يحدُث أن ينطِق كل شئ بك صارخًا أُحِبُك بينما أنت مُتسلِحًا بصمت مُطلق خوفًا من الوقوع بفخ عينين اختلط بهم العشق و الرفض معًا فتصبح كمن يقف بمنصف جزيرة تتوسط بحرًا هائجًا أن بقي بها سيهلك من الوحده و أن جازف والقي بنفسه بين أمواجه الثائرة قد يموت غرقًا أو عشقاً
نورهان العشري ✍️
🍁🍁🍁🍁🍁🍁🍁🍁🍁
كان نظراته مصوبه أمامه تتفرق بلامبالاة في وجوه المحيطين بهم بينما قلبه كان عالقا بها منتبه كليا لكل ما يصدر منها و تابع في محاوله منه للامساك بطرف الحديث معها و الذي لا يريد أن ينقطع بينهم أبدا " يعني أنتِ شايفه أن علاقتهم دي ممكن تنجح ؟" عارضته مصححه " هي أصلا لسه مبقتش علاقه عشان نفكر إذا كان ممكن تنجح أو لا؟"
ارتشف من الكوب الخاص به قبل أن يُغمغم ساخرًا " كمان.. الله يعينك يا سليم !" اغتاظت منه فحاولت رد سخريته قائلة بتهكم " والله كل واحد بيزرع الي بيحصده.. و الي زرع شوك مش زي الي زرع ورد. "
علق ساخرا " المبالغة و الستات!" " مش مبالغة علي فكرة بس هو غلط في حقها و يستاهل"
صاح بنفاذ صبر " ماهو بيعمل المستحيل عشان يصلح غلطه." التفتت تناظره بغل اختلط مع نبرة صوتها حين قالت " مش كفايه . مفروض يداوي الجرح الى جرحهولها الموضوع مش سهل و لا هيخلص بين يوم و ليلة.."
ضاق صدره من جدال عقيم كان هو بوادى و هي بآخر فقال بملل و نظرات حانقه " طب و لو خلقه ضيق و عايز ينجز في الليله كلها يعمل ايه ؟"
كانت تهوي استفزازه سابقا اما الآن فهي غاضبه منه و من نفسها و من تلك القيود التي ستغرقها بأعماق المحيط دون القدرة علي التحرر أبدا " هو سلق بيض ايه ينجز دي ؟ "
غلف الغضب نظراته حين قال بفظاظة " ماهي الأفعال مش نافعه يعمل ايه تاني يقطع نفسه !!" خرجت الكلمات مندفعه من بين شفتيها حين أجابته " يقولها.. وهي هتعرف منين هو بيعمل كدا ليه بتضرب الودع مثلا. "
رفع إحدي حاجبيه استنكارا تجلي بنبرته حين قال " لا والله . يعني هي كل دا مفهمتش؟ و مستنياه يقول!!" تحلت بفضيلة الشجاعه وقالت مؤكدة " ايوا طبعا. لازم يعرفها عشان تقف علي ارض صلبه.."
غلف المكر عينيه التي ضاقت حين قال بتختبث "يعني لازم يقولها أنه بيحبها عشان تعرف ؟ " بشجاعه غير معهودة يغلقها توسل مبطن " ايوا طبعا لازم"
تحدثت عينيه اولا والتي كانت مسلطه بقوة علي خاصتها حين قال بنبرة قويه ولكن خافته "طب لو واحد بيحب واحده الحب نفسه قليل عليها يعمل ايه؟ يوصلها إحساسه بيها ازاي ؟؟ "
شعرت بأنها مهددة بالسقوط أمامه فنظراته حاوطتها بشكل لم تعهده سابقا و كأنها تحصرها بينه و بين كلماته التي جعلت نبضاتها تتعثر بقوة داخل صدرها ولكنها حاولت الحفاظ علي ثباتها حين قالت باستنكار " دي مبالغه منه أو وسيله للهروب مفيش حد الحب قليل عليه "
عاندها قائلًا بعينين تقطران عشقًا " في يا فرح.. زي مافي مشاعر بتتظلم لما نسجنها في كلمه حُب قليله اوي عليها.."
اجتاحتها زوبعه من المشاعر المتضاربة بقوة كان أولها الترقب و اللهفه وآخرها الخوف الذي لأول مرة تتجاهله قائله بشفاه مرتجفه " يعمل الي عليه و يقول اي حاجه وهي اكيد هتفهم و تحس" باغتها سؤاله الذي يشوبه اللهفه " ولو كان خايف من رد فعلها؟" اجابته باندفاع مستنكرة " خايف!!! الي اعرفه عنه أنه ماببخافش "
لأول مرة يغزو قلبه الارتياح منذ أن وقع بعشقها ولكنه أراد الوصول لأقصي درجات الأمان معها فسألها بتخابث " هو مين الي مبيخافش ؟" " هاه.."
شعرت بوقوعها بالمصيدة التي نصبتها عينيه ولم تعد تستطيع الحديث للحظات فاقترب منها خطوة متجاهلا وجود الجميع حولهم وقال بلهجه مُلحه " مين الي مبيخافش يا فرح ؟"
كانت كمن يحاول تحريك جبلا شامخا من مكانه . لا تعلم هل مخطئة ام مصيبه ولكنها شعرت بموجه من العبرات تجتاح مقلتيها مرورا بقلبها الذي ضاق ذرعا بما يحدث فانثاقت خلف لحظات جنونيه اغرتها بالتخلص من حمل هذه المشاعر التي ستُهلكها يومًا ما فقالت بانفعال " أنتِ عايز ايه ؟ عايز تسمع مني ايه ؟ عايزني اقولك اني ….
باااس مش قيلالكوا هتقول ايه عشان تبقوا تبطلوا تتفاعلوا حلو تصبحوا علي خير الاقتباس دا كنت واعده بيه الناس القمر الي بترشح روايتي بس عشان محدش يزعل نزلته لكن بعد كدا هيبقي ليهم اقتباسات خاصة بيهم تقديرا ليهم زي ما قدروني عجبني التصميم اوي و اللقب الجديد دا حقيقي عجبني اوي #قيثارة_الكلمات بجد لمسني أوي أوي شكرا للناس الي بتحاول تفرحني ♥️♥️
