وصي خيالك يجيني لا يخليني

اثنين وثلاثين

متعب بحده : لا تحلف يبه
ابو متعب بتحدي : انا حلفت والله ما تاخذها
انصدم متعب من كلام ابوه والتفت يناظر في امه وجدته الساكتين رجع يقول : يبه حرمتي مالك حق تمنعني اخذها
ابو متعب سكر باب الغرفه وحبس هنا داخل : مالك حرمه عندي روح لا شوفك الا بعد ثلاث سنين ، تجيني نتفاهم وقتها
صرخ متعب بقهر : يبه انت وش فيك
ابو متعب بعصبيه : لا ترفع صوتك على انا مو ورع عندك تنفخ على وتهيني عند الرياجيل وتكسر كلمتي في مجلسي
متعب : تبغاني اخليك تزوج هنا رجال غير وتظلم اختي بزواج ما تبغاه واسكت
ابو متعب : من قال لك اني غاصبهن
متعب : لو مو غاصبهن ما كان سويتوا كل شي بالدس
ابو متعب : اطلع يا متعب لا تخليني اغضب عليك
متعب بهدوء علشان ما يازم الموضوع اكثر : باخذها معي مثل ما عمر بياخذ ريم
ابو متعب : انا قلت ما انت ماخذها واطلع من بيتي
متعب بقهر وهو يضرب فخذه : ليش ليش يبه
ابو متعب : قلت لك ليش ، اطلع من بيتي
الجده : محمد يمي
قاطعها ابو متعب : يمه الله يخليك لي لا تدخلين ، لا احد يتدخل بيني وبينه
متعب بقهر : لا ماقلت ليش
ابو متعب : البنت تدرس
متعب : ماني مانعها  ، تدرس عندي
ابو متعب : جامعتها هنا ، ولاني مخليها تروح معك في شقه مفروشه في عماره داخلين طالعين منها الناس والعمال حولها انت حتى مهر ما قدمت كيف تبغاني اخليك تاخذها وانت مو جاهز لزواج
متعب : اجيب لها مهر وشبكه واستاجر لها بيت كلها بعد ما اخذها
ابو متعب : وبتتركها لحالها في شفه وانت الصبح جامعه والليل شغل
متعب بقهر : يبه لا تعقدها ، هناك اضبط وضعي
ابو متعب : ما انت ماخذها يا متعب لا تحاول
رجع متعب يصرخ بقهر : يبه لا تحدني على شي ما ابغاه
ابو متعب بتحدي : بتضربني
ضرب متعب باب الغرفه بقوه وصرخت هنا داخل : لا لا لا
ام متعب بخوف : خاف الله يا رجال بتذبح ولدك
صرخ ابو متعب : ولا كلمه حسابك معي بعدين انت واللي جنبك
حصه بخوف : انا وش سويت
ابو متعب : انت اللي معلمته
قبل تجاوب حصه متعب قال : ما احد منهم علمني والله ،  كشفكم الله في المستشفي
ابو متعب : مرام ، ولا اخت خالد
متعب كذب علشان خاف على ابوه يزعل من خالد واخته : لا آدم  خويي يشتغل في المستشفي
ابو متعب : وش عرف خويك في اختك وبنت عمك
متعب : عرفت وخلاص  اللي يهم الحين ليش تمنعني اخذ حرمتي
ابو متعب : تحسب بمشي لك اللي سويته والله لطلعه من عينك واعلمك ان الله حق انت واختك تحسبون معاد لي حيل اربيكم من جديد
متعب بقهر وهو يضرب صدره : اضربني هاوشني بس لا تمنعني اخذها
ابو متعب بتحدي : ما انت ماخذها لو تطير وتوقع
صرخ متعب بقهر وصار يدور ويرجع يضرب باب الغرفه : افتحوا الباب
الجده خافت من منظر متعب لانها تذكر حالته وقت مرضه  : محمد انت وش جاك خل الولد ياخذ حرمته
ام متعب وحصه صاروا يبكون وهو يناظرون في متعب كانو خايفين ياذي نفسه او يتعب
دفه ابو متعب عن الباب وقال بعصبيه : روح المقلط انت ما تفهم
متعب بقهر والدموع تغرق وجهه : ليش يبه ليش تسوي فيني كذا انت وعدتني وانا صدقت كلمتك و ستامنت لكم وفجاه تغدرون فيني يبه انت ليش تكرهني لهذه الدرجه ليش كل مره تقهرني وتطعني
قرب متعب من ابوه ووقف قدامه : انا وش اسوي علشان تصدق اني تغيرت يبه ، اذبح نفسي يرضيك والله اسويها
ابو متعب خاف عليه وقال بهدوء : انا ما اكرهك ولا اقصد اقهرك بس روح المقلط خلنا نتفاهم رجال لرجال
متعب بحده : نتفاهم خليتوا فيها تفاهم وانام ناوين تغدرون فيني
ابو متعب : فيه امور انت ما تعرفها حدتنا اطلع خلنا نتفاهم
ناظر متعب في ابوه بخيبه وقهر متعود عليها منه بس هذه المره كانت اكبر لانه وعده قبلها وزفر اهه طويله تقطع القلب وطلع للمقلط وداخله نار شابه