🌟كاوري في الدوار🌟
🌛بارت:31🌜
خرجت من عند الحاج وراسي مطنطن تفكرت با ومي وعرس ختي قرب ضرني خاطري تمنيت كون كانو معانا وشوفو بنتهم عروسة...
أيمن: بستت
انا: جيتي عوتاني أش بغيتي؟؟
أيمن: غير لي بغا يدير خير بفف نساي صافي أنمشي بحالي..
أنا: أجي لهنا قول أش عندك..
أيمن: دوري معايا بعدا..
انا: مكتشبعش من فلوس..
أيمن: واسربي راه غايطيرو لك بيه...
انا: هاكة ياله دوي شكون غايطيرو بيه؟؟
أيمن: صقرامة ولكن هانية على وجه حبيبي ويل ليام
انا:(شنقت عليه هزيتو عندي) تاقول أش كاين؟!
أيمن: واخة واخة غير طلقي ونطلق تانا..
انا: تا أش غطلق رانا لي شاداك؟؟ واتا دوي..
أيمن: احم دابة كيشتي بنات الدوار كتعرفيهم مع لحيس لكابة لديك إحسان..
انا: سربي خلاص أشنو كاين..
أيمن: أوكي أوكي مهم متافقينن يتلاقاو لراجلك ونسيبك ديرين خطة ياتسخف إحسان ولا شي حاجة ولعبو عليه باش ياخدو شعرهم بزوج وسحرو ليهم ... ونزيدك سمعو خبار ختك غتزوج وناوين يسحرو ليها..
انا: بنات كلاب ليومة نريشهم ....ليوم يقراعو والله يامهم تاغايضامنو مع مرضى سرطان ليومة..
أيمن:هاد سرطان كنسمعو بزاف واش صعب من لحناش؟؟
انا:سير فحالك دابة راه لقرودة كلعبو ليا فوق راسي..(أيمن شاف فيها وشاف فراسها ورمش ياله غايدوي) سيير فحالك حسن لك طييير منشوفكش..
مشى أيمن بشوية عليه كيتمختر وداير ضحكة جنب عزيز عليه يشري صداع يموت فلمضاربات..
غادة ونقلب على بنات الدوار وهوما يبانو ليا مجمعات حدا دار مي التايكة، زربت فالمشية هزيت كمشة ديال حجر ومشيت ليهم .. غير شافوني جاية كحلو بلعما..
إحسان:(وقفات) اييه نتي تجي حدايا نعيط لجوندارم نديكلاري بك..
انا:(وقفت قدام دار مي التايكة) عيطي ليهم رانا وياهم ولينا صحاب..
بنت1:رودينا شناك ترافقتي مع لكاوري ونفختي ريشك..
بنت2:خليها متيقة راسها حتى تجيب كرش ومشي وخليها ديك ساعة نشوفو شكون ينفخ ريشو..
انا:ساليتو؟؟ (وانا نهز لحجر وبديت نشير عليهم هال قزيبة هال لفخاض هالمعاكل*رجلين* وكنعير) والله يامكم ونلقى شي وحدة ضور بالكور ياتانقبر مها ياكلبة منك ليها عينكم غير فلمزوج ... ايه يالالة ونشوف شي وحدة كتعنب ولا تقول سلام (بديت نشير بحجر كبير) تامن سلام لسمعتها داك هو نها لخر ليكم كلكم..
بنت: (كتنقز فبلاصتها كتخوي لحجر)ها حي علك واش بغيتي رجالة بزوج خلي لينا غير ويييحد
إحسان:(مخبية من مورة بنت) انا انا لي غاناخد لكاوري..
انا: والله يامكم وضورو بأي واحد فيهم تانعطب مكم(هزيت عصية ومشيت ليهم نضرب غير لرجلين) كاوري لي جا ليوم راه ديال فطيطيم هي لي شافتو لولة...لاخر راكم عافينو ديالي والله ونشوووف وحدة فيكم دور بيا ولا بختي ولا بفطيطيم...
بنات هربو بقات إحسان مخبية ياله غنشحطها وهو يشد ليا إيدي شي حد ضرت وانا نلقاه داك سام.. رجعت فيت الروح بعدا...إحسان هزات جلايلها وعطات رجليها لريح...
سام: ههههه نتي واللهتا علام
انا: خخخخ طلق طلق خلعتيني نسحبو داك خوك طيحتي فيا نص (سام كغمز فيها) ناري كون كان هنا كون نكدها عليا الله ينكدها عليه اووف جاب الله غير نتا..مالك نتا ضريف وخوك معقد...واه على تخنزيرات عندو يطيحو زرزور من فوق سور(سام ككحب وغمز فيها تسكت) أمالك ألعشير ياكما وحلات لك؟؟
سام: ككح كح موراك..
انا:(ضرت لقيت ويليام هاز حاجب وحاط لاخر) ههه بيلي زين ديال لكور ههه مشتكش ههه انا نمشي نشوف واش لغنم رجعت ولاواش دجاج قرق على لبيض(راجعة بلور)..
سام:(كضحك) واخويا راك قطعها فيها..
ويليام:(جرني من إيدي لعندو) واش نتي غير ضوري وضاربي؟؟
انا: والله ياخويا كنكون باااركة معليا مبيا كافية خيري شري عاتا كيجيو عندي..
ويليام: خويا؟؟ ايه انا خويا وهو لعشير؟!
سام: بعد من نسيبتي ونتا مدخل فيها رعب
انا:(تسليت من إيدو) انا مغنتزوجش غانبقا حياتي كلها بايرة عزيز عليا لحرية..
ويليام: بصح هي نمشيو نقلبو على ديك لبنت إحسان ياك سميتها؟!!
انا:(شنقت عليه نسييت سهييت) بربي تان..(عقت براسي) هههههه بربي تاعادي زعمة..
أيمن:(خرج من واحد لبنيقة) ويل ليام أجي انا نوريك فين كيكون لبنات مجموعين
انا:أيمن هههه (تحت سناني كنتحلف عليه)غانجي لمك غير بلاتي...
أيمن: باااز لوجهك عيني فيه يخ منو...
أنت تقرأ
كاوري في الدوار
Romanceقصة بطابع كوميدي... كاوري كيزور دوار بسيط فيه بنت هبيلة غاتخرج ليه لعقل... بسباب حادت بسيط غاتولي مكلفة بيه وتاهو غايلقاها سبة حيت فعلا هاد لبنت خلاتو نسا كلشي وكيعيش معاها مغامرات....
