في شوفتك سالت دموع العين من فرحها

"23"

طلال ضحك : وننقفط مثل كل مره بسبب سلمان
سلمان دخل الغرفه وابتسم : وش فيكم تضحكون
طلال من شاف وجه سلمان ضحك بقوه وسعود شبك معه وسلمان رفع حاجبه وبدا يعاين بلبسه وشكله يدور شي يضحك : انتم تضكون من ويش؟
سعود كان يحاول يكتم ضحكته :ولا شي ولا شي تعال اجلس
سلمان : بما انكم انهبلتو بنهبل معكم
طلال : تكفون يعيال خل ننحاش
سعود ضحك : قداممم
سلمان شمر كُمه : ناخذ الفطور وننهج يم العزبه
طلال لف على سعود ورفع حاجبه : ذا سلمان ؟
سعود ضحك ورفع كتوفه ( بمعنى مدري )
طلال : انا بدق على عساف ناخذه
سعود : طلالوه ترا لي ايام الاحظك مغير تدور عساف
سلمان وقف وعصم شماغه : بتمشون معي ولا تخيسون هنا ؟
سعود وقف وضرب كتف سلمان وغمز : مشينا يالعضيد
طلال ناظرهم بطرف عين وتكلم بسخريه: انت بالعضيد طلع الابره
سعود : اذا تعبت ترا منكم
سلمان : وانجلد انا من ابوي وطلال ينحاش بيت ابوه
طلال : ابوك يدق على ابوي وابوي الله يعطيه العافيه يكمل علي
سلمان ضحك: بدق على حاتم
سعود كان يحاول يطلع الابره : على طاري حاتم رديتو له ؟
سلمان : بايش
طلال : اخوك مفهي يهو مو حاتم خاطب بنت اخوك
سلمان : طلال الزمنا بسكوتك وش دخلك ؟؟ ،،، مدري عنهم انا خرشني فايز زوج البنت بدوم مايسالها !! يقول البنت كبرت وصل عمرها 25 وهي ماتبي تتزوج وحاتم مايتفوت يقول كذاا اخوك وجع يسعود
سعود : وجعان وربي صاحي ذا ؟؟ واذا وصل عمرها 25 عانك انت عمرك 33 ولسا ماعرست
طلال فطس
سلمان ناظره بطرف عين : ورع امسك خويك ذا لانه دابلني بتسبدي
سعود بابتسامه: ابشر " لف على طلال وشاف وجهه وضحك بقوه "
سلمان رفع يدينه : يارب انك تشفيهم
دق الباب لف لسلمان على الباب ورفع صوته : ادخل ادخل وفكني منهم
دخل حاتم بهيبته : سلام عليكم
، كان طلال يشرب شاهي وشرق
سعود حاول يكتم ضحكته ويدق ظهر طلال : صحه صحه
سلمان وقف : ارحب ابو عتيق
حاتم : البقى " جلس على الكرسي " علومكم
طلال : والله سلامتك عاننا هنا عند سعود
سلمان : حاتم حيلك فيهم يبون ينحاشون
حاتم رفع حاجبه : انت صادز ؟
طلال : اي فيه شي ؟
حاتم وقف : صاملين ؟
سعود ضحك : كفو يالنسيب
حاتم بنفسه ( لو يدري اني مابيها وش بيسون ) وابتسم بتسليك
سلمان وقف : بنروح لزياد
طلال عبس : ييعععع زياد ؟؟
سلمان رفع حاجبه: شفيه ؟؟
طلال : الرجال ذا مادانيه واحس متصنع والمرجله بوادي وهو بوادي
سلمان بغضب : احترم نفسك يطلال مثل ماانت خوي سعود ترا زياد خويي من سنين ومعزته عندي مثل سعود واكثر
حاتم : تبون الصدز زياد رجال رجال وماشاء الله عليه لحظته يم طلعت بنتكم عند سعود حتا وهي متستره صد "ولف ناظره على طلال " ولا ناس قعد يهاوش ويعاين
سلمان وسعود مافهمو من يقصد وبوقت واحد : من ؟
طلال وقف وتكلم بتوتر : ااا مو انتم تبون تروحون ؟ يالله
سعود ابتسم : قدام السالفه طالت مره وتاخذ الوقت
طلعو العيال متوجهين لعزبه زياد .
-
ببيت الجد ناصر دخلت ريتال غرفة البنات وكانت تغني بدت ليالي تصفق لها وتضحك : وش ذالصوت الخايس
ريتال ابتسمت : محد طلب رايك
ترف ضحكت: ليالي وين جبهتك
ليالي : تافهاتتتت
خلود دخلت الغرفه معصبه : وين ريتال ؟؟؟
ريتال كانت معطيه خلود ظهرها ورفع يدها : هنا
خلود سحبت شعرها : خيررررر تضربين نايف ؟؟؟
ريتال صرخت : خلودوههه فكي شعري وربي لانتف شعرك انتي وولدك
خلود بغضب : يويلككك ان جاني نايف يشكي منكك
ريتال بعدت خلود بالقوه منها : اوجعتيني تدرين ؟؟ وفكينا من شرك انتي وولدك
حور كانت متامله بهوشتهم ولفت على ترف : الحين احنا بنصير كذا ؟
ترف ضحكت بقوه
ريتال : شفيكممم
خلود : وربي اني غلطانه اني جيت اكلمك وربي بزرر اكبري لو شوي
ريتال : شف من يتكلم جايتني تهاوشيني عشان ولدك اخخ انتظري بس عبدالعزيز يجي ويمردغ ولدك ذا ومايخلي فيه عضمن صاحي
خلود تجاهلتها وطلعت من الغرفه
ليالي ابتسمت بحزن : شعور ان لك اخت شي حلو مره
حور : ليالييي واحنا خواتك ترا !
ريتال حضنت ليالي من كتفها : يخي انتي مو بس بنت خالتي انتي اختبيي يهو
ليالي بابتسامه: بناتت احبكم مره تعرفونن ؟؟
حور ضحكت: حتا احنا نحبك يشيخهه !
ترف وقفت: خلصتو حب ؟ هيا قمنا نكشخ بنروح بيت عمي فالح
ريتال : الا صدق وش الطاري ؟
ليالي : على قولتهم صقر بيجي
ريتال : من ذا ؟
حور : واحد يريتال اففف وش اقول ووش اخلي
ريتال شهقت: يبنت استحي تراتس مخطوبه وبتزوجينن
حور ضحكت بسخريه : وينه للحين ماملك
ترف لفت عليها وفتحت عيونها بقوه : وينك انتي !!!؟؟؟ ابوي اليوم يقول حاتم بيملك على حور اليوم
حور : مستحيلللل بنات تكفوننن مابي
ليالي : انا ماني فاهمه وش صار بالضبط شوفي ممكن حاتم فيه خير لك
حور بعبس : بنات يخي ماني مرتاحه احس مراح نكمل مع بعض مدري ماعرفه ماعرفه !! اول مره شفته فيه كان يهاوش ومعصب شلون بجي معه ذا
ريتال تربعت : وش وش وش عيدي ؟؟ متى شفتيه ؟
حور : كنا بالمستشفى وكان يهاوش طلال لان ليالي دخلت المستشفى عشان
ريتال : فاهمين الي بعده
حور بعصبيهه : بنات وش اقول يخي كريه مانكر ملامحه حليوه يجي منه بس معرف حتا انه يم شافني قعد يستغفر ويصد ؟
ريتال ضحكت : غبيه وربي اجل تبينه يقعد يعاين فيك طبعاً بيصد !!
حور : مدري وش اقول انا حايسه يبناتت
ليالي : حور قلبي قومي صلي استخاره وشوفي
حور : حتى لو احس اني مو مرتاحه ابوي بيغير رايه ؟
ترف كانت على الجوال ولفت بسرعه على البنات وصرخت : بناتتتت
حور : شفيككك
ترف ورت البنات فديو : شوفو عمي سلمان مصوره بناتتت في واحد اسمه زياد اوففففف
ليالي بعدم اهتمام : هذا الي ساعدني
ريتال لفت على ليالي بصدمه : ايششش !!!؟ ذا احلفي
ترف : يبنت المحظوظه شلون طحتي على ذا ؟؟؟
ليالي : بنات وجع وش فيكم
ريتال رجعت تناظر بالجوال : ماقدر اروح اخطبه بنفسي ؟
حور ضحكت: نست البعير
ترف طاحت تضحك : وربيييي
ليالي اشرت على حاتم : وذا حاتم
ريتال شهقت: يالكذوب يحور تقولين يجي منه ؟؟ خذي الجمال وش عندها ذي ؟
ترف : يخي وش ذا المُزز عماني شلون طاحو على ذول
ليالي : ذا طلال ؟ بنات فيه من حاتم تصدقون
حور : ولد عمه
ريتال : ول ول ول ول كل شي تعرفونه انتن ؟؟؟
حور ضربتها على كتفها بخفه وبضحكة : قولي ماشاءالله
ترف : وربي ريتال انا وانتي مانعرف احد
خلود دخلت عليهم وكانت معصبه وبقوه : خيرررر ؟؟؟؟
ريتال فزت : يليللل يخي انتي كل مره تجين معصبه
خلود : طبعاً بعصب ؟؟ للحين ماجهزتو
ترف لمحت واحد وبهدوء : ماشاءالله تبارك الرحمن
حور : شفيك
ترف ورتها واحد بالجوال : هذا معهم
ريتال دخلت وجها بالجوال : وينه وينه
خلود بغضبب :: اناااا وش اقول ؟؟
ليالي : بنات خلاص يالله خل نجهز طولنا الساعه 11 واحنا مارحنا ولازم نساعدهم
ريتال ضحكت: من يساعدهم ؟ طبعاً انا مالي دخل
حور : الا يقلبي لك دخل تبين خالتي قمراء تخطبك لعساف خليك سنعه مو رفلة
ريتال : يقلبي ذول بيتهم فيه اقل شي عشر خدم ماهمهم السنعه ولا رفله
خلود بصدمه : وش عساف
ريتال : اوله انتي للحين هنا ؟
خلود : انا لازم امسكك على جنب يوم وامسك تحقيق الحين اخلصو عشان نروح الله عطاكم عشر دقايق والي ماتخلص نروح ونخليها
ترف شهقت : عشر دقايق وش تسوي ؟؟
خلود طلعت وتكلمت بصوت عالي : بدا الوقت هياا
بدت حوسه البنات وكل وحده تساعد الثانيه عشان يخلصون بسرعه وخلصو كان لبسهم عباره عن
ليالي
بنطلون ابيض اوفر سايز وتيشرت وردي ماسك له اكمام وولامه جزءً من شعرها وميكب عباره عن مسكره وايلاينر وبلشر وقلوس فقط .
ريتال
جنز اوفر سايز وبلوزه سوداء ولامه شعرها كله ومطلعه خصل وكان ميكبها خفيف .
حور
فستان ماسك على جسمها نيلي وفاكه شعرها الكيرلي .
ترف
بنطلون اسود وتيشرت اخضر غامق ولامه شعرها كله .
--
بعزبة زياد
شاف سلمان ساعة جواله ولف على حاتم بقوه : الساعه 12 !!! وربي ان يذبحني ابوي
حاتم وقف : قم قم حتا انا ملزم علي اجي
سعود اشر على نفسه : وانا طيب ؟
سلمان كان يلبس نعاله : نرجعك المستشفى
سعود : تعقبون والله مرجع
سلمان لف على زياد : زياد
زياد : نعم
سلمان : الحقنا
زياد : وين ؟
عبدالرحمن: قصده انك تروح لعزيمتهم
سلمان : ماشاءالله على اخوك عرف
عبدالرحمن: تسلم
سلمان : الا يزياد والله اقوله صادز تعال حياك عند عمي
زياد : الله يكثر خيركم واعذرني ماقدر
سلمان : والله ان تجي وماني برايح اذا ماجيت
زياد ابتسم : استهد بالله بعدين انا بروح لاختي لي ثلاث ايام ماشفتها وواعدها اطلعها
سلمان : اسمع الليل بتجي غصب مالي دخل وجب اختك معك
عبدالرحمن: فرح صغيره وماتعرف تتعامل مع الناس الا الي تعرفهم
سعود : كم عمرها
عبدالرحمن: 9
سلمان : معليه ليالي هناك تنتبه لها وبتحبها متاكد
سعود : اي معك مجرب من شفت وجها وهي توها طالعه من بطن امها وانا حابها ف بتحبها
زياد ابتسم : بشوف وان شاء الله نجي
سلمان : انتظرك
حاتم : يالله مع السلامة
طلعو العيال متوجهين لبيت ابو مسفر .
زياد وقف : يالله نروح لخالتي دق عليها قل بنجي
عبدالرحمن دق على خالته
خالته نوف : هلا وغلا بدحوم
عبدالرحمن ابتسم : هلابك يخاله احنا جاين انا وزياد وبنجيب غداء لاتسوين شي
خاله نوف : لا يحبيي ماتقصرون
زياد اخذ الجوال : يخاله معليه بنجيب غداء ومانبي نكلف عليك
خاله نوف : يالله استودعتكم الله .
__________________
-
ببيت ابو مسفر
تهاني كانت تطبخ الذبيحه بالحوش وبعصبيه رمت الملعقه : خدامه انا خدامه ؟؟ وين حريم اخواني
ساره وهي داخله بالصحون والفناجيل : يبنت يدي انكسرت وانا امشي بالدلال
تهاني : وينها السوسه ؟؟
ساره ضحكت بخفه: قصدتس نايفه ؟
تهاني : فكيني من سيرتها
ليالي دخلت المطبخ : شفيككك ؟؟ صياحك كلن يسمعه ؟
تهاني : وينكمم ؟؟ تو الناس الحمدلله شرفتو يخي وربي يدي انكسرت ابوي ذابح اربع ذبايح !! يخي يليت خلاه عشاء غداء !! مع ذالشموس اطبخ ؟؟ توبه اجي الـد*** انا بتبوك وعايشه مع رجالي حياه حلوه انا حتا الطبخ هناك ماطبخ !!!
ترف دخلت على حلطمتها وشافت تهاني وطاحت تضحك
ريتال ضحكت: تهاني وش ذالحاله قلت بجي الحين كاشخه والكشخه اوفف عشان اخوها
تهاني : جو جو الشماتات
حور : خلاص خلاص "ولفت على البنات " يعني مالكم داعي البنت اخر مره مسكت لحم ورالي قبل عشر سنين "وضحكت "
تهاني تنهدت بقلة حيل ورجعت لقدورها
بقي ترف عند تهاني ونطقت : أساعدتس ؟
تهاني بهدوء : لايقلبي
ترف : توك كنتي تهاوشين عش
قاطعها صوت الرمي واصوات الرجال "وصرخت "
تهاني : شفيتسس يبنت
لفت ترف على صوت الرجال الي كان ينادي باسم تهاني
تهاني : ادخلي ادخلي
صقر رجع من لمح بنت : تهاني خلي الي عندك يدخل
ترف : ويعع ذا صقر؟؟
تهاني : اشش تراه يسمعتس
ترف : خير وش الي عندك يدخل ؟ بنت ترا
صقر : يبنت الناس ادخلي
دخلت ترف تركض و تهاني ضحكت: تعال تعال
صقر : وش ذالنشبه "حضنها " كيفك يعيون اخوك
تهاني : خليتني انسى الكرف الي كرفته
صقر ضحك : والله وتغيرتيي
تهاني : وجع يصقر خمس سنين مدري ست طبعاً بنتغير
صقر بلهفه : امي وينها
تهاني دخلت تناديها ام مسفر ويم شافت صقر بكت
صقر : ليه يام صقر البكي "حضنها بقوه "
كانت ترف تشوف الحوار الي بينهم كله ومبتسمه
صقر فكه واستند على الباب : علومكم ؟
ام مسفر : الحمدلله انت كيفك
صقر : بخير من بعد شوفتك يالغاليه
تهاني : صقر هيا اذلف البنات بيجون يساعدوني انهلكت يخوي
صقر باس راس امه وجاء بيبوس راس تهاني وقفته : خيرر ! ترا عمري 30 مو 50 ! يم تحب راسي
صقر ضحك : احترام يبنت !
تهاني : خايس وربي انك واحشني
صقر ابتسم : مايوحشك غالي
ريان من بعيد : صقر يولدد تعال راح ولا رجع ابوي بيمردغك تعال
صقر رفع صوته : يخي ماصدقت اشوف اميمتي خلني هنا
ام مسفر ضحكت : رح رح لريجيل هنا بيجن البنات
تهاني ؛ يعني انقلع بس بشكل محترم
صقر ضحك : دزي امها
تهاني طلعت نعالها : ترا بصكك بهنعال
صقر رفع يده : اوببب ب بب ب ابشري على خشمي بروح
تهاني : على شحم
راح صقر لرجال ،
-
عند باب البيت دخلت ارجوان وام طلال استقبلتهم ليالي وساره
ارجوان حضنت ليالي : كيفك ؟
ليالي بعدت عنها : الحمدلله نحاول نعيش
دخلت ام طلال للمجلس ،
ارجوان طلعت من عند المغسله باستغراب: امي وينها ؟
ساره : اوهه دخلت من اليوم وينك انتي ؟
ارجوان : احلفيييي تكفين شلون ادخل ؟
ساره : عادي يبنت ادخلي وسلمي عليهم كلهم واجلسي او تعالي هنا
ارجوان : طيب شكلي ؟ تحسين مبالغ ؟
ساره : بسم الله عليك وربي تهبلينن
ارجوان بابتسامه: تسلمينن ، بدخل ادعي ماتفشل
ساره : موفق
دخلت ارجوان المجلس وكان مليان حريم والكل يناظرها ، بهدوء: سلام عليكم
ردو السلام ، توجهت ارجوان تسلم على الحريم وصلت عند جود
وقف جود وتقريباً جود حضنتها وهمست : كيفك ؟
ارجوان بدون نفس : بخير
جود : بخير ؟ ممكن ذي اخر مره تقولين فيها بخير لفتره طويله "وضحكت بخفه "
فجر وقفت وسلمت على ارجوان وهمست : بشري صار شي ثاني غير البوسه ؟
ارجوان ناظرتهم بقرف وكملت تسلم على الحريم بالغصب ، طلعت بسرعه ودخلت اول غرفة قدامها ماقدرت تتحمل كل هالضغط وبكت بحرقه وقهر على الي يصير لها ،
سعود بابتسامه: علومك يولد العم
صقر : الحمدلله بخير
ريان جلس بتعب : العزيمه ذي متى تخلص ؟
صقر ضحك: علامك انت واختك مغير تحلطمون ؟
ريان : خلها على الله
عساف بكره : صقر وش تخصصك
صقر : قانون
عساف : ماشاءالله تفكر تتزوج ؟
صقر ( يليل يالبلشه ) : اا الصدق ابد مالي فيه
طلال : يعيال صدق زياد بيجي ؟
سعود : ايه بيجي باليل
طلال وقف بغضب : يخي فكونا منه كريه
سعود : اقول تلايط تراه لواء يقدر يقشك الحين
طلال : والز^****
حاتم : شفيكم !!! يخي افتكينا من هوشات البنات جيتو انتم ؟؟
عساف ضحك : خل عنك الهوشات صدق بتملك اليوم ؟؟
حاتم كان وده يصرخ يقول انا مابيها مغصوب عليها ، : ايه
عساف : حركاتتتت والزواج ؟
حاتم : كانك متحمس اكثر مني ؟ ههههههههههههههه
عساف تفشل : يعني شوف مدري ابي العب واردح فهمت
مسفر صرخ : يالله يعيال تعالو بنحط الغداء
حطو الغداء عند الرجال والحريم وبعد الغداء صار البيت يفضى من الناس وبدت تجهيزات ملكة حور وحاتم .
-
ريتال دخلت مقلط الرجال ببيت خوالها وبما انهم راحو قبل الرجال فمتوقعه مو موجود احد وكانت مروقه و ترقص وتهز وتدندن : عالجوني يحسبوني مريض مادرو عن علتي وسط الشرقيه ، عالجونييي يحسبوني مريض مادرو عن علتي وسط خوالييي
سلمان صرخ : ريتاللللل
خالد طلعت عيونه : يبنت ادخلييي عساف هنا
عساف يحاول يخفي ابتسامته عشان اخوها وخالها
سلمان طلع لها : وش دخلكككك هنا ؟
ريتال ( يبوييي يارب ماسمعو كلامي ) : ها وربي مادريت مو احنا جينا مشي ! وانتم مو معنا ف مادريت انكم جيتو عبالي مافي احد وامي دزتني اجيب شي من المقلط ومن الخرشه نسيته
سلمان ضحك : عساف بالمقلط
ريتال شهقت : احلففففف
سلمان : ايه هيا دزيها
دخلت ريتال تركض للبنات دخلت غرفة وصرختت : بناتتتتت البعير شافني المشكله اغني واقول علتي وسط الشرقيه !! ووسط خوالي واشوا سلمان وخالد مانتبهو
الجده فاطمه فتحت عيونها بقوه : منهووو ؟؟
ليالي وقفت بتوتر : يامي محد محد هي تطقطق
الجده فاطمه وقفت وحطت عصاتها عن راس ريتال : لي فتره وانا الاحظك مغير تسولفين عن هالبعير
ريتال بتوتر ( رحتي فيها يريتال ) : يجده استهدي بالله ماقصد احد
جده فاطمه: تلعبين علي تقولين علتك وسط الشرقيه !
ريتال بكت بتمثيل : يجده انا اطقطق على البنات ماتخافون الله تتهموني ؟؟ هذا ظلم ظلم
الدجه فاطمه انخرشت من بكيها : بسم الله ريتال يبنتي ماقصد شي خلاص خلاص روحي روحي
ريتال طلعت تبكي ومعها ليالي طلعو للحوش وطاحت تضحك : مشتتت
ليالي ضحكت : وجعانه ههههههههههههههه
بعد دقايق وقفت ريتال بالغصب من الضحك
ليالي : بنت ارجوان فيها شي ؟
ريتال : كيف ؟
ليالي : البنت فيها شي ابي اكلمها بس مابي اروح لبيتهم
ريتال : ليه ؟
ليالي : بيتهم فيه طلال وانا ماداني اكون بالان الي هو فيه
ريتال بفهاوه : حتا هي ماتحب تجي هنا عشان سعود
ليالي : ايش ؟؟
ريتال استوعبت ( اخخ حالفه اجيب العيد اليوم ) : ولا شي
ليالي مسكتها من كتفها : وش فيه سعود ؟؟ يخي انا حاسه صاير شي
ريتال بسرعه تكلمت : سعود سوا شي بارجوان
ليالي شهقت وطار تفكيرها بعيد : مثل ايش ؟
ريتال : يم انتي ضعتي سعود انهبل وكان منضغط وطلع حرته بارجوان
ليالي : خيررر ؟؟؟ وش الي منضغط تسمعين الي تقولينه ؟؟؟
ريتال : وش عرفني ؟؟ الي يشوفني يقول انا الي قلتله
ليالي مسكت راسها : لا اله الا الله ، يبنت كفايه زوجة خالي وجدتي ابد مو راضيه امي عليها ولا تكلم خالي ولا سالفة حور وحاتم ولا سالفتي انا وزياد مخي ضرب
ريتال ندمت انها قالتلها وهي وعدت ارجوان : اسمعي انا وعدت ارجوان بس قلتلك اف اف
ليالي : خير اجل تبين تسكتين ؟؟ وين سعود ؟؟
راحت ليالي للمقلط جت بتدخل صرخت ريتال
ليالي : شفيك ؟؟؟
ريتال : البعير جوا بيشوفك !!
ليالي : تغارين انتي ووجهك !
ريتال : وخالد بعد !! شدخل غيره ؟؟
سلمان طلع على الاصوات : علامكم انتم ؟
ليالي : سعود وينه ؟
سلمان : راح مع طلال
ليالي : سلمان دق عليهه ضروريييي قله يجي البيت بسرعههه
سلمان استغرب النبره وكلامها : علامك ؟؟
ليالي ماقدرت تتحمل : اخوكك جاب العيد بنفسه وبشخص ماله اي ذنب كانت ضحيه واخوك استغلهاا !!
سلمان انخرش ( سعود وش بيسوي ؟ يارب سترك ) بهدوء عكس داخله : كيف ؟
ليالي : دق عليه وبعدين تفهم
دق سلمان على سعود وقاله يجي ضروري .
-
عند زياد
زياد كان يلعب مع فرح غميضه : فروحه وينك
كانت فرح قدامه بس هو يسوي نفسه مايشوفها
عبدالرحمن طلع يعدي يبي يحلل ركض زياد : مسكتكككك ههههههههههههههه
عبدالرحمن بعبس : غش !
فرح ضحكت : دحوم هيا عد
عبدالرحمن: بمسكك يالنتفه
نوف دخلت بالشاهي : وقفو لعب وتعالو
فرح : خالهه نوف ليه ؟؟ ابي العب معهم
زياد : خلاص انتهى الحين نرتاح
عبدالرحمن وقف جنب فرح واشر على زياد : شوفي الشايب تعب
زياد رفع حاجبه وضحك : عمري 30 يالطيب
عبدالرحمن: ثلاثيني شايب
نوف : خل عنك وتعال الي ترا بينكم 5 سنين
زياد ضحك : حجرتلك نوف ههههههههههههههه
عبدالرحمن: تمون الغاليه
زياد نزل بيالته : وينه نادر ؟
نوف : راح الرياض عنده اعلان وبيجي
عبدالرحمن: الله يرزقه
زياد : فرح بناخذها اليوم في عشاء وبنروحله اذا تبين تجي افضل عشان فرح واذا ماتبين عادي
نوف : وين ؟
عبدالرحمن: البطل زياد ساعد بنت وبنت تصير بنت اخت خويه شوفي الصدفه مدري كيف بس مو خويه خويه يعرفون بعض
زياد : على كيفك هو ؟ مو خويي الا خويي درست معه المتوسط والثنوي وكملنا يمكن اخر سنتين هي الي ماتقابلنا فيها كثير
نوف : شلون ساعد بنت
عبدالرحمن: سالفتهم سالفه "بدًا عبدالرحمن يشرح لنوف السالفه كلها " وبالختام زياد شكله طاح ومحد سمي عليه
زياد ضربه بخفه : وجع ماني بخفيف مثلك
نوف : ماهي غريبه على زياد اخوك رجال عن الف رجاجيل
__________________
اسفهه وربي مادري متى اخر مره نزلت بارت اعذروني الاختبارات لعب فيني انا نزلت بالانستا بس هنا لا لكن ان شاء الله بعوضكم بعد الاختبارات 🤍🤍🤍'