فــآئدٍةّ💎(الجزء الثاني)

ولادة الإمام الجواد ع ..

ولادة الإمام الجواد ع ..
تحبون نسولف شوية ونربط سالفتنه بي؟

كلنا نحب الإمام محمد الجواد ع وكلنا نتمنى هسه نشوفه ونحجي وياه ..اغلبنا من راح يشوف الامام الجواد ع ممكن يجي بباله ويكله : مولاي انصحني .. كلي شسوي ..انطيني شي يبقى وياي طول حياتي ..ويجوز هسه انت بينك وبين نفسك تكول اي والله صدك هيج اكله لان كلش حاير ومادري شسوي ..

بس بالحقيقة هو الامام مجاوبنا قبل اكثر من ألف سنة ،واصلا قبل منسأل كايللنه شنسوي ومو بس هيج حتى النتيجة منطينياها ..اذا سوينه هيج راح يصير هيج ..وموبس هيج
حتى تأكيد الراح يصير منطينيا وشلون نتأكد ان السويناه مقبول لولا ..

الامام اختصر كل هاي اسئلته وكل هاي حيرتنا بخمس أشياء .. اذا سويناهن مراح نقاسي كلشي ولا راح نحير بأي شي ..

اول شي هو : توسّد الصبر

الله الله ..يعني شنو توسّد الصبر ..
يعني اتخذه وسادة ..يعني شنو اتخذه وسادة؟
يعني عوّد نفسك وعلّمها ع الصبر ، خلي الصبر ياكل ويشرب وياك ، بس هاا .. مو هذا الصبر اللي متعودين عليه ..موبس هذا الصبر اللي لازم نطبقه من تصير عدنه مصيبة! مو ( لنبلونهم بشيء من الخوف والجوع ونقص من الاموال  والانفس والثمرات وبشر الصابرين )

ولا ( الذين اذا اصابتهم مصيبة قالوا انا لله وانا اليه راجعون)

اكو درجات من الصبر ارقى .. اكو صبر ع الذنب ..اكو صبر أمام الشهوة ..اكو صبر ع المعاصي .. اكو صبر امام الاغاني ..وصبر امام المكياج ..وصبر امام العلاقات المحرمة .. وصبر امام المغريات

اكو ( وماصبرك الا بالله) هذا الصبر اللي لله وعلى الله .. اللي يجبرك ان تصبر مو علمود شي ..بس لان تحب الله

هذا الصبر هو اللي يرفعك
من تروح لعرس كله اغاني ونفسك تسويلك واهس ويكوم ابليس يوسوس وتصير عندك رغبة تجاه هالشي بس توكف امام كل المغريات وتصبر! هذا الصبر هو اللي يرفعك ..توسّد هذا الصبر

من تشوفين رجليج حلوة وناعمة وثلث ارباع البنات اللي حواليج ميلبسن جواريب بحجة عادي ومنو يباوع وهي حذاء مقبطة وتوكفين امام هالمغريات  وتغطيها بجواريب يخفيها وتصبرين ! هذا الصبر اللي يرفعج ..توسدي هذا الصبر

من تروحين للجامعة يومية وتشوفين اشكال والوان كدامج والوجوه متعرفيها شبيها مابيها ويعجبج تسوين مثلهن بس تتذكرين انو الزينة بس للي يستحقها وتتذكرين انو مستحيل تكونين بيوم من الايام فد لذة لشخص وتخلي يباوعلج شكد ميريد وتوكفين امام هالمغريات وتصبرين ..هذا الصبر اللي يرفعج ..توسدي هذا الصبر

وهم اكو صبر ارقى وارقى ..
صبرت على عذابك ..فكيف اصبر على فراقك؟

ثاني شي شنو؟

إعتنق القبر!

آني أعتنق القبر؟شلون مولاي!

إعتنق القبر مو تروح تتمدد يم قبر وتعانقه ..ولا انك تكظي ايامك كلها بالمقبرة .. اعتنق القبر يعني تخلي منظر القبر كدامك وين متروح !