الميت اللي بيننا حي

الخامس

انت لو رجال ما رضيت تتزوج وحده مغصوبه عليك
كلامها هزه هز طلعه من طوره رجع بخطواته للوراء ثم التفت في المصورة اللي شافها حاطه يدها على فمها تمنع شهقتها تطلع
رجع يناظر فيها كانت واقفه بكل قوتها قدامه وهي تتكلم وتعلن عن رفضها له ،عزيز اللي من العصبيه ما يدري وش يسوي فسخ بشته ورماه على الارض وبعدها فسخ شماغها ورماه على الكنبه وراها ، طلع بسرعة من الغرفة وهو مايشوف قدامه
هيا انصدمت من شكله ودخلت الغرفة وشافت وجد  تسحب الطرحه من فوق راسها وبعدها دخلت الحمام وفتحت الدش عليها بللت ملابسها وشعرها ووجها ، بدات تفرك وجهها وفمها بقوه تبغى المكياج يروح
اختلط المكياج مع الماء ودموعها وشعرها
طلعت من الحمام وحصلت الجميع واقف قدامها مصدوم جلست على الارض وهي ترجف وقالت بغضب : سويتها اخذت بثار ابوي وعمي منكم يا المخلف

قبل اربع ساعات

في احد فنادق الرياض كان عزيز واقف قدام المراية وهو يسكر كبك ثوبه وكان عياف و هيثم وعامر  يسولفون مع بعض ويضحكون بس هو مو قادر يسمعهم لان عقله مشغول فيها ، ابتسم وهو يتذكر الايام والشهور والسنين اللي انتظر فيها هذا اليوم ، كيف انه قدر يمنع نفسه لا يرتكب غلط واحد ويدمر كل اللي بناء ، كيف استحمل دلعها وتشرطها عليه وكيف كان يضغط على نفسه وهو يسمع كلام ابوه وعمه اللي يوصونه ويذكرونه بتعبهم طول السنين ، تنهد وقال في نفسه : اليوم ياوجد راح اخذ حقي منك وراح اعرفك كيف تتدلعين وتتكبرين على
قطع عياف عليه حبل افكاره بعد ما ضرب على ظهره بشويش وقال : يالله ياعريس تاخرنا
قرب هيثم وهو شايل بشته حطه على كتفه ، رفع عزيز يدينه وبداء يضبط البشت وهو يبتسم
عامر : من اليوم تبوسم خل لعروستك شي لا تستهلكها
عزيز : ماعليك محوش كثير
عياف : اكيد محوش وانت لك سنين تنتظر هالعرس بس تركد على البنت لا تتهور
كشر عزيز اللي يكره هذا الكلام والمعني الخفي له وقال بغضب : عياف
هيثم : خلاص فكونا ، نبغي نفرح مثل الناس
عياف : امزح يا رجال لا تشدها واضح انك متوتر ارتاح
سالم اخوهم كان من اطفال متلازمة داون لكذا ما يحب الصوت العالي او الهواش : لا تهاوشون ، لا تعصبون
عياف : ما نتهاوش يا سالم نمزح
عزيز بصوت هادي :  انا مو مجنون اعرف اتصرف
عياف : عزيز لا تزعل بس انت عصبي لازم تضبط اعصابك خاصه اليوم لان البنت اكيد متوتره وراح تتصرف معك بغرابه
هيثم : ماعليك عزيز فاهم
عزيز ضبط بشته وقال بحده : مشينا انا جاهز
ومسك يد سالم وقال : جاهز يا سالم
سالم اللي كان لابس بشت مثل عزيز : جاهز ، جاهز انا عريس
طلعوا من الجناح وتوجهم للقاعة الخاصه بحفل الرجال ، دخل عزيز بكل ثقة للمكان وفرض هيبته على الجميع الكل وقف وتوجه له يسلم ويبارك حتى هو قرب منه ونظرات الغضب من عيونه تحرق المكان الا عزيز اللي ماهز فيه شعره
عزيز : هل ومرحبا يا مسعد ، مقدر حضورك
مسعد : اكيد بحضر هذا زواج بنتنا
التفت عزيز لبوه اللي تدخل وسلم على مسعد واخذه على الجنب
هيثم همس في اذن عزيز : لا تهتم ، افرح انت عريس
عزيز بقهر : ليش اصر ابوي يعزمه
هيثم : تعرف ، عمي طيب مره
قرب العم مبارك ابو هيثم منهم وقال بعصبيه : الامل فيك يا عزيز تبعد هذا الحقير عنا وترجعه لحجمه الطبيعي
عزيز : بس اخوك مايثق فيني
ابو هيثم : انت خبل ماتعرف تسايرهم
التفت عزيز لعمه بس سكت علشان ابو عياف قرب منهم