسفة اسفة وربي مو قصدي اذكرج
جنى: لا عادي ادري مو قصدج
.
.
اماني: امانة لا تزعلين مني
جنى: بابتسامة .. لا مو زعلنا
اماني: اني راح اجهز التمر
جنى: تمام
.
.
حطت بس صحن تمر وماي علمود نفطر بيهن ونصلي المغرب وبعدها العشى الرسمي وماكو شوربة وغيرها لان يوم واحد فما يحتاج تحظيرات كاملة
.
.
بعد ما اجو الولد من المضيف بدقايق اذن المغرب وفطرنا شفت الدولمة استوت كلبتها بصينية وشغلت البانكة (المروحة) علمود شوية تبرد ورحت توضيت وصليت
.
.
ورجعت طفيت المروحة وحطيت للولد وامهم بصينية صغيرة وحطيتلهم العصاير واللبن كامل وجانت اماني تحط النا وهنادي تعزل المطبخ
.
.
من كملت صاحت هنادي لكاضم واجى اخذها وراح وكعدنا احنا نتعشى اكلن منها وكالن كلش طيبة عاشت ايدج واني احس راسي انتفخ من الفخر ههههههههه
.
.
من خلصنا عشى غسلنا المواعين وجهزنا حنة علمود نحط على ايدينا وتعللنا ويا الحجية من صارت الدنيا ليل رحنا للغرفة مالتي حطتلي اماني حنة
.
.
بس يوقتها ماكو لا نقشات ولا غيرها مجرد تحط شوية بنص الايد واسكر ايدي عليها وبعدها تفطي المفصل الاول من اصابع الايد
.
.
ولبستنا مثل الجيس بس قماش مخيطتو بالبيت وشدتو على ايدي علمود ما يتدمر الفراش وبعدها نمت بفراشي وغطتني هي وراحن لغرفتهن
.
.
واني بقيت مثبتة ايديني خايفة تخرب الحنة لحد ما نمت هن من راحن اماني حطت لهنادي والحجية حطت لاماني ونامن والحجية ما تحط حنة
.
.
بس كل عيد ينصبغ اصبعها السبابة لان تحط لاماني من اذن الفجر اجت الحجية كعدتنا علمود نغسل ايدينا ونسبح قبل الصبح
.
.
من كعدت الحنة يابسة على ايدي فتحتلي الخيط مال الجيس الحجية ورحت غسلت ايديني جان كف الايد الي بالوسط عليه حنة والاصابع من داخل عليهن حنة بس الخط مال المفصل
.
.
ومن خارج اول مفصل والاضفر ولان ايدي بيضة طالعة فد شي كلش حلو بالحنة رجعت اريد اخذ ملابس للعيد اول شي كلت البس الفستان الاسود ووياه بدي
.
.
بعدين كلت الدنيا عيد وانا لابسة اسود وفوكها الموقف الي ماراح انساه طول عمري طلعت فستان جوزي يشبه الاسود بس مو مزند ونقشتو حلوة كلش ويرهم للعيد
.
.
طلعت وياه شال مثل لونو وسبحت ولبستو ورحت لاماني علمود تحطلي مكياج حطتلي حمرة لونها داكن على لون الفستان ووياها كحل لعيوني
.
.
ووجهي لان ابيض وصافي كالت ما يحتاج شي وجانن الاحذية حاطاتهن البنات بدرج صغير رحت اريد اطلع حذاء الي واسمع صوت مصطفى صعد وصاح على كاضم وشاهين
.
.
كاللهم تحظرو هسا اجي ونروح للجامع سوا كلت هنا انلاصت كمت اريد انهزم وشلون انداريت شفتو يباوعلي
.
.
جان لابس دشداشة شكد مو بيضة تحسها تلمع ووياها شماغ احمر مثل لون الدم وعكال على راسو وساعة سودة كلش وقندرة سودة وطالع حلو بشكل لا يوصف
.
.
عيونو الخضر بارزات بنظرتو العصبية المعتادة واللحية المرتبة من اول ما شفتو والهيبة الي تسطر سطر بس اني من الخجل ما باوعت عليه ههههههه
.
.
تقدم على واني احس متت من الخجل والتوتر صار قريب علي وكالي بنبرة حادة غطي شعرج زين بالشال واندار وراح اني انهزمت لغرفتي ركض
.
.
من دخلت سكرت الباب ورجعت بضهري عليه واهفي بايدي على وجهي احس نار اشتعلت بخدودي من شوية هدأت شفت نفسي بالمراية
.
.
كلت امداج عدلي شالج مطلعة شعراتج تكول صوف نعجة مكيفة بيهن عدلت شالي وضبطتو ونزلت تحت حظرنا الريوك بين ما اجو من صلاة العيد وهالعيد بدون كليجة
.
.
جانو بعيدهم مو مسوين كليجة واماني تكول لان وفاة ابوي صارلو 10 شهور يعني اقل من سنة من توفى ما سوينا بس لازم نلبس جديد ونفرح لان هذا عيد
.
.
وربنا ما حددلنا العيد علمود نحزن بيه عالماتو بس بنفس الوقت نقلل شوية من الرسميات لخاطر بابا قبل ما يجون من صلاة العيد بلشو الجهال يجون
.
.
هنادي هي اهتمت بتوزيع الحلويات عالجهال واني واماني بقينا بالمطبخ ننتظر الولد يجون علمود نحط الريوك من اجو سلمو على امهم وعايدوها وراحن اماني وهنادي سلمن عليهم
.
.
اسمع مصطفى كال صيحو لجنى شلون تعوفنها وتجن واجت اماني كالت مصطفى يصيحج ورحت وياها بس ماعرف شسوي تكول جاهل
.
.
من وصلت بس كلتلهم كل عام وانتو بخير كلهم كالو وانتي بخير وصحة وسلامة كلتلهم إن شاء الله اشوفكم كلكم  عواريس
.
.
كاضم جان يريد يشرب ماي الا طلع الماي من خشمو البنات وكعن بالكاع من الضحك مصطفى كال بضحكة وانتي عريس يا ويلي بوقتها شلون افتشلت فشلة
.
.
الحجية رغم جانت زعلانة على الحجي بس من كلت هيج حطت شيلتها على وجها وكامت تضحك واني انهزمت للمطبخ ومن الفشلة الا بجيت
.
.
اني بالمطبخ واسمع صوت ضحكهم ومصطفى يكوللهم كافي قابل هي معصومة من الخطأ كلت بكلبي وانت كحلتها وفشلتني بعد اكثر
.
.
اجت اماني شافتني ابجي كالت شبيج كل عقلج تبجين علمود هيج موضوع كوة سكتتني وكالت لمصطفى شوف كامت تبجي بسببكم
.
.
كاضم الخبيث يكول لا تزعل غاط العرس علي وفستاني عليها ويضحك مصطفى كالو كافي تضحك لا افلش وجهك كال كاضم لاماني كوليلها مصطفى زعل لا محد يتبرعلو بالفستان
.
.
اني بنص بجيتي ضحكت عليه ومصطفى يرزل بيه بس مبين من صوتو دا يضحك وياه واكيد كاضم ما يحجي هيج على مصطفى كدام احد بس لان بيناتنا كال هيج
.
.
انطتني كلينكس اماني واخذتلهم الريوك وجابت الكحل رتبتو الي وصاحنا مصطفى كلت والله بعد ما اروح لو تخرب الدنيا وراحت اماني وهنادي جانت بالصالة
.
.
انطاهن عيدية ودزلي عيديتي ويا اماني من خلصو ريوك اجى كصاب علمود يضحي بالبقرة مصطفى بدل ملابسو وراح ويا الكصاب
.
.
شفتو من شباك المطبخ اخذ حبل شدو على ايد البقرة وفرو حولها وسحبو بسرعة وهي لان انسحبن ايدينها ورجليها وكعت بالكاع ومسك راسها ثبتو بالكاع
.
.
وكاضم وشاهين ثنينهم مسكو الحبل الي مثبت ايدينها ورجليها علمود ما تكدر تكوم واجى الكصاب وجهها للقبلة وضحى بيها
.
.
ومن انتهت حركتها رجع مصطفى غسل وكشخ مرة ثانية وراح وبال 9 خلص الكصاب وبدو يعزلون اللحم بعلاليك علمود يوزعون للناس
.
.
من خلصو حطوهن بالسيارة وراح كاضم يوزعهن والباقي جابو زلمة يطبخو وجابو جدور كبار بس الطبخ صار خارج البيت وبلشو الكرايب يجون
.
.
مصطفى: من كعدت الصبح هي ببالي وما تروح من بالي صليت الفجر وبدلت ونزلت تحت وتذكرت السبحة مالتي ناسيها بالغرفة وصعدت علمود اجيبها
.
.
من صعدت شفت وحدة من البنات جانت عند الدرج مال الاحذية من وكفت واندارت كلت بكلبي شسوي بحالي ليش دائما تطلعين بوجهي من تكونين حلوة
.
.
انتبهت لشعرها طالع من الشال تقدمت عليها هي ضاعت متدري شتسوي كلتلها غطي شعرج ونسيت علمود شنو صعدت اصلا  وعفتها ونزلت
.
.
واكول بكلبي ارحمي حالي يبنت الناس ترا اني بشر مو معصوم وما اكدر اتحمل رحت للجامع ويا اخواني
.
.
جنت متعود كل عيد اروح بالبداية واصير بالصفوف الامامية واكبر ويا الموجودين وبعد الصلاة اسلم عالموجودين بالجامع وبعدها نرجع اني واخواني
.
.
ودائما نروح من طريق ونرجع من طريق لان الرسول ﷺ جان يروح بطريق ويرجع من غير طريق بصلاة العيد من رجعنا جفصت جنى جفصة مرتبة
.
.
وتعال جيب الي يقنع كاضم يسكت وشاهين وجهو صار احمر من الضحك هي من الفشلة شفت عيونها دمعت واماني تكول لكيتها بالمطبخ تبجي
.
.
بعد ما خلصنا ريوك ساعدت الكصاب بالاضحية وخليتها باسمنا اني واهلي و 5 من كرايبنا واهل جنى لان ما تكدر تضحي وكلت بدال ما تضحي هي احط اسمهم ويانا
.
.
وبعدها رحت استقبل الي يجوني للمضيف ومعروف عند كرايبنا كلهم اول يوم العيد الغدا يكون ببيتنا بوجود ابوي وبعد وفاة ابوي اني سويت نفس الشي
.
.
واحد من عمامي جاب طاري المنطقة الي جانت جنى بيها وحجيتلهم عنها واني اعرف قصدو على جنى بس ما حجيت عنها وهو ماكدر يسألني بصيغة مباشرة كدام الناس وبقى ساكت
.
.
.......... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413