ببيت الجد ناصر
وصلو البنات من بيت ارجوان وكانت جمعه خفيفه خلتهم ينسون جميع مشاكلهم وهمومهم ، وكل وحده توجهت لغرفتها ، دخلت ليالي لغرفتها وبدلت ، جلست على سريرها ، فتحت جوالها ودخلت الاستديو كانت تبحث عن صوره وانتبهت لصورة جود وهي نست امرها تمامًا ، رجعت تدقق بالصور كلها واضح فيها وجه جود ، ركبت شريحتها الجديده وكان باسم شخص ثاني وارسلت كل الصور وكتبت لها كلام وكان عباره عن ( تهددين او تقولين لاحد عن سعود وارجوان الصور ذي تنتشر بكل مكان وافضحك عند اهلك ، ) بلكت جود وهي الفرحه مو سايعتها حست بانتصار واخيرًا بيرتاحون من جود ،قفلت جوالها وقامت طلعت لصاله وصادفت حور توجهت لها وحضنتها : اعوذ بالله وحشتيني بسرعه
حور نطقت بلهفه : تكفينن وربي بيطقني الخلا هناك ماابيهم بقعد عندكم
ضحكت ليالي وجلست هي وحور على الكنب وجابت ترف القهوه
ناظرة حور بترف ودقتت النظر بوجها ، استغربت الهالات وتغير بشرتها ونحفها وهي تو تنتبه لها نطقت باستغراب: ترف فيك شي ؟
ترف ماسمعتها وكانت مسرحه ، حطت ليالي يدها قدام وجه ترف ، رفعت ترف راسها ونطقت : اشبكم ؟
ليالي : انتي الي شفيك
ترف ناظرتهم بحزن : الحين ابوي كم بيقعد بالسجن ؟ 20 سنه كثير
حور تنهدت : انا اشوف انها افضل ومنها يتغير ويرجع نفس قبل ابوي الي احبه هذا واحد ثاني
سمعتها ام حور ونطقت بغضب : هذا ابوك وحتا لو يذبحك عادي ذا ابوك ومعه حق بكل الي سواه
حور وقفت واستغربت كلام امها : شلون معه حق ؟ امي انتي مستوعبه وش تقولين ؟
ام حور : ايه معه حق وحتا لو يذبكن عادي وسند لو يقفل عليكن الباب ويضربكن عادي هو رجال
حور ضحكت: هو رجال ؟ انتي مستحيل امي وش صاير فيك ؟ هل دخول ابوي لسجن اثر عليك ؟ لانك كل يوم تصدميني بكلامك
ام حور بغضب : انقلعو انقعلو انتي واختك الوصخه ذي لااشوفكم ببيتي
ترف وقفت وناظرتها باستغراب: الحين انتي تشكين بتربيتك
ام حور : ماله دخل انا ربيتكم كلكم مع بعض وانتن لسانكن كل وحده اطول من الثاني وعبدالمجيد وسند وش حليلهم
عبست ليالي وجها وهمست : عز الله القرد بعيون امه عزال
سمعتها ترف وضحكت بخفه ،
ام حور ناظرت بحور : وانتي روحي مع رجلك لاتقعدين عندي
دخل الجد ناصر على كلمتها : يمرة فايز احترمي البيت الي انتي فيه وحور ماهي طالعه من بيتي الا برضاها وبعدين تطردين حفيدتي من بيتي ؟
وقفت ام حور ونطقت بتوتر : ماكنت اقصد و...
الجد ناصر: الكلام الواجد فكيني منه وتعالي يحور هناك عمانتس وخوانتس ورجلتس محارم مير البسي عباتك وتعالي
استغربت حور : كيف ؟
الجد ناصر اشر بيده : امشي امشي اظهري منه
لبست حور عبايتها وحط طرحتها على راسها عشان ممكن يجي احد من العيال ، دخلت المجلس وفزو عمامها كلهم يرحبون فيها ، حضنها مجيد : حوروهه يزفته والله اني فاقدكك
ضحكت حور ، وابتعد مجيد وسلمو عليها اعمامها ومسكوها سلمان وسعود وجلسوها بينهم وسحبو على حاتم يسولفون مع حور ، حاتم استند على المسنده وقعد يتامل علاقة حور باعمامها وواضح الحب من عيونهم وسرح بجمال عيونها وحاتم تقبل حور بسرعه صح انها للان ماتجرت عليه لاكن مع الايام تزين ، قاطعه من ضحك الجد ناصر ونطق : حاتم يولدي شفيك من اليوم اناديك وماترد ولا تعاين فيني
استوعب حاتم ولف شافهم كلهم يناظرون فيه وحور كاتمه ضحكتها
نطق بتوتر : هلا يعم
سعود ضحك : علامك انت فيك شي ؟
حاتم : لالا والله مابني شي
ناظر سلمان بحور ونطق : بتنامين اليوم عندنا ؟
سعود : طبعًا بتنامين عندنا
حور استندت على المسنده : على حسب اذا ماطفشت قعدت واذا طفشت والله رحت بيتي
سلمان ضحك: اخس مسرع صار بيتك ؟
سعود : خل البيت ،،، ترفيه عندك احنا ؟ عاد حاتم وش عنده ؟
سلمان غمز لسعود ،
سعود فهم على سلمان وضربه وضحك ،
مسك سلمان مكان الضربه : وجع ، مفروض تداريني اليومين ذي لاني بسافر
حور : جد وين ؟
سلمان : الجويت يقلبيي
سعود عبس وجه : جويت ؟
ضحكت حور : عمي يحاول يقتمس الهجه قبل يروح
سلمان ضربها على راسها بخفه : ثامن مره اروح لها
سعود شهق : ها ؟ ابك انا ولا مره سافرت ؟
حور ؛ حتا انا ذا الكويت لحالها 8 مرات كيف الدول الثانيه هههههههه
سلمان : لا اله الا الله اعوذ بالله قولو ماشاءالله لاتطيح بي الطياره
سعود : احسن خل نطيح
ناظره سلمان بطرف عين وتجاهله ، ضحك سعود ولف على حور ويسولف معها وسلمان يشارك ويناغشهم ويتضاربون ،
وقف الجد ناصر: يالله الصلاه يالله مشينا نصلي العصر
سعود وقف وتوجه للجد ناصر : ابوي ترا بنروح للمسجد الحدر ذا ماودي نجيه
الجد ناصر بااستغراب : علامه ؟
سلمان فهم انه سعود ماوده يقابل ابو ارجوان وقنع ابوه ونزلو للمسجد الحدر ودخلت حور للبنات .
-
بعد صلاة العصر طلع ابو طلال من المسجد وهو مستغرب ناصر ماجاء كان بيروح له ، وقاطعه من مسكه واحد لف عليه باستغراب: نعم يخوي امر
رجُل : سلام عليكم
ابو طلال باستغراب: وعليكم السلام
رجُل : يبو طلال يرضيك ولدهم يكون سبب بموت ولد وما يتحاسب ؟
انصدم ابو طلال ونطق : منهوو ؟؟
رجُل : ولد ناصر ، فايز بن ناصر من بني راجح طلع من المجلس ومعه رجال وطلع طلال معهم والرجال حط السلاح على طلال وفايز ماسوا شي ، مير ان فايز دخل السجن بتهمة مخدرات وأشياءٍ اعوذ بالله ،
انصدم ابو طلال ( طلال مات بسبب ولد ناصر ؟) مسك راسه بصدمه من استوعب
رجُل : يحاولون يغطون على فضيحتهم وماتنتشر ، الا ان مابقى احد مادرا
ابو طلال استاذن من الرجُل ومشي للان بصدمه ناصر الشخص الي اقرب له من اخوه ولده يصير سبب بموت ولده صار يفور من العصبيه توجه لـ بيت الجد ناصر دخل بقوه وشافهم كلهم بالمجلس وحاتم موجود ، فزو وتوجه سعود لـ محمد وصار يرحب فيه ، قرب بيحب خشمه ودفه ابو طلال ، انصدم سعود من الحركه
، قطب حواجبه الجد ناصر ونطق : الرجال بيسلم عليك وراك تدفه
ابو طلال بغضب : علامنيي ؟ماخليت مجالس مامدحتك فيها ماخليت كلمة عن الاخوه ماقلتها ، كل ذا قلته عبث .... اعرف من الناس قبلك ليههه
انصدم الجد ناصر من نبرة صوته وهو للان مافهم : يبو طلال انت شتقول
ابو طلال كان يحاول يمسك دموعه : ولدي مالي الا هو وبنيه مات بسبة ولدك وانت ماجيتني ولا قلت لي شي خليتني اعرف العلم من العرب ، خلتني افقد طلال والحين خويي من سنين انت ماحشمتني ونسيت العشره كلها عشان ولدك ، هو بكبره مااحترمك ولا فكر فيك
انجلط الجد ناصر من كلامه ونطق بغضب :احترم البيت الي انتي فيه داخل بيتي وتحاسبني من انت ؟؟ مننن
سعود دخل قلبه الخوف خاف على ارجوان اكثر منه وهو اول مادخل ابو ارجوان بعصبيته كان متوقع انه عرف عن الي سواه ، توجهه لابوه ويحاول يهدي فيه لاكن مو راضين وكل واحد يغلط على الثاني ماكانهم اصحاب من سنين ،
نطق ابو طلال بغضب : لاعاد انتي خويي ولا عاد اعرفك وبيتك ذا معاد اطبه والله ياخذ الساعه الي تعرفت فيها عليك
انجلط سعود من كلامه توجه له ومسك يد ابو طلال : يعمي استهدي بالله لاتلخي الشيطان يدخل بينكم
دف ابو طلال يد سعود من ونطق : اعوذ بالله من الشيطان ومنكم
حاتم من اول ماادخل عمه وهو يحاول يهديه وخاف ان السالفه تلف عليه ويخلونه يطلق حور ، طلع ابو طلال من البيت وسعود وراه يحاول يقنعه وابوه يهاوش بالمجلس راح سلمان ومسك سعود وركبه السياره
، سعود ناظر بسلمان بحزن : تكفى يخوي ارجوان
زفر سلمان بضيق : شسوي شسوي
سعود نزلت دموعه : ليش ليشش المشاكل ذي ليش ؟ بسبب تافه يسلمان
سلمان : ماهوب بتافه يسعود فايز سوا شِّين لا اله الا الله وفايز كانو يهددونه وطلال كان بيساعده ورموه والله او انا مااسكت
مسك سعود راسه بصدمه وجته ضيقه قويه وصار يحاول ياخذ نفس ، لف سلمان باستغراب وشاف ان سعود منكتم ....
-
دخل ابو طلال بيتهم وهو معاد يشوف من العصبيه ، دخل المجلس وشاف ام ارجوان وصرخ : الحيننن تجهزون اشيائكم بنمشي الرياض والباقي اخوي يجيبه
دخلت ارجوان على كلمته : يبه شلون ؟؟
ابو طلال : بسرعهه خذو لبسكم وبالباقي عتيق يشحنها يالله
ام طلال بصدمه : يبو طلال شفيكك ؟؟
ابو طلال تجاهلها وطلع من البيت يجهز سيارته وام طلال دخلت غرفتها تجهز شناطها ،
دخلت ارجوان غرفتها مصدومة وش السبب الي يخليهم يروحون الرياض وهي من ولدت على الدنيا عايشين بالديره اخذت جوالها ودقت على ليالي ردت ليالي وقالت ارجوان وش صار لها
نطقت ليالي بحزن : ارجوان ابوك تهاشو مع جدي وخوالي وصارت هوشه كبيره مره ويقولون سعود كان يحاول بابوك يقعد وابوك مااهتم له وسعود مدري وش صار فيه لاكن انقطع التنفس عنده ودخله سلمان علينا وعطوه بخاخ ورجع له الحمدلله
خافت ارجوان مره ونطقت بخوف واضح من نبرة صوتها : ليالي سعود بخير متاكده ؟ ؟
ليالي : ايه ايه انتي كيف الحين بتروحون ؟
ارجوان كانت تجهز اغراضها ومركبه السماعه باذنها تكلم ليالي : للاسف ماابي تكفينن ماابي
ليالي زفرت بضيقه : الله يعين انتي خلصي ولوصلتي طمنيني
ارجوان : تمام
-
« بسيارة حاتم »
وصلت حور لسيارته وركبت لفّت على حاتم ونطقت : حاتمم !!
حاتم ناظرها : لبيه
حور تنهدت وانفجرت تبكي ، انخرش حاتم وقف السياره ناظرها : حور يبنتي شفيك !
حور ضحكت من قال يبنتي ،
حاتم ضحك من ضحكتها : شفيك تبكين وتضحكين
حور مسحت دموعها وصرخت : حاتمم خيرر ابي اقعد عند اهلي
حاتم شغل السياره ومشى : عبالي في احد ضاربك وبعدين شايفه حال البيت
حور استغربت: شفيه ؟
حاتم ناظرها بطرف عين: لاتسوين ماتدرين بعدين الي متهاوش مع جدك ، عمي وابوي مااضمنه فجاه يقولي طلق حور وانا مااقدر
حور ضحكت: ماتقدر ؟ يشيخ هههههههه
حاتم ابتسم ومنتبه انها تسولف معه باريحيه : ايه مااقدر
حور مسكت جوال حاتم وحطته قدامه : فك
حاتم استغرب : ليه ؟
حور للان بقلبها يوم حنان دقت على حاتم : فك فك واعلمك
حاتم سحب الجوال منها : جوالي يالطيبه !
حور : حاتمم بليززز
حاتم ماقدر يمسك ابتسامته وفتح الجوال ومده لها : اخلصي
دخلت حور سجل المكالمات وشهقت من شافت الارقام : اوله حاتم خمسين رقم داق عليك اولههه حاتمم كل ذول ،
وشافت اسماء بنات فتحت عيونها بقوه ودخلت الجوال بعين حاتم : من ذولل ؟؟؟
بعد حاتم الجوال وركز بالاسم ضحك من شاف الاسماء ، تجاهلها ورجع يناظر بالطريق
حور تنرفزت : حاتممم !!! خيرر !! اسرع خيانه بالعالمم ،
حاتم سحب جواله : معطيك جوالي عشان تفتشينه ؟
حور : لو افتح السناب يوهه بلقى اشياء تروع
حاتم ضرب راسها بخفه : حرام عليك ماعندي الا لينا وانتي مو راضيه تضيفيني ، والارقام ذول معي بالعمل وانا كل فتره ناقليني ديره
فعشان كذا
حور تكلمت بصوت باكي : حاتمم خير خير وحنان ذي يويلك تقرب منها تراها فاقعه مرارتي ،
حاتم : ماسوت لك شي حرام ظلمتيها
حور مسكت يد حاتم : حاتم تكفى طلبتك لاتكلم بنات كثير تكفى
حاتم نزل نظره على يده وشاف مسكتها شد عليها اكثر ، استوعبت حور انها ماسكه يده حاولت تبعدها لاكن حاتم شاد عليها بقوه هجدت ورجعت ظهرها على ورا بهدوء
ضحك حاتم : وين الي تهاوشني قبل شوي
حور ماناظرت فيه : شسمه ...
ضحك حاتم ورفع يدها وباسها ، استغربت حور وهي ملاحضه اهتمام حاتم فيها ومستحيل يكون حبها من اول اسبوع ،
ناظرته ونطقت بهدوء : احذف البنات
ضحك حاتم بقوه : يكثر غيرتك ،حذف مااقدر لاكن ابشري بحاول مااكلمهن ،
حور تنرفزت من كلمت بحاول : حاتمم مافيي بحاولل سوهه
حاتم ضحك : ان شاء الله ،
-
طلعت ارجوان شنطتها وودتها لـ ابوها عشان يركبها لفّت بترجع وانتبهت لشخص يناظر فيها بلعت ريقها من توقعت الشخص لفّت بخفه وناظرت فيه وطاحت عينها بعين سعود ، ماتوقع سعود انه بيضعف كذا وهو تعلق بارجوان بشكل جنوني ماقدر يتخيل انها بتروح وتتركه زفر بضيق من صدت ودخلت ، جلس على عتبت بابهم بضيق شديد فقد خويه والان وحده تعلق فيها وحبها بجنون ، فقط تخيل ان غيره ياخذها يذبح ، شافه نواف وهو عارف وش علته جلس جنبه
ونطق بهدوء : تبي تحرق قلبك ؟
سعود نزلت دموعه وهو معاد يقدر يمسكها : ينواف بيروحون من الديره
نواف انصدم : انت صادق ؟
سعود ناظر بنواف : تكفى ينواف حاول تكفى لاتخليهم يروحون
زفر نواف بضيق : يسعود مااقدر ابوي زعلانن منه بالحيل وهو شبها
رجع سعود يناظر بسياره ابو طلال وركبت ارجوان وامها وحركو متوجهين لرياض ،
عض شفته بقهر وضيق ، : اخخخ ينواف راحت راحت
نواف ناظرة والحزن باين من عيونه : سعود تعوذ من الشيطان وان شاء اذا ربي كتبها من نصيبك ان يصير ويمكن خيره لكم ، يخوي سلمان قال انك ضميتها بالمستشفى وذا حرام انت مو محرم
سعود ناظره بانكسار : يعني خيره ؟ دامها خيره ليه تعبتني ليه
نواف بحده : سعودد هذا قضاء الله وقدره شي مكتوب وبيحصل ممكن بنت محمد ماهي من نصيبك
سعود انجلط : والله ماخذ غيرها ويحرم على بنات حواء من بعدها
نواف ناظره بصدمه : انت صاحي ؟
سعود : ورالي معاد بي عقل من بعد ماشفتها
ضحك نواف بصدمه : شكله
وقف سعود وناظره بضيق : انا بروح لحالي واذا سالو عني صرفهم باي تصريفه ويمكن مااجي الليل
وتوجه لسيارته .
-
بجناح حور وحاتم |
حاتم بتمثيل للغضب : يحوررر
حور رافعه جوال حاتم وضحكت : والله ماتشد جوالك الا اذا حذفت البنات
حاتم : غبيه انتي ؟ جوالي معك كيف احذفهم ؟
حور ضحكت: دبر عمرك
حاتم رفع اصبعه بتهديد : حور لاتخليني اشدك بالغصب !
حور تخصرت : يشيخ ؟ تحداك
حاتم يكره كلمة تحداك ، وبلحظة ركض يمها ، صرخت حور من شافت حاتم جايها انبلشت ودخلت غرفة النوم
رفعت يدينها : خلاص خلاص استسلم
حاتم ضحك بقوه : تستسلمين ؟
وهي ترجع على ورا : شوف بمسحها واعطيك
حاتم تقدم لها بسرعه ومسكها من عضدها وسحب جواله
حور بغضب : خير يحاتم خيررر !!!
حاتم استغرب: شبلاك ؟
حور دخلت يدينها جوا ذراعه : حاتم افهممم مااحب ماحب
حاتم فهم عليها لاكن يبيها تقوله بلسانها : وش ماتحبين ؟
حور شتت نظراتها عنه وزفرت بغضب : تسوي ماتفهم ؟
ضحك حاتم ،
ابتسمت حور وصرخت : لاتضحكككك
حاتم ابتسم وصار يتاملها ،
رفعت حور راسها وشافت حاتم : حاتم اقصر بصير طولك
نزل حاتم نفسه ، ناظرت حور اشكالهم بالمرايه المقابله لهم وضحكت
حاتم : وش ؟
حور : حاتم شوف اشكالناا ! هههههههه
مرر حاتم ذراعه حول خصرها وحضنها من الخلف ، ابتسم بخفه : شوفي وش حلونا ونصير احلى اذا جبنا بنوته تشبهك
ناظرته حور بصدمه : نعم
ضحك حاتم ماقدر يمسك نفسه ورغبته فيها لفها وصارت مقابله له لمس اطرف شعرها وهو مغرم بلون شعرها البُني ، حضنها بشده
حور انكتمت وبصوت مبحوح: حاتم حاتم انكتمت
حضك حاتم بقوه وأبتعد عنها ، توجه لسرير وجلس فتح جواله
توجهت حور وجلست جنبه : افتح حق المكالمات
حاتم زفر بتمثيل لـ غضب : يليل يحور فكيني
وقفت حور ونطقت بنبرة باكيه : حاتمم !! يخي تعبت احذفف البنات تكفىىى ،
حاتم : حور مااقدر
حور بكت : حاتم اكرهكك واكره طبعكك !
حاتم مسك يدها : وانا احبكك واحب غيرتك
حور قطبة حواجبها : ماهي غيره !!
حاتم ضحك : ماهي غيره ؟ استوعبي انك قاعده تبكين !
مسحت حور دموعها بقوه : من قاله ؟
تجاهل سوالها ورجع نظره للجوال : الحين بنمر لينا ونروح لبيت عمي محمد على شان نشيل اغراضهم
تنرفزت حور من تجاهله لها ، وقفت وراحت تبدل لبسها وتلبس عباتها .
-
دخل جابر البيت وتوجه للمجلس شاف جده وجدته فاطمه وكل واحد مو متحمل الثاني ناظرهم باستغراب وهدوء البيت غريب تقدم لجده وباس راسه وجدته ، جلس وصب له قهوه : علومك يبو فايز
الجد ناصر: لاتقول ابو فايز ! ماعندي ولد اسمه فايز
رفع حاجبه باستغراب: تجحده ؟
الجد ناصر بغضب : جابر قم قم انقلع لااشوفك
وقف جابر وهو براسه الف سوال غايب من البيت له يوم كامل مايدري وش صاير ، توجه لباب الحريم وصرخ ينادي وجدان ، جت وجدان وبضحكه : ارحب ياخو وجدان
ضحك جابر : البقى ياخت جابر
حضنته وجدان : شقد مشتاقه لكك وينك مختفي
ابتعد جابر وحط ذراعه على كتفها : شوفي والله في اسباب كثير واشغال الا ابوي وينه ؟
وجدان : جابر شوي شوي ابي افهم شتقول
ضحك جابر : ابوك وينه اقول
جاه نواف من الخلف وضربه بخفه على راسه : شتبي بابوها
جابر : ارحب يابو سلطان
نواف وقف وناظره بحده : آبو سلطان ؟ ابو جابر
وجدان : لا سلطان ولا جابر ، ابو وجدان
جابر : طبعًااا واخو وجدان وغنى وراشد وسلطان
وجدان : راشد فينه ؟ مااشوفه كثير
جابر مايدري وش يقول وحتا هو مايقابل راشد كثير : شسمه راشد كذا مايحب يختلط بالناس كثير ،
نواف زفر بضيق: الله يعين
جابر وده يكلم ابوه ولف عى وجدان : وجدان ضفي وجهك
رفعت حاجبها : خير ، بابا شوف ولدك قاعد يطردني
ضحك نواف ورفع يده : مالي دخل حلوها بينكم
ضربته وجدان على ختفه بقوه ، صرخ جابر ومسك ماكن الضربه : وجداننننن !!
ضحكت وجدان بقوه ودخلت تركض ، كان جابر بيلحقها ومسكه نواف : على وين ؟
جابر : يبه شف بنتك !
نواف ضحك : امش امش قل وش تبي
توجهو للمشب ودخلو جلس نواف وجلس جابر مقابل له ،
نطق جابر بخوف واهتمام كبير: يبوي كيف علاجك ؟
نواف فهم انه يقصد الكيماوي ، ابتسم بحزن : الحمدلله
جابر نزلت دموعه ، وهو له فتره منشغل وماقدر يروح معه ، تقدم ومسك يده : اعذرني ماقدرت اروح معك والله اني انشغلت والله اني ندمان اني قدمت شغلي وتركتك تروح لحالك وانا عارف انك بفتره ...
نواف سحب جابر وحضنه بقوه : معذور معذور يبوي
أبتعد جابر عن نواف ومسح دموعه ، اخذ نفس قوي : اوعدك كل جلساتك الجايه انا معك
نواف شال شماغه من راسه ونطق : الحمدلله على كل حال
رفع جابر نظره على راس : حلقته ؟
هز راسه : ايه هو يتساقط وانا حلقته مره وحده ،
جابر : يبوي وش قال الدكتور ؟
نواف ابتسم : لا ان شاء الله سليم والحمدلله حالتي قاعده تتحسن بكثير
فرح جابر : جد ؟ الحمدلله
نواف وقف: الحمدلله يالله تخاويني
جابر رفع يده ، ومسكه نواف : قدام
-
«بسيارة حاتم »
ركبت لينا القت السلام وردت حور وحاتم عليها ، والسيارة صمت محد تكلم ، حاولت لينا تتكلم بس ابد مافي امل ، لف حاتم وناظر بحور وواضح انها منفسه ، اخذ جواله ومده لها ونطق بهدوء: خذي
ناظرته حور باستغراب ، ونطقت بهدوء عكس الي بداخلها : وش ابي فيه ؟
حاتم زفر بغضب : مو انتي تقولين احذف الارقام ؟ خذي احذفيها
حور ضحكت ، ونطقت بنبره مستفزه : مو تقول ارقام مهمه ؟ الارقام اهم من ....
شافها حاتم سكتت وماكملت جملتها : اهم من ايش ؟ قوليها غيرتك يحور
لينا كرهت الساعه الي راحت فيها معهم تفشلت وبقوه وفهمت ان صاير بينهم شي ، حاولت تلهي نفسها باي شي وماتسمعهم
حور حاولت تمسك دموعها : حاتمم !!!
ناظرها حاتم لثواني ورجع نظره لطريق ، تنهد : يحوري يقلبي انا قلتلك السبب خلاص ، بس ابشري حنان الحين احذفها
لينا فتحت عيونها بصدمه خافت ان اخوها حق بنات ،
حور بغضب : طبعًا حنان ذي اول وحده تحذفها
ابتسم حاتم وهز راسه : ابشري خل نوصل بيت عمي وقدامك ابلكها بس خلاص
-
تنحنحت لينا من استوعبت انهم مو منتبهين لها او بالاصح ناسينها
، لف حاتم بصدمه وادرك انه نسى وجودها ، ضحك بخفه وناظر
حور ، حور انحرجت جدًا ، رفعت راسها وشافت حاتم يضحك ، ضربته على يده بخفه ، ابتسم ابتسامة عريضة وهو انتهى وطاح على وجهه من اول لقاء بالمستشفى وحركاتها وغيرتها دمرته ، ماتوقع انه بيتقبلها بسرعه وبيحبها كذا ، وصلو للبيت عمه على المغرب ونزلو
نطقت حور بضحكة : يلبى بيت اهلي يالله مع السلامه
ناظرها حاتم باستغراب: على وين ؟
لفت حور عليه : على بيتنا
رفع حاتم حاجبه وضحك : اقول منه على بيت عمي بنجهز اغراضهم
حور توجهت له ورفعت اصبعها : اليوم ماخليتي اقعد بقعد الحين !!
حاتم دخل ذراعها جوا ذراعه : امشي امشي
مشو وحور تتحلطم وحاتم يضحك على حلطمتها ، دخلو بيت ابو طلال ،
لينا زفرت بضيق : حاتم وش صاير بالضبط ؟
حاتم : مدري مشاكل واشياء كثير
ناظرة حور بـ حاتم : تتوقع لو يدري جدي اني هنا بيقول شي ؟
حاتم قطب حواجبه ، استغرب : ليه ؟ لا ان شاء الله
حور : مدري يحاتم خايفه احس بيصير شي
حاتم : لا ان شاء الله مايصير شي وبعدين شدخلنا بمشاكلهم ؟ واذا بتوصل لطلاقنا والله مااطلق
حور ناظرته والدموع بعينها ،لينا حطت رجلها وانحاشت
ضحك حاتم وهو تعود على دموع حور ، حضنها من الجنب : اتقي الله بدموعك نشفت والله
حور صدت عنه ، مسك يدها وتوجه للكنب جلسو وطلع جواله دخل على سجل المكالمات وبلك حنان ، حور عجبها الوضع بس مابينت
نطقت بهدوء: متى بتداوم
حاتم : ورالي بعد يومين
حور رجعت ظهرها على الخلف : بتتلزق فيك تشيل البلوك
حاتم وقف ومد يده : فكيني من سيرة حنان لانها دبلتني بكبدي
وقف حور : تم تعال خل نحوس شوي ،
لف حاتم يدور لينا : وين اختفت ذي ؟
حور ضحكت: يبوي تلقاها انحاشت منك مااتخيل اشوف اخوي يتغزل بزوجته هههههههه
كملو سوالف ويشيلون الاغراض ويشحنونها .
-
الساعه 9:40
بعزبه زياد دخل عبدالرحمن معه العشاء وحطه قدام سعود و قلطه ، انتظر عبدالرحمن سعود يمد يده وسعود الضيقه ذابحته ونفسه منسده ، زفر بضيق : يسعود كل لك لقمتين اقل شي
رجع سعود على ورا : كثر الله خيرك يعبدالرحمن ، مير اني جاي هنه ماابي اقابل احد من اهلي
عبدالرحمن ماقدر ياكل يم شاف سعود رفض حاول فيه وسعود مافي امل ياكل ، سوا شاهي جمر وشرب سعود ، فرح عبدالرحمن ليش مايدري وهو للان مايدري وش فيه سعود ،
نطق عبدالرحمن بهدوء ، ونظره على البياله : سلمان كملني وسالني عنك وقلتله عندي وبيجي
رفع سعود راسه بصدمه ، وبغضب: يعبدالرحمن انا جاي هنا عشان ماشوف اهلي !! الحين القبيله كلها جايه ، وراك تقوله مكاني ؟
عبدالرحمن: تبيني اكذب ؟ لا والله ماني بكاذب قلت الصدق وماضنتي بيجي معه احد ، وانت وش علتك من جيت مانطقت بحرف
تنهد سعود يضيقه وللان مو مستوعب ضياع ارجوان منه ، : مدري يعبدالرحمن مدري انا طحت طيحه قويه
عبدالرحمن توقع انه يحب : حب ؟
تنهد سعود : ايه في بنت احبها واليوم صارت مشكله بين ابوها وبين ابوي وسافرو على وين مدري وورالي معاد بها رجعه وانا مااقدر بدون هالبنت
عبدالرحمن: من ابوها ؟
كان الحزن والضيق باين على وجه سعود وذابل : محمد بن تركي ، ابو طلال
انصدم عبدالرحمن: مو بينهم صداقه قويه هل المشكله قويه لدرجه يتفرقون ؟
سعود عض شفايفه : موت طلال فايز له يد بموته
قطب حواجبه بصدمه ونطق : فايز ؟ ابوها غلط عليه صح ؟
سعود : كلهم غلطوا على بعض وقبت بينهم
زفر عبدالرحمن بضيق وقاطعه دخول زياد وسلمان ،
توجه سلمان لسعود وضربه بخفه : يوجعانن وينك فيه !!! بغيت اموت
ضحك سعود : شفيك يولد !
جلس سلمان بتعب : اذا بتطلع علمني اجي معك
وقف سعود وسلم على زياد ورجع جلس جنب سلمان : يصير خير
لف سلمان وشاف عبدالرحمن فز : ابو ناصر نسيت اسلم عليك
وقف عبدالرحمن ، وضحك : يرجال معليه
سلمان حب خشمه : ولله ان البزر ذا ماخلى بي عقل
ناظره سعود بطرف عين : تلايط
جلس سلمان جنبه وحاول يسولف معه وابد سعود ماهو معهم ، نطق زياد : سعود شرايك تسمعنا صوتك
تنهد سعود وهو بخاطره يغني من اول بدا يغني وكانت الذاهبه لـ خالد عبدالرحمن:
الله اللي راد والعقدة قضاها اللي عقدها
لا على الدنيا سلام ولا لباقي العمر زينة
الفضاء ما كأنه إلا خيمة طاحت عمدها
والفرح ما كأنه إلا شيخ انقصت إيدينه
والعمر قطعة زجاج انكسرت ولا طال أمدها
والعرب في العيد بدموع اليتامى مستهينه
والشوارع لفها ثوب الظلام اللي هجدها
والبيوت أطلال من عقب المحبة والسكينة
~ اخذ نفس طويل والدمعه بعينه وبكل كلمة يرجع يتذكر ارجوان كمل يغني :
والشتاء والليل والبرد وسماء يصرخ رعدها
والعيون اللي وراء الشباك مذعورة حزينة
طولوا في الكهف الأصحاب وبقت روحي وحدها
كأنها في كوكب ثاني خلا من ساكنينه
الوداع اللي بعلم العين يعبر من رمدها
والوداع اللي بلا علم القفا في صدري غبينة
والوداع اللي بلا رجعة عليّ أمر وأدها
والله إنه غرغرت سم وسكاكين سنينه
وقف وطلع من الخيمه والضيقه ذابحته مايدري وين يروح مايبي يرجع للبيت ابد ولا يبي يقعد عند العيال وذابحه الفضول يعرف وش صار على ارجوان ووين هم رايحين ،
-
« ببيت الجد ناصر »
دخل ام خالد على ريتال ، فزت ريتال واستغربت مشيت امها ودخولها الغريب :يمه شفيك ؟
تم خالد : يالله جهزي شنطتك وشنطة دارين كلمت خالد بكره الصبح بنمشي الطايف ونروح لرياض بالطيارة
انصدمت ريتال : يمههه !! تكفينن ماابي تكفينن
ام خالد بغضب : اخلصي بنروح البيت هنا متكهرب وبالحيل وامي ماهي متحملتنا خل نروح بيتنا افضل
بكت ريتال : اميي ماابي تكفين بقعد عند البنات وبعدين اجيكم
ناظرتها ام خالد بنقد : شنو ؟ تجين متى من يجيبك ؟ صاحيه انتي ؟ يالله اخلصي واقعدي مع البنات اليوم وبكره نمشي ومن نرجع
ترجعين لشغلك الي تاركته من شهور ! خالد خمس مرات يروح الرياض ويرجع ولا مره رحتي معه
ريتال شتت نظرها بالغرفه : يعنيي شسمه خالد يكفي
ام خالد طلعت من الغرفه : جهزي اغراضك يالله
وقف ريتال وشوي وتبكي توجهت لغرفه ليالي دخلت وصرخت ، فزو ترف وليالي
نطقت ليالي بغضب: يقطع بليسك يخايسه !!!
توجهت ريتال وجلست : اخخخخ بكره بنروح الرياض ببكيييي
ترف باستغراب : غبيه ! لو انا كان انحشت
ليالي : الصدق اتفق معها روحي شتبين هنا انا بقنع بسعود ونجي هناك منها اكمل دراستي
ترف : جويي بروح معكم
ريتال رفعت يدينها وتدعي : يارب ترف وليالي يجون الرياض عندي كل يوم بطلعهم
ضحكت ترف : مركزه على اهدافك
لفّت ريتال عليها : طبعًا
دفتها ليالي : قومي قومي خل ننام ونقوم الفجر
ريتال بتمثيل لـ غضب : يناس اجازه اجازهه واحنا دجاج من ياذن العشاء واحنا خمد !
ترف وقفت : والله انا ميته تعب بنام مالي خلق حتا نفسي
وقف ريتال وطلعت ،
ضحكت ليالي واشرت على ريتال : لا يكون زعلت ؟
ترف توجهت لفراشها : ماتزعل ذي هههههههه
__________________
سلام عليكم ، اول شي طلال مات خلاص يناس مو راضين تفهمون ؟ وشلون ارجعه ؟ خلاص مات ، وفي مجموعه يقولون مراح نقرا روايتك عشانك خليتي طلال يموت ؟ انا ماغصبت احد على الروايه ، غصبتكم ؟ انا يندى ماغصبت احد ، وبعدين شوفو معكم حق تزعلون عشان طلال مات بس خلاص انتهى جاني سب وهواش تحاسبوني بشي يناس انا ادرا فيه ؟ يحبايبي انا ماغصبت احد على روايتي الي يبي يقراها يقرا ويعطيني رايه باحترام ، حاولت اوصلك لكم المعلومه ولعلها هجت معي وفصلت عليكم .
أنت تقرأ
في شوفتك سالت دموع العين من فرحها
Randomاول رواية لي || الكاتبه ندى حسابي بـ الانستا ~ j.xiiix ~
