فــآئدٍةّ💎(الجزء الثاني)

سلامٌ على المُجاهدين في ساحات العِلم #طلاب_السادس

سلامٌ على المُجاهدين في ساحات العِلم
#طلاب_السادس

أعرف يمكن بيكم بده بالمراجعة وبيكم باچر عگبة يبدي ..لذلك حبيت أحچيلكم كم شغلة تخلوها ببالكم

هاي شغلات عامة للطلاب جميعا ..

١_ توكل ع الله وخلي طموحك گدامك مثل مابديتها ولتوهن لو تضعف هن شهرين ٣ وكلشي يخلص صدّگني وترا دراستك ١٢ سنة بجهة وها ال٣ أشهر بجهة يعني هنّ اللي راح يحددن مصيرك.

٢_قبل متبدي بالمراجعة إخذلك يومين او ٣ أيام إستراحة وإبتعد عن الكُتب نهائيًا ،بذني اليومين إرتاح وريّح ذهنك وعقلك وإطلع غيّر جو وسوّي فد شي تحبه ، المهم ترتاح.

٣_إذا عندك نقوصات بالمواد فصل فصلين كمّلهن يلاتبلّش مو عندك بالرياضيات فصل ممكمله وتبدي تقرأ لا ، كمل نقوصاتك كلها يلاتبدي.

٤_ليظل ببالك انو لازم تهيّأ مكان دراسي وأجواء شاعرية وكذا ،صحيح ذنّي الأشياء يحفزن أكثر ويساعدنك عالقراءة أكثر بس مثلا اكو طلّاب حالتهم تعبانة وبيتهم يادوب مكفيهم تجي انتَ تگله مكان دراسي وخضار وأشجار ومدري شنو ، ترا النجاح يجي بدون المكان الدراسي والمعدل العالي هم يجي وأقسملك بالله يجي ف لتخلي ببالك انو فلان حيجيب معدل أكثر منك لان عنده مكان دراسي حلو ومعزول عن البيت وهدوء .. لا ترا اكو متوفرلهم كلشي ومجابوا نتيجة واكو ممتوفرلهم اي شي وصنعوا التميز من رحم المعاناة.

٥_كلّش عادي وطبيعي إنّك من تكمل المادة تحس نفسك كلشي مقاري وكلشي ممضبط واذا يسألوك متجاوب ، أبصملك بالعشرة حتى بالمراجعة الثانية مراح تسيطر ع المواد ،تدري شوكت تسيطر؟ ليلة الامتحان ، حتلو تروح للامتحان وتحس نفسك ممسيطر وانت مكمل مادة وقاري بس عادي ،بس تجيك الاسئلة العقل تلقائيًا يبدي يسترجع خزين المعلومات اللي عندك.

٦_إبتعد عن الاصدقاء اللي كلما يشوفوك يسألوك وين وصلت وشكملت ( هاي النوعية من اصدقائك إنطيهم بلوك هاي الفترة ) لان اكو طلاب اذا مثلا هو واصل للفصل الرابع ويسأل صديقة يلگاه واصل للفصل السادس اعتبر الدگ واللطم بده ..وشلون حيكمل وآني بعدني وبعد مالحگ وبعد ماگدر ويسويها عجة ظلمة ع نفسه وتالي يضيّع كلشي ، إعتبر نفسك بس انتَ طالب سادس بالدنيا .

٧_قبل متبدي بالمراجعة حضّر كل امورك ، ملازمك كتبك دفاترك أقلامك بحيث بعد ماعندك شي نقص.

٨_حافظ ع صلواتك بوقتهن خاصة خاصة الفجر وإلزم فد ورِد يومي وصفحة من القرآن ، مثلا يومية زيارة عاشوراء او إنت شتحب أقرأ المهم متهمل الجانب العبادي .

٩_لتخبص أهلك خبص ، خليك طالب أريحي ، عادي انت تگعد تسوي ريوگ لنفسك وأهلك نايمين ماكو داعي الا امك تگعد وها سكتوا فلان يقرأ ها فلان يقرأ ها فلان يقرأ .

١٠_خليلك يوم بالاسبوع مثلا من العصر لليل تفتح بي الموبايل او قبل متنام تفتحه نص ساعة ، ترا هم نحتاج صديق يطمئنا ونحتاج الناس اللي يشعّون علينا بالإيجابية ، بس مو تفتح الموبايل تسمع اغنية وتنام ، ترا تكئبك بالزايد .

١١_لتضايق نفسك انو من فلان ساعة لفلان ساعة اقرا هيج ومن فلان ساعة لفلان ساعة اقرا هيج ولازم اگعد هيج وكت و... لا ، بس انت حدد مادة لازم تكملها باليوم ..مثلا اليوم عندك واجب تكمل الفصل السابع ..بعد تقرأ الصبح تقرأ الظهر تگعد بالوحدة تگعد بالستة المهم انت متنام اذا ممكمل المادة المُقررة.

١٢_كل فصل من تكمله لخصه يمّك بورقه ومن تكمل الكتاب كله ارجع اقرا بس التلخيصات.

١٣_ إستخدم الورق الملّون للتلخيص اذا تحب يكون أفضل الك .

١٤_حاول قدر الإمكان تربط دراستك بأمثال من واقعنه وتسوي قصص وافلام ومسرحيات بخيالك 😁 ترا هالشي كلّش مُفيد وعن تجربة .

١٥_ كافأ نفسك دائمًا بأشياء تحبها وإتبع أسلوب التحدي ، يعني مثلا اليوم ماآكل إذا ماأكمل هذا الموضوع ، ومن تفوز بالتحدي كافأ نفسك .

١٦_خليك مطمئن ومتفائل دائمًا ، وعيونك الحلوة المكتوب يصير انتَ المهم سوّي العليك والله ميضيع تعب واحد .

وبالأخير أرجع وأگول أملنا بيكم وهن كم شهر ونلگه كل طالب گدام إسمه التخصص اللي يحبّه.💙متحدثتكم طالبة سادس السنة الماضية نجحت أول دور بمعدل ٩٢ بدون خصوصي ولاأي دورة ومن رحم المعاناة ..ودخلت للتخصص الأريده والحمدلله .

نبأ💚
نسألكم الدُعاء يارِفاق ..🤝💙
دزوها لطلاب السادس اذا تگدرون..🌷