THE TIME MACHINE(IN HINDI)

15. Sarang Saves All & Neha's Truth(EPISODE 15)

Episode 15
Paasa ab palat chuka tha. Jo nikhil abhi kuch second pehle tak un dono par haavi tha wahi nikhil ab behosh pada tha aur sarang uske paas khada neha ko ghoor raha tha jo thodi door khadi ro rahi thi.
''Tumne mere sath aisa kyu kiya neha??'' Sarang ka sabse pehla sawal yahi tha.
''Mujhe maaf kar do sarang.. mujhe nikhil ne majboor kiya tha..'' neha ne rote rote hi kaha.
''Lekin tum mujhe bata bhi to sakti thi.. kam se kam mai sapne to nahi dekhta.. mere aur tumhare bhavishya ke..'' sarang bhi ruansa ho gaya tha.
''Nikhil ne hi mujhe dhamki di thi ki agar maine tumhe ya gaurav ko kuch bhi bataya to wo gaurav ko maar dega.. use malum tha ki mai gaurav se pyar karti hu..'' neha ab bhi roye ja rahi thi.
''Lekin mai hi kyu??'' Sarang ka sawal bilkul jayaj tha.
''Wo mai baad mai bataungi.. pehle police ko phone karke ise yaha se bhijwao.. warna agar ye uth gaya to musibat ho jayegi..'' neha me nikhil ki aur ishara karte huye kaha. Halaki wo uska judwa bhai tha magar ab use nikhil ki shakal se bhi chid ho rahi thi.
''Uski chinta mat karo.. Maine police ko phone kar diya hai.. wo bas aati hi hogi..'' gaurav apni jeb mai mobile rakhte huye bola.
Kuch hi minute baad police waha pahunch gayi aur nikhil ko jeep mai daal liya.
''Shashi uncle is par murder ka charge bhi lagaiyega.. kawya ke murder ka..'' sarang inspector shashi se bola jo uske papa ke kafi achhe dost the.
''Lekin sarang beta.. kawya ka murderer to tabhi pakda gaya tha na..'' inspector shashi ne dimag par jor dalte huye kaha.
''Nahi uncle murderer wo nahi ye tha.. isne khud kabool kiya hai..'' sarang ne inspector shashi ko bataya.
''Theek hai.. mai dekh lunga.. aur raat bahut ho gayi hai.. kaho to hostel tak chhod doo..'' inspector shashi ne waise hi apnepan se kaha.
''Nahi uncle.. hum car laaye the.. usi se chale jayenge..'' sarang ne kaha.
''Jaisi tumhari marzi..'' kehte huye inspector shashi jeep mai baith gaye aur waha se nikhil ko lekar chale gaye jo ab tak behosh tha. Sarang ne wakai kafi jabardast mukke maare the.

''Chalo ab shuru se sab kuch batao ki akhir ye natak mere sath hi Kyu khela gaya??'' Police ke jate hi sarang neha se bola.
''Theek hai batati hu..'' neha ne ek lambi saans li aur phir bolna shuru kiya, ''is natak ki shuruat balwinder ke pakde jaane aur nikhil ke usi din restigate hone ke karan huyi.. jab balwinder pakda gaya aur nikhil khud bhi restigate ho gaya to use laga ki ab gaurav se time machine hasil karne ka koi upaay nahi bacha hai isliye usne mujhe istemal karne ka plan banaya..''
''Lekin tumne natak sarang ke sath hi kyu kiya?? Ye natak tum mere sath karti to time machine paane ke chances jyada hote..'' gaurav ne sawal kiya.
''Aisa karne ko nikhil ne hi bola tha.. use malum tha ki tum kawya ke ilawa kisi aur ko apni jindagi mai jagah nahi doge.. isliye usne sarang ko nishana banaya kyuki time machine ke baare mai tumhare ilawa sirf sarang hi janta hai ki is vakt wo kaha hai..'' neha ne spasht kaha.

''Aur aaj ka ye natak kya tha phir??'' Sarang ne gusse se poocha.
''Aaj hi is natak ka end hona tha.. nikhil ka plan tha ki mujh par revolver taan kar wo tumhe darata aur time machine ki location janne ke baad tumhe maar deta..'' neha phir se rone lagi.
''Ek baat batao neha.. kya tumhe pata tha ki nikhil ne hi kawya ko maara tha??'' gaurav ne neha se poocha.
''Nahi.. tumhari kasam gaurav.. mujhe sach mai nahi malum tha ki nikhil ne hi kawya ko maara hai..'' neha ne rote rote hi kaha.
''Lekin tum sarang ko to marwana hi chahti thi.. to tumhari baat ka yakeen kaise kiya jaye..'' gaurav sarang ke kandhe par hath rakhte huye bola. Sarang ki ankhe bhi ab bheeg chuki thi.
''Mera yakeen karo gaurav.. mai sach mai nahi janti thi aur na hi sarang ko marwana chahti thi.. lekin mujhe tumhare aur sarang ke beech mai se kisi ek ki jindagi ko chunna tha.. maine tumhari chuni kyuki mai tumse bahut pyar karti hu gaurav.. I love you too much..'' neha ne kehte huye gaurav ki aur badna chaha magar gaurav ne apne hath se ishara karke use wahi rok diya.
''Neha tum meri sabse achhi dost ho.. par plz aaj ke baad mujhse ya sarang se kabhi mat milna.. warna teeno ko hi takleef hogi..'' gaurav ne ruansa hokar kaha.

Ye sunte hi neha waha se rote huye chali gayi. Sarang ka to bura haal tha. Wo ye sochkar roye ja raha tha ki pichle 7 dino mai neha aur uske beech Jo kuch hua wo sab ek natak tha. Wo to sach mai hi neha se pyar karne laga tha.
Gaurav use kisi tarah samhalte huye gaadi tak laya aur phir dono waha se nikal gaye.
Halaki gaurav ko car chalana pasand nahi tha, use to apni bike hi pasand thi, magar aaj sarang driving ki halat mai nahi tha.

''Abe ek baat bataega kya??'' Gaurav ne hostel pahunchne ke baad room mai jate hi sarang se poocha. Ab tak sarang bhi kafi kuch normal sa ho chuka tha.
''Ha.. bhai pooch...''
''Wo suit tere paas kaha se aaya??'' Gaurav ne poocha. Ye wakai ek ashcharya hi tha ki sarang ke paas wo suit us vakt mojoud tha.
''Tujhe dhyan hai jab us din hum log company se nikal rahe the to mai bathroom karne gaya tha.. darasal mai papa ke paas gaya tha unse apne liye bhi ek 'Invi-suit' lene.. aur aaj jab tune plan cancel karne ko kaha aur neha ka mobile off jaa raha tha tab mujhe bhi tension hone lagi.. isliye jab tu taiyar ho raha tha maine wo suit gaadi mai daal liya kisi anhoni ki ashanka mai..'' sarang ne bataya aur phir neha ka jikra aate hi udaas ho gaya.
''Chalo koi baat nahi.. ant bhala to sab bhala.. ab bhool jate hai is baat ko aur exams ki taiyari mai lag jate hai.. waise bhi ek hi hafta bacha hai exams shuru hone mai..'' gaurav use cheer karne ke liye bola. Halaki dhakka to use bhi laga tha kawya ki maut aur nikhil dono ki hi sachhai jankar lekin usne khud ko sambhale rakha.
to be continued...