وصي خيالك يجيني لا يخليني

الرابعه

سعود يسقي الزرع في حوش بيت ابو مناحي وكانت هذه من اجمل فقرات يومه ، وهي الاهتمام في اشجار الرمان اللي زارعهم هو بنفسه
ابو مناحي بيته شعبي دور ارضي وكان حول البيت حوش كبير ، سعود اصر على ابو مناحي يزرع فيه ، منه يستفيدون بالمحصول ومنه يكون مكان حلو لتجمع ولعب الاحفاد
وبرا الحاره كان عنده عزبه فيها غنم وكان يبيع ويشتري فيها وكافيته عن الناس ، ربى بناته وعلمهن ودخلهن الجامعة في الطائف اللي قريبه منهم
سعود كان يشتغل بحماس خاصه وهو يشوف ابو مناحي مبسوط من شغله ويمدحه ، سمع صوت ام مناحي تنادي : تعال تقهو
غسل سعود يدينه من المغسله اللي في الحوش وراح يركض حتى جلس بجنب ام مناحي وباس كتفها ، واخذ الدله يصب هو عنها القهوه
ام مناحي : ترا الراعي اليوم ما جاب الحليب
ابو مناحي بغيض : لاحول ، انا قايل له من البارح يحلب الشياه ويجيب الحليب من بدري ، وانت توس تكلمين
ام مناحي : وانت في البيت علشان اعلمك
فز سعود : انا بروح اجيبها
وقبل يمشى شافوا سيارة الراعي توقف عند الباب وينزل منها ، طلعت الشغاله من البيت تركض
ابو مناحي بعصبيه : الشغاله هذه ماهي مضبوطه كل ماشافت الراعي راحت له تركض
سعود : يمكن تحبه
عطاه ابو مناحي نظره خلته يبلع الابتسامه اللي كانت على وجهه
ام مناحي : انا قايله لها ان الراعي بيجي ولازم تاخذ الحليب منه
مد الراعي الحليب لشغاله وتوجه لابو مناحي اللي قال : علامك تاخرت ، انا ماني موصيك من بدري
هز راعي راسه وعصب اكثر ابو مناحي : انقلع للعزبه
ام مناحي : انت علامك يامسلم خل الولد يتقهوا 
صب له سعود فنجال ، واشرت ام مناحي على صحن التمر : تمر ،، خذ تمر
ابتسم الراعي واخذ له تمره واكلها
ابو مناحي لراعي : جهزت ذبايح ساطي
هز الراعي راسه : ايه كلو جاهز
ام مناحي : اجل هو مشتري من عندك ذبايح عرس ولده
ابو مناحي : ايه ماشاء الله اخذ له عشر روس
سعود : ماشاء الله ، الله يبارك لك يا جدي ويزيدك
ابو مناحي : علشان تروح معي للعرس بكره
سعود : تكفي يا جدي ماودي ، يمتحنوني الشياب بالاسئله اللي ما تخلص
ابو مناحي بغيض : وش عليك منهم
سعود بغصه : كيف وش على منهم وهو يشككون فيني وفي امي وابوي
واحد منهم يقول انت لقيط يوم مالك اوراق
ام مناحي : جعله للوجع اللي مايستحي
سعود : جدي انا ماصدقت افتك من كلامهم تبغاني ارجع اسمعه مره ثانيه
ابو مناحي تنهد بحرقه : على هواك يابوك بس ودي اسند عليك قدام الرياجيل
سعود : خذ العيال معك أحمد او معاذ ، ولا طارق مايقصر بعد
التفت لراعي : قم انت روح للعزبه لا تنسرق
سعود : يلا انا بروح بعد
ام مناحي : تعش يمي معنا
سعود : بتعشى مع سندار ،، وين خواتي ما شوفهم لا هن ولا بزارينهم
ام مناحي : راحو لبيت معيض يقولون مسوين للعروس حفله
ضحك سعود : الله يعينها على ازعاج البزارين
ابو مناحي بعصبيه : البزارين مع امهاتهم ، والعيال الكبار وين
ام مناحي : اللي جالس على المروح السوني واللي نايم واللي طالع
سعود : يلا في امان الله سندار قم مشينا