الميت اللي بيننا حي

اربعة وعشرون

وجد قررت تتكلم وتقول كل شي لعزيز علشان ترتاح من الثقل اللي تحس فيه ، راح تبدا من قبل ثلاث سنوات تحديدا قبل الزواج بثلاث اسابيع
يوم حفلة توديع العزوبية اللي مسويتها ميعاد صديقة وجد لها في بيتها طبعا كانت عازمه (اروى صديقة من الجامعة لميعاد وسبق تقابلت مع وجد ، وايضا ملاك صديقة مشتركة من ايام المدرسة الثانوية ) كانوا البنات مبسوطات وهو يسولفون ويرقصون ويطقطقون على العروسه ( المكسوفه 🫣)
اروى بضحك : وجد متى تصبغين اشقر وتحذف ارقامنا
ضحكت وجد : بعد ما استلم هداياكم
ميعاد :  عاد بعد الزواج راح تبهركم وجد في حالات وتس ( اللهم استودعتك عائلتي ) انفجروا البنات ضحك هستيري
ملاك : و لا تنسون السناب والهدايا والطلعات والمطاعم، واهم شي مسكت اليد
وجد صرخت عليهم علشان يسكتون لكن البنات استمروا وغنوا مع بعض : مخطوبه مخطوبه ابن خالي يعشقني والغيره اسلوبه
وجد بدات ترمي البنات بالخداديات وتهاوش وهو يبعدون عنها ويضحكون اكثر عليها
دخلت ام ميعاد على البنات وكانت معها حرمه غريبه
سكتوا البنات منحرجات ، قربت ام ميعاد وقالت : بنات ممكن اتكلم مع وجد لحالنا
ميعاد : ايش فيه يمه
ام ميعاد : ميعاد حبي اخذي صاحباتك للغرفه الثانية
ميعاد : يمه وش تبغين من وجد
ام ميعاد تقرب من بنتها وتهمس : موضوع خاص في عائلتها
ميعاد التفتت لصديقاتها واخذتهم برى
جلست وجد قدام ام ميعاد وهي خايفة مره ومستغربه
ام ميعاد : وجد ، الموضع اللي راح نتكلم فيه معك مره مهم وخاص ، بس قبل اوعديني تسمعين للاخر
وجد : تفضلي ياخاله
ام ميعاد : انا مادري ايش امك وخوالك قايلين لك عن ابوك وعائلة ابوك
وجد : ما قالو الا كل خير ، ان ابوي رجال طيب توفي بعد ماكتب كل املاكه لي ووكل خالي ابو عياف فيها ، وان ابوي كان وحيد ماله غير ولد عم بعيد اعتقد اسمه مسعد
ام ميعاد : طيب لو قلت لك ان كلامهم كذب وان ابوك مو وحيد لا ، كان عنده اخ واخت
وجد : خاله وش تقولين
قاطعتها ام ميعاد : لا تقاطعيني ارجوك ، بس قبل شوفي هذه الصور
اخذت وجد الصور كان صور لاطفال وشباب وصورة ابوه بينهم ، كان واقف وهو حاضن بنت وبجنبه وشاب يشبه
جود :  هذه صورة ابوي
تكلمت المرأة اللى جات مع ام ميعاد : ايه صورة ابوك ثواب وعمك عقيل وصورتي انا عمتك طرفه
وجد : كيف كذا امي تقول
طرفه : للاسف يا وجد امك كذبت عليك ، خالك حسين ابو عياف ذبح اخوي ودخل السجن فيه وامك اغرت اخوي ثواب اللي تزوجها وعفا عن اخوها وكتب الاملاك كلها لها واعطي خوالك فلوسه ، كل اللي معهم هي من فلوس اخوي ، وتحسبين انهم اكتفوا ، لا سوو لبوك كمين وذبحوه
فزت وجد مصدومه ودموعها تغرق عيونها : مستحيل انت كذابه
طرفه : والله مو كذابه ، هذا اللي صار ، طلعت ورقه من شنطتها ومدتها لوجد : شوفي هذه الورقة
اخذت وجد الورقة وكانت صك قصاص من المحكمه باسم خالها حسين المخلف ، بسبب قتله عقيل ال ناجي
وورقه ثانيه مكتوب فيه انا ثواب ال ناجي اعفوا عن حسين المخلف الذي قتل اخي غدرا لوجه الله
طاحت وجد على الكنبه مغمي عليها
صحت بعد خمس دقايق وشافت ان طرفه عندها وام ميعاد مو موجودة
طرفه : وجد حبيبتي بنت اخوي وريحة اهلى لا تخافين مني والله اني صادقه في اللى اقوله لك ، وانا جيت اقولك علشان تنقذين نفسك من ولدهم اللي يبغي يتزوجك علشان ياخذون ورثك لهم ، ما تشوفين المشاريع اللي يفتحها كلها بفلوسك والسيارات والبيوت والسفرات اللي متنعمين فيها بفلوسك ، وانت حابسينك بحجة ان امك تخاف عليك ، لا خايفين تقابليني واكشفهم لك
وجد تبكي وتسمع لها ، وطرفه تكمل : انا يوم كنت في عمرك حبيت زوجي ابو سعود وكان يشتغل عندنا شاب فقير ماله اهل ، ابوي كان يحبه ومامنه فيني يوديني ويجيبني للمدرسة ، اول ماكشف ثواب اللى بينا ضربه وطرده وهدد بقتله ، وانا حبسني في البيت وفصلني من المدرسة ، بس العناد والاصرار فينا يال ناجي ، لكذا هربت معه علشان نتزوج ، ساعدنا سواق يشتغل عند ابوي كان اردني ، قبل ندخل الاردن قابلنا اخوي عقيل وراح معي وزوجني ابو سعود ، عقيل قال لي : لا عاد ترجعين انسي اهلك وعيشي حياتك هنا مع زوجك ، لان ثواب وعيال عمي يدورون عليكم ، غيروا اسمائكم وعيشوا ، واعطاني مبلغ كبير ، وفعلا غيرنا اسمائنا وشرينا لنا ارض وبيت وعشنا في الاردن ، وبعد سنتين سمعت ان عقيل انقتل ، وبعد سنه ونص، وصل لنا ثواب ، بس ما سوي شي بالعكس بارك لنا واعطاني فلوس وطلع ، بعدين سمعت انه انذبح في كمين هو وعيال عمي ، اول ماسمعنا اللي صار رجعت انا وابو سعود وقابلنا مسعد ولد عمي وقال لنا ان المخلف هم اللي ذبحوه بعد ما زوجوه اختهم واخذوا املاكه ، بس ما قال عنك شي ، ماكنا نعرف انك موجوده لان امك وخوالك  مخبينك عن العالم وقبل مده بسيطه رجعنا السعودية بعد ماتوفي ابو سعود وصادفت ام ميعاد كانت صديقة لي في المدرسة اول ما سمعت اسمي ذكرتك وعلمت عنك ، على طول سعود ولدي بحث عنك وعرفنا بوجودك ، كان سعود وده يروح عندكم للبيت ويفضح كل شي بس انا منعته ، خفت عليك وعليه
وجد كانت جالسه تسمع لها وهي مصدومه بعدين سالت : وش اسوى يا عمه
طرفه : تعالي معي وخليهم
وجد : خايفه
طرفه : لا تخافين الحين انا قويه اقدر واقفهم عند حدهم
ولدي سعود معي ، خلينا نروح بيت ابوك ، لا ، لا خلينا نروح للاردن لمزرعتنا تتخبين عنهم وتاخذين كل اموالك ، وجد انا مو محتاجه اموالك والحمدالله عندنا خير وسعود يملك شركة استراد وتصدير ولنا مزرعة في الاردن واملاك فيها
وجد ارجعت للبيت وهي تفكر في كلام عمتها كانت تبغي تواجه امها وخوالها بس عمتها حذرتها منهم وطلبت انها تتنتظر لين يسوون لهم خطة ويقدرون يهربون
دخلت موضي على بنتها اللى واضح من وجهها ان فيه شي يشغل بالها ، جلست بجنبها وسالت : وش فيك يا وجد ما استانستي مع صديقاتك
وجد : الا بس مصدعه ابغي انام
موضي : نامي يامك ولا تنسين بكره الصباح موعدك الاخير في العيادة
وجد : ان شاء الله ، يمه اروح لحالي ما يحتاج تروحين
موضي : تعرفين ما اقدر اخليك تروحين لحالك
وجد بعصبيه : اف يمه تعبت والله من خوفك على ، انا مو صغيره خلاص بعد اسابيع بصير راعية بيت ولا بتحرسيني  هناك بعد
موضي تعودت على السان وجد الطول وكلامها الجارح لها لكذا معاد تزعل او تاخذ في خاطرها منها ، قامت بتطلع بس وجد مسكتها وجلستها وباست راسها ويدينها : اسفه يمه مو قصدي ، انت تعرفين لساني متبري مني
موضي : نامي يا حبيبتي
قامت موضي وقبل تطلع سالتها وجد : يمه ، فين بيتنا القديم ، اقصد بيتك مع ابوى
موضي : كنت عايشه في المزرعة انا وجدتك اللى توفت بعد اشهر من زواجنا اما ابوك كان عمله في الرياض يروح ويجينا كل ويكند
وجد : يعني المزرعة ملكي انا
موضي : ايه لك
وجد بعصبيه : وليش خوالي يروحون لها مع عيالهم متى ما يبغون
موضي باستغراب : لاني سمحت لهم  وبعدين اللى لي لهم
وجد : بس هي مو لك لي انا
انصدمت موضي من كلام بنتها بس ما قالت شي ، وجد صدت وانسدحت تعطيها ظهرها لامها
وجد اخذت رقم عمتها وكانت تتواصل معها وتكلمها كل مره وتحاول تسرق بعض الفرص من غير امها وتقابلها
ومره من المرات قابلت سعود معها ، كان واقف بجنب امه ، اول ما شافته وجد خافت منه رغم ان وجهه مايخوف ابد بس خافت ، قربت منهم وسلمت كانو متواعدين في المول ام سعود حضنت وجد : هلا ، هلا بريحة اهلى
سعود : حيالله بنت خالي
وجد بخجل : الله يحيكم
جلسوا كلهم وقدم سعود اوراق جديده لوجد فيها معلومات شامله عن ابوها وعائلته واملاكهم
وجد : وش اسوى في هذه المعلومات
سعود : احفظيها علشان تعرفين ابوك وتعرفين عائلتك وورثك
وجد : انا واثقه في خوالي مستحيل ...
قاطعها سعود : تعرفين ان عزيز بدء في مشروع جديد ، وبتكلفه عاليه مره ، وعياف فتح مكتب اكبر وزاد عدد الموظفين عنده ، وهيثم بني مبني جديد لشركه وراح ينقل فيها قريب ، هذا من غير المصروفات والسيارات الجديدة
حتى زواجك عزيز استاجر اغلا فندق واخذ اغلا جناح لكم
من غير الجناح اللى حاجزه لنفسه هو واخوانه ، وحاجز تذاكر طيران جوله كامله في اوروبا وفلل خاصه ، بالله هذه كلها منين
وجد : انصدمت من كلام سعود لان ما احد قال لها عن شي ، كل اللى تعرفه ان عزيز مخطط لهم رحلة شهر عسل مفاجاه لها
ارجعت وجد للبيت وبدات تخطط وتفكر في خطه مجنونه تفضح الكل فيها وتوضح حقيقة خوالها اللى استغفلوها طول هذه السنين ، طلبت من عمتها تسجيل صوتي تتكلم فيه عن كل شي تعرفه ، ثم طلبت من بشرى صور لعزيز وهو صغير : واح اسوي عرض فديو قبل الزفه لي انا وعزيز ومحتاجه صوره عن كل مرحله عمريه
بشرى : من عيوني ، واحمدي ربك امي من النوع اللي يعشق التصوير لكذا لنا صور كثير
وجد : ابغي صور عبيطه لعزيز يعني توضح شقاوته وجنانه
بشرى وهي تضحك : اصلا كل صور عزيز مجنونه
بعدين وجد طلبت لها منسقة خاصه واتفقت معها على كل الاحداث ، طبعا ماتعرف المصورة ايش هي نية وجد الحقيقية ، ويوم الزواج نفذت وجد خطتها ونجحت فيها
وطلعت من بينهم مع عمتها اللى اخذتها للمطار وطاروا لتركيا وكانت مجهزه لها جواز مزور ، وقدرت وجد تدخل تركيا من بجوازها المزور ، وبعد يومين طاروا للاردن لمزرعة عمتها ، جلست سنه كانت خايفة من عزيز بس سعود كان يطمنها كل مره لانه كان يراقب تصرفات عزيز ،
وبعد سنه ونص قبل تروح وجد مع نجد لندن علشان الدراسه اتصل على جوال عمتها خالها ابو عياف ، كان هذا الشي صدمه لهم ، ولما علمت ام سعود ولدها ، كانت ردت فعله غريبه ، عرفت بعدها وجد ان خالها سبق وقابل وكلم سعود
وجد : كيف عرف خالي عني ، اكيد عزيز راح يوصل لنا
سعود : لاتخافين عزيز مايعرف شي ، وخالك حلف انه ما راح يقول له مقابل يكلمك ويعرف اخبارك
، كلمت وجد خالها وطمنته على نفسها وارفضت ترجع لهم
في لندن صادفت سحاب البنت اللي كانت تكرهها وتغار منها يوم كانو في الثانوية مع بعض ، طبعا حاولت وجد تتجاهلها بس ماقدرت لان سحاب محبوبة والكل صديقها ، اطرت تتعامل معها علشان تسجيل المعهد ، وبعدين عرفت انها بنت طيبه وحبيبه
وجد : سحاب انا اسفه
سحاب : ليش تعتذرين
وجد : كنت نذله معك في الثانوية
سحاب : والله مو زعلانه ، بعدين هذيك المرحله كانت عقولنا صغيره ، الحين احنا كبار وانا اعتبرك اخت اكثر من صديقه
وجد : وانا والله
سحاب : ممكن سوال خاص
وجد عرفت ايش راح تسال لان كل المدرسة كانوا يعرفون ان وجد مخطوبه ، وجد : اعرف وش بتسالين ، للاسف زواجي مانجح
سحاب : ليش اخبر البنات يقولون ان بينكم قصة حب كبيره
ضحكت وجد لانها هي اللى انشرت هذا الكلام بين البنات لانها اجبرت تتزوج بدري فمكان منها الا انها تكذب هذه الكذبه
وجد علمت سحاب بكل شي بحكم انهم صاروا صديقات ، والغريب ان سحاب وقفت معها وشجعتها تدرس علشان يكون انتقامها اقوي ، سحاب صارت لوجد الاخت اللى كانت تحتاجها ، رغم ان نجد كانت طيبه معها وتراعيها ، بس علاقتهم كانت رسميه وهذا اللى كان مزعل عمتها منهم
: انتم ليش مو صديقات ، ليش تعاملون بعض كذا
نجد : ماما مافيه شي احنا كذا مرتاحين كل وحده وتفكيرها وانا احب وجد واخاف عليها ، وهذه اقصي حدودي في التعامل معها
وجد : عمه انا ونجد بنات خال ونحب بعض ونقدر بعض بس هذا مايعني نكون صديقات
ام سعود بعصبيه : وليش ماتكونون صديقات ، هذا انت علاقتك مع سعود زينه
وجد : ومع وجد بعد علاقتي زينه
انتقلت سحاب وميثاء ووجد ونجد لشقة اكبر وافضل
وكان لكل وحده غرفة ، زادت الصداقه بينهم اكثر واصبحوا مقربات من بعض اكبر وتحسنت علاقة وجد ونجد
في يوم الحادث نجد كانت في شقة اخوها سعود اللي كان في زيارة عمل لندن ، وفضلت وجد تقعد في شقتها مع البنات
بعدين صار الحادث اللي قلب كل الموازين وغير الحقائق
انصدمت وجد بعد ماهربت من عزيز في المطار ان سعود قابل خالها وامها وعرفت كل الحقيقة عن موت خالها عقيل وابوها ، حست بالخيانه منهم كلهم وقررت ترجع السعودية
وبعد ما ارجعت تواصلت مع خالها هيثم وطلبت تقابله
وجد كانت راح ترجع لامها في النهاية بس كانت تبغي الطلاق من عزيز وعمها وعدها ، وهي قالت لعمتها ما راح ترجع لامها الا اذا طلقها عزيز ، وراحو لبيت خوالها وهم متفقين على هذا
لكن اللى سوته موضي وعزيز فيها غير طريقها مره ثانيه