الميت اللي بيننا حي

سته وخمسون

الكل يتجهز علشان روحة المزرعة ، اخذوا ثلاث سيارات
وحده كانت مع عامر اللى صار يتذمر ويهاوش لانهم جمعوا الشغالات معه ، وهو وده يكون لوحده مع زوجته
التفت عامر لزوجته مرام : معليش حبي اهلي قاتلين للمتعة
وذابحين الرومنسيه
مرام : عادي حبي ، انا معك بعدين وش تبي تسوي احنا في السيارة 
غمز عامر ومسك يدها يبوسها : ودي امسك يدك بس عيونهم تراقب كل حركه
سكت اول ما اركبوا الشغالات مع شنطهم وحرك للمزرعة قبل الكل
هيثم شال امه و موضي وهيا وزوجته والاطفال
ثواب اخذ معه حصه ووجد وبشرى عياف : اخذ امه وزوجته والاغراض
عزيز اخذ ابوه وعمه وسالم وعيال عياف ،  كان وده ياخذ هو البنات بس الملقوف ثواب هو وزوجته حصيص سبقوه
وصلوا المزرعة والكل نزل ، وجد جابت معها توته ، وعلى طول اخذتها جنى بنت عياف تلعب معها قرب عزيز منها وشال توته يحضنها ويبوس فيها ، كانت فيها ريحه وجد اللى عارفها وحافظها في قلبه
البنات جهزوا القهوة والحلا وشغلوا الاغاني يرقصون
والعيال شبوا النار وجهزوا الشوي ، بعد العشاء اللى دخل ينام واللي جلس عند النار واللى دخل يتفرج على الفلم
وعزيز اللي طول الوقت عيونه جهت قسم الحريم يتمني يلمح وجد ، مع انه شاف الكل تقريبا الا هي ماطلعت برا للحين ، فقد الامل يوم شافهم يسكرون الانوار ، وعرف انهم نامو ، راح ينام هو بعد
الصباح صحي بدري وكان يمشي في المزرعة ولمح توته تركض بين الزرع ، راح لها واخذها شاف انها معدومه من الطين ، وقعد يضحك على شكلها : قطوه النعمه محتاسه
التفت وشاف قطوا كبير واقف في طرف المزرعه ، اخذ له حصاه صغيره وحذفها عنده : انقلع ما ازوج بنتنا لمتشرد مثلك
شاف وجد من بعيد واضح انها تدور عليها ، توجه لها
اول ما دخلت المخزن ، صار يركض ودخل وراها
وجد صحت من النوم ولا حصلت توته في مكانها دورتها في البيت ولا حصلتها ، وطلعت بعدها تدورها حول البيت ، شافت باب المخزن مفتوح ودخلت تدور فيه ، صارت تناظر حولها شافت بعض الادوات وخياش الحبوب وبعض الكراسي ، سمعت صوت احد بدخل عليها ويسكر الباب ، التفت بتصرخ بس شافت عزيز شايل توته ويقول : انا انا عزيز
وجد بعصبيه : خوفتني يابني ادم
ضحك عزيز اللي اشتاق لهذه الكلمه كثير منها وقرب منها ومد لها توته :  شوفي بنتك حصلتها برا تقابل قطو شوارع الا ما تستحي
ناظرت وجد في توته وهي تبتسم : توته خير من اي احد يستاهل تحبينه
انتبهت وجد للي صاير ، هي وعزيز داخل المخزن والباب مسكر عليهم ، وعزيز واقف قدامه يتاملها
وجد من الربكه والعجله وهي تدور توته لفت الطرحه بسرعه عليها ولا سكرت عباتها ، وكانت ارقبتها وشعرها من وراء طالع وعباتها مفتوحه وبجامتها واضحه
وجد سحبت توته بسرعه من بين يدين عزيز علشان تطلع من المكان قبل احد يشوفهم ، بس عزيز وقف قدامها يمنعها ، خافت وجد اكثر منه وشدت على توته بين يدينها
عزيز همس : انا من اللي يستاهلون الحب او لا
وجد بخوف : عزيز بعد تكفي
قرب عزيز منها اكثر : خايفه مني
وجد وعيونها لباب تخاف احد يدخل : لا ، بس خايفه احد يشوفنا يفهمنا غلط
عزيز : وش يفهمون
قرب عزيز وحط يده على توته يمسح عليها وعيونه على وجد
وجد : عزيز تكفي بعد
جاهم صوت بشرى وجنى من برا ينادون على وجد
وجد جمد وجهها من الخوف وناظرت  في عزيز بتبكي
همس عزيز : اطلعي انت بسرعه وبعديهم ، انا اطلع 
التفت عزيز حوله يداور مكان يتخبى فيه ما حصل غير وراء الباب ، رجع يهمس : اطلعي
طلعت وجد قبل يدخلون البنات وعزيز وراء الباب
يسمع لهم
بشرى : انت هنا
وجد وصوتها واضح ما زال فيه الخوف وارتباك : ايه كنت ،، ادور توته
بشرى : الحمدالله حصلتيها ليش تبكين هذه هي طيبه معك
وجد معاد قدرت تمسك نفسها صارت تبكي
بشرى شافت حالة توته وقالت : خلينا نسبحها المسكينه وننظفها من الطين
راحوا البنات وعزيز حاط يده على قلبه يلعن ويسب في نفسه ، لانه تصرف بغباء وتهور وهذا اللي كان يمنع نفسه من زمان عنه ، الحين راح تزعل منك يا عزيز يا غبي ويمكن تكرهك اكثر
طلع عزيز من المخزن اول ما تاكد ان البنات بعدوا ،راح يركض للمجلس ، طلع قدامه ثواب ، ووقف مفجوع
ثواب كان يناظر فيه وبعدين ناظر وراء وسال : وش فيك تقول هارب
عزيز يحاول يلقط نفسه ويهدي قلبه : لا ،، كنت ،، اجري ،، رياضه الصباح
ثواب : ملابسك معدومه من الطين ، كنت تلعب فيه 
ناظر عزيز لنفسه وشاف اثار الطين من توته على بلوفره وبنطلونه ، ابتسم : شفت قطو ناشب وطلعته
ثواب : عساك على القوة
رجع يدخل ثواب المجلس ، وعزيز وقف يمسح وجهه بيدينه ويحك راسه ويشده وهو يضرب على الارض بعصبيه