وصي خيالك يجيني لا يخليني

سبعه وعشرين

سعود كان منتبه على حال متعب لكذا قرر ياخذه معه بالغصب لجده علشان عنده كم شغله هناك ويبغى متعب يغير شوي عن روتينه : يلا يا رجال يوم بالكثير صد رد
متعب : صدقني ما اقدر مره مضغوط
سعود : واذ قلت تكفي يا صاحبي
زفر متعب : تم ، بس تكفي لا تكثر انت تعرف اني مضغوط
سعود : صدقني بترتاح بعدها ، تغير انا وانت محتاجين له
الفجر مشى سعود لجده ومتعب معه اللي نام اغلب الطريق ، وصل سعود مكان شغله و متعب اصر ينتظره ولا يروح فندق
اخذ متعب يتمشي في المكان ويتفرج على واجهات المحلات ، دخل محل واشتري لمجد وسمو اكسسورات و لغسان كاب
تذكر امه واخواته واشتر لهم ساعات وطبعا ما نسي هنا ، اما جدته اشتري لها شنطه يده ، واشتري لنايف كاب مثل غسان ، اما ابوه احتار كثير وش يشتري له وصار يتمشي حتى وصل محل رجالي واشتري بوك لابوه وله ، متعب طلع بوكه القديمه الهريان ، فتحه وطلع رساله هنا ، و سلسالها اللي اخذه من زمان و للحين محتفظ فيه وحالف ما يرجعه الا اذا ارجعت له ويلبسها اياه بيدينه ، بدل بين الابواك ورمي البوك القديم
رجع للمكان اللي سعود فيه وجلس ينتظره ، بعد ساعه طلع سعود : اسف تاخرت
متعب : لا ، اصلا رحت اتمشى
سعود : اشوفك مشتري هدايا
ابتسم متعب : ايه للغالين
راحو يتغدون وبعد ما انتهوا طلب متعب من سعود يروحون للبحر مايدري ليش كان عقله يطلب منه يروح للبحر ويواجهه ويثبت له ان موجود وانه راح يرجع هنا له ، متعب يكره البحر لان كل شي ابتدا من بعد ما زاروه
اول بغت تغرق هنا فيه وبعدها مرضت بعدين طلع وكان مو حذر وطاح في فخ عيال الديره اللي قلب حياته و اخذها لطريق ثاني مليان  وجع وحزن وهم ومرض ، طريق اخذه بعيد عن كل اللي يحبهم
وقف متعب قدام البحر وصرخ بصوت عالي ارعب سعود : بسم الله متعب وش فيك
متعب رجع يصرخ : والله لو عاد الزمن فينا ماراح اخليك تاخذها مني
سعود قرب من متعب وحط يده على كتفه : متعب اذكر الله يا صاحبي
سعود متاكد ان الضغط اللي يتعرض له متعب الحين كبير عليه وهو محتاج ينفس عن نفسه ويطمن قلبه بس هو للاسف عاجز ولا في يده شي يقدمه له ضرب على كتف متعب بخفيف : هونها وتهون ياصاحبي وربي ماراح يخذلك ابد
متعب : بس هم راح يخذلوني ، هي بعد راح تخذلني
سعود : متعب ليش تسوي في نفسك كذا من باعك بيعه
متعب : حاولت يا سعود بس ماقدرت والله خاصه بعد ماشفتها تجددت جروح قلبي ورجعت افكاري القديمه اللي ظنيت انها راحت
سعود : طيب انت سالتها تدري عن رايها يمكن جدتك وابوك ما سالوها
ومن راسهم تكلموا ، متعب انت تقول كلمتها وشفتها وكتبت لها رساله
وكل هذا وللحين ابوك ماعرف ، تدري وش يعني هذا
متعب ناظر في سعود وكانه يدور حبل النجاة معه
سعود : انها ماقالت لهم وهم ما كلموها عنك ، وبس يتكلمون من فكره قديمه
بعدين انت تقول تدرس وابوك حلف ما يغصبها وهي تحب الدراسه يعني ماراح تتزوج يا صاحبي صدقني ، ارتاح ووكل امرك لله
متعب رجع يناظر في البحر كلام سعود ريحه كثير وخفف عنه ثقل كاتم على
صدره ، تذكر كيف هنا ردت عليه في السيارة بكل قوة وثقه عكس ماكانت عليه اولا وهذا يعني انها صارت اقوى