အမုန္းမွသည္...ခ်စ္ျခင္းဆီသို႔(နာက်ည္းခ်က္မ်ားႏွင့္ အခ်စ္ကိုဖန္ဆင္းမည္)

🍂Part-37🍂

(Unicode)(Part 37)

"ကိုမဟာ ကျွန်တော်သားနဲ့ ပတ်သက်ပြီး ကျွန်တော် တောင်းပန်ပါတယ်"

ဖုန်းထဲမှထွက်လာသော တစ်ဖက်လူ၏ အသံကြောင့် ဦးခွန်းမြတ်မဟာ ပြုံးလိုက်သည်။ ထိုသို့ဖုန်းဆက်ပြီး တောင်းပန်စကားဆိုလာမည်ဆိုသည်ကိုလည်း သူသိပါသည်။ လွန်ခဲ့တဲ့ နာရီဝက်လောက်က ခွန်းဆက်သူငယ်ချင်းတွေက ခွန်းဆက်နဲ့ မာန့်အားလာပို့ကာ အကြောင်းစုံရှင်းပြသွားသည်ကြောင့် သူသိပြီးသားဖြစ်သည်။ ခွန်းဆက်ဘက်က လက်လွန်ခဲ့သည်ဆိုပေမဲ့ တကယ်အပြစ်လုပ်ထားသူက သူတိူ့ဘက်ကဖြစ်နေသည်ကြောင့် တရားစွဲမည်တော့ မဟုတ်ပေ။ အကယ်၍ တရားစွဲလာခဲ့လျှင် ငွေအင်အားသုံးပေးလျှင် အဆင်ပြေသည်။ ဥပဒေ၏ အထက်တွင် ငွေရှိနေသည် မဟုတ်ပါလား။ ငွေဆိုသည့်အရာက စကားလုံးလေး တစ်လုံးထဲဆိုပေမဲ့ သိပ်ကိုစကားပြောပါသည်။ ငွေကြောင့် အမှန်ကနေလည်း အမှားဖြစ်သွားနိုင်သလို အမှားကနေလည်း အမှန်ဖြစ်သွားနိုင်သည်လေ။

ဦးခွန်းမြတ်မဟာ နှုတ်ခမ်းတွန့်ရုံ ပြုံးလိုက်သည်။ ထို့နောက် မတင်းလွန်းမလျော့လွန်းသော လေသံဖြင့် တစ်ဖက်လူအား ပြတ်ပြတ်သားသား ပြောလိုက်သည်။

"နောက်တစ်ခါ ကျွန်တော့်သားနှစ်ယောက်ဆီကိုသာ လာမရှုပ်ပါစေနဲ့... ဒီတစ်ခါတော့ ခင်ဗျားမျက်နှာကြောင့် ဘာမှမဖြစ်ခဲ့သလိုထားလိုက်မယ်... နောက်ဆို ကျွန်တော့်အဆိုးမဆိုပါနဲ့"

"ဟုတ်ကဲ့ စိတ်ချပါ... ကျွန်တော်သူ့ကို နိုင်ငံခြားပို့တော့မှာပါ... ဒါကြောင့် နောက်တစ်ခါ မရှိစေရပါဘူး... ဒီတစ်ခါအတွက် ကျေးဇူးတင်ပါတယ်"

"ကောင်းပါပြီ"

ဦးခွန်းမြတ်မဟာ ဖုန်းချလိုက်ပြီး သူရှေ့တွင်ထိုင်ကာ ဒေါသထွက်နေသော သားဖြစ်သူကိုကြည့်လိုက်သည်။ မင်္ဂလာပွဲကို အသည်းအသန်ငြင်းခဲ့သော ခွန်းဆက်ရောင်နီနှင့် အခုသူ့ရှေ့မှာ ထိုင်နေသော ခွန်းဆက်ရောင်နီက တစ်ယောက်တည်းလားဟုပင် မေးယူရလောက်အောင်ထိ ကွဲပြားနေသည်။ ဒီလောက်အချိန်လေးအတွင်း ခွန်းဆက်ကို ခံစားချက်တွေရှိသွားအောင် လုပ်နိုင်သော သား အလင်္ကာသည် တကယ်ကိုချီးကျူးလောက်ပါသည်။ ခွန်းဆက် ထိုသို့ဖြစ်သွားအောင်လည်း အမေတူသားလေး အလင်္ကာက တကယ့်ကိုအလှတရားလေးပင်။