THE TIME MACHINE(IN HINDI)

12. Both In College & Meet Neha (Episode.12)

12. Both In College & Meet Neha
(Episode.12)

Agle din college mai gaurav ko itne dino baad
college aaya dekhkar sabhi hairaan the. Poora
college yaha tak ki sabhi teachers aur professors
kawya aur gaurav ke be-inteha ishq ke baare mai
jaante the aur sab yahi soch rahe the ki kawya ki
maut ke baad gaurav kafi sadme mai hai aur shayad
hi kabhi college aaye.
''Hi gaurav!! Kaise ho??'' Neha ne poocha.
Neha nikhil ki judwa behen thi aur gaurav ki sabse
achhi dost bhi.
''Hi Neha!! Mai theek hu.. tum kaisi ho?? Kafi din ho
gaye tumhari chatar patar sune..'' gaurav ne hanste
huye kaha.
Neha ko uski muskan par vishvas hi nahi hua. Use
hansta muskurata dekh use khushi aur ashcharya
dono ho rahe the.
Use to laga tha ki kawya ke jaane ke baad gaurav
bilkul rookha aur udaas hoga lekin yaha to nazare hi
alag the. Gaurav to bilkul purane gaurav ki tarah hi
ekdum jolly mood mai tha.
''Achhha jii... mai chatar patar karti hu.. aur wo jo
tumhara lambu sarang karta hai kya wo chatar
patar nahi hai..'' Neha ne bhi waise hi jolly mood
mai kaha.
''Kya keh rahi hai ri bandariya.. agar aur ek baar
mujhe lambu kaha na to mujhse bura koi nahi
hoga..'' achanak peeche se sarang ki gusse se bhari
awaaj aayi.
''Tujhse bura koi hai bhi nahi.. lambu.. lambu..''
Neha use chidate huye boli.
''Ruk.. abhi batata hu..'' kehte huye sarang neha ki
aur lapka par wo to pehle hi taiyar khadi thi, turant
waha se bhaag li. Sarang bhi uske peeche-peeche
bhaga.
''Ye dono kabhi nahi sudherenge..'' gaurav hanste
huye khud se bola aur waha se bola aur waha se class ki taraf chal
diya.
Sabhi professors aaj khush the kyuki aaj unka
favorite student itne dino baad college aaya tha wo
bhi itne bade sadme se ubarkar. Hamesha ki tarah
gaurav sabse age wali seat par baith gaya aur
sarang aur neha ka intejar karne laga.
Thodi hi der mai neha class mai aayi. Use dekhkar
gaurav muskuraya par wo sharmate huye bina kuch
bole class mai sabse peeche jakar baith gayi.
Gaurav ko ye bada ajeeb laga par jaise hi sarang
class mai ghusa use neha ki sharmahat ka karan
lagbhag samajh mai aa hi gaya. Sab sarang ko
dekhkar hans rahe the magar sarang ko pata hi na
tha ki sab hans kyu rahe hai. Wo jakar gaurav ke
bagal mai baith gaya joki khud kafi dino baad itne
jor se hans raha tha.
''Kyu re chupe rustam, itta bada kaand ho gaya aur
hume pata bhi nahi chala..'' gaurav ne waise hi
hanste huye kaha. Uski awaaj sunkar baaki sab bhi
aur jor se hasne lage siway neha ke Jo chupchaap
baithi thi.
Sarang ko badi hairani huyi ki gaurav ko kaise
malum pada, ''tujhe k..k..kaise malum pada..''
sarang phusphusate huye bola.
''Aiseeeee..'' kehte huye gaurav ne sarang ke gaal pe
lage lipstick ko apni ungli se poncha to use malum
pada ki sab log kyu has rahe the.
''Nahi.. bhai.. wo to neha ne achanak..'' sarang apna
gaal saaf karte huye haklakar bola.
''Rehne de be.. jyada safai mat de..'' gaurav ne
hanste huye kaha aur aage kuch kehte hi wala tha ki
class me professor Sharma aa gaye.
''Good morning class..'' professor Sharma bole aur
phir gaurav ki taraf dekhte huye bole, ''kaise ho
gaurav.. achha laga tumhe wapas normal life mai
lautte dekhkar..''
''Mujhe bhi professor...'' gaurav ne unka abhivadan
kiya aur phir class chalu ho gayi.

''Abe.. gaurav.. tujhe pata hai.. nikhil ko college se
nikal diya...'' peeche se raj ki phusphusati awaaj
aayi. Ye sunte hi gaurav ke kaan khade ho gaye.
''Usne ek ladke ko buri tarah peet diya kal.. isliye
principal sir ne use turant restigate kar diya..'' raj ne
apni baat poori ki.
''Achhaaaa????'' Gaurav ne bas itna hi kaha par ab
wo soch mai pad gaya tha.

College ki chutti ke baad:
''Tumhara kaam ho gaya..'' neha ne phone par kaha.
''Use shak to nahi hua na??'' phone ke dusri taraf
wali awaaj bharbarayi.
''Nahi.. plz par ab tum gaurav ko kuch mat karna..
mai mar jaungi uske bina..'' neha phone par rote
huye boli.
to be continued...