فــآئدٍةّ💎(الجزء الثاني)

حوارات_شبابية ( ٢ ) 💖

#حوارات_شبابية ( ٢ )

سلام عليكم ، اني أقرأ وماانجح ،اتعب ومااجيب درجات ، مالي واهس ادرس ، ماعرف انظم وقتي ، شسوي؟

وعليكم السلام والرحمة
اولا وثانيا وثالثا وعاشرا واخيرا اكول ان الله ميضيع تعب واحد ولا يضيع جهد واحد (  إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا (30)  )

الله ابد ميضيع تعب أحد ، بس مو شرط التعويض يجي بنفس جهة البذل ، مثلا اليوم شخص قرا زين وتعب وسهران ومافاتح الموبايل وراح للامتحان ماجاوب ! أو راح وجاوب جواب صحيح ومااجت درجته زينة بينما فلان اللي ماقرا اجته درجة زينة ! زين هاي شلون بله؟ لعد الله مو عادل ؟ وين العدل لعد!

رب العالمين عادل متفقين ع هالشي 💙

بس ممكن هذا الشخص اللي ماجاوب وهو قاري من يرجع للبيت راح يلكه خبر كدامه يفرحه ! يمكن من راح يطلع للبيت الله راح ينقذه من حادث ! يمكن راح يجي اتصال يخبره ان حاجة من حوائجه انقضت ! ويمكن هذا التعب اللي ميجيب نتيجة راح يتراكم ويتراكم لحد ما بالنهاية ينجمع وتجي درجة كاملة وتفوق تام ! ويمكن هذا التعب اللي ماجاب نتيجة راح يلكاه هناك .. بالقيامة .. من تصير شعره بينه وبين الجنة ويحتاج عمل ويكله رب العالمين تذكر مرة من قريت ومانجحت؟ ... تذكر ذيج الاذية اللي تأذيتها والالم اللي تأذيته؟ راح اعوضك هسه .. ادخل الجنة بتعبك  ذاك.. 💙

يمكن حتستغرب من كلامي .. بس هذا الواقع ... يمكن لو تصفن راح تكول يارب انت شكد دتنقذني من اشياء ، ساتر ع اشياء اذا عرف بيها واحد بعد ميبقالي ماي وجه ، دتنقذني من اشياء اني دااورط نفسي بيها .. يارب اني شمسوي؟
انت هذا اللي مسوي .. تذكر من تتعب وتدرس وتالي متنجح شكد تتأذة؟ هاي الاذية متروح بلاش ..تتحول لعطايا بس بغير اشياء ..

خليك مطمئن .. الله ميضيع تعب احد ،ولا يخليك حجاية بحلك فلان وفلان ، ولا يرضى انك تنام وانت دتظن بي سوء وتكول ياربي وين العدل ..💔

هواي بدوها بفشل وختموها بنجاح
هواي بدوها برسوب وختموها بتفوق
هواي بدوها بتعب ونهوها براحة

الناجح مو اللي ينتظر الظروف تتوفرله وينجح
الناجح  هو اللي يتأقلم وي كل الظروف وينجح

الناجح مو اللي يخلي الفشل سبب للرسوب
الناجح  هو اللي يخلي الفشل حافز للنجاح

الناجح مو اللي ينتظر تحفيز من المقابل وتهدئة ومسكنات
الناجح هو اللي ينطي مسكنات للمقابل واديه مجروحه

الناجح هو اللي : تعب وفشل
تعب وفشل
تعب وفشل
وتعب وتعب وتعب .ونجح
لانه من البداية ناجح ،لان هو ناجح