الميت اللي بيننا حي

تسعة وثلاثون

عزيز وياسر في مصنع السيارات يتفرجون على مراحل التصنيع ، كان صوت الالات مره عالي ومزعج وهم لابسين قبعات حماية على راسه ونظارات كبيره والمهندس يتكلم معهم بصوت عالي
عزيز صد بعصبيه : الله يصجكم فقعتو راسي
ابتسم ياسر وقال للمهندس انهم اكتفوا من الجولة
اول ما طلعوا شاف ياسر جواله يدق وكان ابوه ، خاف مره وكان مايبغي يرد
عزيز بعصبيه :  ماتسمع جوالك انت
ابتسم ياسر وراح بعيد علشان يكلم فتح الخط : هلا 
مشعل : السلام عليكم ، وينك
ياسر : وعليكم السلام في المانيا ، قلت لامي
مشعل : ترى وصلنا وحاليا في الفلة الجديدة
ياسر : مبروك الله يجعله منزل امبارك
مشعل : ماجد يقول انك طلبت تحضر الهدم
ياسر : ايه ، لايكون بديتوا
مشعل : لا ما بدينا ، سمعت انك مسوي اكشن الايام الماضيه
غمض ياسر عيونه من الخوف مايدري وش يقول اكيد وصل خبر زواجه لابوه
مشعل : خلص شغل وتعال نتفاهم
ياسر با رتباك : يبه ،، اللي صار كان رد فعل ،، انا ماكنت
مشعل قاطع ولده : مابغاك تتكلم الحين تعال نتواجه ونتكلم ، ماتوقعتك من اللي يستغلون معارفه ويمررون خدماتهم
ياسر في داخله يدعي على اللي وصل الخبر لابوه
مشعل : اخلص لاتطول
ياسر عرف ان  رجوعه الحين مو في صالحه ابدا لكذا قال : ان شاء الله باقي ماخلصنا الشغل
قاطعه ابوه : عزيز  يتكفل الشغل انت تعال
وسكر المكالمة من غير ينتظر رد من ياسر
، ياسر من الارتباك عرقت يدينه صار  يمسحهم على البنطلون وهو يفكر وش راح يقول لابوه التفت لعزيز وشافه باقي مشغول مع المهندس ، على طول دق على فجر هو من يوم سافر ما دق عليها كان بس يرسل يتطمن ، ردت فجر : هلا
زادت ضربات قلب ياسر وحس مو عارف يتكلم : هلا
فجر : هلا فيك
ياسر بلع ريقه وسال : كيفكم اليوم
فجر : تمام ، متى تجي
ابتسم ياسر اول ما حس بلهفتها في السوال : بكره بحاول اجي
فجر : انت قلت يومين وراجع ، صار لك اربعة ايام ، وانا باقي مقفله المكتب ولا طلعت انتظرك
عض ياسر على شفايفه علشان يمنع سوال غبي نط في عقله
فجر : اليوم دقوا على الشرطة يطلبون احضر
ياسر : رحتى
فجر : لا قلت انتظر زوجي يجي من السفر
رجع ياسر يبتسم واحب كلمه ( زوجي ) : خلاص اليوم ان شاء الله اجي بدور رحلة الحين ، محتاجين شي
فجر : لا
ياسر : استودعتك الله
سكر ياسر المكالمة وراح لعزيز يقول له : اسمع لازم ارجع السعودية ابوي طلبني بشي
عزيز : خير فيه شي
ياسر : خير ، خير ، اعذرني ما اقدر اطول
عزيز : روح ماعليك
ياسر : بدور رحلة  لرياض يارب احصل
فتح ياسر جوالة يدور على  وحله واستانس اول ماحصل رحله مباشره لرياض بعد اربع ساعات ، بس كان الكرسي في الدرجة السياحية ، وياسر ماعمره جرب هذه الدرجة ، حجز على طول وودع عزيز وراح ياخذ اغراضه من الفندق وتوجه للمطار ، رجع يرسل لفجر : حصلت طيارة الاقلاع بعد اربع ساعات ، الوصول بيكون على الفجر ، بروح البيت اريح وامركم الصباح
فجر : توصل بالسلامة
ياسر كانت في داخله مشاعر مخربطة مو قادر يحددها