وصي خيالك يجيني لا يخليني

السابع

عبدالرحمن تخرج من الجامعة ويستعد بكره للشغل في مكتب ابو عناد للمحاماة ، هو حاط لنفسه خطه علشان يوصل لهدفه ، اول يشتغل خمس سنوات محامي بعدين يدرس ماجستير ، وعقبها يقدم على منصب قاضي ، وكانت خطته هذه مافيها زواج لانه خايف ان الزواج والمسؤليه
تشغله عن هدفه اللي يسعى له ، مع ان امه وابوه حاولو كثير فيه بس هو يرفض يسمع لهم
ابوه سوي له عزيمه في استراحه وعزم اهل الحاره واعمامه وخواله
حظر ابو عناد وعياله وابو سطام وعياله واخذوا معهم نايف لان ابوه كان مسافر ، وطبعا متعب ما احد فكر يعزمه او يقول له لانه اصلا ماراح يحظر
امه عبدالرحمن وبناتها متكلفات شوكلاته وضيافه
ام متعب وبناتها ما راحو بس الجده وام سطام راحو

في بيت ابو متعب ،،، مرام جالسه تكتب الاغراض اللي تبغاها للجامعة لانها راح تبدا بعد اسبوع ، وطبعا راح تطلب من متعب يوديها السوق ، تذكرت هنا ودعت لها ان متعب ما يمنعها من المدرسه السنه هذه راح تتخرج من الثانوية، انتبهت ان متعب مامرهم البيت من بعد اخر مره ، تسلل القلق والخوف داخلها وراحت المطبخ علشان تسال امها : يمه متعب كلمك
ام متعب : لا ، ليش تسالين
مرام : طيب تدرون عن هنا ، كيفها لايكون مسوي فيها شي
ام متعب بكل بروده : لو ماتت كان درينا
ما استغربت مرام من كلام امها لانها من الاول عارفه ان هنا ما تهمهم كثر ما يهمهم صلاح متعب على حسابها
مرام : ربي راح يسالنا كلنا عنها يوم القيامه
ام متعب بحده : مرام ،، فكيني من كلامك هذا ، انت تعرفين ان مالي كلام على متعب او ابوك وربي شاهد على عجزي
زفرت مرام ورجعت تسال : طيب تعرفين اذا بيخليها تكمل دراسه ، يمه البنت متفوقه حرام ما تكمل
تنهدت ام متعب بتعب : والله مدري عنه ماقول غير الله يصلح هالولد
مرام : امين
رجعت غرفتها وجلست تكمل كتابه قائمة الاغراض
دخلت ريم عندها وجلست
مرام : هاه كتبتيها كلها لا ينقص شي تعرفين ماراح يروح مره ثانيه
ريم : كتب بس اكيد بعدين بيطلبون علينا اشياء ثانيه
مرام : الشكوه لله ، بجيب لهنا مثلك بما انكم نفس المرحله
ريم : بتدرس
مرام : مدري ،، وصراحه اخوك ينشك فيه يخليها
ريم : يارب ما يمنعها حرام متفوقه
مرام : امين ، حصيص ونايف كتبوا اغراضهم
ريم : مدري عنهم