وصي خيالك يجيني لا يخليني

الثامن عشر

خالد كان زاير ابو متعب علشان يتطمن عليه هو صار يزورهم اسبوعيا ويجلس مع ابو متعب اللي اغلب الوقت ساكت ومهموم وكان خالد يصبره بكلمات ووعود ان متعب بيرجع ان شاء الله ، فجاه دخل عليهم ابو خلف عليهم : السلام عليكم
فز خالد ونايف مستغربين دخوله اما ابو متعب وقف وسلم عليه وقلطه هو وعياله وكان معه مسلط
نايف ناظر بحقد له وده يضربه بس خالد مسكه وهمس : صب القهوه
جلس خالد من غير مايسلم عليهم وكان يستعد لشي كبير منهم لان جيتهم مستحيل تكون خير ، خالد سبق وشافهم في يوم محكمه متعب لكذا هو عرفهم اما ابو خلف ماعرفه لانه سال ابو متعب : الرجال هذا من
ابو متعب : هذا خالد بحسبه ولدي خوي لمتعب
ابو خلف باستهزاء وهو يحك لحيته : اجل متعب للحين له خوي
خالد : اكيد لان خوته متعب ماتتعوض
ابتسم ابو خلف وهز فنجالها لنايف ، اللي اخذه ورجع يجلس بجنب خالد لان عيال ابو خلف بعد انتهوا من القهوه
ابو متعب : حيال الله ابو خلف
ابو خلف : البقى يابو متعب
انتبه ابو خلف لابو متعب اللي غمز لنايف والثاني فز علشان يطلع بس وقفه : وقف ياولد
بعدها لف لابو متعب وكمل : حنا جاينك ومستعجلين بنروح ديرتنا لا تكلف على نفسك في شي
ابو متعب : افا واجبك انت وعيالك
ابو خلف : واجبي شي ثاني
ابو متعب : ابشر به
رجع نايف يجلس بجنب خالد اللي كانت نظراته لهم كلها كره واحتقار
ابو خلف : جاي اخطب بناتك ، الكبيره لفرج والثانيه لمسلط
ابو متعب ناظر في فرج وسال : انت مو متزوج
فرج : ايه عندي حرمه وعيال الحمدالله بس اني ابي العرس وهذا حقي وشرع الله لي
خالد اشتعل غضبا لدرجه تمني يقوم يضرب فرج لين يموت ( شرع الله لك ، لابوك لابو من جابك تخسي تاخذ مرام او حتى تحلم فيها )
ابو خلف : حنا جماعه نعرف بعض وانت بناتك ما احد جاهن ،، علشان سمعت اخوهن القشره ، وهذا انا جايك ما اقول بخيرة عيالي ، بس ان فيهم خير ورياجيل شايلين نفسهم ، فرج عسكري وله بيت في الديره يروح ويرجع عليه ، ولا هو ساكن في الرياض في بيت ملك والحمدالله ماله الا سنه ساكنه ومجهز الدور الثاني كله ، ومسلط يشتغل معي في الحلال تعرف انت بسبب السجن ما كمل دراسته
خالد من القهر كان وده يتكلم بس يعرف ماله علاقه معهم ومهما عامله ابو متعب على انه ولده هو غريب عنهم في النهايه ، بس كان مقهور من كلام ابو خلف وطريقة خطبته ومقهور اكثر ان فيه اشخاص مثل ذولا فكروا يخطبون مرام ويتوقعون انها توافق عليه
انصدم خالد من رد ابو متعب : يصير خير انت تعرف لازم نستشير البنات وامهم عطنا وقت ونرد عليك
فز ابو خلف وعياله معه : لا تطول علينا ، حنا جيناك وحنا جاهزين
طلع هو وعياله وطلع معهم ابو متعب
نايف بقهر : الله ياخذك انت وعيالك لا وجاي يخطب ولا كانهم مسوين شي
خالد بقهر : تتوقع ابوك يوافق
نايف : مدري ، بس والله ما اوافق ولا اخلي خواتي يوافقون بعد ما بقى غيرهم
ابتسم خالد غصب عنه لان موقف نايف اسعده كثير وطمن قلبه شوي
كان يفكر يدق على مرام ويرجع يهددها بس علشان ماتوافق على الزواج