وصي خيالك يجيني لا يخليني

السابع عشر

علشان اليوم يوم ميلادي راح انزل لكم بارتين استمتعوا

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺

سعود كان مشغول في اختباراته لكذا اغلب وقته كان في الشقه يذاكر او جالس في الاستقبال يراجع ، وكان متعب يمر عليه كل ساعتين يتاكد انه ياكل ويريح وكان الامر مايخلا من مناقر بين الاثنين
مثلا ، مره كان سعود سرحان وواضح مو منبه لاحد ، دخل متعب وسلم بس الثاني ما رد ، قرب متعب وسحب كرسي سعود بسرعه والثاني فز مستعد لضرب وصرخ : انا ولد ابوي
التفت وشاف متعب بضحك عصب ومسك متعب ولف يده حول رقبته وطاح شماغ متعب وعقاله ، والثاني لف رجله حول رجل سعود وطاحوا على الارض الموظفين متعودين على حركاتهم لكذا ما تدخلو ، لكن كان فيه مستاجر يظن انهم يتهاوشون صدق ، جاهم يركض علشان يفرق بينهم واستغرب يوم سمعهم يضحكون
دف متعب سعود : انقلع الرجال
وقف سعود وناظر في المستاجر : ما فيه شي بس هذا مهبول ويفصل عقله وعلشان يرجع طبيعي يحتاج له كم رفسه
وقف متعب واخذ شماغه من الارض وقال : والله ما الفاصل غيرك
المستاجر : اللي تسوونه غلط ، انتم تخوفون الناس ولا سمح الله تعورون بعض من غير قصد او يشوفونكم اطفال  يقلدونكم وتصير مشكله ، انتم في مكان حساس والعيون عليكم لازم تكونون حريصين
كح متعب لانه تذكر غسان وخواته اللي دائما يشوفونهم بهذا الحال
سعود بخجل : فعلا كلامك صحيح ، ان شاء الله معاد نعيدها
متعب مر من جنبهم طالع للعماره الثانيه : يصير خير
ناظر المستاجر في سعود والثاني هز راسه بقل حيله
متعب مع سعود تغير كثير وصار يحس بالامان والراحه وسعود بعد رغم مناقرته مع متعب الا انه مبسوط في حياته ان فيه شخص يسولف معه ويهتم فيه ، سعود اول الوقت هو اللي يهتم في متعب ويحرص على اكله و علاجه وكان دائما يعلمه ويساعده والغريب ان متعب يكون مصغي له ولا يرفض او يعاند ، والحين متعب صاير يهتم فيه علشان فترة الاختبارات