يوم الحفلة ..
امر عاصم بانصراف السكرتاريه مبكرا للاستعداد للحفلة المقامة بقصره والتي سيحضرها نخبة من رجال الاعمال والشخصيات الهامة..
عادت هبه الى البيت مع آيه وقالت باجهاد :
- انا هدخل اخد شاور سريع عشان افوق وانتي كمان خدي شاور وبعدها نبقى نجهز..
ابتسمت لها آيه وقالت بمرح :
- حاضر بس هعمل حاجة خفيفة ناكلها الاول..احنا مش عارفين الحفلات دي بيبقى فيها اكل ولا الناس دي بخلا وهيجوعونا..
ضحكت هبه وقالت بقلة حيلة :
- مفيش فايدة فيكي..انا هدخل واعملي اللى انتي عايزاه..
انهت هبه حمامها واخرجت فستان السهرة الذي احضرته مسبقا وفستان اخر مناسب لآيه وقبل ان تنادي لها وجدتها تندفع الى غرفتها وتقول بحماس :
- ماما فى ناس بتسأل عليكي بره..
قالت هبه بتساؤل : ناس مين دول..
قالت آيه بخبث : مش عارفة بنتين ومعاهم فساتين ولوازمها..تعالي شوفي..
عقدت هبه حاجبيها وخرجت معها فوجدت فتاتين بانتظارها قامت احداهما وقالت بابتسامة واسعة:
- اكيد حضرتك مدام هبه..
قالت هبه باستغراب: ايوة انا...مين حضرتك..
قالت الفتاة بعمليه :
- انا ديما وهاي ريتا اجينا من اتيليه جوليا لحتى نساعدك لتتجهزي للحفلة..
قالت هبه بدهشة :
- جوليا...بس انا مطلبتش حد..
قالت ديما :
- حبيبتي هاي اوامر عاصم بيك..فيكي تحاكيه لتتأكدي
هتفت ايه بخفوت:
- طيب كلميه يا ماما عشان نفهم..
امسكت هبه الهاتف بعصبية واجرت اتصال بعاصم الذي اجاب على الفور فبادرته هى قائلة :
- مين اللى حضرتك باعتهم دول يا عاصم بيه..
ابتسم عاصم وقال:
- دول عشان يساعدوكي ويتأكدوا انه الفستان اللي بعته مظبوط..
هتفت بضيق : فستان ايه..انا جهزت فستان للحفلة خلاص..وكمان ماحبش البس على ذوق حد..
قال عاصم برقة : ولا حتى انا..
صمتت هبه وابتلعت ريقها بتوتر فأكمل هو بهدوء :
- انا طلبت من جوليا تختار فساتين لفريق السكرتارية كله... الا فستانك..انا اللى اخترته بنفسي..
شعرت بالتوتر والارتباك من نبرته فأضاف بحب :
- لو حابه تلبسي الفستان اللى جبتيه فانتي حرة طبعا.. لكن لو لبستي الفستان اللى انا اخترته هكون سعيد جدا وهعرف ان ذوقي عجبك.
قالت بخفوت : هشوف..
انهت المكالمة والتفتت الى ديما التي اخرجت فستانها من حقيبته ورفعته امامها فقالت آيه بانبهار:
- واو..ده تحفة..
قالت ديما بتلقائية:
- عن جد عاصم بيك ذوقه كتير حلو...وعم يهتم فيكي كتير..الله يهنيكي بيه..
قالت هبه بارتباك : لأ انتي فاهمة غلط ده...
قاطعتها ديما ضاحكة : لا حبيبتي ماني فاهمة غلط.. هاي الامور ما بيهتم فيها الا الرجال ياللى بيحب مرته كتير...وهلا خلينا نبلش...شو رأيك تقيسيه لحتى نتأكد اذا بده تعديل او لأ..
اخذت هبه الفستان وذهبت الى غرفتها لترتديه.. وامسكت ديما الحقيبة الاخرى واعطتها لآيه وهى تقول : وهاد لإلك..
ابتسمت لها آيه واخذت الحقيبه ودخلت هى الاخرى..
ارتدت هبه الفستان ونظرت لنفسها بذهول وهى ترى روعته عليها وكأنه صمم خصيصا لاجلها...دخلت آيه لها وهى تقول بسعادة :
- شوفي فستاني حلو قد ايه....
بترت عبارتها وهي تنظر لها بإعجاب:
- ايه ده...الفستان يجنن عليكي يا ماما..
ابتسمت لها هبه وقالت باعجاب :
- فستانك كمان حلو اوي..
امسكت به آيه وقالت وهى تدور حول نفسها :
- شايفة لونه وتصميمه يجنن كمان على قدي بالظبط..
قالت هبه بابتسامة سعيده:
- فعلا جميل اوى..بس غريبة انه عرف المقاس بالظبط..
قالت آيه بخبث:
- لا مش غريبة ولا حاجة..اكيد سها ساعدته فى تحديد المقاسات مانا عرفت انها راحت الاتيليه عشان تختار ليها وللبنات..وانا مقاسي قريب منها..
رفعت هبه حاجبيه وقالت : يمكن..
ابتسمت آيه بخبث فقد ذهبت هي مع سها باليوم السابق بطلب من عاصم وانتقت فستانها اما فستان هبه فقد اختاره عاصم بالفعل لكن آيه اخبرته بقياسها..
كان يعلم انها لن تقبل هديته الا اذا كانت هديه مشتركة قدمها للجميع...لذا فقد اشترى فساتين للطاقم كله..
