فــآئدٍةّ💎(الجزء الثاني)

احب اعلمكم شي ..💙

احب اعلمكم شي ..💙

خلوا علاقتكم قوية بالقران كلش .. هواي امور مرات بحياتنا نحتار بيها او نحتاج مرات طمأنينة .. نحتاج كلام ملموس نحتاج جواب .. من باب ( من اراد ان يكلم الله فليصلي ومن اراد ان يكلمه الله فليقرأ القران ) صدكوني القران ميخذل ابد ابد .. من انت حاير ومتدري وين تنطي وجهك واكو سالفة ببالك كوم توضأ وتوجه للقبله وخلي قرآن بين اديك ..خاطب ربك

يارب .. انت بعد تدري بشغلتي ..هيج وهيج ديصير بيه .. انطيني فد شي امشي عليه ..انطيني امر ..انطي طمأنينة ..يارب خلي عيني تجي ع آية تكون جواب الي .. وافتح القران
صدكني حتتفاجأ بالجواب اذا جانت نيتك صافية وجنت ع يقين تام انو الله دزلك رسالة

اسولفلكم كم موقف صار وياي ..

مرة من المرات كاعدين تقريبا هيج وقت ب٧ او ب٨ بليل ف خابرنا السيد الوالد كال سويت حادث ورايح للمستشفى وسد التلفون .. رجعنا اتصلنا عليه ميرد ..بعد تعرفون شيصير بينا ..مندري شصاير وياه متأذي لا داعم واحد شنو الفلم كلشي مندري

الاهل بالبيت بقوا حيل حايرين وغير اليبجون وهذا الراح للمستشفى وهذا اليتصل .. المهم اني مجان عندي حل غير ان اركض للقرآن ..

ركضت بقلبي قبل رجليه .. بسم الله الرحمن الرحيم .. فتحت القران طلعت أول آية (ومن جاء بالحسنةِ فلهُ عشرةً أمثالها وهم من فزعِ يومئذٍ آمنون )

وكعت عيني ع هالاية ..اطمئنيت حيل حيل .. باوعت للاهل كلتلهم ابوي مابي شي  ... اليوم مسوي عمل خير والله دفع هالبلاء بسبب هالعمل ..
مدااكلكم انو اني اعلم الغيب من حجيت هيج بس مرات الواحد من يرتبط ويثق بشي يحس انو رب العالمين ديمده بالطمأنينة والنور حتى لو جان بأحلك الظروف ..

المهم ..

شويه اتصل علينا السيد الوالد كال ماكو شي الحمدلله عدت سلامات

رجع للبيت ب١٢ بليل تقريبا ..كاعد ديرويلنا الصار ف كال ( اني اليوم العصر خابرني فلان سيارته عاطلة بالحلة وماعنده احد  ورحت جبته واجيت وبالطريق صادفتني مرة صعدت وياي وصلتها وكالت حالتي ضعيفة وبقت تسولفلي عن وضعها ومااخذت منها كروة وظلت تدعيلي هوااااي  ) ف هو ويحجي هيج احنه واحد كام يباوع للثاني ويبتسم .. عرفنا ان الكلام جان فعلا صحيح وان القران ميخذل احد ابد وفعلا هو شفاء لما في الصدور❤️

الموقف الثاني

بإمتحان الاقتصاد صار وياي ظرف وماقريت زين يعني رحت للإمتحان ابد مامستعدة ومتهيأة والاسئلة شوية اجت بيها صعوبة يعني الشي اللي مقاريته اجه لدرجة ردت أاجل .. بوقتها كلش ضجت بس كلت خلي اجاوب وع الله هي لو بالهدف لو بالنجف

جاوبت وكتبت الاعرفه وتوكلت ع الله وكتله مادام انت تدري شكد قريت وتعبت ف بعد بكيفك ...طلعت ضايجة من الامتحان كلش ومتأذية واحس نفسي قصرت .. وصلت للبيت ركضت للقران .. فتحت القران طلعت ( وَعَدَ اللَّهُ الَّذِينَ آمَنُوا مِنكُمْ وَعَمِلُوا الصَّالِحَاتِ لَيَسْتَخْلِفَنَّهُمْ فِي الْأَرْضِ كَمَا اسْتَخْلَفَ الَّذِينَ مِن قَبْلِهِمْ وَلَيُمَكِّنَنَّ لَهُمْ دِينَهُمُ الَّذِي ارْتَضَىٰ لَهُمْ وَلَيُبَدِّلَنَّهُم مِّن بَعْدِ خَوْفِهِمْ أَمْنًا ۚ يَعْبُدُونَنِي لَا يُشْرِكُونَ بِي شَيْئًا ۚ وَمَن كَفَرَ بَعْدَ ذَٰلِكَ فَأُولَٰئِكَ هُمُ الْفَاسِقُونَ )

كلش ارتاحيت خاصة ( يبدلنهم من بعد خوفهم امنا )

المهم راحت ايام اجت ايام ..اجه يوم النتائج .. رجعت فكرت بالاقتصاد وتذكرت جوابي 💔
رجعت فتحت القران طلعت نفس الصفحة ونفس الاية !! بعد كلش ارتاحيت يعني اطمأنيت اكثرررر💚

اجت النتائج ..اجت درجة الاقتصاد ٩٦
لطف خفي او عناية خاصة .. اي مسمى  .. المهم هالامان اجاني من الله ..والتوفيق من الله .. والبركة بهالقرآن💚

شكد متقرون القران هو يقراكم .. وشكد متحفظوا هو يحفظكم ..وشكد متهتموله هو يهتملكم .. حياتكم الضايعة تلكوها بالقران ..ومشاكلكم تلكون حلولها بالقران  .. وتعبكم تلكون جزاته بالقران ..

شكد متتيقن ان الله فعلا ديحجي وياك انت بالذات راح تجيك الاية ع مقاسك ..
ادعوا الله ان ينبهكم للاية المناسبة الكم من تفتحون القران .. ويخلي قلوبكم ترف الها

على كولة الاخت ..
على قدر اهتمامك بالتكاليف و الدساتير الالهية يهتمون بك من عالم الغيب 💙

اني مداانقللكم بعض مواقفي حتى اكلكم شوفوني .. لاابد .. بس مثل مااني عشت هالشي ف واجبي ان انقله الكم واخليكم هم تعيشوا من باب (حب لأخيك ماتحب لنفسك ) صدكوني يفوتكم ..💙
منقول نبأ هديب