يا حبيبي امبارح وحبيب دلوقتى
يا حبيبي لبكره ولاخر وقتى
احكيلي قولي ايه م الاماني ناقصلى تاني وانا بين ايديك
عمري ما شوفت حنان فى حياتى زى حنانك ولا حبيت يا حبيبي حياتي الا عشانك
*بتحب انت الأغنية دي يا حبيبي دايما تشغلها اكتر من اى اغنية تانية لام كلثوم.
*فعلا بحبها اوي بحس انها بتوصف حبي ليكي.
جذبها لتجلس بجانبه واضعا يده على كتفها وهو ينظر فى عينيها بحب شديد ، ابتسمت له برقة وقالت :
لسة بتحبني بعد العمر ده كله.
اجابها مؤكدا : هتفضلي دايما حب عمري وشريكة حياتي واجمل حاجة حصلت لى ... بحبك.
نزلت دموعها وهى تتذكر لحظاتهم سويا مسحتها سريعا وهى تستمع للمأذون يقول: ان ابغض الحلال عند الله الطلاق راجعوا نفسكم يا جماعة .
نظر اليها بحزن وصمت.
فقالت هى بحزن يغلفه القوة : خلص الإجراءات يا مولانا احنا متفقين.
انتهت إجراءات الطلاق أصبحت الان مطلقة بعد اثنان وعشرون عاما من الزواج نظر اليها بحزن وخرج صوته محشرجا وهو يتحدث بالم:
قبل ما امشي عايز اطلب منك حاجه..ارجوكي ماتتردديش تتصلي بيا لو احتاجتى اى حاجة خلينى اول حد تلجأى له لو احتاجتى اى شئ حتى لو مجرد فضفضة .. ارجوكى.
نطق كلمته الاخيرة برجاء شديد
قالت بهدوء وهى تتحاشى النظر اليه:
مفيش بنا اى ضغائن يا طارق صحيح حياتنا الزوجية انتهت لكن فى بينا احترام وصداقة هتفضل طول العمر انت ابو ولادى ودى حاجة مش هتتغير واكيد انت اول حد الجأ له لو حصل اى حاجه.
اومأ برأسه مؤكدا : ده عشمي برده .. اشوفك بخير .
* مع السلامة.
#بقلم هبة-عبدالفتاح
