روايه احببت منقذي (داعش)
(بقلم) :اساور احمد
لاتنسون التصويت ومتابعه للحساب وتعليقاتكم الحلوه ع كل فقره 🖤 قمراتي
.......................
لـــو كحلتـنـي بحلـــم
بـگليبي يفتـك بـاب
وافرش سنين العمر
ضحكـه وزعل وعتاب
___________
مشهد من البارت السابق (للتذكير)
اسمعه اخذ نفس وزفر ما جاوب كتله:- راهب
-يـ راَحته
-شبيك؟؟
-مابيه
-ليش هيج صوتك راهب
همس بصوت هادئ وتعبان وفحيح صوته كال:- دنيتي تعبااان
جسمي قشعر من نبرت صعوته التعبان وكلبي رجف كتله:-روحها لدنيتك شبيك راهب
همس:- محتاجج دنيا تعباان
______-____
بسم الله الرحمن الرحيم 🌹
دنيا:- بيه التعب ولا بيك كلي يا روحي شبيك شغلت بالي والله
كال بصوت ناصي:- بعيد الشر منج عمري مابيه بس تعبان من الشغل تعبان من كلشي هيج كون يمج تلميني بحظنج الصغير وتنوميني محتاجج حيل
ابتسمت ومدمعه:- وعد مني من نتزوج ماخليك تنام بعد بس بحظني هيج اللعب بشعرك وبوجهك لحد ما تغفى
سمعته ضحك بالكوه وكال :- زدتي الضيم ضيمين يولي
ضحكت سكت واني سكتت بس مامطمنه احسه تعبان حيل مو شويه واسمعه ياخذ انفاس كال:- لاتسكتين سولفيلي خل اسمع صوتج
-شسولف انت سولفلي حبيبي شنو المتعبك
-عوفج مني وكليلي خلصتي جهاز واشتريتي كلشي
-يعني نكول اي وبقى القليل
- اعذريني يا روحي مو وياج بهيج ايام ولا اتصل بيج بس الشغل من راسي فوك وجاي احسب ساعه ساعه لرجعتي عليج
- حبيبي معذور ليش ماعرف طبيعه شغلك وبعدين انت اشتريت وياي كلشي بس بقه القليل والشغلات الي ماكدرت اشتريهن من نكون سوه
ضحك وكال:- روُح روُحي انتٍ دنيتي الغاليه
ابتسمت:- احبك زوجي ونبي شكد مشتاقتلك افتح كام اريد اشوفك
-ماكدر ضلعي صحباني طابين طالعين أنا من افضى ادك عليك مشتاك لخلقتك الزفره
- هههههههه ولي
كال:- عمري هاي سبوعين كدامج سوي كلشي خلصي كل مشترياتج وحظري روحج أنا من ارجع ماكو يومين ارتاح واجهز الثالث عرسي صبر بعد ماكو مشتعل جد جدي عليج وانا كلفت اركان وامي وفاطمه يضلن يمج لحد ماتخلصين كلشي كون اجي اشوفج متحضرتلي كامل
- ادلل حبيبي اني شبه مخلصه بس باقيه البدله والمسكه وذني الشغلات وتمنيتك وياي نختار البدله سوه اعرف ماترضه ع الكاشف لو شي كلت ع ذوقك احسن حتى ماضوج بالعرس
-شوكت تروحين تشوفين البدلات ؟؟
-ماعرف والله باجر أو عكب باجر ماعرف
-اذا صحتلي فرصه اتصل بيج كامره وتشوفيني وإذا ماكدرت امي موجوده وتعرف شنو الارضى علي وشنو لا
- تمام حبيبي ادلل
سكت واني سكتت كال:- احجي
-خلصت ماضل سوالف
-ههههه الفاهيه اي بعد شسويتي ما سويتي وين رحتي منين اجيتي رحمه للكعبه بس احجي ارتاح على صوتج
ضحكت وكلت:- والله بس للسوك كل يوم من البيت للسوك حتى المستشفى مواصلتهاا ولا العياده
- ليش ؟
- ماعندي وقت واني اخذت اجازه ويمكن بعد يومين ارجع وللعرس ابقى اداوم حتى وره العرس تنقلني
-ان شاء الله
تذكرت كريم كلت لازم اكله ويكون عنده خبر كتله:- راهب
-يـ عـيوُنه
- يا روحي ابوس عيونك اني اريد اكلك شغله محاجيتها الك قبل واتمنى تفهمني لان اني لو ما هالشغله جان مشفتني هسه هيج وبصحتي
-اي كولي لحظه
سمعته تحرك ورد كال:- اي حبيبي احجي شني هالشغله هيج مهمه
اخذت نفس:- شوف راهب أني من طلعت من الموصل ودريت اهلي ميتين انواع الامراض صابتني اعتزلت وحدي بالغرفه لمده شهرين لا احجي ويه احد ولا اكعد وجنت اذكر كل المر بيه بالموصل من داعش لو الرمي لو التخيلات بذاك البيت وشبه تخبلت وراهه طلعت وكلت لازم ارجع لدراستي واعيش واحقق حلم اهلي رجعت لدراستي بس بنفس الحاله اني جنت حتى من اصفن واركز بشي راسي يصير يوجعني وتجيني الحاله قبل جانت تجيني الحاله باليوم مرتين أكثر لدرجه اني كاعده اهز بروحي
احجي وهوه ابد ماحجه ضل يستمع:- وزهور جانت تكول انتي نايمه تضحكين لو تبجين وتصيحين عوفوني وساعدوني لدرجه زهور صارت تخاف مني وخالتي ماتخليها تنام يمي بس خالتي تنام ونوم جنت ما انام الا ع حبوب منومه جانت تكول تكعدين من نومج وانتي تحجين وتصيحين لدرجه تخبلت كلت شويه ويخلوني بالمصح مرت فتره ودرست وتعينت بالمستشفى صارت عندي صديقى منى اقرب صديقى من بعد زهور هيه منى وجانت دكتوره جبيره وشاطره حتى عدها عياده وهيه هاي هسه عادتي واقترحت عليه اشتغل وياهه بالعياده واشتغلت حيل تقربت مني
وتحجيلي كلشي يخصها وفتره وكالت بعد ماكدر اتعب مستشفى وعياده ولادتها قربت ف عرضتها عليه اخذتها اني وكعدت بيها لحد ما ترجع وأحمد كال اني افتحلج وحده ف بقت بس بالمستشفى تداوم صدفه اجو شهداء للمستشفى ماعرف شنو بس صار صياح وعياط ورمي ماتحملت الصوت وراسي وجعني واجتني الحاله كعدت واني بأحد الغرف ومرت فتره ومنى كالت شبيج كلتلها هيج وهيج بس ماحجيتلها عن داعش ولا كلت اهلي ميتين بيت خالتي كايلتلهم هم اهلي وسألت ليش هيج كلت من ضروف ومادري ليش هيج كالت لازم تروحين لطبيب نفسي
