الميت اللي بيننا حي

الثامن والعشرون

صحي عزيز على صلاة الفجر صلا ورجع لغرفته يشيك على جواله شاف ان وجد شافت الرساله ، على طول دق عليها
ردت وجد بصوت ناعس : نعم
عزيز : صاحيه
وجد بتعب : اكيد صاحيه بعد ما قومتني
ابتسم عزيز : وش رايك في فطور لذيذ
وجد تناظر في الساعه باقي خمسه الفجر : فطور هذا الوقت
عزيز : ايه ، يالله قومي البسي انتظرك في السيارة تحت
وجد بتعب : مالى حيل ابغى انام
عزيز : يالله بس قومي ، بعدين هذا عقابك لانك نمتي البارح قبل اشوفك يالله انتظرك ، معك عشر دقايق لو مانزلتي طلعت لك فوق وسحبتك من شعرك
وجد باستهزاء : الله على الرومنسيه
عزيز يضحك : تبغين رومنسيه ، اجل انزل انا طلعت لسيارة يا قلبي
قفل الخط
تاففت وجد منه وكانت راح تسفهه بس حست بجوع لكذا دخلت الحمام غسلت وفرشت اسنانها ولبست بنطلون جنز اسود على بلوزه حمراء ثقيله واخذت عباتها وطلعت ، شافت باب غرفة امها مفتوح دخلت وحصلتها تقرأ قران وهي على سجادتها ، سكرت موضي المصحف وسالت باستغراب : طالعه !!!
وجد : ايه مع عزيز تو كلم يقول يبغى نفطر مع بعض
ابتسمت موضي : فطور الحين
وجد باحراج : مدري عنه ، اذا ماتبغين اقول له امي رافضه
موضي : لا ، لا روحي معه استودعتكم الرحمن
قربت وجد من امها وباست راسها وطلعت وحصلت عزيز ينتظرها اركبت السيارة من غير ماتقول شي
عزيز : مافيه سلام او صباح الخير
وجد من غير نفس : سلام ، صباح الخير
سحب عزيز يدها وباسها : صباح النور ، اشتقتي لي
سحبت وجد يدها منه : جوعانه ايش بتفطرني
شغل عزيز السيارة : انتظري راح تاكلين الذ فطور في الرياض
تحمست وجد من كلامه ولكنها انصدمت اول ما شافته وقف قدام بوفيه بجنب المحطه والتفت لها يسال : تبغين بيض او جبن
وجد بصدمه : هذا الذ فطور
عزيز : ايه ، وعندهم الشاي مضبوط ، او تبغين كرك
تنهدت وجد بقهر : ما ابغى شي
عزيز : خلاص بجيب لك من على ذوقي
وجد : حسبي الله عليك تقومني من عز نومي وفي النهاية بوفيه معفنه
عزيز : احمدي ربك ، نعمه
نزل عزيز وترك وجد تغلي من القهر