لحاج ياله وصل بلاصة غين كانو جوندارم ولاد وبنات الدوار مجموعين حتى بانليه شي وحدين شادين رودينا وهي كتنتر من إيديهم وكتغوت..
#عند رودينا من بعد ماداها داك ولد دوار لفين كاينة جوقة..
قلبي مامطمنيش وقالو راجل ومرتو ماتو وانا با ومي تعطلو تسلت لجوندارم ماشافونيش وانا نمشي نجري حتى كتبان ليا طوموبيلة با محطوطة ولبيبان محلولين، وقفت من جرا وركابيا فشلو وراسي داخ عليا وليت كنهز رجل ونسبقها قدام لوخري وبحالة كنمشي فووق شوك كل خطوة خنجر فقلبي كتغرس عرفت أش غانلقى ولكن مقدرتش نرجع لور حادني وصلت لقيتهم ياله كيغطيو فجثة ديال مي وانا نجهل ملي شفتها وغوت بحر جهدي...
انا: ميييي واميييي
بديت نجري غادة ليها وشدوني شي مرود وانا كنتنتر ونغوت ربي لي خلقني لاااا مييي بان ليا لحاج جاي يجري عندي...
الحاج: طلقوها طلقو لبنت بعدو منها...(شدني عنقني)
انا: با لحاج ماما غير سخفانة قوليهم يخليوني نمشي نفيقها...دوي معاهم الحاج
الحاج:أبنتي لبقاء لله غير صبري
انا:لا لا لا مايمكنش فين بابا
شفت فلحاج لقيتو كيشوف جيهت لغابة وهوما يبانو ليا جوندارم مجموعين فبلاصة خرى قبل مايدوي لحاج دفعتو وبديت كنجري لديك بلاصة، جوندارم حيت جيتهم على غفلة ماشدوني حتى كنت شفت لي شفتو... طحت على ركابية من المنضر لي شفت جالحاج كيجري ويتعكل وطيح ونود برك حدايا وعنقني... دموعي مبغاوش إهبطو كنحس براسي عافية شاعلة فقلبي..
انا: شش ششكون دار فيهم هاد لحالة
لحاج: أبنتي ياله عند ختك راها بوحدها
انا: (بنبرة حادة) شكووووون؟؟؟ شكووون دد دبح با هاكا شكووووووون (غوت حتى كاع ناس سكتو ودارو كيشوفو فيا)
لحاج: أبنتي معرفناش قالو شي قطاطعية
انا:شفارة؟؟ وعلاش يقتلوهم إشفروهم ومشيو.. علاش لقتيلة علااااش؟؟
لحاج:أبنتي ماماك جا أجلها من عند الله ماقتلوهاش وباااك..
انا:(قاطعتو) لا لا هوما لي قتلوها لخلعة لي قتلاتهاا ودبحو ليا بااااا
لحاج: أبنتي نوضي ياله نوضي ختك راه بوحدها...
انا:مغنمشي تاندي با ومي معايا
جوندارم:سيري ألالة بحالك راه غانديو باك لمشرحة
انا:عرفتو شكون قتلو؟؟
جوندارم:انا مسالي لك نتحتو
انا:قوليا غير إمتى مات عفاك(كتجر ليه فيدو) عفاك خليني نعنقو أخر مرة...
جوندارم:(دفعني طحت فالغيس) ق*** عليا من هنا
انا:لحاج نوضني عفاك ... عطيني سباطك عفاك
لحاج: (مزادش لهدرة معاها) اش بغيتي سباط أبنتي؟؟
انا: فيا لأعصاب أبا لحاج كون لقيت لي دارو فبا ومي هادشي ...ها أش غندير ليهم..
تلاحيت على داك جوندارم لي دفعني بزوج سبابط ديال لحاج كل فردة فيد وبركت نطنطن ليه راس وندرب بحر جهدي...
جوندارم:لكلبة لوخرى هادي راه اعتداء على موضف أثناء مزاولة عمله
انا:(شادة راسو بجوج سبابط وكنعض ليه فودنو) واللهما نمشي من هنا تانبرد فك غديدي..
تحماو عليا جوندارم شدوني وانا ندفع فيهم ونغوت جاتني هيستيريا وهو يجي شاف ديالهم عاود ليه لحاج أش وقع وهو يقوليهم طلقوني... وانا عيني باقي فداك لمردة لي باقي كيعاير غير سمعتو قال بنت لمسطية وتفكرت منضر مي مليوحة فلرض وانا نتلاح عليه بنتيف ولقميش ولعضاان .. عاودو شدوني بزز
شاف:هاديك ها واش باغة دوزي ليلة فسيلون؟؟
انا: يجبد مي ولا با عوتاني واللهتا نمشي عليه للحبس
شاف:لاحول ولاقوة إلا بالله ...الله يصبرك أبنتي..ونتا(كهدر مه لمردة) دوز ق*** مانشوفكش دور هنا...
رجعني لحاج لدار وخبر سومية لي دارت مندبة، أما انا مبقاوش بغاو إخرجو ليا دموع...من داك نهار وانا راس مالي غير ضحك ولعب باش كنبرد على راسي وعمرني نسيت والديا.. لقضية ديالهم تسدات والمتهمين بقاو مجهولين...
نرجعو لحاضر أو بالأحرى نهار قبل لعرس لي لكاوري فرتك ليهم
أنت تقرأ
كاوري في الدوار
Romanceقصة بطابع كوميدي... كاوري كيزور دوار بسيط فيه بنت هبيلة غاتخرج ليه لعقل... بسباب حادت بسيط غاتولي مكلفة بيه وتاهو غايلقاها سبة حيت فعلا هاد لبنت خلاتو نسا كلشي وكيعيش معاها مغامرات....
