في شوفتك سالت دموع العين من فرحها

"37"

طلعت ارجوان ووقفت ونظرها على سعود ، تاكدة انه سعود حست بالخوف ماتدري وش السبب لكن الخوف تملكها من شافت سعود ، توجه سعود لـ سيارتة واستند على الباب ، رفع نظره لـ ارجوان ، وصدت ارجوان عن سعود من ناظرها ، غمضت عيونها بخوف وحاولت تمشي وتحس في شي مثبتها ماتقدر تتحرك ، نزل سعود نظره على جواله ودق على جابر ,
، كان مشاري منتبه لـ ارجوان قطب حاجبه ولف على وصايف : شفيها ؟
رفعت وصايف حاجبها : مدري يخي نفسيه واحس فيها شي ماهي بصاحيه
مشاري : انزلي شوفيها ليش صنمت هناك
تاففت وصايف : لازم ؟
ناظرها مشاري وقلد نبرة صوتها : اجل تبين انزل انا ؟
نزلت وصايف ونادت بصوت عالي : ارجوان
رفعت ارجوان راسها من سمعت صوتها وشافت وصايف ، لفت لـ سعود خوف من انه سمع اسمها وشافته يدور بنظره وسحبت وصايف معها وركضت لـ السياره ، تاكدة وصايف ان ارجوان مو صاحيه وتجاهلتها وركبت السياره وندمت انها اخذت ارجوان معها، و سمع سعود اسم ارجوان صار يدور مكان الصوت لكن ضيعه ،توقع ان يتهيأ له وهمس بضحكة : والله من كثر الحب يسعود صارت كل الاسماء ارجوان عندك
انتظر سعود البنات وطولوا مره , ركب السياره ينتظرهم وابتسم من تذكر عُيون ارجوان وبدون وعي صار يردد بيتين شعر تذكره بـ حبّيبته :
أموت بين الخد وعيونه السّود
وحواجبٍ ربّي بملحه قرنها

وشَعر يدهن المسك والورد مكدود
جديلةٍ تضمني .. واحتضنها .
تنهد سعود ورجع راسه على المرتبه وغمض عيونه ومّر بباله ملامح ارجوان وعيونها السّود ، تنهد بلهفه وشوق : اخخ يام العيون السّود وش سويتي بسعود !
-
«بـ سيارة مشاري »
حاطه ارجوان يدها على خدها ونظرها على الشارع , وفي بالها اسأله كثير واولها وش سبب تواجد سعود بـ الرياض ، تنهدت من تذكرت اعتذارات سعود و كان بموضوع الاعتذار غبي جداً ، تحس بفرط مشاعر قوي وماتنكر خوفها لمًا شافت سعود , للان ماتعرف هل سعود عرفها او ما درا انها موجودها أصلًا , وللان ماتعرف هي تكره سعود او ... ,
و قاطع سرحانها من لفت وصايف على ارجوان ونطقت : ارجوان !! فيك شي ؟
لفت عليها ارجوان , ونطقت بهدوء  : هلا لا ليه
وصايف : مدري احس فيك شي مو طيبه ومع البنات ما تتكلمين ؟ ليه ووشفيك توترتي يوم جيتك ! ؟
ماحبت ارجوان اسألت وصايف : مااعرفهم فـ عشان كذا
ابتسمت وصايف : ماله دخل مره ! الصراحة تفشلت مع البنات !
لف مشاري على وصايف ودقها بخفه من كتفها وهمس : وصايف !!
ناظرته وصايف وبصوت مرتفع : اشبك ؟ اعلمها وش صار فقط
كشر مشاري بوجه وصايف ورجعت ظهرها على المرتبه ونظره لـ الطريق ، ندمت ارجوان انها راحت معهم وتمنت أنها قعدت ، وتمنت إنها قعدت ولا راحت مع وصايف , وصلوا البيت ونزلت ارجوان ، توجهت لـ قسمهم , دخلت وفكت النقاب وحطت شنطتها بسرعه وراحت تدور امها شافتها جالسه على سجادتها , وتربعت جنبها , سلمت ام طلال ولفت على ارجوان : شعندك ؟
رفعت ارجوان يدينها : الحين تقولين لي ليه احنا نقلنا هنا ! ابوي يقول في اشياء ماتعرفينها ! وش السبب !!!!
وقفت ام طلال بهدوء ونطقت : هذي امور ماله داعي تعرفينها !
وقفت ارجوان : كيف ماله داعي !!! فجاه تقولون يالله مشينا ! ونجي هنا مانعرف احد ولا احد يعرفنا وابوي جايبنا عند ناس غريبين ، و في سبب مستحيل بدون سبب ولا ابوي يحب الديره ولا يقدر يطلع منها ايش صار ؟ و ليهههه !!!!!؟
تنرفزت ام طلال من كلامها ولفت عليها بغضب : تبين تعرفين ؟ هولد ناصر من بني راجح هو السبب بموت اخوك !! ارتحتي الحينن !!!!!
رفعت ارجوان حاجبها بصدمه وخطر ببالها على طول سعود , تجمدت ولا قدرت تنطق بـ حرف ,
ناظرتها ام طلال : عشان كذا ماقلتلك ! لا عاد تحفرين ورا اشياء مالك داخل فيها وافضلك تبعدين عنها ولا بتعبين !!!
عضت شفتها تحاول تكتم بكيتها و سالت دموع ارجوان حزن وقهر , طلعت من غرفة امها وقفلت الباب , توجهت لـ غرفتها بهدوء , حست بضيق قوي بصدرها من قوة الضيقه تحس انها بتختنق , وحاطه ببالها ميه بالميه ان سعود الي تقصده امها , دخلت غرفتها , وتوجهت لـ الدولاب , وبدت تدوره بين الملابس وهي مخبيته بين الملابس احتياط , لقته فتحت الشاشة وشافت الخلفيه , عبّست وجهها من لمحت سعود , وكان حاضن طلال , ونطقت بغصه : صاحبك الي تفتخر فيه غدر بك يخوي  , الله يرحمك يطلال
حطت الجوال على صدرها حاضنته ,و  انهارت تبكي كان صعب على ارجوان تقبل موت طلال وكل فتره يصير شيء يذكرها فيه ، حست بكره شديد وحقد على سعود , وهو اخذ منها اخوها الوحيد , انسدحت على سريرها وحاضنه الجوال وتبكي , ومن التعب نامت .
-
«بـ بيت ام خالد , بعد المغرب »
وقف سعود عند الباب ويناظر بالحي , الحي كبير وراقي , جذب سعود هدوء الحي , جلس على عتبت الباب , ولف على نور السياره , وقف من شاف خالد , نزل خالد , وسلم على سعود  , وجلس جنب سعود , لف سعود على خالد ونطق : الحين العمارات ذي كلها فيها عرب ؟
خالد : اي وحده ؟
سعود : انا ابي لي بيت
استغرب خالد طلب سعود :   بيتنا يكفي اقعدوا عندنا وانتم فتره وترجعون الديره !
هز سعود راسه : لاا والله مانبي نكلف عليكم وودي البنات ياخذن راحتهن اكثر وهنا صعبه ابوك وانت مااقدر
خالد بابتسامه: اجل بكره الصبح بمررك على الفلل وتشوفها
سعود : توكلنا على الله
وقف خالد ولف على سعود : جويع ؟
ضحك سعود : اي والله جويع
خالد : هتعال في مطعم يمدحونه الشباب انه حلو مره وراقيي
وقف سعود : قدام
ركب سعود مع خالد ومشوا متوجهين لـ المطعم ، وطولوا على بال مايوصلون , وقف خالد ولف سعود عليه : كنت متوقع نوصل الفجر
ضحك خالد بخفه : تعرف الزحمه
نزل سعود وتوجه لـ الباب , دخل ولف على اصوات صراخ , قطب حاجبه من شاف رجال واقف وقدامها نساء ورجال ويهاوشهم , توقع انه صاحب المطعم ,
نطقت وحده من الموظفات: نعتذر منك يا راكان و وعد اخر مره يصير مثل هالتقصير  !
راكان بغضب : وين اصرف اعتذارك هذا ؟ بعد مافشل المطعم ؟ بسببكم الزباين انحاشوا معاد احد يدخل مع هالباب !!
الموظف : ان شاء الله كل الي تامر عليه بيحصل وبنعدل الوضع
ضحك راكان بسخريه : ماتفهم انت؟؟
نزل الموظف راسه لـ الارض , زفر راكان بغضب من الوضع و
اشرت الموظفه على سعود وخالد :  راكان وراك
لف راكان وشاف العيال ونطق : المطعم مقفل ماتشوف ؟
رفع سعود حاجبه : المعذره يخوي الباب كان مفتوح ودخلت مادريت انه مقفل
صد راكان : الله يستر عليك
استغرب سعود تعامل الرجال , وسحب خالد وطلع : فهمت شي ؟
خالد : شكله فشل الصدق هذا وجهه مو وجه شغل ومسؤوليه تلقاه شبعان ومايدري وين يصرف فلوسه
ضحك سعود بخفه : والله فكرة المطعم جازتلي بعدين بفتحلي مطعم ان شاء الله وبدخل شريك مع شخص مو لحالي
توجه خالد لـ السياره ونطق : ليه مع شريك ؟
ركب سعود : عشان يساعدني واساعده ولحالي بيكون علي ضغط
خالد : افتح المطعم وانا اول داعم لك
سعود بابتسامه: الله يعطيك العافيه يبو دارين , مير انه كلام ماضنتي بسويها
خالد : ليه ان شاء الله تسويها ونشوفك اكبر تاجر بالمملكة
ضحك سعود : اكبر تاجر !! وين
ضحك خالد وكنسلوا المطعم ورجعوا لـ البيت .
-
«بـ المالديف , الفجر  »
مر يومين على وصول حور وحاتم لـ المالديف ، كانت حور جالسه على الكرسي ونظرها لـ السماء وتتامل شروق الشمس , حُبت حور الشروق من بعد ليالي وحبها الشديد لـ الشروق واللوانها, اشتاقت لـ البنات بالحيل , وعمانها وعمتها نوره ومزون , تنهدت بضيق من طرا ببالها مزون , حست ببروده خفيفه و لفّت لاسفل الكرسي وكان فيه بطانيه ملفوفه , اخذها وحطتها على أكتافها , وحاضنه رجولها ومغطيتها بالبطانيه  , و كان حاتم مستند على الجدار ويناظر حور ويراقب جميع تصرفاتها وتقلب مزاجها بـ دقيقه وتقدم لـ جهتها , ورفعت حور راسها من حست بحركه وشافت حاتم , رجعت نظرها لـ السماء وللان مو قادره تتخطى سالفة منى , وقف حاتم قدامها , وبهدوء : في مكان ؟
رفعت حور نظرها لـ حاتم , وتحاول تبين قوتها ولا تنكسر وتبكي وحور ماتحب تبكي عند احد وندامه انها بكت عند حاتم , جنبت عن المكان , وجلس حاتم جانبها , لف وجهه لـ حور , زفر بضيق من شاف ملامحها : للان ؟
ناظرته حور وبنفس نبرة حاتم : بايش ؟
ميل حاتم راسه : لزعلك مثلًا
اخذت حور نفس طويل , وزفرته ببطى , ونظرها لـ السماء : وهل بنظرك ان الموقف الي حصل يستاهل الزعل ؟
رجع حاتم جسمه لـ الكرسي واستند عليه : لو صار لك نفس كذا يمكن اذبح الولد
ابتسمت حور : حسيت بمرارة الشعور ؟
ناظرها حاتم بضيق وهُم من جوّا لـ المالديف وهو يحاول فيها وكانت تطنشه كثير , تنهد بقل حيل : الحياة ماتوقف على شي يحور ! والزعل ماهوب بحل
لفت حور عليه , ومقطبة حاجبها : اجل وش الحل  ؟
حاتم : تفهمين الي صار وتستوعبينن وش كان موقفي !! عرفتي !
لفّت حور على حاتم بـ غضب ورفعت يدها : مافي شي ينفهممم !!! الي صار شي مو هين !
نزل حاتم يدها لـ اسفل الكرسي وشد عليها , قرب وجهه لـ حور , ونطق بنبره قريبه لـ الهمس : لهدرجه تدورين الزله علي ؟
توترت حور من قرب حاتم وشتت نظرها , ونطقت بتوتر : ماله... دخل ...
و وقفت بتدخل , وقف حاتم ومسكها من ذراعها : حورر ...
غمضت حور عيونها , وفتحها , لفّت لـ حاتم , عابسه وجهاا : حاتم فك يدي بدخل انام !
حاتم بـ ابتسامه مستفزه : بتنامين ؟ ولا تنحاشين عشان ماتبكين ؟
قطبت حاجبها بـ استغراب من كلام حاتم : انت بديت ... تلخبط بـ ... بالكلام .... ولـ...
قاطعها من سحبها لـ حضنه ، وشد عليها وشوي وتدخل بعظامه , تنهد ونطق : لا تخلين سفرتنا تخرب بسبب منى والي معها
غمضت حور عيونها تحاول تكتم دموعها , نزل حاتم نظره لـ حور ونطق : لهدرجه انتي والدموع اعداء ؟
مسحت دموعها بقوه ورفعت راسها لـ حاتم : شدخل ؟ لا
ضحك حاتم بخفه , وللان حاضنها ولا وده يتركها وماصدق بادرته لو شوي .
-
« بـ الرياض , 3 العصر »
رفع سعود ذراع لـ السماء من شاف خالد متوجه لـ جهته : وأخيرًا الحمد لله الحمد لله الي خلاني اشوفك
ضحك خالد وتوجه لـ سعود وحضنه : المعذره والله انشغلت اليومين ذي ولا كان طلعنا ندور
ضحك سعود : يالله مشينا خل ندور
ركبوا سيارة خالد ولفوا الاحياء كلها وماخلوا فله مادخلوها ولا بيت ولا شي يعجب سعود ولازم يطلع عيب فـ الفله , وبعد طلعت روح دخل سعود فله وصار يدور بالغرف , ودخل غرفة كبيره وجازتله بالحيل , طلع من الغرفه وكان يكلم البنات كام ونطق : شرايكم البيت حلو حلو والله
ورجع لـ الغرفه الكبيره : وذي ترا لي دبروا انفسكم
ليالي بضحكة : ليش كبيره ؟
لف الكمره على وجهه وبـ ابتسامه : غرفتي انا وارجوان
ضحكت ليالي : تلف الجوال كله ليه اضغط على الشاشه وتقلب الصوره ؟ وحركات ارجوان ؟ للان عندك امل ؟ هههههههه
سعود : شعرفني بالجوال  ههههههههه ...... واكيد في امل بس والله الغرفه كايفههههه وفيها بلكونه اسطوريهه
ليالي : الصدق شكلها حلوهه , تمام بكره نجي نشوفها
رجع سعود الكمره ومشى : ايه الحين بطلع وبكره نجي كلنا ونختار الاثاث ونسكن والديره شكلي ماني بمعود لها جازتلي العيشه هنا
فتحت ليالي عيونها بقوه : لااا تمزححح !!! كل خميس وجمعه بنروح ل الديره
لف سعود الكمره على وجههه : صاحيه انتي كل خميس وجمعه رايحين وراه ؟؟؟
ليالي : ابوي !!!
سعود : خرشتيني الله يقلع بليسك معليه ابوي بنجيه بس والله ماني بقاطع مسافه كل اسبوع ترا الطريق مو هين
زعلت ليالي : خلاص هونت خل نرجع !!
ضحك سعود : نعود الديره ؟ مستحيل
عبست ليالي وجها : يالله سقها
وقفلت من سعود , ضحك و نزل جواله ورجع لـ الغرفه تكتف والابتسامه شاقه وجهه : اخخ يام العيون السّود لونك معيي الحين !
دخل خالد وسمع سعود وضحك : ام العيون السّود ؟
لفّ سعود على خالد وضحك بخفه ، نزل راسه ونظره على رجله الي ويحركها بالارض ، ابتسم خالد ونطق وهو متوجه لـ البلكونه : شكل في حب كبير بقلب سعود
ضحك سعود بـ قوه ونطق : عذبنيي هالحبب
توجه خالد لـ سعود وحط ذراعه فوق كتف سعود : الله يكفيك شره اجل
لف سعود عليه بـ قوه : لا والله ابيه بشره وخيره
ضحك خالد ، وطلعوا من الفله واتفقوا يجون بكره ويجهزون اوراق نقل الملكية .
-
«بالرياض, بـ بيت ابو طلال »
رجعت ام طلال من عند ام مشاري ودخلت البيت بسرعه وتوجهت لـ غرفة ارجوان , حاولت تفتح الباب لكن ارجوان مقفلته , صارت بدون وعي تدق الباب بقوه وتصارخ , فزت ارجوان من نومتها مرعوبه من الأصوات, رفعت راسها على كلام امها
ام طلال بغضب : ارجوانن فكيي الباااببب لا انادي ابوك الحين !!
وقفت ارجوان بخوف وتمشي بهدوء لـ الباب وترجف ، ماتدري ليه لكن حست بخوف , فتحت الباب وابتعدت بسرعه عنه , دخلت ام طلال ومسكت ارجوان من عضدها , وبغضب : وش مطلعك الصبح !!!! من ذاك الولدد!!!
لفت ارجوان بصدمه على امها ونطقت : اي ولد ؟؟؟
ام طلال : لاتسوين نفسك غبيه وحده من الجارات تقول جتني بنت اسمها ارجوان ويلحقها واحد منهوااا !!!!
ارجوان : عانيك تقولينها يلحقها شدرانيي عنه مااعرفه لو اعرفه ليه يلحقني ؟؟؟
ضربتها على كتفها بقوه : ليه يلحقكك ؟؟ وش مسويه ؟
صرخت ارجوان : ماسويت شيييي ماسويتتت شييي !!!
نطقت ام طلال وهي راصه على اسنانه : اجل ليه الحرمه دورت على بيتنا دوار ؟ ماخلت احد ماسالته عنا ولقتنا وتجي تعلمنا ؟
رفعت ارجوان نظرها لـ امها بصدمه من خباثة غاليه وراحت علمت كل الي بالحاره على تصرف مالها ذنب فيه وكان مشاري السبب , بعدت يد امها ونطقت : صحيح انا طلعت الصباح امشي لكن الولد هذا كان جالس بسيارته ولحقني يقول شفتك طالعه من بيت بني حمد بس
ام طلال : بس الي تقوله الحرمه مو كذا تقول دخلت بيتي وتقول يهددها وحالة البنت حاله يوم جتني
صرخت ارجوان : كذابهههه كذذابهههنه انا مادخلت بيتها !!! ولا جيتها والولد اختفى ولا اعرفه !!!
رفعت ام طلال حاجبها : واذا طلع كلامك كله كذب ؟
ناظرتها ارجوان بصدمه : يعني ماتصدقيني ؟ تراني بنتككك ماني بنت واحده من الجيران ! وانا طلعت ابي امشي ابي اغير جوو انخنقت بالبيت !!!
فكتها ام طلال وشالت يدها بقوه , وطاحت ارجوان على الارض , طلعت امها , تجمدت على الارض , تحاول تفهم وش صار  وندمت انها دخلت على غاليه وكلمتها , وقفت بصعوبه , حست بالام مو طبيعي اسفل ظهرها , مررت اصابعها عليه ومن الطيحه تاثرت مره ،
وقفت وتوجهت لـ الباب ، قفلته ورجعت لـ سريرها واتصلت على.....
-
توجهت ارجوان لـ سريرها , اخذت جوالها واول شخص طرا ببالها ميار , تعرفت عليها وعرفتها وكانت البنت قمه بالاخلاق واسلوبها , حبتها ارجوان , اتصلت عليها
, ردت ميار بترحيب : ياهلاا ومسهلا يمرحباا يجوجووو
ابتسمت ارجوان وضحكت بخفه : هلابك يقلبيي اخبارك ؟
ميار : الحمدلله بخير انتي كيف ؟
ارجوان : نحاول نكون بخير , ميار فاضيه ؟
ميار :  ايه يقلبي امري ؟
وقفت ارجوان وتوجهت لـ الشباك ونظرها لـ الحوش , وعلى انها تعبانه وظهرها يوجعها الا ماتبي تقعد وكرهت البيت بشكل ، : شرايك نطلع ؟
ميار بفرحه : اوه من اليوم انتظر احد يقول نطلع تمم نطلع وقطه تراني طفرانه
ضحكت ارجوان : على حسابي خلاص
ميار : لا والله ،،،، مااقدر اقول انا بدفعها لكن بقول نص بالنص ههههههه
ضحكت ارجوان : تمام تمريني ؟
ميار : الانن عندككك ، ببيت وصايف صح ؟
ارجوان : ايوه
ميار : هيا بقفل بروح اتكشخ
ضحكت ارجوان : يالله روحي هههههههه
قفلت ميار من ارجوان , وقفت ارجوان وماتنكر ميار كانت غير غير عن باقي صاحبات وصايف وكلهم فيهم غرور مو طبيعي , وميار عكسهم من طريقة كلامها وطيبتها وكلامها الواجد , لبست عباتها وتنتظر ميار تجي وتلبس النقاب ، وبعد مدة طويله وصلت ميار , نزلت ارجوان  ووقفت من شافت مشاري وقف قدام الدرج ونطق : على وين ؟
تجاهلته ارجوان وكانت بتطلع , ولف عليها  مشاري : ارجوان !!
لفّت ارجوان وبهدوء: نعم ! دامني صادفتك بقولك كلمتين واتمنى تسمعها
مشاري :  وش هالكلمتين متحمس اعرفها
زفرت ارجوان بغضب و عارفه انه يطقطق ، ونطقت : اذا سالوك عني انكررر انك ماتعرفنيي ولا تعرف عن البنت الي طلعت من البيت
انعقدت حاجب مشاري باستغراب: وش السبب ؟
ارجوان : تكفىىى اهلي الفتره ذي ماش لاتعطبها زياده
سكت مشارب ونطق بعد ثواني : وين رايحه ؟
رفعت يدها من سمعت صوت البوري , ولفت بتطلع , مسكها مشاري من يدها : قولي وين تروحين ولا اعلمهم ! وازيد كلام وترا للحين مانسيت كذبك على ابوي
سحبت ارجوان يدها بقوه : انا ماكذبت الكلام صدق وبعدين ليش تسال من انت ؟؟ والله لا ابوي ولا اخوي ولا زوجي نعم مشاري ؟
شتت مشاري نظره : تقلعي روحي لو تروحي وادرين بقلعتك  ماهميتيني
ناظرته ارجوان باستغراب, ومانطقت بحرف وكملت طريقها لـ سيارة ميار , ركبت ونطقت ميار بصراخ : جوجووووو
ضحكت ارجوان : وي سمعونا الناس شوي شوي
ضحكت ميار : محد بسامعنا هيا اركبيي
ركبت ارجوان وسلمت على ميار , لفت ميار عليها وبابتسامة: وش ذوقك بـ الاغاني ؟
اخذت ارجوان جوال ميار : انا بختار انتي ركزي بالطريق لا نصدم
ضحكت ميار : لا معليك هههههههه
ضحكت ارجوان بخفه : الله يستر هههههههه
ضحكت ميار وطلعوا متوجهين لـ كوفي .
-
«بالديره , بـ بيت الجد ناصر »
بحوش الجد ناصر , جلس جابر ومستند على الجدار يتامل البيت , وابتسم من تذكر الاجازه , كانت مليانه إحداث حلوه وسيئ , وذكريات مستحيل تنسى , البيت الي كان يعج بـ الناس الان فاضي والهدوء أجتاحه , اشتاق لـ بداية الإجازة وسمراتهم مع العيال وعود سعود , والان نهاية الإجازة الكل راح لـ مدنهم عشان دوماتهم , قاطع سرحانه صراخ مجيد
رفع راسه باستغراب لـ صراخه : وجع وجع فقعت طبلتي !
ضحك مجيد وقوم جابر : تعال عندي مشوار وابيك تجي
تجاهله وسحب مجيد يد جابر , وقف جابر معه , وطلعوا ،  ركب مجيد السياره , لف جابر عليه باستغراب : ويننا رايحين ؟
مجيد بابتسامه: للمزعه يا ابن عمييييي
قطب حاجبه مستغرب: ليه ؟ بنزل بعلم جدي واجي
مسكه محيد بقوه : غبي انت مراح نروح بيرفض وانا ابي اروح للاسطبل مالي دخل
تراجع جابر وجازتله الفكره بالحيل وطلعوا من الديره لـ مزرعه الجد ناصر, وبعد مده طويله وصلوا وعلى غروب الشمس , دخل السياره جوا المزرعه , نزل مجيد ومعه جابر متوجهين لـ الاسطبل , دخل ونطق : وحشتونيي كتكيتييي
لف جابر عليه وضحك : كتكيتي ؟ هههههههه
ضحك مجيد و توجه لـ الخيل وجهزه , ركب وصرخ : يالله الحقني خل نسوي سباق
ضحك جابر وركب خيله " الاصيل " : يالله موفق
لف مجيد ونطق : اذا فزت عليك لاتبكي
ضحك جابر بقوه ومارد على مجيد , وبدا السباق بين مجيد وجابر  كان جابر متعدي مجيد ويطقطق عليه رفع جسمه ووقف فوق الاصيل , لف مجيد على جابر ونطق بصراخ : جابر يولد انتبــ.....
ما امدا مجيد يكمل كلامه الا جابرالا طايح من فوق الخيل واصددم بالسور , توتر مجيد وماعرف كيف يوقف الخيل وابتلش وكان خيل ليالي كسار وسوا حركه خطا ولف على اساسا يوقف وطرحه الخيل , صرخ مجيد من طاح على كتفه بقوه ولف وجهه لـ جابر وشافه يتالم , و وقف بـ صعوبه و كتفه ذابحته , توجه لـ جابر وحاول يسحبه من رجوله يبعده عن السور , صرخ جابر : مجيد رجلييييي
وقف مجيد بصدمه وخاف ان رجل جابر انكسرت : يولد رجلك لا يكون انكسرت !!
جابر : مدري مدري طيحتي ماهي قويه ! 
حاول مجيد يسحب جابر من ذراعه الايمن : الا طيحتك قويه انت صقعت بالسور بقوه ،
غمض جابر عيونه بالام ومجيد يكافح مع ذراع وحده , سمع عامل المزرعه اصوات , وصل وانصدم من شاف العيال موجودين , لف مجيد ونادا العامل يساعده , شالوا جابر وركبوه السياره , وساق بهم العامل , كان بطيء وصرخ مجيد : اسرعع اسرععع
اسرع العامل بقوه وطوف بـ سبب السياره الي قدامه ولف لـ الجهه الثانيه والصدمه من تطلع قدامه سيارة وصرخ مجيد و....
-
«بـ الرياض, وصلوا البنات لـ الكوفي »
نزلوا متوجهين لـ الباب بيدخلون , انتبهت ميار لـ مشيت ارجوان ومسكتها لـ ظهرها , تقدمت ونطقت: ارجوان انتي تعبانه ؟
لفت ارجوان : لا
حست ميار ان ارجوان تعبانه ودخلت ذراعها جوا ذراع ارجوان , وجلست وراحت ميار تطلب , طلعت جوالها تشغل نفسها باي شي , جتها رساله من الايدروب , وشدها الاسم , ( ارجوان افتحي !!! ) , ضحكت بخفه من شافت اسمها , تجاهلته وكانت بتقفل الايدروب لكن رجعت الرساله مره ثانيه , فتحها وشافت صورتها , رفعت راسها بـ صدمه , مين الي قدر يصورها ؟ توترت وحاولت ماتبين لكن كان واضح عليها , رجعت ميار لـ طاولت ارجوان , نزلت نظرها على يد ارجوان وكانت ترجف , جلست جنبها مقطبه حاجبه : ارجوان فيك شيء ؟
رفعت ارجوان راسها ومدت الجوال لـ ميار , شافت ميار الصوره ولفت عليها ، بـ برود : لا تهتمين في مجموعه يسون كذا عشان البنت تسوي حوسه وتقول من انت وتكلمه وكلام كثير
ناظرتها ارجوان ونطقت بصوت منخفض والرجفه واضحه عليه : بس يعرف اسمي !
فتحت عيونها بقوه : كيف يعرف اسمك ؟؟؟؟؟
كانت بـ تتكلم وقاطعها اشعار من نفس الشخص وفتحها
فتحتها وارسل صور لها كثير  وكلها متغطيه الا صوره وحده , ناظرتها ميار بخوف : ذا يعرفك ولا كيف جاب الصور ذي و واضح انه مصورها ووش المقصد يرسلك الحين ؟ في اساله كثير براسي
بلعت ارجوان ريقها بخوف , والدمعه بطرف عينها ولفت لـ ميار : في صوره واضح فيها ملامح وجهي !! ميار ببكي خايفه !!
حضنتها ميار : ارجوان معليكك اخوي محامي نخليه يتله تل معليك
ابتعدت ارجوان , وببكى : بس احنا مانعرفه !
ميار : نجيبهه من الايميل واشياء كثير نطلعه معليك انا معك
توترت ارجوان , ورفعت نظرها تحاول تلقاء مكان الشخص من التصوير , وطاحت عينها على مشاري , رجعت لـ الصوره و ونفس الجهه , ابتسم مشاري من شاف ارجوان ورفع يده بخفه , تجمدت ارجوان بـ مكانها وعرفت انها طاحت بـ شخص مجنون  ، رفعت ميار راسها وكانت بـ تتكلم ، انعقدت حاجبيها من شافت الدمعه بـ عين ارجوان , لفت لـ المكان الي تناظره ارجوان , شافت ولد ويبتسم لها , و نزلت راسها من صوت  الرساله , اخذت ارجوان جوالها بـ سرعه وفتحتها , كان كلام مو مفهوم ، وفهمت انه لحقها ويبي يعرف وش رايحه , وقفت ارجوان ولفت على ميار : انا مااقدر اقعد خل نطلع !!
وقفت ميار ونطقت : اسمعي هو جالس جنب الباب اذا سوا اي حركه اصرخي وجمعي الناس عليهه !! اتفقنا
هزت ارجوان راسها وتمسكت بـ ميار , طلعوا من الباب ووقف مشاري ، وسحب ارجوان من ذراعها بهدوء وطلع بسرعه , رفعت ميار حاجبها بـ صدمه كيف سحبها كذا , وطلعت خلفهم تركض , تجمدت ارجوان من حركة مشاري ولا قدرت تتحرك , سحبت ميار ارجوان من يدها بقوه وصرخت : خير !!!!!
انقعد حاجب مشاري بـ غضب : لاتصايحيننن !!!
رفعت اصبعها بـ تهديد : من انتت ؟؟ من انت وش تبي بـارجوان ؟؟؟
مشاري بنفس النبره: وش دخلك ؟ تحشرين نفسك بكل شيء
حس مشاري ان الناس تجمعوا عليهم خاف ان يدخل بـ مشاكل كثير , وابتعد عنها وراح لـ سيارته حرك لكن ماابتعد مره ، لفّت ميار وانصدمت من شافت الناس ، وبـسرعه اخذت ارجوان وركبتها السياره وكانت منهاره تبكي , ناظرتها ميار ونطقت : ليششش خليتيهه ياخذككك كذاا ليششش !!
سكتت ارجوان , ونزلت دموع ميار قهر  : بغيت اموت يوم سحبك كذا بسهوله
حضنت ارجوان وبكت معها : انتبهيي منهه تكفينن
نطقت ارجوان بـ غصه : اخو وصايف
ابتعدت ميار بـ صدمه ونطقت : اخو وصايف صاحبتي ؟؟؟؟؟
هزت راسها , ونطقت ببكي: ايه
لفت ميار وتحاول تستوعب الي تقوله ارجوان , وتذكرت ان ارجوان تعيش عندهم , وشغلت سيارتها : معاد بتطبين بيتهم !
لفت ارجوان باستغراب: كيف ؟
زفرت ميار بـ غضب : تبين تقعدين ببيتهم وهو موجود ؟؟؟ مستحيل اخليك تقعدين عند واحد مثل كذا ذا فيه قل صح مستحيل بكامل قواته العقليه
مسكت ارجوان يد ميار ونطقت ببكى : لالا تكفين مااقدر اغراض طلال بالبيت مااقدر
ميار : من طلال ؟
تنهدت ارجوان و رجعت ظهرها على المرتبه , غمضت عيونها بقوه, تحاول توقف بكي , لكن ارجوان زاد بكيها اكثر من قبل , ناظرتها ميار وحست انها مسؤوله عن ارجوان وناظرتها ، رفعت اصبعها : والله مايمسك ضرر من هالكلب وانا موجوده
ناظرتها ارجوان وماتقدر توصف الشعور الي داهمها من جملة ميار ، وتوجهت ميار لـ بيتها  .
-
«الطريق »
صرخ مجيد من شاف نور السياره وصوت البوري ، توتر عامل المزرعه من شاف السياره قدامه وماقدر يتصرف , تقدم مجيد ولف الدركسون لـ التراب وطلع من الزفلت ، وقفت السياره بدون اي ضرر لهم , زفر مجيد بـ راحه و رجع ظهره لـ المرتبه ، و نزل نظره لـ جابر ، شافه مغمض وطرا بباله الموت على طول وصرخ وصار يدف جابر ويحاول يقومه , لف على العامل وصرخ : امشششش امششش للمستشفى بسرعهههههه
حرك العامل وطلعوا طايرين لـ المستشفى ومجيد خلاص توقع ان جابر مات من الالم , نسى كتفه ونسى الالم وكل تفكيره بـ جابر ندم انه قال لـ جابر انهم يروحون لـ المزرعه ، وصلوا المستشفى ونزل محيد ويصارخ وتجمعوا العالم عليهم ، دخلوا جابر وقالهم مجيد كل الي صار , طاح على الارض منهد حيله وينتظر بس يقولون جابر مات ، طلع الدكتور بعد مدة طويله ، وشاف مجيد توقع انه نام ، تقدم له وصار يطبطب بخفه على كتفه ،
فتح عيونه بخفه ويحاول يميز ملامح الي قدامه , فز من عرف انه دكتور جابر ، ونطق بتوتر : وش صار ؟؟؟؟
الدكتور بـ ابتسامه : الحمدلله حالته سليمه فقط يحتاج يرتاح وعنده كسر بالرجل ومايقدر يمشي عليها لـفتره وبعدها يرجع طبيعي
زفر مجيد بـ راحه ، ولف على الدكتور : اقدر ادخل
هز الدكتور راسه ، واستاذن مجيد من الدكتور ودخل على جابر , سالت دموعه من شاف جابر على السرير والتعب واضح على وجهه ، توجه لـ جابر وحضنه ، ضحك جابر من شاف مجيد يبكي ونطق : علامك تبكي !
ابتعد مجيد ويمسح دموعه : شفتك طايح مغمى عليك قلت مت بغيت اموت وراك
صحك جابر وسحب يد مجيد ، وصرخ بقوه , فكه جابر ونطق : عبدالمجيد !
نطق بالام : ذراعي يعورني يولد
ماكان جابر يعرف ان مجيد طاح : ليش شصار ؟
تذكر مجيد طيحته من الخيل : ايه طحت من الخيل يولد وعلى كتفي بعد
جابر بـ خوف : روح شوف لايكون بعد يدك مكسوره
زفر مجيد : والله ان يذبحنا جدي
ضحك جابر ونطق : اخلص شوف ذراعك معليه ابوي يفزع لنا
طلع مجيد وراح يكشف على ذراعه وجابر من التعب نام .
-
«بـ بيت الجد ناصر »
جالس الجد ناصر بـ المجلس وحوله نواف والجده فاطمه ، استغرب هدوء البيت ولف على نواف : البيت مابه ازعاج العيال وينهم ؟ مالهم حس
نواف : يمكن بالحاره يدوجون
الجده فاطمه: معليه عيال وكبار يدبرون اعمارهم
الجد ناصر: ذول حطيهم مع سعود الكل يكبر الا هم والكل يعقل الا هم
ضحك نواف ,وبعد مدة قاطع سوالفهم اتصال , رفع الجد ناصر جواله وعطاه نواف : اقرا الاسم
قرا نواف الاسم ورد الجوال : يبوي ذا العامل حق المزرعه
انعقد حاجب الجد ناصر: وش عنده شف شف يمكنن به شي
رد نواف على العامل وفتح الاسبكر ، نطق العامل : بابا عبدالمجيد وجابر في مستشفى
فتح الجد ناصر عيونه بقوه من كلمة مستشفى ولف على نواف بسرعه
وحاول يقوم ، وصرخ : مشيناا مشيناا
وقف نواف ومسك الجد ناصر من كتفه عشان يقوم , اخذ عصاته وطلع مع نواف متوجهين لـ المستشفى .
-
«بالرياض , بـ بيت ميار »
دخلت ارجوان بيت ميار , لفت بنظرها البيت كله , ولفت على ميار ونطقت : ببيت مين احنا ؟
فسخت ميار عبايتها , ولفت لـ ارجوان , وبـ ابتسامه , رفعت يدينها : اهلًا بك في بيتي ... لاتخافي هذا البيت خاص فيني محد يجي من اهلي
قطبت ارجوان حاجبها : تعيشين لوحدك ؟
هزت ميار راسها : اعيش لوحدي واخلص اشغالي لوحدي واهلي تواصلي معهم قليل
وقفت ارجوان وتنهدت : ليه ؟؟
ابتسمت ميار : ظروف
رفعت ارجوان حاجبها باستغراب ولكن ماحبت تسالها لانه خاص فيها ونطقت تغير الموضوع : تتوقعين اهلي يفقدوني ؟
استندت ميار على طرف الطاوله ومتكتفه , وبـ هدوء: ممكن
ضحكت ارجوان بـ خفه : ماضنتي
وقفت ميار ولفت لـ ارجوان : تعالي اوريك وين تنامين
ابتسمت ارجوان وطلعت مع ميار لفت فيها البيت كله وطاح الحظ على وحده من الغرف , دخلت ارجوان الغرفه وقفلت الباب وقفت وضحكت من تخيلت ان اهلها بيفقدونها , ومشت بهدوء تستكشف الغرفه , ووقفت عند شباك كبير سحبت الستار توجهت لـ الشباك ورفعت راسها لـ السماء , وتجهل وجود الشخص الي يراقبها .
«بـ سيارة مشاري »
نزل الزقاره ونفّث الدخان ونظره لـ بيت ميار ، انتبه لـ نور الغرفه وانفتحت الستار , ووقفت ارجوان ونظرها لـ السماء , رجع الزقاره لـ فمه ونظره لـ ارجوان , دخل يده بين شعره ورفعه على فوق لانه بدا يضياقه على عيونه , كان مستمتع وهو يناظر ارجوان ويعرف انها للان ماانتبهت لـ وجوده او شخص يراقبها  , وابتعدت عن الشباك وللان مشاري يناظر بـ جميع تحركاتها ، و تلاشت ابتسامته من قفلت ارجوان الستار , زفر بـ غضب ومسك نفسه بـ صعوبه لا ينزل , ومو عاجبه وجود ارجوان بـبيت ميار , وغيرته عليها قد يكون فيه رجال ,
سكرت ارجوان الستار , وتوجهت لـ سريرها لعل النوم يداهمها لكن التفكير غلبها والخوف من الي بيواجها بـ باقي حياتها اذا هذه البدايه كيف النهايه , دخل قلبها الخوف من مشاري و أبدًا مو مرتاحه له والسبب الي توفى منه طلال للان تجهل الباقي وهل سعود قدر يغدر بخويه ؟ وش سبب نقل ابوها لـ الرياض وكيف عرف ابو مشاري وليش هم ببيتهم وش سبب وجود سعود بالرياض ، حست بضيقه قويه وراسها اوجعها من كثيرة التفكير ، و حطت يدها على راسها تحاول توقف تفكير وغمضت عيونها بقوه وصرخت ببكى : وقفييي وقفييي خلاصصصصص لا تفكرينننننن خلاصصصصصص لاتفكريننننن
«برا الغرفه »
طلعت ميار من غرفتها متوجها لـ المطبخ وشدها صوت صراخ بـ غرفه ارجوان , ركضت لـ غرفة ارجوان , فتحت الباب , انصدمت من شافت حالة ارجوان ورجفتها وبكيها وصراخها , انرعبت ميار من الموقف , وتوجهت لها حضنتها بقوه وتحاول تهديها , لفت ارجوان ذراعها على ظهر ميار وشدة عليه وتبكي , للان ميار ماتدري وش حصل لـ ارجوان بـ حياتها لكن بتوقف معها مهما حدث, بعد مدده هدت ارجوان واجتاحها النوم ونامت وهي حاضنه ميار , عدلت لها ميار فراشها وقفت , وناظرت ارجوان بـ حزن على حالها , و توجهت لـ الباب وفتحته بخفه وطلعت بشوي خوف من ان ارجوان تقوم , وتوجهت لـ غرفتها .
-
«بـ الديرة , المستشفى »
فتح الباب بقوه ودفهه وصدم بالجدار وطلع صوت قوي , فز مجيد من شاف الجد ناصر داخل ومعصب , توجه خلف جابر ونطق ببكى : والله يجدي مالي دخل وعان عان يدي مكسوره
رفع الجد ناصر عصاته واشر على جابر : وينكم طالعينن يالسرابيت !!!
شهق جابر : اح يجد احنا سرابيت ؟؟
تكتف نواف وكاتم الضحكه من خوف العيال ومايبي يضحك ويحول عليه ابوه , نزل الجد ناصر نظره على رجل جابر , وبصوت عالي : رجلك علامها !!
اشر جابر على مجيد : عان حفيدك يجد قالي خل نروح الاسطبل ونركب الخيل ونسوي سباق وبسببه طحت وعان رجلي انكسرت
فتح مجيد عيونه بقوه من غدرت جابر : افا يجابر غدرت فيني !!!
رفع الجد ناصر يده واشر لـ مجيد : تعال تعال انت تعال
اشر مجيد على نفسه , ونطق بخوف : انا ؟
الجد ناصر: لا جدتي تعاللل
تقدم مجيد بخوف ومغمض عيونه ومستعد لـ اي ضربه ، مسكه الجد ناصر من رقبته : ارتحت الحين ولد عمك رجله انكسرت ومجبسينها ؟
رفع مجيد راسه لـ الجد ناصر واشر على يده : اخخخ يجدديييي الحبب شوف تهاوشني ولا تهتم ليدي اخخ يجددييييي الحببب
ضربه بخفه على رقبته : انطم وتقلع عند جابر
عرف جابر ان الجد ناصر بيحول عليه وبكى بتمثيل : اخخ يجديي رجلييي رجلييي
واشر على راسه ، وبكيي بكذب :يجديي صقعت بالسورر وراسييي اهه يعورنيييي يعورنييي
خاف الجد ناصر ان جابر جد صار فيه شي قوي وتقدم له : جابر يبوي وش قالوا لك ؟
قدم مجيد يده وقلت جابر وبكى : يجديي عانن يدي عانن
لف الجد ناصر على مجيد : يولدد اهجددد بشوف ولد عمك واجيكك
ابتعد عنه ويناظر الجد ناصر ، ضحك نواف من غيرة مجيد واشر له : تعال تعال
ابتسم مجيد من حس بالاهتمام ، وراح يركض له , شاف نواف يد مجيد ونطق : لااا الحمدلله طيبب اسبوع اسبوع ونص وانت طيب
مجيد همس : يعمي مابي اصير طيب
نوف بنفس النبره: ليه ؟
مجيد : ابي جدي يهتم فيني مثل جابر
ابتسم نواف وخم راس مجيد ونطق : انت وولد عمك واحد ولاتخلي احد يفرق بينكم انتبه يعبدالمجيد انتبه
ابتعد مجيد ونطق بابتسامه عريضه : يعمي معليهه جوجي مايفرقني عنه احد والله لو يطب بالنار طبيت معه
ضحك جابر من سمع جوجي ونطق : جوجي من يحمار هههههههه
جلس الجد ناصر على السرير , واشر لـ مجيد , جاه مجيد وجلس على ركبته مقابل الجد ناصر ورفع راسه يناظره, رفع الجد ناصر يد مجيد وصرخ من حس بالام , ضحك الجد ناصر , ولف على جابر وضربه على رجله , وصرخ جابر من الضربه , ونطق الجد ناصر: لالا طيبين
مافهم مجيد الحركة ونطق : جدي مافهمت هالحركه ؟
تذكر نواف هبال سعود وسلمان وضحك ، لف مجيد على نواف ونطق : علامكم مغير تضحكون شبلاكم ؟
حاول نواف يوقف ضحك ونطق : زمان سعود وسلمان سرقوا سيارة ابوي وصدموا فيها وسعود الخبل سوا ان رجله مكسوره عشان ابوي مايهاوشه وابوي ياخذ العصا بيضرب سعود وهو يقمز يعدي ورجله مابها شي ومن بعد هالسالفة ابوي مايثق باحد هههههههه
جابر : انا من الخرشه بغيت ازحف ولا اقعد بمكاني
الجد ناصر: عشانكم مكسرين مراح اعقبكم والله لو صار مره ثانيه ان اعاقبكم عقاب ماقد صار وتكرهون الساعه الي طلعتوا فيها
اشر جابر : على خشمي
وكملوا يتكلمون وقالوا كل شي والي صار غير السياره الي طلعت موجهم ولا كان انكسرت رجل جابر الثانيه واانفقش راس مجيد .
«الرياض, الفجر »
قامت ارجوان مفجوعه من الاتصالات الي عيت تنتهي اخذت جوالها وكل المكالمات من ابوها وامها , بلعت ريقها ماتدري كيف تسوي وقررت تقفل جوالها , قفلته والخوف متملكها وعارفه اذا عرف ابوها ممكن يذبحها , وقفت وتوجهت لـ دورة المياه , توضت وبعدها فرشت سجادتها وصلت , وماقدرت تتحمل وانهارت وهي تصلي وصارت تبكي وتتكلم عن كل الي صار لها ومن التعب نامت على سجادتها .
-
«بـ بيت ام خالد , العصر »
نزلوا البنات وطلعوا من البيت , فتحت ليالي باب السياره وركبت بجانب سعود ونطقت : سلام عليكم
لف سعود عليها وبـ ابتسامه: وعليكممم السلام ارحبيييي ليليييي اخباركك
تكتفت ريتال وبـ تمثيل لـ الغضب : ايه ايه ليلي طيب احنا
ترف ونظرها على الجوال : والله انا ماهمني احسبي نفسك لاتدخليني
ضحك سعود ولف لـ البنات : اخبارك يـ ريتال اخبارك تروف
ريتال  :روتل لوسمحت و الحمدلله عبرني بخير انت كيفك
رفعت ترف نظرها لـ سعود : تمام انت كيفك
ضحك سعود : انا بخير دامكن بخير
رجع ظهره لـ المرتبه ونطق : وين نروح اول ؟ نشتري اثاث ولا نروح البيت ؟
ليالي : طبعًا البيت
هز سعود راسه ومشى متوجه لـ البيت , بعد مدة وصلوا , رفعت ترف نظرها لـ البيت ونطقت بـ اعجاب : ماشاءالله تبارك الرحمن
وقف السياره ونزلت ريتال , ضحك سعود : شوي شوي
فتح سعود باب البيت ودخلوا البنات , والكل توزع بالبيت , وتوجه سعود لـ الغرفه الي اختارها , دخل وفتح البلكونه ونطق : حلا لاه لونك معي يام العيون السّود
ضحكت ليالي بخفه وتوجهت لـ سعود : ام العيون السّود والله انك طحت يسعود
تنهد سعود : ماضنتي بقدر اتزوجها دام ابوها وابوي متهاوشين
طبطبت ليالي على كتف سعود ونطقت : لا ان شاء الله تتزوجها وانا الي بقوم بعرسك اذا ربي احيانا
ابتسم سعود ولف لـ ليالي : نمشي ؟
ضحكت ليالي : خل ننتظر الانسه ريتال تختار لها غرفه
رفع حاجبه بـ ضحكة : لا جد ؟ هههههههه
هزت راسها وضحكت , طلع سعود من الغرفه وشاف ريتال جالسه على باب الغرفه وتتهاوش مع ترف : ترفوهههه هالغرفه ليي روحي دوري غرفه ثانيهههه
ترف بنفس النبره : يسروققققق انا قلت ذي لييي ورحت اشوف البيت رجعت لقيتكككك هنيهههه اطلعيييي من غرفتييييييي
رفعت ريتال يدها : والله لو ماانقلعتييي انن افقش راسك مثل البعير ! 
رفع حاجبه مستنكر كلمة البعير ونطق : اعوذ بالله شبلاكم ؟ ووش بعيره ؟
لفت ريتال على سعود ونطقت : سعوددد معليششش بس انتظر خل اتفاهم مع البنت ذي !!!
ترف : البنت لها اسم يبعيررر
تقدمت ليالي وتجاهلت ريتال ودخلت الغرفه , لفت عليهم ونطقت : الغرفه لي انا هيا كل وحده تطس تدور لها غرفه ثانيه
رفعت ريتال راسها بصدمه : خير ؟
ضحكت ترف : حيككك كفو هههههههه
لفت ريتال وجهها لـ ترف : سوال مو انتي قبل شوي تبينها وش صار ؟
ترف : ليالي تاخذها ولا انتي تاخذينها
فهم سعود : يعني مكاجر ؟ هههههههه
ترف : تقدر تقول
وقفت ريتال وركضت لـ ترف , صرخت ترف ونزلت تهرب من ريتال ,
ضحك سعود ونطق : الله يعطيكم العقل
نزل سعود ومعه ليالي ولف على البنات وللان يتهاوشون وصرخ : خلاصصص يالله بنروح
ركضت ترف لـ سعودد وجت خلفه : عمييي انا بوقف لكن بنت اختك ذي عاقبتني !!
تجاهلتهم ريتال وراحت تاخذ عبايتها , ضحك سعود ونطق :  يخي انتم بزراين وش جايبني معكم انا  ؟ هههههههه
ناظرته ليالي من المرايه وهي تعدل نقابها : على قولت ابوي الكل يكبر الا سعود فطبيعي
لف سعود عليها ونطق : تدقيني بالكلام ؟ ولا
لفت ليالي واخذت شنطتها : الي تبيه
وطلعت وخلفها ترف , ونزلت ريتال تركض وزحلقت باخر درجه , لف سعود وطاح يضحك من شاف ريتال طايحه
-