👑جارية السلطان: 👑
💎بقلم: ليلى روي💎
البارت12
على أرض حرشة نايمة ودوز على رجليها بيدياتها لحنان ....وفمنامها تشهق و تنزلهم على عينيها لثنان....تلف بللحاف جنابها وتحلم براسها بين واليديها ناعسة فلحضان .....شكون ليها من بعدهم من غيرك يارحمان ...ناس طغات و مابقات فقلبهم لا رحمة ولا إيمان...خلاوها عشريام وسط ضلمة مكمشة فركان...شكون حن ولا حس بها..من بعد ما كانت وردة فجنان و لات شوكة مقطعين بيها لحبال..... شكون يقول هادي هي نجمة بنت سلطانة....يديها تقشرو ورجليها نشفو وشعرها تخبل مابقا عندها لا شان ولا مرشان...تحسر على يامها وتقول أش مزال مخبي ليا زمان....مولاي سلطان مات وسلطانة غبرات و نجمة من وسطهم تشردات....
تقرقب لمفتاح على باب لحديد وتفتح عليها...هزات راسها تقيل من الأرض وهي كتغطي رجليها وكتحل فعينيها بزز منها ...
تكلم لعبد سمر اللون وطويل القامة لابس سروال مفضفض وجيلي على لحمو و على راسو عمامة..
العبد :يامك سالات هنايا .. غاتنوضي طلعي وإلى عاود راسك سخن عليك غترجعي وهنا غتكملي ما بقالك من عمرك حتى تفناي..يالاه زيدي قدامي...
نوضها من إيدها وهي وقفات غا بزز جرها من وراه و طلع بها من نفس دروج..دروج مضيقين ومن تراب مصنوعين وبلقنديل مضوين ...طلعو لفوق لأرض مع هزات راسها تضربات فيها شمس ..ضرقاتها بإيدها وهو زايد جارها حتى عاود دخل بها لنفس لبيت يلي كانت فيه قبل فاش جات..بيت كبير فيه ناموسية مابينها و بين لأرض والو ولحكيمة باركة كتسنا حداها لوصيفة لغليضة نيت غير شافت نجمة ولاو عينيها حمرين ..مشات عند نجمة جراتها من عند لخادم و قالت ليه باش إيمشي و رجعات شافت فنجمة و هي مخرجا فيها عينيها و هازا صبعاها قدام وجه نجمة...
لوصيفة:والله و تطلعي ماشي بنت يا حتى ليوما راسك إتقطع...
نجمة:لا لا والله حتى بنت ...غابعدو مني..
لوصيفة:هاحنا غنشوفو على ديك لحالة ليدرتي و تطلعي ماشي بنت عاود غاوجدي راسك...
جراتها و داتها حدا سرير تكاتها على ضهرها و عطات إشارة لحكيمة باش تبدا خدمتها... بدات لحكيمة خدمتها فرقات ليها رجليها و غطاتهم بلحاف فلبيض و دخلات إيديها بيناتهم...ونجمة بحال لحية لمدفونة ماهي عايشة ما هيا ميتة ..مابقا عندها جهد لاباش تغوت ولا تعاند ولات باغا غا سلاك وحاجة وحدة يلي مصبراها هي أنها بنت سلطانة و غيجي نهار يلي فيه غتنتاقم منهم كاملين...قلباتها لحكيمة وهزات راسها وإيديها باقين بين رجلين نجمة شافت فلوصيفة وغمزاتها وحركات ليها راسها...إما لوصيفة فهماتهاو حدرات راسها و بدات تحنحن ..يحساب ليها نجمة ماشي عزبة إيوا صدقات محنتاها...رجعات لحكيمة راسها تحت لحاف باش تحيد إيديه و تجمع لنجمة رجليها..معا جمعات ليها رجليها بانت ليها فوق فخضها صغيرة و متقونة سرحات ليها رجليها مزيان وبدات تقلب فيهم حتى لقات لكمالة فجيهة لخرا ..هزات راسها بزربة وحيدات إيديها و غسلاتهم و هي كتزرب و رجعات عند نجمة هزات ليها راسها بزربة و بركاتها و حيدات ليها شعر من على عنقها دوراتو لجيهة لخرة وهنا عاد تصدمات صدمة وحدة تلقات من نجمة مخرجة عينيها وبدات راجعا بلور وكتشوف فلوصيفة وتنعت فنجمة و هي كتمتم...
لحكيمة:هيييييي هي هي ولله حتى هي...
شافت فيها لوصيفة بإيستغراب و سولتاها...
لوصيفة:شكون هي مال هادي ...تكلمي جاوبي...
لحكيمة:هييي هي هي لمقصودة هي ...
لوصيفة:أش كتخربقي نتيا ...تقلي و رزني ووزني كلامك عاد هدري كيفاش لمقصودة...
لحكيمة:هي نجمة أه نجمة..بنت سلطان و سلطانة حاكمين بلاد لحرية...
لوصيفة:شنو..أويلي على زغبية 😱😱😱
💎💎 أمم فنضركم أش علاقة نجمة بهدرت لحكيمة و لوصيفة...وأش شافت لحكيمة حتى عرفات سميت ونسب نجمة ..خليو ليا توقعاتكم فتعاليق و تفاعلو كتر 💎💎
#يتبع#
أنت تقرأ
جارية السلطان⚜️مكتملة⚜️
Romance💎مكتملة💎 ❌حصرية على الواتباد❌ 🌛قصة- رمضانية 🌛 ⚜️العنوان :جارية السلطان⚜️ 💎بقلم:ليلى روي (jë süis lä)💎 💎الكوفر من تصميم : #Ñöřhãņ Ñöřhãņ 🍃رجعو معايا بزمان..لزمان لحكمة ولحشمة ولحيا... زمان سلاطين ولملوك وجاريات غنعيشو حكاية جامعة فحضانها كل م...
