وصي خيالك يجيني لا يخليني

الخامس عشر

مرام في المستشفي راحت سالت وعرفت ان عناد عندهم
تشجعت وراحت له شافت اخوه وابوه جالسين برا ، طلبت من الممرضه تعطيها خبر متى يمشون كانت تفكر تجيب هنا علشان تقابل عناد وتطمن عليه وتسمع منه ليش طلقها بدل الحزن والبكاء اللي استسلمت له
مرام كانت كل ما تشوف هنا تحس بتانيب الضمير لانهم تركوا متعب في غرفتها بس هم وش دراهم ان متعب راح يسوي كذا هم كل اللي فكروه فيه في ذاك الوقت صحته متعب النفسيه والجسدية وسلامة عقله ، مع ان متعب ماطلب منهم هذا الشي ابدا وان جدتهم هي اللي قالت يخلونه في غرفتها لانها اكيد فكرت ان وجود متعب فيها راح يهدي نفسه ويريح  قلبه ، متعب اول الوقت ماكان يحس باللي حوله ويوم فاق وبداء يدرك انه في غرفته هنا سكت ولا قال شي ويوم طلبت منه امه يصعد لغرفته في الدور الثاني رفض هو حتى رفض احد يقرب من اغراض هنا او ينقلها من الغرفه
مرام ماتذكر ان متعب في يوم تعبث في اغراض هنا لانها دائما تشوف اغراضها زي ماهي صح احيان تشم ريحة عطرها في الغرفه او على بطانية متعب وملابسه ، متعب كان يرفض احد يلمس اغراضها وكان هو اللي يرتب ملابسه في الدولاب وياكثر ما تهاوش معهم اذا شافهم يرتبون الغرفه علشانهم حركوا اغراضها من مكانها حتى انه هاوش حصه علشانها اخذت السرير وكان يبغى ياخذه منها بالغصب ويرجعه بس ابوه رفض وقتها وقال : خل السرير يابوك ، اذا تبغى شريت لك واحد جديد
متعب بعصبيه : ما ابغى جديد ابغى سريرها القديم يرجع
ام متعب : يابوي هذا خشب مثله مثل غيره وترا الطراحه والمفرش رميناها 
صرخ متعب : من قالكم ترمونها ، هذا ماهو لكم علشان ترمونه
ابو متعب : عمك اللي رماه مو حنا
متعب بقهر : وليش عمي يسوي كذا ماكان يبغاها ترجع
بعد الصراخ والنقاش الحاد طلع متعب من البيت ولا رجع الا بعد يومين وبعد مارجع معاد تكلم في موضوع السرير
تنهدت مرام بحسره ( ياقلبي ياخوي كل مره الدنيا تقلب عليك وتخليك الغلطان ، انت ماسويت غلط كل اللي سويته صبرت قلبك المشتاق  لها )
مرام قرات رساله متعب لهنا وانقهرت ان هنا مافتحت رساله الاوله ، واندمت كثير انها طلبت منها تكتب له رساله من الاول ، لان واضح متعب فهم من رسالتها انها تحبه وراح تنتظره لكذا صدمته اول بطلاقها وبعدها بزوجها واختفائها
هنا مازالت تحتفظ في الرساله وترفض ترميها او ترمي اغراض متعب الثانيه والاغراب انها تقول ( هذه ماهي اغراض متعب هذه اغراض خويه سعد حتى نوع الزقاير غير عن اللي كان متعب يستخدمه ) ما احد انتبه لنوع زقاير متعب اللي يختلف عن الزقاير اللي في الصندوق الا هي رغم انها ماعاشت معه غير مده بسيطه

مرام شافت نورة تمشي من بعيد وتذكرت اختها المحاميه وزوجها وفجاه جات في عقلها فكره وراحت لها ركض : نورة ، نورة
التفت نورة : هلا مرام
مرام : كيفك وكيف الوالده
نوره : الحمدالله طيبه تتوجع شي بسيط بس احسن من اول
مرام : الله يجمع لها بين الاجر والعافيه ، ليش ما اخذتي اجازه علشان تهتمين فيها
نورة : دور خالد هو اللي اخذ اجازه هذه المره ، انا اخذتها المره الماضيه
مرام لمست في خالد حنيه كبيره اتجاه امه واخواته وحتى اتجاه متعب وابوها وهذا من الاشياء اللي استغربتها فيه خاصه بعد الجنون اللي كان بينهم
مرام : بغيتك في موضوع مهم ، انتهى دوامك انت
نورة : ايه انتظر خالد بس يجي
مسكت مرام ذراع نوره تقودها : طيب تعالي نجلس في مكان لوحدنا ايش رايك نطلع للحديقه الخارجيه
مشت نورة معها وهي تهز راسها : طيب