فــآئدٍةّ💎(الجزء الثاني)

قصة زهراء💖

https://youtu.be/oHeAeUZYzBM

هواي ترددت.. اكتب هالرساله لولا...
بس اعرف هواي اشخاص كلوبهم نضيفه، هواي اشخاص يردون يتغيرون، هواي اشخاص يبجون على نفسهم كل يوم وميعرفون الطريق ... لخاطرهم قررت اكتب...

بمثل هليوم قبل سنة بالضبط، زهراء ماجانت زهراء الي كدامكم اليوم، جانت انسانه مكسوره لابعد درجة، جانت انسانه تايهه، انسانه يمكن جانت تعتقد بانها ابد ماراح تشوف النور بحياتها...

بس بفضل الله وهالشي شكدما اشكر رب العالمين عليه ابقه مقصره، الله مدلي ايده وانتشلتي من الغرق، الله مرات يفضل عليك ويحسسك شكد هوه كريم وانت شكد جافي وجاحد، وينعم عليك رغم كل اخطائك بس علمود تعرف الله شنو... بس علمود ترجع للطريق ...

جانت امتحانات بكلوريا، مجان باقيلي على تخرجي من الاعداديه غير بس كم اسبوع، جنت بين يوم ويوم داخله مستشفى، شد عصبي، اختناق، جنت اخاف انام خاف اختنك وماكعد بعد...
اي لهل درجه جنت واصله 💔
كل الدنيه مسوده كدامي،،

من اكوللكم الامام المهدي يروح للانسان الغافل اكثر من الانسان المؤمن ويدلي عالطريق، لان اني لمست هالشي، صح جنت اعرف الامام وجانت عندي معلومات كلش هواي عن الدين والامام المهدي، حافظه قران وخطب اهل البيت، بس مجان عندي اتصال روحي وياهم...

فجئه ادخل عالتلكرام الكه القنوات كلها تنشر عن صاحب الزمان، شلون عدهم اتصال ويا، شلون يفكرون بي ع طول،، كلت اني وين جنت؟ بيا غفله جنت؟ بديت احس بالذنب كلش، جانت روحي تطلع من افكر هوه شكد متاذي من عندي، شكد متعبته💔

ماجنت اعرف الطريق،، ماجنت اعرف شلون اتقرب منه، شلون واني بهيج حالة يرثى لها؟! امتحاناتي من جهه، مرضي من جهه، نفسيتي من جهه ،، كل الي اعرفه جنت ابجي هواي.. لدرجة صديقاتي جانن يكوللي ارحمي نفسج حرام هيج تسوين بيهه! ايام اجت جنت ابجي بيهه للصبح 💔 ابجي من الندم، ابجي عله نفسي، ابجي شلون اني جنت ماحاسه بالامام هيج، شكم سهم اني مخليه بكلبه؟!!!!

جنت من ابجي فعليا احس روحي تطلع بكل شهكه، احس كلبي خلص بعد راح يوكف، دوم جنت اردد واكوله، امسح على كلبي هذا الضعيف خلي يقوه، متمسكه باطراف عباتك لا تتركني وحدي، لا تعوفني، لا تبعدني عنك من جديد، 💔

بيوم من الايام دخلت عاليوتوب، جان عندي امتحان بكلوريا فيزيا، ماجنت اعرف منو سيد بهاء، ولا جنت سامعتله محاضره، بس الله رادني اشوف هالمقطع ... كلماته النقيه، بجيه الي من كل كلبه.. دخلن لكلبي وعقلي من دون ماحس، ، جنت كل يوم اسمعه، بكل وقت وكلمره اسمعه بيهه اتندم اكثر واكثر، ابجي اكثر واكثر💔

اذكر بيوم امتحان البكلوريا مال فيزيا، طلعت من الامتحان ورحت دورتلي زاويه بالمدرسه محد بيهه وكعدت اسمعه وابجي من دون وعي،،،

ماكدر اوصفلكم ذيج المرحله، كلما اذكرها دموعي تنزل، شكدما جانت صعبه، صهرت روحي، بس لوما ماره بيهه ماجان اليوم صرت زهراء الي كدامكم 💔

اليوم عرفت (("إن الدموع هي جليد الروح المذاب ♥️")) ‏"فإن حبَستكَ المسَافة عَن وصُولٍ ..
عَرّج بِـ عَينك َ، إنّ الدمُوع لَو تدرون َ..
وِصَالٌ لإمام الزّمان...💚✨
فعلا الدموع اطهر روح الانسان وكلبه!

باقل السنه، صاحب الزمان نقلني من شي لشي ثاني، من مكان لمكام ثاني، من ذاك اليوم لهل يوم متلطف عليه، وهوه هذا حال الانسان الي يتقرب من امام زمانه، يكوم يقربه من الله بكل شي، يتفقده، يدير باله عليه ويغمره بانعام وتوفيقات مايتخلها عقله🙏🏻

مدينه برسالة شكر للسيد بهاء، لوما هالانسان الله مخلي كدامي ماعرف شنو جان راح يصير 🙏🏻🙏🏻

زهراء لحد هسه ولا شي، اقل من الولاشي، بس مجرد انسانه الله انعم عليها من فظله، شالها من مكان وخلاها بمكان، مثل مازهراء تغيرت صدكوني انتو هم تكدرون تتغيرون، لان اهل البيت مستحيل يرجعون شخص جايهم من كل كلبه ❤️ صاحب الزمان ابو كلب الطيب، الحنون ، مستحيل يخيب انسان جايه من كل كلبه .. اتمسكوا بي ، والله العاقل هوه الي ميتركه طول عمره💙

دعواتكم 🙏🏻🍃
١٣/٣/٢٠١٩
منقول #لنتفطن