جلست سوزان مع صديقاتها بالنادي تستمع الى حديثهن عن عاصم وزواجه المفاجئ وهي تحاول رسم البرود على ملامحها وكأن الامر لا يعنيها..
قالت احداهن : بس غريبة انه يتجوز واحدة مش معروفة..
قالت اخرى : وكمان جوازو حصل بسرعة اوى..
ردت سوزان ببرود :
- انتوا مصدقين انها جوازه بجد..
قالت الاولى : امال يعني هزار يا سوزي..
قالت سوزان بتكبر :
- طبعا...عاصم اتجوز عشان يضايقني لأنه طلب مني اكتر من مرة اننا نرجع لبعض وانا كنت بماطل..فقرر يتجوز جوازة اي كلام عشان يخليني اغير..
قالت احدى السيدات بتهكم : معقول يا سوزي..
قالت سوزان بغرور :
- ده اللى حصل وبكرة تشوفي يا صافي..كلها شهر ولا شهرين ويسيبها ويرجع يتحايل عليا من تاني..
قالت صافي بسخرية :
- بس دي مش طريقة واحد متجوز عشان يغيظ واحدة انتي شوفتي الصور اللى منزلها على الانستجرام.. ده كاتب على صورة فيهم " مع حوريتي فى وادي الجنة "
قالت اخرى باستهزاء :
- لأ وبيلف بيها العالم...تركيا وإيطاليا ويا عالم هيروح فين تاني..
هتفت احداهن بلهفة : باريس..!!
قالت صافي بفضول : ايش عرفك..؟
قالت السيدة : لسه مشير صورتهم مع بعض فى برج ايفل من دقايق...افتحي الفون وشوفي..
قالت اخرى : فعلا..وصورة تانية فى متحف اللوفر..
قالت صافي بمغزى :
- شايفين السعادة واضحة فى عينيه ازاي..
قالت احداهن : عندك حق يا صافي...صحيح عاصم بيه الابتسامة مش بتفارق وشه..لكن ابتسامته فى الصور منورة اكتر..باين جدا انه فرحان..
قالت اخرى بسخرية : عريس بئا ومبسوط...يا بختها عرفت تفوز براجل زيه..
لم تعد سوزان تحتمل حديثهن المليئ بالشماتة فقامت فجأة وانصرفت تشيعها ضحكاتهن الساخرة منها..
....................................................................
اطلقت هبه ضحكة طفوليه وهي تشاهد عاصم يغلق الهاتف وينظر لها بغيظ بعد ان استمرت لنصف ساعة كاملة تختار موقع لالتقاط صورة لها بجوار برج ايفل لتبدو وكأنها تستند عليه.. وكلما اخذ عاصم صورة لها تقوم بحذفها لأنها لا تعجبها حتى انفجر عاصم واقسم انه لن يلتقط اى صور لها الان..
هتف عاصم بغيظ :
- وكمان بتضحكي..عشرين صورة مش عاجب سيادتك فيهم ولا واحدة..
قالت وهي تغالب ضحكتها:
- اعملك ايه..انت اللى مش بتعرف تصور..
هتف باستنكار:
- دلوقتي بقت المشكلة فيا..وكل الصور اللى اخدناها قبل كده كانت ايه..
قالت هبه بتوضيح :
- كانت حلوة..بس المصور الشاطر بيبان من الكادر اللى بياخده..انت مش عارف تجيبني وانا سانده على البرج مظبوط..
قال بغيظ : يا سلام...اوكي دوريلك على مصور غيري..
قالت بعبوس : كده يا ميسو.. الله يسامحك..
اتسعت عيناه وقال بذهول :
- ايه ميسو دى كمان..؟
قالت ببراءة : دلع عصوم..
هتف باستنكار : هي عصوم ليها دلع..
أومأت برأسها بطفولة وقالت : مش حلو بذمتك..
نظر لها بذهول ثم ضحك بقلة حيلة وقال:
- يادي المصيبة...وبقيت ميسو على اخر الزمن..ولسه ياما هشوف منك..مانا اللى جيبته لنفسي..
هتفت بعبوس طفولي وهى توليه ظهرها :
- ايه ده..يعني مش عاجبك اني ادلعك.. طب خلاص مش هدلعك تاني.. وكمان مش هكلمك..
استدار اليها وهو يقول بمرح:
- لا يا حبيبتي..دلعيني براحتك..بس بلاش الدلع اللى يضيع البرستيج ده..
ثم قرص وجنتها وهو يكمل : اين الهيبة..انا لا اراها..
ضحكت من اسلوبه وقالت بمرح :
- هيبة ايه يا حبيبي..احنا فى شهر العسل..
ابتسم وقال بمشاكسة:
- الله على حبيبي اللى طالعة زي السكر دي..انا ملاحظ انك اتحسنتي على جو باريس..ياريتنا جينا على هنا من الاول..
احمر وجهها فقال بأسى :
- ايه اللى طلع الطماطم دلوقتي..انا حسدتك ولا ايه..
قالت بتلعثم : بطل كلامك ده..وتعالى نتغدا فى اى مكان..انا جوعت اوى..
قال باسما : حاضر يا قلبي..فى مطعم هنا حلو اوي.. كمان الديزرت بتاعهم هيعجبك جدا..
ذهبا معا لتناول الطعام ثم طلب لها التحلية فقالت بفرحة : مين قالك اني باحب المولتن كيك..
قال بابتسامة عذبة:
- محدش قالي..لكن انا حابب انك تدوقيه..لأن هنا احسن شيفات بيعملوه..
قالت بتذكر :
- صحيح..هى الشيكولاتة بتاعة جوازنا كانت فرنسية مش كده..
قال بهدوء : لأ..ليه فاكرة انها فرنسية..
قالت ببساطة : عشان فرنسا اكتر بلد مميزة فى الشيكولاته والحلويات اللى بتدخل فيها..
قال بتأكيد : فعلا..لكن فى بلد واحدة بتتفوق عليها.. اغلى وافخر شيكولاتة فى العالم موجودة فيها..
سألته باستغراب: ايه هي..
قال عاصم : سويسرا..شيكولاتة جوازنا كانت من سويسرا..ودي بتجيلي مخصوص..
قالت باستمتاع : فعلا كانت مختلفة ومميزة...انا اكلت شوكولاته قبل كده من محل الشيف بتاعه من اصل فرنسي..وكانت حلوة جدا..لكن دي مختلفة..
قال عاصم بحب :
- خلاص مدام عجبتك هاجيبلك منها على طول..
ابتسمت له وقالت:
- هنروح فين دلوقتي..
قال عاصم بهدوء : هنرجع الاوتيل نستريح..عشان بكرة عندنا جولة من نوع تاني..
قالت بتساؤل : ليه..هنروح فين بكرة..؟
قال بمكر : بكرة تعرفي..
~~~~~~~~~~~~~~~~~~~~~~~~~~~~~
