Painting On The Skin

Ep-15(Unicode)

အကြောင်းအမျိုးမျိုးကြောင့် အခန်းရှင်းဖို့အရင်တက်မသွားဖြစ်ဘဲ အတူခေါ်သွားမိတဲ့ အက္ခရာမှာ အခန်းတံခါးဖွင့်ပြီးမှ သူမှားသွားမှန်းသိသည်။အမှိုက်တွေ၊ဖုန်တွေနဲ့ ရှုပ်ယှက်ခက်နေလို့‌တော့မဟုတ်။အိမ်မှာအမြဲနေလေ့ရှိသော မိခင်ဖြစ်သူကြောင့် အိပ်ရာခင်းကအစ ပြန့်ပြူးနေပြီး ယောကျ်ားလေးတစ်ယောက်ရဲ့ အခန်းကိုဖော်ပြလေ့ရှိသည့် ဟိုတစဒီတစချွတ်ထားသော အဝတ်တွေလည်းမရှိပါ။

အခန်းထဲဝင်ဝင်ချင်းညာဘက်ဘေး မတ်တပ်ဗီရီုမှာ ကပ်ထားတဲ့ ပုံများကြောင့်ဖြစ်သည်။အမျိုးသမီးအဖော်အချွတ်ပုံတွေတော့မဟုတ်။ညီမဖြစ်သူနဲ့ သူငယ်ချင်းလိုပေါင်းသော အစ်ကိုတစ်ယောက်အခန်းမှာလည်း ထိုပုံများမရှိနိုင်။ညီမက အချိန်မရွေးဝင်နိုင်သည်မလား။အက္ခရာရဲ့ နားရွက်ဖျားမှာ ရဲအောင်အထိရှက်သွားစေသောပုံမှာ Japan Anime ပိုစတာများသာဖြစ်သည်။

သူ့ပင်ကိုယ်အကျင့်အတိုင်း နားထင်ကိုလက်ညိုးနဲ့ကုတ်ခြစ်ပြီး ဗီရိုနားအမြန်လျှောက်သွားကာ တံခါးဆွဲဖွင့်သည်။အပြင်ဘက်နံရံမှာကပ်ထားတာကြောင့် ဖွင့်လိုက်တော့ ပုံတွေမမြင်ရနိုင်တော့ဘူးထင်သော်လည်း အတွင်းဘက်ခြမ်းမှာပါ ရှိနေသေးသည်။ကျစ်ခနဲစုတ်သပ်ပြီး အဝတ်တွေထဲ ခေါင်းစိုက်သွား၏။

သဘောက ကိုယ်ကသူ့ကိုကလေးပေါက်စလို့ထင်သွားမှာမလိုလားသည့်ဟန်။

"အက္ခရာက Otaku လား"

Otaku ဆိုတာ Japan Anime ဇာတ်ကားများနဲ့ Mangaများကိုနှစ်သက်သောသူတွေအား ရည်ညွှန်းသည့် နာမ်စားဟု ကြားဖူးသည်။မအူမလည်လေးလိုရှက်နေသည့် အက္ခရာ၏မျက်နှာမှာ ချက်ချင်း ဝင်းပသွားပြီး

"ဒေါက်တာလည်း ကြည့်တယ်လား"

"အင်း တစ်ခါတစ်လေပေါ့"

သူပြုံးပြီး အဝတ်ဗီရိုကိုမကာထားတော့ဘဲ မတ်မတ်ရပ်သွားသည်။ထို့နောက် အဝတ်တွေထုတ်ယူနေရင်းမှ

"Otakuတော့မဟုတ်ပါဘူး ကျွန်တော်လည်းတစ်ခါတစ်လေကြည့်မိရင်း သဘောကျတာရှိရင် ပုံထုတ်ပြီး ကပ်ထားမိတာ"