روايه احببت منقذي (داعش)
(بقلم) : اساور احمد
لاتنسون التصويت ومتابعه للحساب وتعليقاتكم الحلوه ع كل فقره 🖤 قمراتي
......................
رجعت مدنك بكل درب بي ماشين
بلكت حلم ضاع هنا
مثل ثلاجه الموته ادوره وما اريد الكا
__________
مشهد من البارت السابق (للتذكير)
البارحه اني نايمه كعدت ع صوتج تضحكين بصوت عالي وانتي نايمه وصرنه نصحي بيج وماتكعدين بس تضحكين
-شنووو
- اي والله مو بس البارحه كل يوم هيج مره تضحكين ومره اللكيج كاعده ع حيلج مغمضه وتصيحين وتصرخين لااا لااا وعوفوني
___________
بسم الله الرحمن الرحيم 🌹
دنيا:- من كالت هيج احس ضربتني الف راشدي شبيه يعني صارلي اربع اشهر هنا وهيج حالتي وحتى صارو يخافون مني
زهور:- دنيا عليج الله لاتكولين لامي كتلج والله تذبحني كالت لاتكولولها
هزيت راسي لزمت ايددي:- لاتفكرين هواي كلبي والله هاذ يجوز من صدمتج ع اهلج والله لاتفكرين
هزيت راسي وكمت ع الحمام دموعي صارت تجري :- يااااالله ياالله رحمتك يا الله موتني وخلصني وخلي اروح يم امي وأبوي يا الله ماريد ابقى هنا ماريد تعبت تعبت ارحمني يا الله ارحمني
بقيت ابجي وارجف وارش ع وجهي مي واباوع لشكلي خسرت من عمري عمر مو اربع اشهور مرن لا ع شكلي حسبالك اربع سنوات واني ع هالحاله تعبت تعبت ابد ابد مو كد هالامتحان تعبت
ضليت ابجي دكت الباب عليه ماجاوبت دكت مره مرتين ماجاوبت:- دنياا شبيج تسمعيني دنيا جاوبي
بقيت اغسل بوجهي ومااجاوب:- دنيا الله عليج جاوبي هسه اروح اصيح ل احمد وأبوي بيج شي بس جاوبي
كلتلها وصوتي مخنوك:- مابيه مابيه طالعه
غسلت وجهي ورجعت شعري وره اذني وطلعت واني امسح بوجهي ودموعي شفت خالتي كاعده بالغرفه باوعت ع مرايه الكنتور وجهي احمر وخشمي احمر خالتي كاعده وتباوعلي بلبسها الاسود ولازمه السبحه تسبح بدون كلام رحت يمها كاعده ع الجربايه خليت راسي بحظنها وتغطيت
هيه بقت تمسد ع راسي وتحجي وياي:- بعد روح امج الثانيه دناوه
- ها خاله
- تجين وياي باجر
باوعتلها فوك:- وين
- عمج يعرف واحد سيد ومن أهل الله وخوش رجال نروح علي يقرالج يسويلج ورگه شي حتى تتخلصين من احلامج التحلمين بيها والله سئلنه علي وكالو خوش رجال وفقير وفاد كومه ناس شرايج هم انتي ترتاحين هم احنه نطمن عليج
- ماريد
- ليش يمه تضلين هيج ماتنامين الا على ابرا مهدء وساعتين وتكعدين مفزوعه شوفي حتى خلصانه من العلاجات والابر بأجر نوديج أني وعمج بنيتي انتي حتى ترجعين مثل اول واحسن
- فقط جسد بالحياة روحي راحت ويه اهلي خاله
- خاله اضلين هيج راحو لمكان احسن من الدنيا شهداء بالجنه عمت عيني عليج اخيتي يمه كلنه على هل طريق محد ضامن روحه انتي ضامنه نفسج تضلين لباجر بهاي الدنيا
هزيت راسي:- لا بس اتمناها من الله ماابقى بهاي الحياة دنيا بدون الاهل ماتسوه شي
- لا تكولين هيج يبعد روحي انتي كلنه اهاليتنه ماتت بس عشنه وخلفنه وكبرنه ولدنه وبناتنه يمه الحياة مستمره ماتوكف
- بس خاله ماخسرتي اهلج وانتي بعمر ال 19 مابقيتي بدون لا أهل ولا اخو ولا اخت ولا عمام ولاعندج خوال واصلا ماتعرفين اصلج شنو وعمامج وين صح انتي خالتي وامي الثانيه بس من ماتو اهلج انتي مستقره ومزوجه وعندج اطفال صح لو لا
- صح بس انتي هسه هم تكدرين تستقرين وترجعين لحياتج الطبيعيه الدراستج مو تكولين ابوي جان يتمنى اصير دكتوره لعد ارجعي للحياة وصيري دكتوره واوكفي بوجهه كل واحد يكول ماعدها أحد اني وياج بكل خطوه بحياتج ارجعي لحياتج بنيتي
هزيت راسي:- تمام خاله تمام بس شويه تتعدل نفسيتي افكر
-خوش هاي خوش خطوه يبعد خالتج واهلها زين يعني بأجر نروح للسيد
-لا
-ليش
- مابيه عود بعدين
- على راحتج يمه على راحتج
بقت تمسد ع راسي وتقرا ايات ع راسي لحد ماغفيت وبهاي النومه حلمت مادري هيج وكأنو شريط فلم يمشي سريع شريط هالشهرين كلهن بهاذ الحلم شفته يمشي سريع مادري شلون اوصفه لكن من جنه جوه الكاع وصياحي وعياطي وذاك الداعشي الحاول يتقربلي وبذاك البيت جيت ابو جمره ووكعته وعباس ماكو والشيطان الشفته كلشي كلشي انعاد بهاذ الحلم لاخر يوم الانفجار الصار كعدت واني اعيط بكلمات مامفهومه:- عوووووووفووووني لااااااا ويين ماخذينيي ويييين راااااااااهب لااااااا راااااااهب ماااااتموت رااااهب عبااااس وينكمممم عباااااس
اصيح وكأنو انعادت ذنيج الايام انفتح الباب قوي ودخلو كلهم احس احد كاضبني ويهدي بيه واني ارافس واعيط:- لااااااااا عوووفوني عوووفوني لااااا وينن ماخذيني وييين ياااااالله عووووفوني
بقيت ع صياحي وعياطي لحد ماحسيت ع راشدي قوي فر وجهي استوعبت وكأنو جنت بحلم باوع وعيوني فاتحتهم حيل اباوع للوجوه يحجون وياي بس مااسمع هيج كلت وماعت روحي تخربطت بعد ماحسيت ع شي
