وصي خيالك يجيني لا يخليني

الثاني

والبداية كانت من هنا ( الاعمار لهذه الفترة )
متعب او المعروف ( ابو شرين ) شاب في بداية حياته ( ٢٠ سنه ) باقي ماتخرج من الثانوية ، لانه من اول مادخل المتوسط وهو كل سنه يعيدها مرتين ، وحاليا ثاني ثانوي للمره الثانية ، شراني كل يوم له مشكله في المدرسه او الحارة لدرجه صار معروف بين عيال المدارس واي هوشه ينادونه علشان يفزع معاهم ، ويابخت الشله اللي يرضي انه يفزع لها ويدافع عنهم ، عنده حميه كبيره وفوق اذاه وشره مايوذي الطفل والحريم او الرجال الكبير ، ولا يغازل او يتعرض لبنات الناس وهذه الحسنه الوحيده اللي فيه ، شديد على امه واخواته ، ومشيهم على نظام ، يا ويل احد من خواته يطلع مشوار مع اخوه نايف الصغير اللي عمره ١١ سنه حتى لو مشي لبيت عمه نهاية الحارة ، لانه خايف احد من اعداءه يتعرض لهم لكذا هو اللي يطلعهم ويرجعهم ، وطبعا الجوال ماكان متوفر كثير بينهم في ذيك الفترة
المدرسين واهل الحارة كلهم متضايقين منه ومهما كلموا ابوه او اعمامه ماينفع الا يزيد في شره لهم ، ماسلمت منه سيارة ولا كفره ولا شباك ولا حتى شجرة اذاه متحرك ياويل اللي يعترض له ، غير ابوه المدرسه ونقله لمدرسه بعيده علشان يبعده عن اصدقاء السوء ، بس هو السوء بنفسه ، متعب فوق شره ذكي يعرف كيف يطلع نفسه من كل مصيبه حتى انه مسجل في سجله المدرس رقم تلفون ثابت مو صحيح ، لكذا متطمن ان ابوه ماراح يجي للمدرسه ويدري عن مشاكله فيها ، اول شهر له في المدرسه الجديده تهاوش مع مدرس مصري وضربه وقطع اوراقه ، تدخل الوكيل والمرشد والمعلمين حتى يسيطرون على متعب ويبعدونه عنها ، ضربه المدير بالخيزرانه ، وارسله لمكتب المرشد يتصرف معه ومن حسن حضه ان المعلم ما قدم عليه بلاغ في الشرطه