مساء الخير يارب تكونوا كويسين
من وقت ما نزلت الفصل و لاقيت بعض الكومنتات إلي ضايقتني بصراحة و إلي كانت تنُص علي إن الفصل صغير و أحداثه قليلة
رغم أن الفصل ٥٠٠٠ كلمة !
و دا لمجرد إني نزلت إقتباس قبلها و المفروض أن الإقتباس دا أصلًا من الفصل يعني طبيعي إن في مشهد أتحرق منه .
انا مش في مقدرتي أكتب فصل أطول من كدا ظروفي متسمحش والله أنا غير وقت الكتابة تقريبًا باخد ساعتين و يمكن أكتر في المُراجعة و أكيد أنتوا لاحظتوا إن الأخطاء الإملائية تكاد تكون معدومة .
فبناءًا عليه مش هنزل اقتباسات تاني قبل أي فصل و رجاءًا محدش يزعل بس أنا الكومنتات ضايقتني فعلًا
ماهو حقيقي ميرضيش ربنا إني أقعد أكتب في بارت ٥٠٠٠ كلمة عشان في الآخر يطلع أحداثه قُليلة و مفيهوش جديد يبقي نخلي البارت كله ينزل مرة واحدة أفضل
كمان عايزة اوضح نقطة كون إن سليم بدأ يحس بمشاعره لجنة يعترف لنفسه بيها و يستنكرها دا حدث و نفس النظام لسالم في تطور في علاقته بفرح حتي لو لسه معترفلهاش أو معرفش لنفسه بس أنت كقارئ بتقرأ السرد إلي بياخد مني وقت طويل جدا علشان أوصلكوا فيه مشاعر الأبطال
دي مش رواية أكشن دي رومانسي درامي يعني الأحداث أحيانًا بتبقي في تطور المشاعر بين الأبطال
نقطة كمان مش في كل بارت هتبقي الأحداث مفرقعة في بارتات هاخد فيها منحني الهدوء عشان الحدث ياخد وقته لإن مفيش حاجه بتيجي خبط لزق كدا يبقي بكروتكوا و مبحترمش عقل القارئ
كل حاجه لازم بتاخد وقتها و إلي متابعني في للعشق وجوه كثيرة هيفهم كلامي كويس
معنديش مشكلة في النقاش والله و بفرح بكومنتاتكوا جدًا حتي لو مبقدرش أرد عليها كلها بس بقرأها
ناس كتير بتطالب إني أزود يوم في الأسبوع طبعًا دا مستحيل انا زوجة و أم و عندي ابني في حضانة و بنتي لسه طفلة رضيعة و فيلم كبير كدا فهيكون صعب جدًا عليا إني أنزل يوم زيادة
أنا عارفة ان دا من حُب الناس في الرواية و دا شئ مفرحني بس أتفاجئت لما لاقيت بنوته بتقول أنا بنسي الأحداث ! الي هو إزاي يعني الفصل بينه وبين التاني يومين تلاته و بتنسي الأحداث !
أكيد حضراتكوا متابعين كاتبات كتير غيري و تقريبًا مُعظم الكاتبات إلي بتنزل روايات في الوقت الحالي بينزلوا يوم واحد في الأسبوع فحلو أوي لما أكون أنا بنزل يومين أعتقد مش جاية علي حد و بحاول ألتزم بمواعيد النشر علي قد ما أقدر و أول مرة أعتذر كان عن البارت إلي فات لظروف صحية .
رجاءا نتفهم ظروف بعض و أنا والله مابحبش أزعل حد و لو أقدر أنزل أكتر من كدا مش هتأخر دا مصلحة ليا عشان اخلص الرواية علي طول و أبدأ في غيرها .
طولت عليكوا سامحوني و أتمني كلامي ميزعلش حد و البارت إلي شايفينه هادي إلي بعده هيكون ضرب نار و هكذا ♥️
أتمني منكوا انكوا تزودوا التفاعل شويه عشان الرواية تتصنف و تاخد تقييمات عالية و توصل لأكبر عدد من الناس ♥️
شكرًا لكل حد جميل قالي كلمة فرحتني أسأل الله أن يعطيكم أضعاف ما جعلتموني أشعر به ♥️♥️♥️♥️
أن شاء الله لو قدرت الفصل هينزل بكرة و أول ما تنزل المقدمة هغلن علي صفحتي علي واتباد أعملولي فولو عشان يوصلكوا كل جديد ♥️
أنت تقرأ
في قبضة الأقدار (سلسلة الأقدار )
Romanceفي قلب كلًا منا غرفه مغلقه نحاول عدم طرق بابها حتي لا نبكي ... نورهان العشري ✍️ في قبضة الأقدار ج١ بين غياهب الأقدار ج٢ أنشودة الأقدار ج٣
