﷽
الشيهانة والعاصوف
بقلمي ياسمين حـ54
صباح الخيرات حبايب لاتنسوني بتعليقاتكم والنجمة
اضافة للغز داخل البارت الي تكتشفه الها بارت تكريم ينزل باسمها
٠
٠
٠
٠
بلسان حال الاكثم
واعوفك للزمن تلويك الايام
بظلك باجر يبين انكسارك
تظن الذكريات تعوفك بخير؟
محطة تمرها يومية بقطارك
وتذكرني بشكو
شلونك بالوجوه
ويصفى الندم عنوان بشعارك
٠
٠
٠
كيناز....
مثبتة راسه بحضني دموعي تهمل عليه الصخونة ماجاي تتركه من غير وجهه اصفر مابيه قطرة دم
وكلما اتذكر اعراضه احسها نفس اعراض ماما اطرد احساسي واكول لا ان شاء الله متوهمة بأحساسي
نزلت دموعي على گصته مسحتهن اكمدله
شهگت مهضومة وين اخذه وبيش اروح اخر مرة تكفل فحوصاته ابو تحسين واخذني روحة رجعة ومافهمت شبيه يگلي ابو تحسين اعراض جرثومة
زين معقولة اعراض الجرثومة هيج تسوي بيه
والمصيبة العلاج مابيه فايدة ماجاي يتحسن عليه
مسحت دموعي الخنگة بصدري بس الله يدري بيها
فتح عيونه بتعب باوعلي نطق اسمي بتعب ورجع غمض
بقيت ساعات كاملة اكمدله وهو نفسه نفسه
بالاخير اتصلت على جوانا يتصل ومترد
جربت ومرة وعشرة مترد صارلي يومين احاول احصلها ماكو
خليته على صفحة وگمت موسدته المخدة بدلت ولبست الحجاب طلعت لبيت ابو تحسين
دگيت الباب عليهم امسح بعيوني يحرگني من السهر والبجي كلما يتخربط ويشكي من الالم اموت قبله
لان مابيدي شي عليه
لحظات اندگ الباب فتحه هيثم ابو نهال
تقدم وسد الباب وراه
رجعت لورة خطوتين سبقني هو بالرد
_هايي شنوو هههه يابة الله يگويج ويساعدج شنو اخبارج امورج ليش هيج صاير بحالج متدمرة ترة
اسال عنج ابوي الله يشهد متضايقين عليج
وعلى حالة اخوج
_ الله يسلمك بس ردت الحجية تجي ذيج المرة جابت شيشة وياها تعالج المصخن ودهنت جسم زيوني صار زين عليها ... فدوة خل تجي وياي تشوفه
حك طرف خشمه وحجى
_ والله الحجية ماموجودة....... طلعت هية والحجي
ويتأخرون..
_ زين ما تعرف يمته يجون؟؟؟
_ لا والله تدرين معاملة وحجوزات للسفر يردون يسافرون لاهلنا بالعراق تدرين انتي صارلهم عمر عن اهلهم راغبين يزورون ويشوفون گرايبهم الا يرجعون
هزيت راسي تشكرته وعبرت خطوتين ماكملتهن صاح وراي باوعتله دموعي تلالي بعيني
_ كيناز.............. احمم اذا راغبة وخايفة على اخوج عادي اخذكم بالسيارة ابوي وامي مامشوا بيها
