في قبضة الأقدار (سلسلة الأقدار )

حلقة خاصة

حلقة خاصة ♥️

بسم الله الرحمن الرحيم

حلقة خاصة بعنوان " عشقًا خُلِق من رحِم القلب"

خُلِقتِ من ضلعٍ أعوج يُجاور القلب، لم يستقيم إلا حين لُقياكِ،
و قُر الفؤاد بدفء وجودك و انتهت عجاف العمر الذي كان قبل أن ألقى عيناكِ.
و الروح رُدت إليها روحها و النفس اهتدت و صار وهج بريقها براقِ.
فيا عزيزة الروح بالله عليكِ أخبريني اي عين تعشقك يُمكنها أن ترى سواكِ؟

نورهان العشري ✍️

🍁🍁🍁🍁🍁🍁🍁🍁🍁

_ ايه يا كبير انت لسه هنا؟

هكذا تحدث مروان بحماس وهو يدلف إلى داخل مكتب سالم الذي لم يرفع وجهه من على الأوراق أمامه انما غمغم بخشونة
_ اروح فين يعني؟

مروان بتهكم
_ هنروح المولد. هنروح فين يعني مش مفروض هنروح عشان نستعد للفطار و للمُزز قصدي لميعاد الوفد الألماني اللي بعد الفطار؟

القى عليه سالم نظرة تحذيريه قبل أن يُعيد أنظاره الى الورق الذي أمامه مرة أخرى وهو يقول بجفاء
_ معاد الوفد الألماني اتغير و هيكون قبل الفطار و احتمال كبير منعرفش نروح نفطر في البيت، و نفطر هنا في الشركة.

مروان بصدمة
_ خليتوا المعاد قبل الفطار! دا احنا هنفطر ييجي رمضانين قدام. دا مين ابن المؤذية اللي قرر الموضوع دا؟

_ أنا يا خفيف.
أتاه صوت سليم الساخر من الخلف جعله يلتفت غاضبًا
_ طبعًا لازم تكون انت. اي نصيبة لازم يكون ليك فيها بصمة. حسبي الله يا شيخ. كنت ناوي احلى بعد الفطار . ربنا يسامحك.

سليم بتشفى
_ غض البصر في الصيام و بعد الفطار يا خفيف.

ناظره مروان شذرًا قبل أن يقول بحنق
_ طب واحنا بقى أن شاء الله هنفطر على خفة دمك ولا هنفطر على ايه؟

سليم باختصار
_ طارق كلم مطعم قريب من هنا هيبعتولنا فطار.

صاح مروان حانقًا
_ طارق؟ طارق مين اللي هيطلبلنا طفح؟ دا عامل ريجيم بقاله تسع سنين و عايش عالخس. مين اللي اقترح الاقتراح الغبرة دا؟

سالم بنفاذ صبر
_ مروان الصيام و الصداع مش طالباك. خف شويه. اي حاجه و ابقى روح كل في البيت.

عند ذكر أمر المنزل تذكر مروان تلك الوليمة التي أعدتها النساء فهتف باستنكار
_ يا جدعان النهاردة في وليمة في البيت. اسيبها و أفطر خس هنا؟

سليم بتهكُم
_ كله أكل يا مروان، و بعدين لازم تفهم أن الإنسان بياكل عشان يعيش مش بيعيش عشان ياكل.

مروان بسخرية
_ دول الحيوانات يا بابا اللي بالنسبالها التبن زي العلف زي البرسيم كله أكل، و بعدين اللي يسمعك كدا ميشوفش العشرة اكس اللي بتلبسه.