من أجلها

الحلقة 4

......بقا يشوف فيه شوفة مش مصدقة .....حس كأنو كاين حاجة خلاف مخفية في هدرتو .....

"....متأكد الحكاية ساهلة كيما راك تهدر ولا كاين حاجة خلاف ، مستحيل راح تعاوني هكذا بلا مقابل ...."

....تبسم معاه الساحر وهو مدقق في تفاصيل وجهو ....

"....كل حاجة عندها مقابل انت عارف هاذ الشيء ...وانا تاني محتاج منك حاجة قبل ما تروح من هنا .....لازملك تجيبلي حاجة من عالم الإنس .....جيبلي الزئبق الأحمر ..."

طلع حاجبو وشاف فيه

"....هذا برك حاب غير الزئبق الأحمر ، ....؟؟؟..."

"....هذا برك ...علابالي انت برك لي تقدر تنفعني في هاد الحاجة ...أنت عارف أنو الزئبق الأحمر نادر بزاف...وراح تعاني باش تجيبو ....اعتبرها ثمن لخدمتك وزيد معاها الجبال تع المال لي مخبيهم حق تعبي ....."

.....تبسم تبسيمة صفرة مخبي بيها توترو وشاف فيه بزربة

"....ههه وينا مال ....معندي شيء يا سيدي ....راني جني زوالي قدي قد الحال .....حتى الخدمة ومنخدمش كيما الجنون الأخرين ....أنت عارف القرناء محقورين في مجتمعنا ......"

.......شعلت نيران زرقاء محاوطتهم في دوايرة....وغضب الساحر شعل

"....تكذب عليا حرايقة .....عارف الألعاب لي راك تلعبها باش تجيب جواهر نادرين .....والفتن لي مشعلها بين القبائل ولاعبها تصلح بيناتهم وتدي من دراهمهم ورزقهم .....في عود راك تلعب مع بني جنسك ....روح العب مع الإنس لي يعتبرو أعدائنا......"

.....حكمتو الرعشة، لأنو عارف هاذ النوع من النيران يحرق الجن .....زير وجهو وناض بشوية .....

"......الإنس كائنات تافهة متهمنيش بزاف ، آخر همي نهتم بأي واحد بيهم .....ولوكان مجتش حياتي مرتبط بوحدة منهم عمري ندير هاذ المخاطرة .....جا زهري انو انا قرين وقدري مرتبط بإنسية جبانة و بائسة......متسحقش هاذاك الجسد .....أنا أذكى منها وخير منها ....."

......طفات هاديك النار .....والساحر ركح شوية .....قادر يتلمس إختلافو عن باقي القرناء.....الحقد من جيهة البشر مخليه معمي على حوايج بزاف بخصوص الشراكة لي بينو وبين قرينتو .......

"....راح نجيبلك مالك يا جاريري .....أما دير في بالك إذا لعبت من ورا ظهري ولا تآذيت من هاد اللعبة راح ندمرك ...وراح نفضح أسرارك للملك.....إذا غرقت نغرقك معايا ......"

...خرج مخليه يشوف معاه بهدوء و غموض خفي شاف مع النار الزرقاء اللي قدامو ......ومسح على لحيتو بهدوء ....

.....أما حرايقة خرج و هو نافخ صدرو عريان يمشي في الأزقة واصل لدارو بملامح مبهمة......دخل وصوت السناسل الكبار في يديه مديرين حس خفيف ....كانو زوج سناسل رابطين يديه من الكتف لليد ....بلون أسود مع خدشات حمراء......وهاد السناسل يتخلقو لأي قرين ....وكي يموت يتآكلو وحدهم .....أما لونهم يتغير بتغير بزواج القرين ....

.....في عرف القرناء....إنو الزواج حاجة مقدسة عندهم ، لأنو يعتبروه إكتمال قوة ليهم ويقدرو يزيدو مكانتهم في قبائلهم ......القرين يتزوج بقرين الشريك للإنسي المرتبط بيهم .....ويعيش معاه ....حبو ولا محبوش لأنو مفروض عليه ....هو كان كاره وضعيتو هادي لأنو حاسس كينونتو مسجونة.....كاره البشر وكاره قانون القرناء هذا .....حاب يتحرر و يعيش كيما حاب هو .....وكاره "جيهان "