وصي خيالك يجيني لا يخليني

اربعه وثلاثين

مشى ابو متعب وسعود ونايف مع متعب لقسمه الشرطه وهناك قابلوا عبدالرحمن اللي كان ينتظرهم ، وشافو ابو خلف واقف مع ابو عناد وولده عادل
متعب غصب عنه تذكر محكمته الاولى وناظر في ابوه بخوف ومد يده يتعلق في يده وهمس : يبه تكفي لا تخليني لوحدي هناك ولا تخليهم ياخذون هنا مني
لف ابو متعب يده حول كتف متعب : تطمن يابوك ماني مخليك وهنا والله ما احد يقربها حتى انا
دخلو عند الضابط وقدم ابو عناد الاوراق ، والضابط قال لهم انه راح يرفع الاوراق للمحكمه ، وامر بحبس متعب حتى موعد المحكمه اعترض عبدالرحمن لكن للاسف بسبب ملف متعب الجنائي رفض الضابط واخذوا متعب لتوقيف
كانت متعب يناظر في ابوه وداخله خوف وحزن ، قرب ابوه واخذه في حضنه وقال : لا تخاف يابوك حنا معك والله ما اخليك لو ابيع روحي بس انت اصبر يابوك ، اذكر الله وقراء قران وانتبه على نفسك و خلك في حالك ، كلمنا وحنا نزورك يابوك كل اسبوع
متعب ما قدر يرد وكتفي بدموعه تنزل
قرب سعود : متعب شد حيلك يا صاحبي ايام وتطلع بحول الله
متعب : لا وصيك يا سعود
شد سعود عليه وهمس : والله ما يقربونها وانا حي
سلم على نايف وقال نايف بحده : تطمن يا متعب والله ما اتركك ولا اخلي احد يقرب من هنا
ضحك متعب وضرب على ظهره : تسلم يا خوي ، انتبه لامي وخواتي وابوي بعد وخلك فطين
اخذ العسكري متعب وطلع عبدالرحمن معه علشان يكتبون الاوراق المطلوبه
عبدالرحمن بقهر : سامحني يا متعب
متعب : ماعليك متوقعين هذا وعارفين انه مو خطاك ، بس لا تقصر عجل في الامور الباقيه
عبدالرحمن : ابشر والله لطلعك من السجن يا متعب