جارية السلطان⚜️مكتملة⚜️

⚜️الجزء 29⚜️

جارية السلطان
بقلمي : ليلى روي
البارت: 29
جايا كتجري وكتزرب فخطاويها ماباغاش تبخل على لالاها بهاد لخبيرة يلي تقدر تكبر بيها فعيينها..

وصلات حدى جناحها و ضقات عاد قادات حوايجها ..حلوليها لخدم لباب دخلات ولقات عذرا باركا وكيسرحو ليها فشعرها وهي مغمضا عينيها غير حسات بشي حد دخل حلاتهم وشافت خنتة قدامها وضاحكة...

عذرا:أش بغيتي أخنتة ياكما واقعا شي حاجة..؟
بركات خنتة حدا رجلين عذرا فلأرض وحركات ليها راسها زعمان على لوصيفة أدنات عذرا باش يخرجو وبقات غير هيا وخنتة..
عذرا:هدري أخنتة أش كين؟

خنتة:أاااه يالالة وأش غنقول وباش غنبدا لمهيم لخطية مشات ولمسمار طرق وطريق خوات...

عذرا:كيفاش شكون مافهمتش؟؟

خنتة:لفعة يامولاتي لفعة مشات مشية بلا رجعا ومابقا حاجز بينك وبين مولاي بعد ليوم...

عذرا:(حركات راسها و بتاسمات ) واش واش هي ههه هي ياك...

خنتة:ههههه أاه ألالة هي مشات مشية وحدا و تكون دابا وصلات عند يلي خلقها ولا بلكتير راها مخنوقة...

ضحكات عذرا وتقادات فلكلسة  وبدات تسول وتستفسر وضحكة شادا ليها من لودن للودن لخرا وخنتة كتعاود ليها...

عذرا:هههه ونتي باش عرفتيها ياجنية..

خنتة:هه راني خنتة ألالة وأجرك على الله راك محزما بلعيالات..تلاقيت مع لوصيفة لقيتها غير غادا وتهدر وحدها سولتها وبدات تعاود بيلي ديك نجمة مولاي حكم عليها حيت قطاعات من سالف لعودة....

عذرا:الله وأخيرا شي حاجة مزيانة ههه قالت لك بغات تولي سلطانة وهي حتى نهار ماكملاتو على هدرتها ..سرها هي يلي دارتها لراسها ...
خنتة:إييه ألالة خرجات على راسها راسها بلا منقيصوها ولا نعصروها طيرانها خرج عليها...
رجعات تكات على ضهرها وضحكات..عذرا:وعلا هاد لخبيرة بغيتك تفرقي لحلوة وخلاخل نقرة على كل خادمة وعاملة ونتي وصية ديالك عندي بوحدك ..يلاه أجي عونيني نقاد شعري ونخرج نشوف سلطاني ههههه و نشوف ديك لياقوت يلي نهار ومطال وهي ملصقا حداها ديك لهبيلة يلاه نصدموها شوية بخبر موتها...
وداك شي يلي وقع نيت عاونات خنتة عذرا باش قادات شعرها و خرجو من جناح.. عذرا صابقا وتابعاها خنتة ..حتى خرجو لوسط لقصر سولو لخدم على بلاصة سلطانة لياقوت وقالو ليها راها معا لأميرة شافية فلحديقة ..زادت وهي ضاحكة ناويا تفجر قنبولة...وصلات عليهم لقاتهم مرة يهدرو مرة يسكتو وكل وحدة ماتحمل لخرا لقات سلام وبركات حاطا رجل على رجل إما خنتة وقفات مبعدة...شافت عذرا فسلطانة وبدات تسول فيها ناويا تفرش طريق لجلطة...

عذرا:إيوا أسلطانة أش خبارك وأش كتعاودي ..هاحنا فقصر واحد وغراب على بعضنا مانشوك ولاتشوفيني غير مرة فشهر....

سلطانة لياقوت: (ضحكة بإستفزاز)إيوا لكنتي لاباس ماكاين لاش نشوفك ولا تشوفيني من حدي مامحتاجاك ومانفعاني ..نهار نبغي شي حاجة غنقولها لك ديريها بلامتهزي هم غير لبغيتي تكوني فبلاصة لخدم ...

عوجات عذرا فمها ناويا ترجع لهدرة وهي تدخل شافية بضحكة صفرة ..

شافية:أااه هه هاد شي ليكاين نيت لواحد هو يلي يغبر باش توحشوه...

حركات عذرا راسها ومابقا عندها صبر للياقوت يلي كتهضر ناويا تهجرو ليها قبل ماتكمل بيها...

عذرا:(ببراءة مصطنعة)لبركة فراسك أسلطانة ..مسكينة كانت ضريفة ونتي عتابرتيها بحال بنتك يلي محطاتها لك كرشك...

لياقوت:كيفاش؟؟! مافهمتش؟..

عذرا:(بمكر)أوووه لا ماتقوليش ليا مافخباركش أش وقع لديك لبنيتة نجمة ...

تقادات فلكلسة وشافت فيها..لياقوت:أش كتقولي نتيا سربي بلا لف ولا هضرة خاوية ...

عذرا:إيوا أش غنقول لك ..وصلاتني لخبار من عينين كبار..كثرة لقيل ولقال على نجمة زينة لبنات بيلي راه مولاي فاتت حدها معاه إيوا دارها فصندوق ورماها وسط لبحر و لمسيكيييينة دابا غتكون وصلات لقاعو وغرقات فباعو الله يرحمها فهاد نهار ويجعل متواها جنة 😏😏..

خرجات لياقوت عينيها وماعرفات واش تيق هدرتها ولا لا ولكين هي ماعندها علاش تكدب ناضت بحال لمصدومة جمعات لوقفة وهي غادة وخادماتها تابعينها من وراها تيق كلشي إلاهادي...
خلات شافية مخرجة عينيها و شدات فبنتها كتسول فيها...

شافية:هدري تكلمي فين هي لبنت أش وقع ليها ..
.
عذرا:وعلا فين غتكون راها فقاع لبحر موتها خير من حياها وأنا غير سمعت...

شافية:ولله وتكون عندك يد فهاد شي لرحمتك من خوك هو راه ولا يتسطا عليها و يموت فيها ويمشي حتى يعرف هاد شي غير وجدي قبرك...

عذرا:مابقا والو وغنولي سلطانة ونشوفو ديك ساعة كيف غيولي يتصرف معايا...(جمعات لوقفة وزادت خلات شافية غكتعجب وحدها)

وصلات سلطانة لجناحها وهي كيف لمصدومة ماقادراش تيق صيفطات لخدم باش يجمعو ليها كاع وصيفات لقصر ..جاو كاملين ومنهم طامو ولغالية وحتى ديك سمرة لخرى بدات تسول وتستفسر حتى عاودات ليها لوصيفة كولشي خلات طامو غامخرج عينيها وتولو هي ولغالية ...جرات عليهم كاملين من جناحها و كلمات لعبد يلي كانو داو نجمة ...هي تأمر وهما خاييفين ليخالفو كلام سلطان ويموتو وهي كتقول لمبغاوش غتقتلهم...

لياقوت:(بصرامة)غادي تمشيو فين رميتوها وغادي تخرجوها ...وتوصيوها باش تهرب وماترجع ....

لعبد:(بخوف)ولكين أمولاتي إلا سلطان عرفنا خالفنا أمرو راه غيقتلنا قبل مانوصلو لعندها....

               #يتبع#